Tan tanapu kánkan èn wini a streilon fu libi

EFU yu ben musu teki pasi pasa wan krasi se, dan sortu boto yu ben sa wani de na ini? Yu ben sa wani de na ini wan brokobroko kruyara noso na ini wan tranga bigi boto? A no de fu taki dati yu ben o wani de na ini a bigi boto, fu di a kan pasa den hebi skwala nanga bun bakapisi.

Aladi wi e pasa a bruya èn ogri seti fu sani disi, wi e kisi fu du nanga tyalensi di no switi kwetikweti. Leki eksempre, den furu fromu denki fu a grontapu disi nanga den difrenti modo di de, kan bruya yongusma son tron èn a kan meki taki den no de seiker fu densrefi. Sma di no so langa ete bigin libi leki Kresten, kan firi leki den no e tanapu kánkan na ini waarheid ete. Sosrefi son sma di e tanapu kánkan furu yari kaba na ini getrow diniwroko fu Gado, kan kisi fu du nanga tesi fu di den fruwakti di den abi no kon tru dorodoro.

A no wan nyun sani taki sma abi den sortu firi disi. Getrow dinari fu Yehovah soleki Moses, Yob, nanga David ben firi brokosaka son leisi (Numeri 11:14, 15; Yob 3:1-4; Psalm 55:4). Ma nanga a fasi fa den ben libi den ben sori taki den ben tanapu kánkan èn taki den ben dini Yehovah fayafaya. A moi eksempre fu den e gi wi deki-ati fu tanapu kánkan, ma Satan Didibri wani meki wi tapu nanga a streilon fu a têgo libi (Lukas 22:31). Sobun, fa wi kan tan tanapu kánkan, noso tan „abi wan tranga bribi”? (1 Petrus 5:9) Èn fa wi kan tranga den Kresten brada nanga sisa fu wi?

Yehovah wani taki wi musu tanapu kánkan

Te wi de getrow na Yehovah, dan ala ten a sa yepi wi fu tan tanapu kánkan. A psalm skrifiman David ben abi fu du nanga furu muilek situwâsi, ma a ben howpu tapu Gado èn fu dati ede a ben kan singi: „[Yehovah] puru mi sosrefi na ini wan dungru olo, a puru mi fu a tokotoko. Dan a poti mi futu na tapu wan bigi ston, a ben seti mi futu fu tanapu kánkan.”—Psalm 40:2.

Yehovah e gi wi krakti fu feti „a bun feti di abi fu du nanga a bribi” so taki wi kan ’grabu a têgo libi èn hori en bun steifi’ (1 Timoteyus 6:12). A e sorgu tu taki wi man tan tanapu kánkan so taki wi kan wini a feti di wi e feti na yeye fasi trutru. Na apostel Paulus ben gi tra Kresten a deki-ati fu ’teki a krakti fu Masra, èn fu tranga densrefi nanga a kefalek bigi krakti fu en’ èn fu ’weri ala den fetisani di Gado gi den, so taki den kan tanapu kánkan gi den triki di Didibri e gebroiki fu kori sma’ (Efeise 6:10-17). Ma san kan meki taki wi e bruya? Èn fa wi kan kakafutu teige den ogri makti disi di kan meki wi kon swaki na yeye fasi?

Luku bun nanga sani di kan meki yu kon swaki na yeye fasi

A de wan koni sani fu memre a tumusi prenspari sani disi: Den bosroiti di wi e teki sa abi krakti na wi tapu te fu kaba. Den kan meki taki  wi sa man tanapu kánkan leki Kresten, noso den kan meki taki wi no sa man tanapu kánkan. Yonguwan musu teki bosroiti soleki sortu wroko den o du, sortu skoroleri den o teki moro fara, èn nanga suma den o trow. Bigisma kande musu teki a bosroiti efu den musu froisi go na wan tra presi noso efu den musu teki ete wan wroko. Aladei wi e teki bosroiti fa wi sa gebroiki wi ten èn fa wi o du wan lo tra sani. San kan yepi wi fu teki a yoisti bosroiti di sa meki taki wi man tanapu kánkan leki futuboi fu Gado? Wan sisa di de wan Kresten wan heri pisi ten kaba ben taki: „Mi e aksi Yehovah fu yepi mi te mi musu teki bosroiti. Mi e bribi taki a de prenspari fu teki rai èn fu libi akruderi den rai di wi e kisi fu Bijbel, na de Kresten konmakandra, fu den owruman, èn fu den Bijbel publikâsi.”

