Gi yesi na san a yeye e taki!

„A sma di abi yesi, meki a yere san a yeye e taigi den gemeente.”​—OPENBARING 3:22.

1, 2. Sortu rai Yesus e gi ibri tron baka na ini ala den boskopu di a seni gi den seibi gemeente fu Openbaring?

FUTUBOI fu Yehovah musu poti prakseri na den sani di Yesus Krestes ben taki nanga yepi fu a santa yeye, di a ben seni boskopu gi den seibi gemeente. Wi kan leisi fu den gemeente disi na ini a Bijbel buku Openbaring. Iya, ibriwan fu den boskopu disi abi a rai: „Meki a sma di abi yesi, yere san a yeye e taigi den gemeente.”​—Openbaring 2:7, 11, 17, 29; 3:6, 13, 22.

² Wi luku kaba sortu boskopu Yesus ben seni gi den engel, noso den opziener fu Efeise, Smirna, nanga Pergamum. Fa wi kan kisi wini fu den sani di a taigi den tra fo gemeente nanga yepi fu santa yeye?

Gi na engel na ini Tiatira

3. Pe Tiatira ben de? San sma ben e meki drape di ben meki a foto kisi barinen?

³ „A Manpikin fu Gado” e prèise a gemeente Tiatira, aladi a e piri-ai gi en tu. (Leisi Openbaring 2:18-29.) Tiatira (now Akhisar) na wan foto di sma ben bow na sei wan kriki di ben e lon go fadon na a Gedisliba (fosi a ben nen Hermus) na a westsei fu Pikin Asia. A foto disi ben kon kisi barinen fu den kefalek moi sani di sma ben e meki drape. Na ini a foto dati sma ben e gebroiki a rutu fu wan bromki fu meki a barinen sortu rediredi noso persi kloru di sma ben e gebroiki fu ferfi krosi. Lidia ben de wan uma di tron wan Kresten na a ten di Paulus go na Filipi na ini Grikikondre. Na uma disi „ben e seri wan sortu rediredi krosi èn a ben de fu a foto Tiatira”.​—Tori fu den Apostel 16:12-15.

4. Fu san a gemeente Tiatira ben kisi prèise?

 ⁴ Yesus e prèise a gemeente Tiatira gi den bun sani di den ben du, gi a lobi, nanga a bribi fu den, èn gi a fasi fa den du a diniwroko fu den. Te yu luku en bun, dan ’den sani di den ben e du na a momenti dati, ben moro furu leki san den ben e du fosifosi’. Awinsi wi abi wan bun nen na tra sma kaba, toku wi musu tan tyari wisrefi na wan fasi di fiti.

5-7. (a) Suma „na uma Iseibel” ben de trutru? San a gemeente ben musu du fu no meki a abi krakti tapu en? (b) Sortu krakti a boskopu di Krestes seni gi a gemeente Tiatira musu abi tapu umasma di abi frede gi Gado?

⁵ A gemeente Tiatira ben tapu den ai gi na afkodrei, den falsi leri, nanga a hurudu di ben de na ini a gemeente. „Na uma Iseibel” ben de na den mindri. Kande dati ben de wan grupu fu umasma di ben e tyari densrefi neleki na ogri umakownu Iseibel fu a tin lo Kownukondre fu Israel. Son sabiman e taki dati a kan taki ’den uma-profeiti’ fu Tiatira ben e suku fu kori Kresten fu go anbegi den mangado nanga umagado di spesrutu grupu bisnisman ben e anbegi. A kan sosrefi taki den ben e suku fu meki den Kresten teki prati na fesa pe sma ben e tyari nyanyan ofrandi gi kruktugado. No meki nowan uma di poti ensrefi leki profeiti, abi krakti tapu trawan na ini a disiten Kresten gemeente!

