Den prenspari tori di Noa skrifi

NA ONDROSUKUMAN Richard E. Byrd ben go na a presi Antartika feifi leisi na ini a pisi ten fu 1928 te nanga 1956. A ben abi wan buku pe a ben e skrifi san a ben ondrofeni na a ten dati. Na ini tra buku a ben e skrifi soifri sortu prenspari sani ben pasa ibri dei te a ben go na Antartika nanga opolani. Na so fasi, en nanga den tra ondrosukuman ben man sabi fa a winti ben wai, den ben man meki karta, èn den ben man kon sabi bun furu sani tu fu a pisi kontren Antartika.

Den ondrosuku di Byrd ben du e sori taki a warti srefisrefi te sma e skrifi wan buku pe den e fruteri finifini fa sani e waka te den de tapu se, noso te den e go na wan presi nanga opolani. Bakaten, den kan gebroiki den sortu buku disi fu luku baka san ben pasa, noso den kan ondrosuku sani di den kan gebroiki bun wan tra leisi.

Den Buku fu Bijbel e fruteri na wan kefalek moi fasi fu a Frudu di ben kon na ini a ten fu Noa. A Frudu dati ben tapu heri grontapu moro leki wán yari. Bifo a Frudu ben kon, dan Noa, en wefi, den dri manpikin fu den, nanga den wefi fu den, ben wroko sowan 50 noso 60 yari langa fu bow wan ark. Na ark disi ben bigi srefisrefi. A ben langa sowan 133 meter, a ben bradi sowan 22 meter, èn a ben hei sowan 13 meter. Fu san ede den ben musu bow wan ark? Den ben musu du dati fu kibri a libi fu wan tu sma nanga meti te a Frudu ben o kon.​—Genesis 7:1-3.

Te yu luku en bun, dan wi kan taki dati wan pisi na ini a Bijbel buku Genesis de leki wan buku pe Noa skrifi den prenspari sani di pasa sensi a bigin fu a Frudu te na a ten di en nanga en famiri komoto fu na ark. Sortu prenspari sani wi kan leri fu a buku disi na ini a ten fu wi?