Ibriwan sma sa sidon na ondro en eigi figabon

A NO makriki fu feni wan kowrupresi te a de zomer [dreiten] na den kondre fu Mindri Owstusei. Den sma na ini den kondre dati lobi den bon di e gi kowrupresi, spesrutu te den sortu bon disi e gro krosibei fu na oso fu den. A figabon e gi moro kowrupresi leki iniwan bon fu den kondre fu Mindri Owstusei, fu di a bon disi abi bigi bradi wiwiri èn a abi taki di e panya go na ala sei.

Soleki fa a buku Plants of the Bible e taki dan „a figabon e gi moro kowrupresi leki wan tenti”. Den figabon di ben e gro na den lanki fu den droifidyari na ini Israel fu owruten, ben de wan bun presi gi den wrokoman fu teki rostu fu wan syatu pisi ten.

Na a kaba fu wan langa, waran dei, memre fu wan osofamiri ben kan sidon na ondro den figabon èn den ben kan abi switi demakandra. Boiti dati, a sma di prani wan figabon e kisi furu gosontu froktu. Fu dati ede, sensi a ten fu Kownu Salomo, dan a sidon di wan sma e sidon na ondro en eigi figabon wani taki dati a sma de korostu, a abi wan bun libi èn a abi pikinmoro ala sani di de fanowdu.​—1 Kownu 4:24, 25.

Moro leki 400 yari na fesi, a profeiti Moses ben taki dati a Pramisi Kondre ben de ’wan kondre fu figa’ (Deuteronomium 8:8). Den twarfu spion ben tyari figa nanga tra froktu kon na a kampu fu den Israelsma fu sori den taki a kondre ben bun (Numeri 13:21-23). Na ini a di fu 19 yarihondro wan man ben go na den kondre di Bijbel e taki fu den. A man disi ben taki dati a figabon na wan bon di yu e si na ala sei. A no de fu fruwondru taki den Buku fu Bijbel e taki furu tron fu figa nanga figabon!

Wan bon di e meki froktu tu leisi wan yari

A figabon kan gro tapu difrenti sortu gron. Fu di den rutu e go dipi na ini a gron, meki a man tan gro na ini den langa zomer fu den kondre na Mindri Owstusei. A bon disi na wan aparti bon, fu di den fosi figa e lepi na ini yuni èn moro furu fu den figa e lepi na ini augustus èn den mun baka dati (Yesaya 28:4). A ben de a gwenti fu den Israelsma fu nyan den fosi figa fu a bon. Den ben  e drei den figa di ben lepi baka dati so taki den kan gebroiki den a heri yari doro. Den ben kan masi drei figa kon tron wan lontu kuku, èn son tron den ben e poti amandra tu na ini den kuku. Den figa kuku disi ben makriki fu gebroiki, den ben gosontu èn den ben switi.

A koni uma Abigaèl ben gi David 200 kuku di ben meki fu den drei figa di den ben masi kon na wan. A ben musu de so taki na uma disi ben denki dati den kuku disi na a yoisti sortu kuku gi loweman (1 Samuel 25:18, 27). Sma ben e gebroiki masimasi figa, leki dresi tu. Di Kownu Heskia ben abi wan takru sweri, dan den ben masi wan tu drei figa èn poti dati na ini wan duku di den ben tai na tapu a sweri. Aladi den ben du dati, toku Heskia kon betre fu di Gado dresi en. *​—2 Kownu 20:4-7.

Na ini owruten, den drei figa ben prenspari gi den sma fu a kontren fu den Mindrikondre. Fu di a politiekman Cato ben sori na Asamblei fu Rome wan figa, meki a ben overtoigi den fu bigin nanga a di fu Dri Feti nanga den sma fu Kartago. Den moro switi drei figa di ben de fu feni na ini Rome ben e kon fu Caria, wan presi na ini Pikin Asia. Fu dati ede, na ini Latijntongo sma e kari den drei figa carica. A srefi presi disi, di de Torkukondre now, abi den moro bun drei figa.

Furu tron den gronman fu Israel ben e prani figabon na ini den droifidyari. Ma a gwenti ben de fu koti den bon trowe di no ben e meki froktu. A ben muilek fu feni fatu gron. Fu dati ede den no ben libi den bon di no ben e meki froktu na tapu fatu gron. Na ini na agersitori fu Yesus di e taki fu a figabon di no ben gi froktu, dan a gronman ben taigi a sma di ben luku a droifidyari: „Now a de dri yari kaba di mi e suku froktu na a figabon disi, ma mi no ben feni nowan. Koti en trowe! Fu san ede a ben sa tan na ini a gron fu soso?” (Lukas 13:6, 7) Fu di sma ben musu pai belasting moni gi froktubon na ini a ten fu Yesus, meki a ben o de wan hebi gi wan sma fu pai belasting moni gi wan bon di no e gi froktu.