⁶ Krestes ’ben de fu meki na uma Iseibel fadon siki na ini bedi, aladi a ben o meki den wan di ben e du sutadu nanga en kisi bigi banawtu, boiti efu den ben o abi berow fu den sani di Iseibel ben e du’. Den opziener noiti no musu brokokindi gi den sortu takru leri disi, noso gi a krakti fu ogri sma. Nowan Kresten abi fu go du hurudu na yeye fasi noso na wan trutru fasi, èn nowan fu den abi fu go du afkodrei, fu kon frustan te fu kaba taki den „dipi sani fu Satan” na tumusi ogri-ati sani. Efu wi gi yesi na a warskow fu Yesus, dan wi sa ’hori tranga na san wi abi’, so taki sondu no sa man de wi basi. Den salfuwan di kisi wan opobaka, drai den baka gi sani di Gado no feni bun èn sosrefi gi takru lostu nanga takru prakseri. Dati meki den sa kisi ’makti tapu den pipel fu grontapu’ èn den sa wroko makandra nanga Krestes fu broko den pipel dati na pisipisi. Den stari fu den gemeente na ini a ten disi e teki presi gi Yesus, èn te den salfuwan kisi wan opobaka fu go na hemel, dan den sa kisi „a krin mamanten stari”, namku a Trowmasra, Yesus Krestes.​—Openbaring 22:16.

⁷ A gemeente Tiatira ben kisi a warskow fu no meki uma di fadon komoto na bribi abi krakti tapu a gemeente. A santa yeye ben tiri Yesus fu seni wan boskopu gi a gemeente. A boskopu dati e yepi umasma di e frede Gado, fu tan na a presi di Gado gi den na ini a gemeente noyaso. Den uma disi no e suku fu basi den mansma, èn den no e suku fu kori iniwan brada fu go du hurudu na yeye fasi, noso fu go huru trutru (1 Timoteyus 2:12). Na presi fu dati, den uma disi de wan bun eksempre na ini den sani di den e du èn na ini a diniwroko fu den di e gi Gado grani (Psalm 68:11; 1 Petrus 3:1-6). Efu a gemeente tan kibri san a abi, namku a soifri leri, wan soifri fasi fu libi, nanga a tumusi prenspari Kownukondre diniwroko, dan Krestes sa blesi a gemeente dati, èn a no sa krutu en.

Gi na engel na ini Sardes

8. (a) Pe Sardes ben de? San yu kan fruteri fu a foto disi? (b) Fu san ede a gemeente na ini Sardes ben abi yepi fanowdu?

⁸ A gemeente na ini Sardes ben musu kisi yepi wantewante, bika a ben dede na yeye fasi. (Leisi Openbaring 3:1-6.) Sardes ben de sowan 50 kilometer go na a zuidsei fu Tiatira. A foto disi ben e drai bun srefisrefi. A ben de wan bisnis foto èn a gron na ini a kontren dati ben fatu srefisrefi. Den sma fu a foto ben e meki furu krosi fu skapu wiwiri. Den ben e gebroiki skapu wiwiri sosrefi fu meki bigi matamata di yu ben kan bradi na gron. Den sani disi ben meki taki Sardes ben tron wan kefalek gudu foto pe sowan 50.000 sma ben e libi. Soleki fa a historia skrifiman Josephus taki, dan furu Dyu ben e libi na ini Sardes na ini a fosi yarihondro b.G.T. Now a foto na wan brokopresi. Ma na mindri den broko ston fu a foto disi sma go feni sani di e sori taki wan snoga ben de drape, nanga wan tempel fu Artemis, na umagado fu den Efeisesma.

9. San wi musu du efu wi e du wi diniwroko soso fu di wi musu du en?

 ⁹ Krestes ben taigi na engel fu a gemeente Sardes: „Mi sabi den du fu yu, taki yu abi a nen dati yu de na libi, ma yu dede.” San wi musu du efu wi e tyari a nen taki wi de na ai na yeye fasi, aladi wi e sribi fu di wi no e broko wi ede nanga den moi okasi di wi abi fu du Kresten diniwroko? Iya, san wi musu du efu wi e du wi diniwroko soso fu di wi musu du en, aladi wi „de fu dede” na yeye fasi? We, wi musu ’tan hori na prakseri fa a Kownukondre boskopu doro wi èn fa wi ben kon yere en’. Baka dati wi musu kon de fayafaya baka na ini a santa diniwroko. A no de fu taki dati wi musu bigin teki prati fayafaya na den Kresten konmakandra (Hebrewsma 10:24, 25). Krestes ben warskow a gemeente na ini Sardes: „Efu yu no wiki, dan mi o kon leki wan fufuruman, èn yu no o sabi kwetikweti o yuru mi o kon na yu tapu.” Fa a de na ini a ten disi? Heri esi wi sa musu gi frantwortu fu a fasi fa wi ben tyari wisrefi.

