Yu e aksi yusrefi: „Pe Yehovah de?”

„Den gowe farawe fu mi . . . Èn den no taki: ’Pe Yehovah de?’”​—YEREMIA 2:5, 6.

1. San sma kan abi na prakseri te den e aksi densrefi ’pe Gado de’?

„PE Gado de?” Furu sma e poti na aksi dati. Son sma wani sabi wán sani nomo fu wi Mekiman, namku, pe a de? Trawan poti na aksi disi baka di wan bigi rampu pasa noso baka di den kisi fu du nanga hebi problema. Den poti na aksi disi fu di den no man frustan fu san ede Gado no yepi den. Ma yu abi trawan tu di no e poti na aksi disi srefisrefi fu di den no wani bribi taki wan Gado de.​—Psalm 10:4.

2. Sortu sma suku èn feni Gado?

² A no de fu taki dati furu sma e si bun furu buweisi taki wan Gado de trutru (Psalm 19:1; 104:24). Gi sonwan fu den a nofo kaba fu abi wan fasi fu anbegi gado. Ma na ini ala kondre, milyunmilyun trawan abi dipi lobi gi san de tru èn disi ben meki taki den go suku a tru Gado. A muiti di den meki no de fu soso fu di Gado „no de fara fu ibriwan fu wi”.​—Tori fu den Apostel 17:26-28.

3. (a) Pe Gado e tan? (b) San na aksi fu Bijbel, „pe Yehovah de?”, wani taki?

³ Te wan sma feni Yehovah trutru, dan a e frustan taki „Gado na wan Yeye” di libisma no man si nanga den ai (Yohanes 4:24). Yesus ben taki fu a tru Gado leki „mi Tata di de na ini hemel”. San dati wani taki? Soleki fa Bijbel e sori, dan a wani taki dati a presi pe wi hemel Tata e tan de farawe fu wi, neleki fa a trutru hemel de farawe fu grontapu (Mateyus 12:50; Yesaya 63:15). Ma awinsi wi no man si Gado nanga wi ai, toku a e meki wi kon sabi en èn a e meki wi kon sabi furu sani di a abi na prakseri (Exodus 33:20; 34:6, 7). A e gi piki tapu den aksi fu reti-ati sma di wani sabi san na a marki fu a libi. Te a e go fu sani di abi fu du nanga wi libi, dan a e sori wi krin fa a e denki fu den sani disi. A e sori wi tu efu den sani di wi wani du, de akruderi san a abi na prakseri. A wani taki wi musu aksi en fu den sani disi èn a wani taki wi musu meki muiti trutru, so taki wi kan feni piki tapu den aksi di wi abi. Fu di a pipel fu owruten Israel no ben du disi, meki Yehovah ben krutu den nanga yepi fu a profeiti Yeremia. Den ben sabi a nen fu Gado, ma den no ben aksi: „Pe Yehovah de?” (Yeremia 2:6) Den no ben e broko den ede nanga san Yehovah ben abi na prakseri. Den no ben e suku a tiri fu en. Te yu musu teki bosroiti, awinsi na bigi bosroiti noso pikin bosroiti, dan a de so taki yu e aksi: „Pe Yehovah de?”

Den wan di ben e suku a tiri fu Gado

4. San wi kan leri fu na eksempre fu David te a ben e suku a tiri fu Yehovah?

⁴ Di David, a manpikin fu Isai, ben de wan yongu man ete, a kon kisi wan tranga bribi na ini Yehovah. A ben sabi Yehovah leki „a libi Gado”. David srefi ondrofeni fa Yehovah ben kibri en. Bribi nanga lobi gi „a nen fu Yehovah” ben pusu David fu kiri a bun bigi Filistiaman Goliat aladi a man disi ben abi furu fetisani na en (1 Samuel 17:26, 34-51). Ma a wini di David wini Goliat, no ben meki taki a ben frutrow tapu ensrefi. A no ben prakseri taki now, awinsi san a ben o du, Yehovah ben o blesi en. Na ini den yari baka dati, te David ben abi fu teki bosroiti, dan a ben e suku a tiri fu Yehovah ibri tron baka (1 Samuel 23:2; 30:8; 2 Samuel 2:1; 5:19). A tan begi: „Meki mi kon sabi den pasi fu yu, o Yehovah; leri mi den pasi fu yu.  Meki mi waka na ini yu waarheid èn leri mi, bika yu na mi Gado fu frulusu. A heri dei mi howpu tapu yu.” (Psalm 25:4, 5). Fu tru, disi na wan tumusi moi eksempre gi wi!

