Den tori di Noa skrifi de prenspari gi wi?

DI YESUS ben taki a profeititori di abi fu du nanga a marki fu en denoya èn fu a kaba fu a seti fu sani disi, a ben taki: „Neleki fa sani ben de na ini a ten fu Noa, na so a denoya fu a Manpikin fu libisma o de” (Mateyus 24:3, 37). A de krin, taki Yesus ben taki na fesi dati den sani di e pasa na ini a ten fu wi de a srefi leki di fu a ten fu Noa. Efu wan tori ben de di e sori soifri sortu sani ben pasa na ini a ten fu Noa, dan dati kan yepi wi trutru fu frustan sani moro bun.

Den sani di Noa skrifi kan meki wi kon frustan sani moro bun? Den sani di a skrifi e sori soifri fa sani ben pasa na ini owruten? Wi kan kon sabi trutru o ten a Frudu ben kon?

O ten a Frudu ben kon?

Bijbel e fruteri wi fa sani ben waka trutru èn o ten den sani ben pasa. Disi e meki taki wi man teri a ten go baka te na a bigin di Gado ben meki libisma. Na ini Genesis 5:1-29, wi e feni a tori di e sori suma na den famiri di ben e libi sensi a ten di Gado ben meki a fosi man, Adam, te na a ten di Noa ben gebore. A Frudu ben bigin „na ini a di fu siksi hondro yari fu a libi fu Noa”.​—Genesis 7:11.

Efu wi wani sabi o ten a Frudu ben kon, dan wi musu suku wan prenspari yari fu pe wi kan bigin teri. Disi wani taki dati wi musu bigin teri fu wan yari di sma e si leki wan prenspari yari na ini historia. A yari disi musu abi fu du sosrefi nanga wan spesrutu sani di ben pasa na ini Bijbel historia. Te wi e bigin teri fu so wan prenspari yari, dan wi kan sori tapu a kalender di sma e gebroiki na ini a ten disi sortu pisi ten a Frudu ben kon.

Wan prenspari yari na 539 b.G.T., a yari di Kownu Sirus fu Persia ben teki Babilon abra. Sma soleki Diodorus, Afrikanus, Eusebius, nanga Ptolemeus, ben skrifi sani fu Babilon na tapu ston èn na tapu papira di e sori o ten a kownu disi ben e tiri. Wan komando di Sirus ben gi, ben meki taki wan Dyu fikapisi gowe libi Babilon èn den doro na a mamakondre fu den na ini 537 b.G.T. Na ini a yari dati, wan kaba ben kon na den 70 yari di a kondre Yuda ben tan leki wan brokopresi. Soleki fa Bijbel e sori, dan a pori disi ben kon na ini 607 b.G.T. Te wi e teri a pisi ten di den krutuman ben e tiri, èn sosrefi ala den yari di den kownu fu Israel ben e tiri, dan wi kan taki dati den Israelsma ben komoto fu Egepte na ini 1513 b.G.T. Bijbel e sori taki 430 yari fosi dati, Gado ben meki wan frubontu nanga Abraham na ini 1943 b.G.T. Boiti dati, wi musu luku o ten Tera, Nahor, Serug, Rehu, Peleg, Heber, Sela, nanga Arpaksad, ben gebore èn o langa den ben libi. Arpaksad ben gebore „tu yari baka a frudu” (Genesis 11:10-32). Na so fasi, wi kan taki dati a Frudu ben bigin na ini a yari 2370 b.G.T. *

A Frudu e bigin

Bifo wi e luku sortu sani ben pasa na ini a ten fu Noa, dan grantangi leisi Genesis kapitel 7 vers 11 te nanga kapitel 8 vers 4. Bijbel e taki disi fu a bigi alen di ben fadon: „Na ini a di fu siksi hondro yari fu a libi fu Noa, na ini a di fu tu mun, tapu a di fu tinaseibi dei fu a mun, tapu a dei disi ala den fonten fu bigi watra na loktu broko opo èn den sroisi fu hemel opo.”​—Genesis 7:11.

Noa ben prati a yari na ini 12 mun fu 30 dei. Na ini owruten, a fosi mun fu a yari ben bigin mindri fu a mun september tapu a kalender fu wi. A Frudu ben kon na ini „a di fu tu mun, tapu  a di fu tinaseibi dei fu a mun” èn alen ben tan fadon 40 dei nanga 40 neti na ini den mun november nanga december 2370 b.G.T.