10. Fa son Kresten o tyari densrefi, awinsi a situwâsi na ini a gemeente fu den de a srefi leki a di fu a gemeente Sardes?

¹⁰ Srefi te wan gemeente de na ini a srefi situwâsi leki a gemeente Sardes, dan toku yu o abi wan tu Kresten di ’no doti den krosi fu den, èn di o man waka nanga Krestes na ini weti krosi, fu di den warti fu dati’. Den e tan sori krin taki den na Kresten, fu di den no e meki grontapu flaka den, èn den no e meki grontapu pori a krin fasi fa den e tyari densrefi, noso den no e meki grontapu pori na anbegi fu den (Yakobus 1:27). Fu dati ede Yesus ’no sa figi a nen fu den puru na ini a buku fu libi, ma a sa kari den nen na fesi en Tata nanga den engel’. Fu di Krestes taki kaba dati a grupu fu salfuwan di de leki en trowmisi na wan grupu fu sma di fiti fu waka nanga en, meki den o weri fini weti krosi di e brenki, èn di de krin. Den weti krosi dati e prenki den regtfardiki sani di den santawan fu Gado e du (Openbaring 19:8). Den e kisi deki-ati fu wini grontapu, te den e prakseri a bigi grani di den o kisi na ini hemel. Den wan di abi a howpu fu libi fu têgo dyaso na grontapu, o kisi blesi sosrefi. Den nen fu den sma disi skrifi na ini a buku fu libi tu.

11. San wi musu du efu wi e firi taki wi o fadon na sribi na yeye fasi?

¹¹ Nowan fu wi wani fu kon de na ini a srefi sari situwâsi na yeye fasi, leki a gemeente na ini Sardes. Ma san wi musu du efu wi e si taki wi o fadon na sribi na yeye fasi? Wi musu opo du wan sani wantewante fu a bun fu wi. Kon meki wi taki dati wi e kisi a firi fu go du sani di Gado no feni bun, kande wi bigin dyompo konmakandra, noso wi no e go preiki so furu moro. Efu dati de so, dan meki wi suku Yehovah fayafaya nanga yepi fu begi (Filipisma 4:6, 7, 13). Wi sa man tan na ai efu wi abi a gwenti fu poti ten na wan sei ibri dei, fu leisi èn studeri Bijbel nanga den tra buku di „a getrow basya” tyari kon na doro (Lukas 12:42-44). Dan wi sa de leki den wan fu gemeente Sardes di Krestes ben feni bun, èn wi sa de wan blesi gi wi Kresten brada nanga sisa.

Gi na engel na ini Filadelfia

12. San yu kan taki fu a fasi fa sma ben e anbegi Gado na ini a foto Filadelfia fu owruten?

¹² Yesus ben prèise a gemeente Filadelfia. (Leisi Openbaring 3:7-13.) Na ini a kontren fu a westsei fu Pikin Asia, dan Filadelfia (now a nen Alasehir) ben de a moro prenspari presi pe sma ben e meki win. Te yu luku en bun, dan a moro prenspari gado fu a foto dati ben de Dionisius, a gado fu win. Soleki fa a sori, dan den Dyu na ini Filadelfia ben suku fu overtoigi Dyu Kresten na ini a foto fu no gowe libi a Wet fu Moses, noso fu bigin hori a Wet baka. Ma den no ben abi bun bakapisi.

13. Fa Yesus gebroiki „a sroto fu David”?

¹³ Krestes abi „a sroto fu David”, èn fu dati ede a ben kisi a frantwortu fu luku ala Kownukondre afersi èn fu tiri na osofamiri fu bribiman (Yesaya 22:22; Lukas 1:32). Yesus gebroiki a sroto dati fu opo na okasi gi Kresten na ini Filadelfia fu owruten èn sosrefi gi den wan di de na tra presi, fu kisi grani nanga frantwortu di abi fu du nanga a Kownukondre dati. Fu sensi 1919 a de neleki Yesus opo „wan bigi doro” gi „a getrow basya”, so taki den kan du a Kownukondre preikiwroko. Nowan feanti sa man tapu a doro dati (1 Korentesma 16:9; Kolosesma 4:2-4). A no de fu taki dati a doro disi tapu gi den sma fu „a snoga fu Satan”, so taki den no kan kisi grani di abi fu du nanga a Kownukondre fu di den a no Israelsma na yeye fasi.