5, 6. Fa Yosafat ben suku Yehovah na difrenti ten na ini en libi?

⁵ Na ini den dei fu Kownu Yosafat, a di fu feifi kownu na ini a famirilin fu David, dan dri nâsi moksi kon na wan fu go feti nanga Yuda. Di Yosafat kisi fu du nanga a problema disi di ben abi fu du nanga a heri kondre, dan a „seti en fesi fu suku Yehovah” (2 Kroniki 20:1-3). Disi no ben de a fosi leisi di Yosafat ben suku Yehovah. A kownu ben drai baka gi a Bâal anbegi di ben lai na a noordsei kownukondre fu Israel pe sma ben fadon komoto na a tru anbegi. Tra fasi leki den sma dati, a kownu disi ben bosroiti fu waka a pasi fu Yehovah (2 Kroniki 17:3, 4). Sobun, now di Yosafat kon na ini a bigi problema disi, dan fa a „suku Yehovah”?

⁶ Na a muilek ten disi, Yosafat ben begi na fesi ala sma na Yerusalem. Na ini a begi disi, Yosafat sori taki a ben e memre a tumusi bigi krakti fu Yehovah. A ben denki dipi fu san Yehovah ben abi na prakseri di A puru den tra nâsi fu wan spesrutu kondre, so taki A ben man gi a kondre dati na Israel, soleki fa A ben pramisi. A kownu ben sabi taki a ben abi a yepi fu Yehovah fanowdu (2 Kroniki 20:6-12). Yehovah ben meki a kownu feni en na a okasi dati? Iya, a ben du dati. Nanga yepi fu a Leifisma Yahasièl, Yehovah sori soifri san ben musu pasa, èn a tra dei A meki En pipel wini a strei (2 Kroniki 20:14-28). Fa yu kan abi a dyaranti taki Yehovah sa meki yu feni en te yu e suku a rai fu en?

7. Den begi fu suma Gado e arki?

⁷ Yehovah no e teki nowan sma sei. A e gi sma fu ala nâsi a kari fu suku a tiri fu en na ini begi (Psalm 65:2; Tori fu den Apostel 10:34, 35). A sabi san de na ini na ati fu den wan di e begi en. A e gi wi a dyaranti taki a e arki den begi fu den regtfardikiwan (Odo 15:29). Te sma e suku a rai fu Yehovah nanga sakafasi, aladi fosi den no ben e poti prakseri na en, dan a e meki den sma disi feni en (Yesaya 65:1). A e arki den begi srefi fu den wan di no ben hori densrefi na a wet fu en, ma di abi trutru berow now èn di e aksi en fu a gi den pardon (Psalm 32:5, 6; Tori fu den Apostel 3:19). Ma te na ati fu wan sma no e gi yesi na Gado, dan den begi fu a sma dati de fu soso (Markus 7:6, 7). Luku wan tu eksempre.

Den aksi ma den no kisi

8. Fu san ede Yehovah no ben arki den begi fu Kownu Saul?

⁸ Baka di a profeiti Samuel taigi Kownu Saul taki Gado ben drai baka gi en fu di a ben trangayesi, dan Saul srefi go didon langalanga na tapu a gron fu begi Yehovah (1 Samuel 15:30, 31). Ma na soso sma ai sani Saul ben du. Saul no ben du disi fu di a ben wani gi yesi na Gado, ma a ben du disi fu di a ben wani kisi grani na fesi a pipel. Bakaten, di den Filistiasma go feti nanga Israel, dan Saul ben du neleki a ben suku a tiri fu Yehovah. Ma di a no kisi nowan piki, dan a go suku rai na wan sma di ben e wroko nanga ogri yeye, aladi a ben sabi taki Yehovah no ben lobi a sani disi kwetikweti (Deuteronomium 18:10-12; 1 Samuel 28:6, 7). Fu taki en syatu, 1 Kroniki 10:14 e taki  disi fu Saul: „A no ben suku Yehovah.” Fu san ede? Fu di Saul no ben e begi nanga bribi. Dati meki a ben de neleki a no ben begi kwetikweti.