Den figa ben de wan tumusi prenspari nyanyan gi den Israelsma. Fu dati ede a ben sa de wan rampu gi den te den no ben o piki so furu figa, kande fu di Yehovah ben strafu den (Hosea 2:12; Amos 4:9). A profeiti Habakuk ben taki: „Awansi a figabon srefi no e gi bromki, èn den droifibon no e gi froktu, awansi a wroko fu na olijfbon trutru no abi bun bakapisi, èn srefi den heipresi no e gi nyanyan trutru . . . Toku fu mi sei, mi sa breiti pasa marki na ini Yehovah; mi sa de nanga prisiri nanga a Gado fu mi frulusu.”​—Habakuk 3:17, 18.

Bijbel e agersi figa nanga wan pipel di no de getrow

Son tron den Buku fu Bijbel e gebroiki figa noso figabon na wan agersifasi. Fu eksempre, Yeremia ben agersi den getrow katiboman fu Yuda nanga wan baskita nanga bun figa, den fosi figa di sma ben gwenti fu nyan fu a bon. Ma a ben agersi den katiboman di no ben de getrow nanga figa di no ben bun, figa di sma no ben nyan ma di den ben e trowe.​—Yeremia 24:2, 5, 8, 10.

Na ini na agersitori fu a figabon di no e gi froktu, Yesus ben sori taki Gado ben abi furu pasensi nanga a Dyu nâsi. Soleki fa  a wi ben taki kaba, dan Yesus ben taki fu wan man di ben abi wan figabon na ini en droifidyari. A bon no ben e meki froktu dri yari langa, èn a man di ben abi a droifidyari ben wani fu koti a bon trowe. Ma a man di ben e luku a droifidyari ben taki: „Masra, meki a bon tan a yari disi ete, teleki mi diki wan olo lontu en èn meki a gron kon fatu baka; èn efu a o meki froktu na ini a ten di e kon, we dan dati sa bun; ma efu a no meki froktu, dan yu kan koti en trowe.”​—Lukas 13:8, 9.

Di Yesus ben gi na agersitori disi, dan a ben e preiki dri yari kaba èn a ben meki muiti fu den Dyu kisi bribi. Yesus ben du moro na ini a diniwroko fu en, a ben meki „a gron kon fatu”. A ben gi a figabon, di a ben agersi nanga a Dyu nâsi, na okasi fu meki froktu. Ma a wiki bifo a dede fu Yesus, a ben de krin taki a moro bigi pisi fu a nâsi no ben teki en leki a Mesias.​—Mateyus 23:37, 38.

Ete wan leisi Yesus ben gebroiki a figabon fu agersi a yeyefasi fu a nâsi di no ben bun srefisrefi. Di a ben komoto fu Betania go na Yerusalem, fo dei bifo a dede fu en, dan a ben si wan figabon nanga furu wiwiri ma a no ben abi nowan enkri froktu. A de so taki den fosi figa e gro makandra nanga den wiwiri fu a bon, èn son tron srefi fosi den wiwiri gro den froktu de na a bon kaba. Fu di a bon disi no ben abi froktu aladi den wiwiri ben de kaba, meki a bon no ben warti.​—Markus 11:13, 14. *

Neleki a figabon di ben gersi taki a gosontu, na so a Dyu nâsi ben sori fu de bun na dorosei. Ma den no ben meki froktu di ben plisi Gado èn te fu kaba den no ben wani teki a Manpikin fu Yehovah srefi. Yesus ben fluku a figabon di no ben meki froktu èn na a tra dei den disipel si taki a bon ben drei kaba. A drei bon disi e sori taki den Dyu no ben o de a pipel di Gado ben feni bun.​—Markus 11:20, 21.

Leri wan sani fu a figabon

Yesus ben gebroiki a figabon tu fu leri wi wan prenspari sani fu a denoya fu en. A ben taki: „Teki a figabon leki eksempre èn leri a sani disi fu en: Te a yongu taki fu en e kon safu èn a e bigin kisi wiwiri, dan unu sabi taki a waran ten fu a yari de krosibei. Sosrefi, te unu e si ala den sani disi, dan unu sabi taki a de krosibei, taki a e tanapu leti na mofodoro” (Mateyus 24:32, 33). Na den faya grun wiwiri fu a figabon yu kan si krin taki a waran ten de krosibei. Na a srefi fasi, a prenspari profeititori fu Yesus di skrifi na ini Mateyus kapitel 24, Markus kapitel 13, nanga Lukas kapitel 21, e sori krin taki a de na ini hemel èn a abi a makti fu wan Kownu.​—Lukas 21:29-31.

Fu di wi e libi na ini so wan tumusi prenspari ten na ini historia, meki a no de fu taki dati wi wani leri wan sani fu a figabon. Efu wi e du disi èn efu wi e tan na ai na yeye fasi, dan wi abi a howpu fu ondrofeni a kontru fu a moro bigi pramisi: „Den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi; bika na a mofo fu Yehovah fu den legre srefi di taki disi.”​—Mika 4:4.

[Futuwortu]