14. (a) San Yesus ben pramisi a gemeente na ini Filadelfia? (b) San wi kan du fu sorgu taki wi no fadon na pisi ten fu „a yuru fu tesi”?

¹⁴ Luku san Yesus ben pramisi den Kresten na ini  Filadelfia: „Fu di yu ben horidoro na a fasi fa mi ben horidoro, meki mi sa kibri yu tu gi a yuru fu tesi, di sa kon na a heri grontapu pe sma e libi, fu tesi den sma di e libi na grontapu.” Efu wi wani tan du a preikiwroko, dan wi musu horidoro neleki Yesus. Noiti a no brokokindi gi den feanti fu en. Na presi fu dati a e tan du a wani fu en Tata. Dati meki Krestes ben kisi wan opobaka fu libi na ini hemel leki wan sma di no man dede. Efu wi tan hori wisrefi na a bosroiti di wi teki fu anbegi Yehovah èn efu wi tan horibaka gi a Kownukondre fu di wi e preiki a bun nyunsu, dan wi sa kisi kibri. Na so fasi wi no sa fadon na ini a pisi ten disi pe wi e kisi tesi, namku „a yuru fu tesi” di wi de na ini nownowde. Wi sa ’tan hori steifi na san wi kisi’ fu Krestes, fu di wi o du muiti fu meki a Kownukondre wroko go na fesi. Te den salfuwan du disi, dan dati sa meki taki den kisi wan tumusi bigi grani na ini hemel, èn te den getrow Kresten di e tan wroko makandra nanga den du disi, dan den sa kisi têgo libi na grontapu.

15. San den wan di wani de ’stonfutu na ini a tempel fu Gado’ musu du?

¹⁵ Krestes e taki moro fara: „A sma di e wini ​— mi sa meki a tron wan postu na ini a tempel fu mi Gado, . . . èn mi sa skrifi a nen fu mi Gado na en tapu nanga a nen fu a foto fu mi Gado, a nyun Yerusalem di e saka komoto fu mi Gado na hemel, nanga a nyun nen fu mi.” Salfu opziener musu horibaka gi a tru anbegi dorodoro. Den musu tan sori taki den na sma di warti fu de wan pisi fu „a nyun Yerusalem”, fu di den o preiki fu a Kownukondre fu Gado èn fu di den o tan krin na yeye fasi. Disi de  tranga fanowdu efu den wani de leki stonfutu fu a glori tempel fu hemel, èn efu den wani tyari a nen fu a foto fu Gado leki sma di sa libi na ini hemel, aladi den o tyari a nen fu Krestes leki a trowmisi fu en. A no de fu taki, fu dati ede, taki den musu abi yesi di e „yere san a yeye e taigi den gemeente”.

Gi na engel na ini Laodisea

16. San na wan tu sani di wi sabi fu Laodisea?

¹⁶ Krestes ben piri-ai gi a gemeente Laodisea di ben abi wan mi-no-ke fasi. (Leisi Openbaring 3:14-22.) Laodisea ben de sowan 150 kilometer moro fara fu Efeise. A foto disi ben bow na wan presi pe difrenti bigi pasi ben e kon na wan, pasi pe sma ben e pasa fu go seri sani na tra presi. A foto ben de na a lagipresi pe a Likusliba ben e lon pasa. A gron drape ben fatu srefisrefi. Laodisea ben de wan foto di ben e drai bun, wan presi pe sma ben e meki furu sani, èn pe furu sma ben e go fu du moni tori. Na ala sei sma ben lobi den krosi fu blaka skapu-wiwiri di den ben e meki drape. Fu di a foto Laodisea ben de a presi pe yu ben abi a barinen datra skoro, meki a kan taki dati ben de a presi tu pe sma ben e meki na ai-dresi di den ben e kari: puiri fu Frigia. Asklepius, wan gado fu dresi, ben de wan fu den moro prenspari gado fu a foto. Soleki fa a sori, dan Laodisea ben lai nanga Dyu, èn a sori sosrefi taki sonwan fu den Dyu dati ben gudu srefisrefi.