Te wi e teki bosroiti, dan a ben o bun fu aksi wisrefi: ’A de so taki baka feifi noso tin yari, mi sa breiti ete nanga den bosroiti di mi e teki tide, noso mi sa firi sari taki mi teki so wan bosroiti? Mi e meki muiti fu sorgu taki den bosroiti di mi e teki no e meki mi kon swaki na yeye fasi, ma taki den sa yepi mi fu gro na yeye fasi?’—Filipisma 3:16.

Son sma di dopu kaba ben brokokindi gi tesi, noso den kon krosibei fu pasa den wet fu Gado. A sani disi ben meki taki den libi no ben waka bun. Wan tu sma di ben puru fu a gemeente fu di den ben go doro nanga den sondu fasi fu libi sondro fu sori berow, ben du furu muiti fu kon baka na ini a gemeente. Ma son tron, syatu baka dati, den sma disi musu ben puru fu a gemeente baka, fu di den du den srefi sondu. A kan de so taki den sma disi no ben begi Gado fu yepi den fu ’tegu gi san ogri, èn fu hori fasti na san bun’? (Romesma 12:9; Psalm 97:10). Wi alamala musu „tan meki reti pasi gi wi futu” (Hebrewsma 12:13). Fu dati ede, meki wi poti prakseri na wan tu penti di kan yepi wi fu tan tanapu kánkan na yeye fasi.

Tan tanapu kánkan nanga yepi fu a Kresten diniwroko

Wán fasi fa wi kan tan lon a streilon fu libi, na te wi abi furu fu du na ini a Kownukondre preikiwroko. Iya, a Kresten diniwroko e yepi wi na wan bun fasi fu tan poti prakseri nanga wi ati èn nanga wi frustan, na a du fu a wani fu Gado. A sa yepi wi tu fu tan hori wi ai na tapu a prijs fu têgo libi. Ini a tori disi, Paulus ben gi den Korentesma a deki-ati: „Fu dati ede, un lobi brada fu mi, tanapu kánkan, no degedege, èn ala ten unu musu abi furu fu du na ini a wroko fu Masra, fu di unu sabi taki a wroko di unu e du gi Masra no de fu soso.” (1 Korentesma 15:58). Wan sma di e „tanapu kánkan” e tanapu steifi neleki wan kankantri, a no e degedege. Sobun, te wi abi furu fu du na ini a diniwroko, dan dati kan yepi wi fu tanapu kánkan leki Kresten. Te wi e yepi tra sma fu kon leri sabi Yehovah, dan wi libi sa de warti èn wi sa de koloku trutru.—Tori fu den Apostel 20:35.

Pauline, wan Kresten sisa di dini leki zendeling èn di du tra sani na ini a furuten preikiwroko moro leki 30 yari, ben taki: „A diniwroko e kibri mi bika te mi e preiki gi trawan, dan mi e kisi a dyaranti dati mi abi a waarheid.” A srefi dyaranti wi e kisi te wi e du tra Kresten wroko doronomo, soleki fu go na den Kresten konmakandra èn fu studeri a Bijbel fayafaya.

Tanapu kánkan nanga yepi fu a lobi-ati bradafasi

A de di wi de wan pisi fu na organisâsi fu tru anbegiman na heri grontapu, kan tranga wi fu tanapu kánkan. A de wan blesi trutru fu abi demakandra nanga so wan lobi-ati bradafasi di de na heri grontapu! (1 Petrus 2:17) Èn wi sosrefi kan gi tra bribiman a deki-ati fu tanapu kánkan.

Poti prakseri na a fasi fa na opregti man Yob ben yepi tra sma. Srefi a falsi trowstuman Elifas ben musu taki: „Iniwan sma di ben naki en futu fadon, ben opo tanapu baka nanga yepi fu den wortu fu yu; èn yu ben meki den kindi di ben degedege, kon steifi baka” (Yob 4:4). Fa wi kan yepi trawan? Wi alamala abi a frantwortu fu yepi den brada nanga sisa fu wi fu horidoro na ini a diniwroko fu Gado. Te wi de makandra nanga wi brada nanga sisa, dan wi kan du sani soleki fa den wortu disi e taki: „Un tranga den swaki anu èn meki den kindi di e beifi, tanapu steifi” (Yesaya 35:3). Sobun, fu san ede yu no e poti en leki wan marki gi yusrefi fu tranga wán, noso tu  Kresten èn fu gi den deki-ati, ibri leisi te yu e miti nanga den? (Hebrewsma 10:24, 25) Te wi e prèise den èn te wi e sori den taki wi e warderi ala a muiti di den e du fu plisi Yehovah, dan wi kan yepi den trutru fu tan tanapu kánkan so taki den kan wini a streilon fu libi.