9. San ben fowtu na a fasi fa Sedekia begi Yehovah fu tiri en?

⁹ Na so a ben de tu na a ten di a kownukondre fu Yuda ben o kisi pori. Na a ten dati furu sma ben e begi Yehovah èn den ben e suku rai na den profeiti fu en. Ma den sma ben e moksi afkodrei nanga a tru anbegi, aladi den ben e taki dati den e anbegi Yehovah (Sefanya 1:4-6). Aladi den ben e du neleki den ben e suku a tiri fu Gado, toku den no ben sreka den ati fu du a wani fu en. Kownu Sedekia ben begi Yeremia fu suku Yehovah gi en. Yehovah ben taigi a kownu kaba san a ben musu du. Ma fu di a kownu no ben abi bribi èn fu di a ben e frede libisma, meki a no gi yesi na a sten fu Yehovah, èn Yehovah gi en wan piki di a no ben lobi kwetikweti.​—Yeremia 21:1-12; 38:14-19.

10. San fowtu na a fasi fa Yohanan suku a tiri fu Yehovah, èn san wi e leri fu a fowtu di a meki?

¹⁰ Baka di Yerusalem kisi pori èn baka di a legre fu Babylon gowe nanga den Dyu katiboman, dan Yohanan sreka sani fu tyari a pikin grupu fu Dyu di ben tan na ini Yuda ete, go na Egepte. Den ben sreka ala sani kaba, ma fosi den gowe, den aksi Yeremia fu begi Yehovah gi den fu aksi en san den ben musu du. Ma aladi den no kisi a piki di den ben wani, toku den du san den ben abi na prakseri (Yeremia 41:16–43:7). Yu denki taki yu kan leri wan tu sani fu den tori disi so taki te yu e suku a fesi fu Yehovah, a sa meki yu feni en?

„Tan ondrosuku”

11. Fu san ede wi musu du san Efeisesma 5:10 e taki?

¹¹ A tru anbegi wani taki moro leki fu teki dopu, fu go na gemeente konmakandra èn fu du a preikiwroko. A tru anbegi abi fu du nanga a heri fasi fa wi e libi. Ibri dei wi e kisi tesi, son leisi den e kon na wan triki fasi, son leisi den de krin fu si. Den tesi disi kan puru wi fu a dini di wi e dini Gado. Fa wi sa du nanga den tesi disi? Di na apostel Paulus skrifi wan brifi gi den getrow Kresten na ini Efeise, dan a gi den a deki-ati disi: „Unu musu tan ondrosuku fu kon sabi san e plisi Masra” (Efeisesma 5:10). Wi kan kisi a koni fu man du disi te wi e luku den furu tori di skrifi na ini den Buku fu Bijbel.

12. Fu san ede Yehovah no ben lobi en srefisrefi di David ben meki den tyari na ark fu a frubontu go na Yerusalem?

¹² Di den tyari na ark fu a frubontu kon na ini Israel baka, dan a ben tan na ini a foto Kiriat-yearim sowan seibitenti yari langa. Baka dati, Kownu David ben wani fu den tyari na ark go na Yerusalem. A ben suku rai na den edeman fu a pipel èn a taki dati den ben kan tyari na Ark go na Yerusalem ’efu den ben o feni en bun èn efu Yehovah ben o feni en bun’. Ma David no ben ondrosuku finifini san ben de a wani fu Yehovah ini a tori disi. Efu a ben du so, dan noiti den no ben o poti na Ark na tapu wan wagi. Den Kehatsma fu a lo fu Leifi ben o tyari na Ark na tapu den skowru, soleki fa Yehovah ben gi a komando. Aladi David ben suku a tiri fu Yehovah furu tron, toku na okasi disi a no ben suku Yehovah na wan fasi di fiti. A bakapisi ben takru srefisrefi. Bakaten David srefi ben taki: „Yehovah wi Gado broko kon na wi tapu, fu di wi no ben suku en soleki fa wi  ben gwenti fu du.”​—1 Kroniki 13:1-3; 15:11-13; Numeri 4:4-6, 15; 7:1-9.

13. Sortu deki-ati wi e kisi fu wan singi di den ben singi di den ben tyari na Ark go na Yerusalem?

¹³ Te fu kaba, di den Leifisma tyari na Ark fu na oso fu Obed-edom go na Yerusalem, dan den singi wan singi di David ben meki. A singi disi abi wan moi pisi na ini di e gi wi a deki-ati disi: „Suku Yehovah nanga a krakti fu en, suku en fesi doronomo. Memre den tumusi moi sani di a du, den wondru fu en nanga den krutubosroiti fu en mofo.”​—1 Kroniki 16:11, 12.