17. Fu san ede den Kresten fu Laodisea ben kisi piri-ai?

¹⁷ Yesus e taki now nanga a gemeente Laodisea nanga yepi fu na „engel” fu den. A e taki na wan fasi di e sori taki en na a edeman èn leki „a getrow èn tru kotoigi, a bigin fu den sani di Gado meki” (Kolosesma 1:13-16). Den sma fu Laodisea ben kisi piri-ai fu di den ’no ben kowru, aladi de no ben faya tu’ na yeye fasi. Fu di den ben broko-kowru, meki Krestes ben o spiti den puru fu en mofo. A pisi tori dati no ben tranga gi den fu frustan. Krosibei fu Laodisea yu ben abi a foto Hièrapolis di ben abi watra peti pe faya watra ben e kuku kon na tapu, èn na Kolose kowru watra ben e komoto na ini a gron. A watra disi ben e pasa na ini peipi go na Laodisea. Ma fu di den tu tra foto ben fara pikinso fu Laodisea, meki a no de fu taki dati a watra ben broko-kowru kaba, bifo a ben man doro a foto. Te a doro afu pasi, a watra ben e pasa na ini wan kanari. Krosibei fu Laodisea a watra ben e pasa na ini ston pe sma ben boro olo na ini, èn di den ben mesre na makandra.

18, 19. Fa Kresten na ini a ten disi kan kisi yepi neleki fa den Kresten na Laodisea ben kisi yepi?

¹⁸ Efu wan sma na ini a ten disi de neleki den Kresten fu Laodisea, dan a no faya nofo fu de wan deki-ati gi trawan, aladi a no kowru nofo tu fu kan gi trawan kowru-ati. Neleki fa sma e spiti watra puru te a kon broko-kowru, na so Yesus sa spiti den sortu sma disi puru! Yesus no wani den fu de leki takiman fu en, leki salfu „sma di e teki presi gi Krestes” (2 Korentesma 5:20). Efu den no abi berow, dan den o lasi a grani fu de Kownukondre preikiman. Den Kresten fu Laodisea ben e feti fu kisi grontapu gudu, aladi ’den no ben sabi taki den na mofinawan, taki sma ben e sari den, taki den ben de pôti, breni, èn nanga sososkin’. Efu sma na ini a ten disi wani kon gudu na yeye fasi, dan den musu bai a ’gowtu fu Krestes di faya meki kon soifri’, dati na bribi di kisi tesi. Efu den wani kon si baka na yeye fasi, dan den musu bai „salfu fu wrifi na den ai”, san o meki taki den sa si sani leki fa Gado e si den. Efu den no wani de nanga sososkin, dan den musu bai na Yesus „weti tapusei krosi” fu regtfardikifasi. Kresten opziener de klariklari fu yepi den sortu sma disi fu kon si taki den abi Gado fanowdu, so taki den kan tron sma di de „guduman ini bribi” (Yakobus 2:5; Mateyus 5:3). Boiti dati, den opziener musu yepi den tu fu poti a yeye ’salfu na den ai’, dati wani taki dati den musu yepi den fu libi akruderi den leri, a rai, nanga na eksempre fu Yesus èn fu abi a denki fu Yesus. A sani disi na wan bun sani fu yepi sma fu wini a „lostu fu a skin nanga a lostu fu den ai nanga a prodo di wan sma e prodo nanga den gudu di a abi”.​—1 Yohanes 2:15-17.

¹⁹ Yesus e gi piri-ai nanga tranga leri, na ala den wan di a lobi nanga en heri ati. Na wan lobi-ati fasi den opziener di de na ondro Yesus, musu du a srefi sani (Tori fu den Apostel 20:28, 29). Den Kresten fu Laodisea ben musu „de nanga faya èn abi berow”, den ben musu kenki a fasi fa den ben e denki, nanga a fasi fa den ben e libi. Fa a de nanga wi? A de so taki sonwan fu wi e libi na so wan fasi taki a santa diniwroko di wi musu du gi Gado no de so prenspari moro na ini wi libi? We dan, meki wi ’bai salfu na Yesus fu wrifi na wi ai’, so taki wi kan si o prenspari a de fu tan suku a Kownukondre fosi.​—Mateyus 6:33.

20, 21. Suma e gi yesi na a „naki” di Yesus e naki na a doro na ini a ten disi? San den sma disi e howpu fu kisi na ini a ten di e kon?