Bijbel e fruteri wi disi tu fu a Frudu: „Den watra ben tapu grontapu wan hondro nanga feifitenti dei. . . . Dan den watra na grontapu bigin saka, safrisafri den ben e saka; èn na a kaba fu den wan hondro nanga feifitenti dei, den watra saka gowe. Èn na ini a di fu seibi mun, tapu a di fu tinaseibi dei fu a mun, na ark kon fasi na tapu den bergi fu Ararat” (Genesis 7:24–8:4). Sobun, a pisi ten di den watra ben tapu grontapu te na a ten di den watra saka ben de 150 dei noso feifi mun. Sobun, baka dati na ark ben kon fasi na tapu den bergi fu Ararat na ini april 2369 b.G.T.

Now, grantangi leisi Genesis 8:5-17. Den ede fu den bergi ben de fu si baka tu nanga afu mun, „na ini a di fu tin mun [yuni], tapu a fosi dei fu a mun” (Genesis 8:5). * Dri mun (90 dei) baka dati, tapu „a fosi dei fu a fosi mun fu a yari di Noa ben tapu siksi hondro nanga wán yari”, noso mindri fu a mun september 2369 b.G.T., dan Noa puru a sani di ben tapu na ark. Na so fasi a ben man si taki „grontapu ben kon drei” (Genesis 8:13). Wán mun nanga 27 dei (57 dei) baka dati, „na ini a di fu tu mun, tapu a di fu twenti na seibi dei fu a mun [mindri fu a mun november 2369 b.G.T.], dan a gron ben drei krinkrin”. Na a ten dati, Noa nanga en osofamiri ben komoto fu na ark èn den ben kan tanapu na tapu drei gron. Sobun, Noa nanga den trawan ben tan wan heri yari nanga tin dei (370 dei) na ini na ark.​—Genesis 8:14.

Den tori disi e fruteri wi soifri sortu sani pasa, fa den sani pasa èn o ten den pasa. San disi e sori wi? Disi e sori taki a Hebrew profeiti Moses no ben fruteri anansitori, ma a ben taki fu sani di pasa trutru. Soleki fa a sori, dan den sani di Moses ben gebroiki fu skrifi a buku Genesis, na tori di trawan skrifi fu sani di pasa. Fu dati ede a tori fu a Frudu na wan tumusi prenspari sani gi wi na ini a ten disi.

 Fa tra Bijbel skrifiman ben si a Frudu?

Boiti a buku Genesis, tra Bijbel buku sosrefi e taki fu Noa noso a Frudu. Luku wan tu eksempre:

(1) Di na ondrosukuman Esra ben skrifi den nen fu ala den famiri fu a nâsi Israel, dan a ben skrifi den nen sosrefi fu Noa nanga den manpikin fu en (Sem, Kam, nanga Yafet).​—1 Kroniki 1:4-17.

(2) Lukas, di ben de wan datra nanga wan Evangelie skrifiman, ben kari a nen fu Noa leki wan fu den fositen tata fu Yesus Krestes.​—Lukas 3:36.

(3) Na apostel Petrus ben taki moro leki wán leisi fu a Frudu di a ben e skrifi wan brifi go na den Kresten brada nanga sisa fu en.​—2 Petrus 2:5; 3:5, 6.

(4) Na apostel Paulus ben taki fu a tranga bribi di Noa ben sori di a ben e bow na ark fu frulusu en osofamiri.​—Hebrewsma 11:7.

Den skrifiman disi di ben skrifi Bijbel ondro a krakti fu santa yeye, ben bribi a tori fu a Frudu na ini Genesis? A de krin taki den ben si a Frudu leki wan sani di pasa trutru.

Yesus nanga a Frudu

Yesus Krestes ben libi kaba bifo a ben tron wan libisma (Odo 8:30, 31). A ben de wan engel na ini hemel na a ten fu a Frudu. Yesus ben si ala sani nanga en eigi ai, èn fu dati ede en na a moro bun sma fu taigi wi nanga yepi fu Bijbel efu Noa ben de wan trutru sma èn efu a Frudu ben pasa trutru. Yesus ben taki: „Neleki fa sani ben de na ini a ten fu Noa, na so a denoya fu a Manpikin fu libisma o de. Bika na ini a ten dati  bifo a frudu, sma ben nyan, den ben dringi, man ben trow èn sma ben gi umasma fu trow, teleki a dei doro di Noa go na ini na ark, ma den no ben poti prakseri na san ben pasa, teleki a frudu kon èn a wai den alamala puru; na so a denoya fu a Manpikin fu libisma o de tu.”​—Mateyus 24:37-39.

A de so taki Yesus ben o gebroiki wan anansitori fu warskow wi gi a kaba fu a seti fu sani disi? A no ben o du dati kwetikweti! Wi de seiker taki a ben gebroiki wan eksempre di e sori krin taki Gado ben krutu den ogriwan trutru. Iya, furu sma ben lasi den libi, ma a de wan trowstu gi wi fu sabi taki Gado ben frulusu Noa nanga en osofamiri komoto fu a Frudu.