14. Fa wi kan kisi wini fu a bun eksempre fu Salomo èn fu den fowtu di a ben meki na ini en libi bakaten?

¹⁴ Fosi David dede, a gi en manpikin Salomo a rai disi: „Efu yu e suku [Yehovah], dan a sa meki yu feni en” (1 Kroniki 28:9). Di Salomo tron kownu, a go na Gibeon pe a tenti fu konmakandra ben de, èn a tyari wan srakti-ofrandi gi Yehovah. Drape Yehovah taigi Salomo: „Aksi mi! San mi sa gi yu?” Leki piki tapu na aksi fu Salomo, Yehovah gi en furu koni nanga sabi, so taki a ben sa krutu Israel na wan bun fasi. Boiti dati, Yehovah gi Salomo furu gudu nanga grani sosrefi (2 Kroniki 1:3-12). Baka di David sori Salomo fa Yehovah ben wani taki a tempel ben musu bow, dan Salomo bow wan kefalek moi tempel. Ma na ini afersi di ben abi fu du nanga en trowlibi, Salomo no ben suku a tiri fu Yehovah. Salomo trow nanga uma di no ben e anbegi Yehovah. Bakaten, den uma disi ben meki na ati fu Salomo drai baka gi Yehovah (1 Kownu 11:1-10). Awinsi o prenspari wi de, awinsi o koni wi de, èn awinsi a gersi leki wi abi furu sabi, toku a de prenspari fu „tan ondrosuku fu kon sabi san e plisi Masra”!

15. Di na Etiopiaman Sera kon feti nanga Yuda, dan fu san ede Asa ben man begi Yehovah nanga a frutrow taki A ben o frulusu den?

¹⁵ Wi man si taki a de tumusi prenspari fu „tan ondrosuku fu kon sabi san e plisi Masra”, te wi e luku san pasa na ini a pisi ten di Asa, wan bakapikin fu kownu Salomo, ben de kownu fu Yuda. Erfu yari baka di Asa tron kownu, dan na Etiopiaman Sera tyari wan legre fu wán milyun man fu go feti nanga Yuda. Yehovah ben o frulusu Yuda? Sowan 500 yari na fesi, Yehovah ben sori en pipel krin san ben o pasa nanga den efu den ben o arki en èn hori den komando fu en, èn san ben o pasa nanga den efu den ben o trangayesi en (Deuteronomium 28:1, 7, 15, 25). Di Asa bigin tiri, dan a puru ala altari nanga postu di sma ben e gebroiki fu anbegi falsi gado na ini Yuda. A ben gi a pipel deki-ati fu „suku Yehovah”. Asa no ben wakti fu du disi teleki problema ben o kon. Sobun, fu di Asa ben e bribi na ini Yehovah, meki a ben man aksi Yehovah na ini begi fu yepi den. San ben de a bakapisi? Yuda ben wini a strei krinkrin.​—2 Kroniki 14:2-12.

16, 17. (a) Na sortu sani Yehovah ben memre Asa, aladi a ben wini a strei? (b) Sortu yepi Asa kisi baka di a ben handri na wan don fasi, ma san a ben du di a kisi yepi? (c) San wi kan leri fu a fasi fa Asa ben tyari ensrefi?

¹⁶ Ma toku, di Asa drai kon baka fu a feti di a ben wini, dan Yehovah seni Asaria fu go miti a kownu èn fu taigi en: „Arki mi, o Asa èn un alamala fu Yuda nanga Benyamin! Yehovah de nanga unu solanga leki unu sa sori fu de nanga en; èn efu unu suku en, a sa meki unu feni en, ma efu unu gowe libi en, dan ensrefi sa gowe libi unu tu” (2 Kroniki 15:2). Baka dati, Asa kisi moro faya gi a tru anbegi. Ma 24 yari na baka, di den ben abi fu go feti baka, dan Asa no ben suku Yehovah. A no ben suku rai na ini a Wortu fu Gado, èn a no ben memre san Yehovah ben du di a legre fu Etiopia ben kon feti nanga Yuda. Na wan don fasi a meki wan frubontu nanga Siria.​—2 Kroniki 16:1-6.