 ²⁰ „Luku!”, Krestes e taki, „Mi tanapu e naki na a doro. Efu iniwan sma yere mi sten èn opo a doro, dan mi o kon na ini en oso èn mi o nyan a neti-nyanyan makandra nanga en èn en o nyan nanga mi.” Furu tron Yesus gi sma leri te a ben e nyan makandra nanga den (Lukas 5:29-39; 7:36-50; 14:1-24). Now a e naki na a doro fu ibriwan gemeente di de leki a di fu Laodisea. San den memre fu a gemeente dati o du? Den o gi yesi te Yesus e naki na a doro? Den o kisi a dipi lobi baka, di den ben abi gi Krestes fosifosi? Den o gi en wan switikon na den mindri èn meki taki a gi den leri? Efu den du dati, dan Krestes sa nyan wan fesa makandra nanga den, wan fesa di sa tyari furu wini kon gi den na yeye fasi.

²¹ Na ini a ten disi, dan na wan agersi fasi, den „tra skapu” e kari Yesus kon na inisei, wan sani di kan meki taki den kisi têgo libi (Yohanes 10:16; Mateyus 25:34-40, 46). Krestes sa gi ibriwan fu den salfuwan di wini grontapu a grani fu ’sidon nanga en na tapu a kownusturu fu en, neleki fa ensrefi ben wini grontapu èn ben go sidon nanga en Tata na tapu a kownusturu fu a Tata’. Iya, Yesus pramisi den salfu winiman, taki den sa kisi a bigi grani fu sidon na tapu wan kownusturu nanga en na ini hemel, na a reti-anusei fu en Tata. Den tra skapu di sa wini grontapu, abi a howpu fu tan na ini wan tumusi moi grontapu te a Kownukondre o tiri.

Wi alamala kan leri wan sani fu den tori disi

22, 23. (a) Fa ala Kresten kan kisi wini fu a boskopu fu Yesus gi den seibi gemeente? (b) San musu de a fasti bosroiti fu wi?

²² A no de fu taki dati ala Kresten kan kisi wini fu den wortu fu Yesus gi den seibi gemeente fu Pikin Asia. Teki den lobi-ati Kresten owruman leki eksempre. Te den e si fa Krestes ben e prèise sma na wan yoisti fasi, dan dati e pusu den fu prèise wan sma, noso wan heri gemeente, te sani e waka bun na yeye fasi. Te den owruman e si taki sani no e waka so bun, dan den e yepi den brada nanga sisa fu si fa Bijbel kan yepi den. Wi alamala kan tan kisi wini fu den difrenti rai di Krestes ben gi den seibi gemeente, ma dan wi musu tan begi fayafaya fu Gado yepi wi fu fiti den rai disi na ini wi libi, aladi wi musu de klariklari fu du dati wantewante. *

²³ Den lasti dei disi a no ten fu go du sani safrisafri, fu go feti fu kisi gudu, noso fu du iniwan tra sani di kan meki taki wi e du pikinso nomo na ini a diniwroko fu Gado. Meki a de so, fu dati ede, taki ala gemeente e tan skèin faya neleki kandratiki di Yesus no e puru na den presi. Meki wi sori taki wi na getrow Kresten di teki a bosroiti fu tan arki te Krestes e taki, èn di e tan gi yesi na den sani di a yeye e taigi wi. Efu wi du dati, dan wi sa nyan prisiri fu têgo leki tyariman fu leti di e gi glori na Yehovah.

[Futuwortu]

San yu ben sa piki?

• Suma „na uma Iseibel” ben de? Fu san ede umasma di e frede Gado no e teki na eksempre fu en?

• Fa a situwâsi ben de na ini a gemeente Sardes? San wi kan du fu no kon de leki furu fu den Kresten di ben e libi drape?

• San Yesus ben pramisi a gemeente fu Filadelfia? Fa den pramisi dati e fiti sosrefi na ini a ten disi?

• Fu san ede den Kresten fu Laodisea ben kisi piri-ai, ma san den fayafaya Kresten kan fruwakti na ini a ten di e kon?

[Aksi fu a tori disi]

[Prenki na tapu bladzijde 16]

Wi musu tan farawe fu na ogri-ati fasi fu „na uma Iseibel”

[Prenki na tapu bladzijde 18]

Yesus opo „wan bigi doro” gi den bakaman fu en, di e gi den na okasi fu kisi grani na ini a Kownukondre

[Prenki na tapu bladzijde 20]

Yu e kari Yesus kon na inisei? Yu e gi yesi na en sosrefi?