Kresten owruman kan du furu bun sani te den e gi den nyunwan deki-ati. Den kan du disi te den e gi bun rai di komoto fu Bijbel èn te den e wroko makandra nanga den na ini a preikiwroko. Na apostel Paulus ben gebroiki ala okasi di a ben kisi fu gi trawan deki-ati. A ben angri fu si den brada nanga sisa di ben de na ini Rome, so taki a ben kan tranga den na yeye fasi (Romesma 1:11). A ben taki fu en lobi brada nanga sisa na ini Filipi dati den ben ’gi en prisiri’ èn dati a ben e ’prodo nanga den’. A ben frumane den tu fu „tanapu kánkan na tapu a pasi fu Masra” (Filipisma 4:1). Di Paulus yere fu den problema di den brada fu en ben abi na ini Tesalonika, dan a seni Timoteyus go fu ’tranga den èn fu trowstu den, so taki nowan fu den ben sa degedege fu den banawtu ede’.—1 Tesalonikasma 3:1-3.

Den apostel Paulus nanga Petrus ben sabi taki den brada nanga sisa fu den ben du furu muiti, èn den ben warderi a wroko di den ben du na wan getrow fasi (Kolosesma 2:5; 1 Tesalonikasma 3:7, 8; 2 Petrus 1:12). Wi sosrefi musu poti prakseri na den bun eigifasi fu wi brada nanga sisa, èn no na den swakifasi fu den. Wi musu luku tu fa den e meki tranga muiti fu tan tanapu kánkan èn fa den e gi Yehovah grani.

Te wi e krutukrutu nomo, dan wi kan meki en moro muilek gi trawan fu tan tanapu kánkan na ini a bribi. Kande wi e du disi sondro taki wi sabi dati srefi. A fiti fu hori na prakseri dati den brada fu wi e ’kisi kwinsi èn e waka bruyabruya’ na ini a seti fu sani disi! (Mateyus 9:36) Na ini a Kresten gemeente den abi a reti fu fruwakti taki den o feni trowstu nanga deki-ati. Fu dati ede, meki wi alamala du muiti fu tranga wi brada nanga sisa èn meki wi yepi den fu tan tanapu kánkan.

Son tron trawan kan handri nanga wi na wan fasi di kan meki taki wi no e tanapu kánkan moro. Te wan sma piki wi na wan grofu fasi, noso te a du wan sani nanga wi di no switi, dan dati sa meki taki wi no sa du furu moro na ini wi diniwroko gi Yehovah? Noiti wi musu meki taki sani di sma e du, tapu wi fu tan tanapu kánkan!—2 Petrus 3:17.

Den pramisi fu Gado e gi wi krakti fu tanapu kánkan

A pramisi fu Yehovah, taki a sa tyari wan tumusi moi tamara kon na ondro a tiri fu a Kownukondre fu en, e yepi wi fu tan tanapu kánkan (Hebrewsma 6:19). Èn wi abi na overtoigi taki Gado e meki den pramisi fu en kon tru ala ten. Disi e gi wi a deki-ati fu ’tan na ai, èn fu tanapu kánkan na ini a bribi’ (1 Korentesma 16:13; Hebrewsma 3:6). Te a gersi taki sonwan fu den pramisi fu Gado no e kon tru wantewante, dan dati kan de wan tesi tapu a bribi fu wi. Fu dati ede a de tumusi prenspari taki wi e luku bun taki sma no e kori wi nanga falsi leri èn taki wi no e lasi a howpu fu wi.—Kolosesma 1:23; Hebrewsma 13:9.

A takru eksempre fu den Israelsma di ben lasi den libi bika den no ben poti bribi na ini den pramisi fu Gado, na wan warskow gi wi (Psalm 78:37). Na presi fu de leki den, wi musu tanapu kánkan, èn wi musu dini Gado na wan fasi di e sori taki wi e hori bun na prakseri dati wi e libi na ini den lasti dei. Wan owruman nanga  ondrofeni ben taki: „Ibri dei mi e libi na so wan fasi, neleki a bigi dei fu Yehovah sa kon tamara.”—Yoèl 1:15.

Iya, a bigi dei fu Yehovah de heri krosibei. Ma wi no abi fu frede noti so langa wi e tan krosibei fu Gado. Efu wi e tan hori wisrefi seryusu na den regtfardiki markitiki fu en èn efu wi e tan tanapu kánkan, dan wi kan lon a streilon fu libi nanga bun bakapisi!—Odo 11:19; 1 Timoteyus 6:12, 17-19.

[Prenki na tapu bladzijde 23]

Yu e du ala san yu man fu yepi yu brada nanga sisa fu tan tanapu kánkan?

[Sma di abi a reti fu a prenki na tapu bladzijde 21]

The Complete Encyclopedia of Illustration/​J. G. Heck