¹⁷ Fu di a ben du disi, meki Yehovah seni a profeiti Hanani fu piri-ai gi Asa. Hanani sori Asa fa Yehovah ben e si a tori èn srefi na a momenti dati, Asa ben man kisi yepi ete. Ma na presi fu suku Yehovah, Asa atibron èn a meki den poti Hanani na ini dungru-oso pe den ben sroto en na ini wan blok (2 Kroniki 16:7-10). Dati na wan sari tori fu tru! Ma fa a de nanga wi? A de so taki wi e suku Gado, ma bakaten wi no wani teki a rai fu en? A kan taki wan  owruman di e broko en ede nanga wi, e gebroiki Bijbel fu gi wi rai fu di safrisafri wi e moksi wisrefi nanga a grontapu. A de so taki wi de nanga tangi te wi kisi yepi na wan lobi-ati fasi so taki wi kan sabi „san e plisi Masra”?

No frigiti fu aksi: „Pe Yehovah de?”

18. San wi kan leri fu den sani di Elihu taigi Yob?

¹⁸ Srefi wan sma di abi wan bun nen fu di a e dini Yehovah na wan getrow fasi, kan du sani di no e plisi Yehovah te problema e miti en. Di wan kefalek takru siki ben e moro Yob, di a lasi en pikin nanga ala en gudu, èn di den mati fu en no ben krutu en na wan bun fasi, dan Yob bigin poti prakseri na ensrefi wawan. Elihu ben memre en: „Nowan sma no taki: ’Pe Gado, mi Gran Mekiman de?’” (Yob 35:10) Yob ben musu poti prakseri na Yehovah èn a ben musu luku fa Yehovah ben e si a situwâsi disi. Nanga sakafasi Yob teki a rai, èn na eksempre fu en kan yepi wi fu du a srefi tu.

19. San den Israelsma no ben du furu tron?

¹⁹ Den Israelsma ben sabi ala den tori fu fositen fa Gado ben handri nanga a nâsi fu den. Ma furu tron, den no ben memre san Gado ben du gi den na ini spesrutu situwâsi na ini den libi (Yeremia 2:5, 6, 8). Te den ben abi fu teki bosroiti na ini den libi, dan na presi taki den ben aksi: „Pe Yehovah de?”, den ben suku fu kisi wini gi densrefi nomo.​—Yesaya 5:11, 12.

Tan aksi: „Pe Yehovah de?”

20, 21. (a) Na ini a ten disi, suma sori fu abi a srefi yeye neleki Elisa fu di den e suku a tiri fu Yehovah? (b) Fa wi kan sori a srefi bribi neleki den èn san wi kan leri fu na eksempre fu den?

²⁰ Di a wroko fu Elia ben kon na wan kaba, dan Elisa, a futuboi fu en, teki a profeiti krosi di ben fadon komoto na Elia. Nanga a krosi, Elisa go na a Yordanliba, a naki tapu a watra, èn a aksi: „Pe Yehovah de, iya En, a Gado fu Elia?” (2 Kownu 2:14). Yehovah gi piki fu di a sori taki now a yeye fu en ben de tapu Elisa. San wi kan leri fu disi?

²¹ Na ini a ten disi, a srefi sortu sani pasa.  Wan tu salfu Kresten di ben e teki fesi na ini a preikiwroko, ben kon lasi libi. Den sma di kisi a wroko fu den, ondrosuku den Buku fu Bijbel, èn den begi Yehovah fu tiri den. Ibri tron baka den e aksi: „Pe Yehovah de?” Leki bakapisi fu dati, Yehovah tan tiri en pipel èn a wroko fu den tan go na fesi. Wi abi a srefi bribi neleki den? (Hebrewsma 13:7) Efu wi abi a srefi bribi, dan wi sa tan krosibei fu na organisâsi fu Yehovah, wi sa gi yesi na den rai fu en, èn wi sa teki prati fayafaya na a wroko di e du na ondro a tiri fu Yesus Krestes.​—Sakaria 8:23.

San yu ben sa piki?

• Nanga sortu sani na prakseri wi musu aksi: „Pe Yehovah de?”

• Na ini a ten disi, fa wi kan kisi piki tapu na aksi: „Pe Yehovah de?”

• Fu san ede Gado no e piki te son sma e suku a tiri fu en?

• Sortu eksempre fu Bijbel e sori taki a de prenspari fu „tan ondrosuku fu kon sabi san e plisi Masra”?

[Aksi fu a tori disi]

[Prenki na tapu bladzijde 9]

Fa Kownu Yosafat ben suku Yehovah?

[Prenki na tapu bladzijde 10]

Fu san ede Saul ben go na wan sma di e wroko nanga ogri yeye?

[Prenki na tapu bladzijde 12]

Studeri, begi, èn denki dipi fu kon sabi ’pe Yehovah de’