„Den dei fu Noa” de prenspari srefisrefi gi den wan di e libi now, na ini „a denoya fu a Manpikin fu libisma”, Yesus Krestes. Te wi e leisi den finifini tori fu a bigi Frudu di Noa ben skrifi fu en, dan wi kan de seiker taki a de wan buku di e fruteri soifri fa sani ben pasa trutru na ini owruten. Boiti dati, a tori fu a Frudu di Gado meki sma skrifi na ini a buku Genesis, de tumusi prenspari gi wi. Soleki fa Noa, den manpikin fu en, nanga den wefi fu den ben poti bribi ini a sani di Gado ben gebroiki fu frulusu den, na so wi kan kisi kibri fu Yehovah tu na ini a ten disi te wi e poti bribi na ini a frulusu-ofrandi fu Yesus (Mateyus 20:28). Boiti dati, wi kan abi a howpu fu de na mindri den sma di o pasa a pori fu na ogri grontapu disi. Wi kan abi a howpu dati, bika soleki fa den tori di Noa skrifi e sori, dan Noa nanga en osofamiri ben pasa a Frudu di ben pori na ogri grontapu fu a ten dati.

[Futuwortu]

[Faki na tapu bladzijde 5]

Sma ben libi so langa trutru?

„NA SO a libimarki fu Noa ben de neigi hondro nanga feifitenti yari, dan a dede”, na so Bijbel e taki (Genesis 9:29). Metusala, a granpapa fu Noa, ben libi 969 yari. En ben de a wan-enkri libisma di ben libi so langa, soleki fa skrifi na ini Bijbel. Ibriwan fu den tin bakapikin fu Adam di ben e libi na ini a pisi ten fu Adam te nanga Noa ben e libi pikinso moro leki 850 yari (Genesis 5:5-31). A de so taki sma ben libi so langa na ini a ten dati?

Sensi a bigin, Gado ben wani taki libisma e libi fu têgo. Di Gado ben meki a fosi libisma, Adam, dan a ben gi Adam na okasi fu libi sondro fu dede, ma a ben musu gi yesi na Gado (Genesis 2:15-17). Adam no ben gi yesi èn na so fasi a ben lasi na okasi fu libi fu têgo. Adam ben libi 930 yari, ma na ini a pisi ten dati a ben e dede gowe safrisafri teleki a drai go baka na a gron fu pe Gado ben teki en (Genesis 3:19; 5:5). A fosi man disi ben meki taki den bakapikin fu en kisi sondu, èn den e dede leki bakapisi fu dati.​—Romesma 5:12.

Toku a de so taki den sma di ben e libi na a pisi ten dati, ben de moro krosibei fu a volmaakti libi di Adam ben abi fosi. Soleki fa a sori, dan na fu dati ede den ben e libi moro langa leki den sma di gebore bakaten. Dati meki furu sma di ben e libi bifo a Frudu ben doro pikinmoro wán dusun yari. Ma baka a Frudu, a libimarki fu den ben kon moro syatu esi-esi. Fu eksempre, Abraham ben libi soso 175 yari (Genesis 25:7). Èn sowan 400 yari baka a dede fu a getrow famiri-edeman disi, a profeiti Moses skrifi: „Den dei srefi fu den yari fu wi, na seibitenti yari, èn aititenti yari, efu a de fu spesrutu krakti ede; toku a wan-enkri sani di den e tyari kon nomonomo, na broko-ede nanga sani di e hati sma” (Psalm 90:10). Na ini a ten disi, a situwâsi de a srefi leki fa a ben de na ini a ten fu Moses.

[Karta/Prenki na tapu bladzijde 6, 7]

Teri go baka, fu a ten di Sirus ben gi a komando taki den Dyu ben kan drai komopo fu katibo te na a Frudu fu a ten fu Noa

537 A komando fu Sirus *

539 Sirus a Persiaman e teki Babilon abra

68 yari

607 A bigin fu den 70 yari di Yuda ben

kisi pori

906 yari langa

a kondre e kisi

tiri fu difrenti

fesiman, krutuman,

nanga kownu fu

Israel

1513 Israel e komopo fu Egepte

430 yari Den manpikin fu Israel ben libi 430 yari

langa na ini a kondre Egypte nanga Kanan

(Exodus 12:40, 41)

1943 Gado e meki wan frubontu nanga Abraham

205 yari

2148 Tera gebore

222 yari

2370 A Frudu e bigin

[Futuwortu]