Aksi fu leisiman

A Waktitoren fu 1 april 2002 e taki na tapu bladzijde 11, paragraaf 7, dati a dopu na ini watra fu den nyun Dyu bribiman na a Pinksterfesa fu 33 G.T. ben wani taki dati „den gi densrefi abra na Gado nanga yepi fu Krestes”. Fu san ede A Waktitoren taki disi, aladi wi ben e bribi fosi taki a dopu fu den Dyu na a pisi ten fu 33 G.T. te go miti 36 G.T. no ben wani taki dati den ben musu gi densrefi abra na Gado nanga yepi fu Krestes?

Na ini 1513 b.G.T., Yehovah Gado gi den Israelsma na okasi fu tron a santa nâsi fu en, èn den ben o tan en santa nâsi solanga den ben ’gi yesi soifri na en sten èn trutru ben o hori en frubontu’. Den piki: „Ala sani di Yehovah taki, wi wani fu du.”​—Exodus 19:3-8; 24:1-8.

Den Israelsma gi densrefi abra na Gado fu di den agri fu libi akruderi a Wetfrubontu fu Moses. Den Dyu geslakti di ben kon baka dati, ben gebore na ini wan nâsi di ben gi ensrefi abra na Gado. Ma a dopu fu den Dyu di tron bakaman fu Yesus Krestes sensi a Pinksterfesa fu 33 G.T., ben wani taki moro leki fu pristeri densrefi na Gado leki memre fu wan nâsi di gi ensrefi abra na Gado. A ben wani taki dati den gi densrefi abra na Yehovah Gado fu di den kisi wan nyun banti nanga En nanga yepi fu Yesus Krestes. Fa so?

Sowan 120 disipel ben kisi santa yeye na ini wan tapusei kamra ini Yerusalem na a Pinksterfesa fu 33 G.T. Baka dati, na apostel Petrus opo tanapu èn a bigin preiki gi den furu Dyu nanga proselietsma di ben kon makandra fu luku san ben pasa. Baka di Petrus gi wan finifini kotoigi, dan den sani di a ben taki naki na ati fu den Dyu. Petrus taigi den: „Abi berow, èn meki ibriwan fu unu teki dopu na ini a nen fu Yesus Krestes fu kisi pardon fu den sondu fu unu.” A deki-ati di Petrus gi den, ben meki taki „den sma di ben teki a wortu fu en nanga prisiri, teki dopu, èn a dei dati sowan dri dusun tra sma tron bribiman”.​—Tori fu den Apostel 2:1-41.

Den Dyu di ben teki dopu baka a deki-ati fu Petrus, no ben de memre fu wan nâsi di ben gi ensrefi abra na Gado kaba? Den no ben abi wan banti nanga Gado kaba fu di den ben gi densrefi abra na en? Nôno. Na apostel Paulus ben skrifi taki ’Gado ben puru a wet na pasi fu di a ben spikri en na a pina-udu’ (Kolosesma 2:14). Nanga yepi fu a dede fu Krestes na ini 33 G.T., Yehovah Gado puru a Wetfrubontu di ben meki den Israelsma abi wan banti nanga En fu di den gi densrefi abra na en. Ma now, Gado ben weigri fu teki a nâsi di no ben wani teki a Manpikin fu En. ’Den  sma di ben de Israel na skin fasi’ no man taki moro dati den de wan nâsi di gi ensrefi abra na Gado.​—1 Korentesma 10:18; Mateyus 21:43.

A Wetfrubontu ben kon na wan kaba na ini 33 G.T., ma Gado ben sori bun-ati gi den Dyu èn a ben tan poti prakseri na den ete. * A tan du disi teleki 36 G.T., di Petrus ben preiki gi na Italiaman Kornelius nanga en osofamiri di ben e frede Gado èn a ben preiki gi tra heiden sma sosrefi (Tori fu den Apostel 10:1-48). Fu san ede tra sma kisi a bun-ati fu Gado sosrefi?

„[A Mesias] musu meki a frubontu wroko wán wiki langa gi den furu sma”, na so Danièl 9:27 e taki. A frubontu di ben abi krakti seibi yari langa, noso „wán wiki”, ben de a frubontu di ben sroto nanga Abraham. A frubontu disi bigin nanga a dopu fu Yesus èn nanga a bigin fu a diniwroko fu a Mesias na ini 29 G.T. Efu wan sma ben wani de na ini a frubontu disi, dan a wan-enkri sani di ben de fanowdu na taki a ben musu de wan Hebrew bakapikin fu Abraham. Yehovah wawan ben e hori ensrefi na a frubontu disi. A no ben de wan frubontu , di meki taki wan sma abi wan banti nanga Yehovah soso fu di a ben gi en ensrefi abra na En. Sobun, awansi den Dyu ben de fu wan spesrutu nasi, toku den Dyu bribiman di teki dopu baka di Petrus taki na a Pinksterfesa fu 33 G.T., no ben man taki dati den ben abi wan banti nanga Yehovah fu di a Wetfrubontu ben kon na wan kaba. Ibri Dyu bribiman ben abi fu sori taki den gi densrefi abra na Gado.

Ma ete wan prenspari reide de fu san ede a ben de fanowdu taki den Dyu nanga den proselietsma ben musu gi densrefi abra na Gado èn ben musu teki dopu na a dei fu Pinksterfesa 33 G.T. Na apostel Petrus ben gi den arkiman fu en deki-ati fu abi berow èn fu dopu na ini a nen fu Yesus. Te den ben o du disi, dan den ben o sori taki den drai baka gi a fasi fu grontapu. Den ben o sori tu taki den teki Yesus leki Masra èn leki Mesias, leki Gran Priester, èn sosrefi leki a sma di e sidon na a leti-anusei fu Gado na ini hemel. Efu den ben wani begi Yehovah fu frulusu den, dan den ben abi fu begi nanga yepi fu Krestes Yesus. Disi ben wani taki dati den ben musu bribi na ini Krestes èn den ben musu si en leki a Fesiman fu den. Now, a heri fasi fa den ben abi wan banti nanga Gado èn a heri fasi fa den ben kisi pardon fu den sondu, ben kenki. Ibri Dyu bribiman aparti, ben abi fu teki a seti disi. Fa den ben o du disi? Den ben o du disi te den ben gi densrefi abra na Gado èn te den ben sori disi na publiki fu di den ben o teki dopu na ini watra, na ini a nen fu Yesus Krestes. A dopu na ini watra ben sori taki den ben gi densrefi abra na Gado èn disi ben meki taki den ben kisi wan nyun banti nanga Gado nanga yepi fu Yesus Krestes.​—Tori fu den Apostel 2:21, 33-36; 3:19-23.

[Futuwortu]