A fasi fu gi sani di e prisiri Gado ati

YESUS nanga den disipel fu en ben e nyan wan switi nyanyan nanga wan tu mati fu den na ini a foto Betania. Na mindri den mati disi yu ben abi Maria, Marta, nanga Lasarus, a man di ben kisi wan opobaka no solanga pasa. Di Maria teki sowan afu liter diri oli kanti na tapu na ede nanga den futu fu Yesus, dan Yudas Iskariot ben kisi atibron èn a ben krutu taki: „Fu san ede a switismeri oli disi no ben seri gi dri hondro denari [wan sma ben musu wroko heri yari fu feni a moni dati] èn ben gi na den pôti sma?” A no teki langa fosi wan tu trawan bigin krutu na a srefi fasi dati.​—Yohanes 12:1-6; Markus 14:3-5.

Ma Yesus ben piki: „Libi en. . . . Bika den pôtiwan de nanga unu ala ten, èn ala ten te unu wani, unu kan du bun gi den, ma mi no de nanga unu ala ten” (Markus14:6-9). Den Dyu kerki fesiman ben e leri trawan taki a ben bun srefisrefi fu gi sani na den pôtiwan, èn taki den sortu bun disi ben kan pai gi den sondu fu wan sma. Ma Yesus fu en sei ben e sori krin taki a fasi fu gi sani di e prisiri Gado ati, no abi fu du nomo nanga moni noso tra sani di sma e gi den pôtiwan.

Te wi luku syatu fa sma ben gwenti fu gi trawan sani na a ten fu a fosi yarihondro Kresten gemeente, dan dati sa yepi wi fu kon si wan tu moi fasi fa wi kan sori taki wi e broko wi ede trutru nanga trawan. Na so wan fasi wi sa man prisiri Gado ati nanga a fasi fa wi e gi sani. Wi sa si sosrefi taki wan spesrutu fasi fu gi sani de, di e tyari moro furu wini gi trawan.

’Du bun gi sma fu di unu abi sari-ati nanga den’

Na difrenti okasi Yesus gi den disipel fu en deki-ati fu ’du bun gi den pôti sma fu di den abi sari-ati nanga den’. Tra bijbelvertaling e taki dati den ben musu „gi potiman hafoe”, noso taki den ben musu „yepi den pôtisma” (Lukas 12:33, Njoe testament nanga dem Psalm; Nyun Testamenti). Toku Yesus ben warskow den fu no du sma ai sani. Den no ben musu gi trawan sani fu suku grani gi densrefi, ma den ben musu du dati fu gi grani na Gado. A ben taigi den: ’Te unu e du pôtisma wan bun fu di un abi sari-ati nanga den, dan unu no musu du dati nanga furu pranpran, leki fa den hoigriman e du na ini den snoga èn na tapu strati so taki sma kan prèise den’ (Mateyus 6:1-4). Den fosi Kresten ben gi yesi na a frumane disi, dati meki den wai pasi gi a fasi fa den sokari santa kerki fesiman fu a ten dati ben e tyari densrefi. Den fesiman disi ben wani sori a bun-ati fu den nanga furu pranpran. Na presi fu dati den Kresten ben frukisi  fu yepi den wan di ben de na nowtu fu di den ben e du sani gi den, noso fu di den ben e gi den kado, sondro fu tra sma sabi.

Na ini Lukas 8:1-3 wi e leisi fu eksempre, taki Maria Magdalena, Yohana, Susana, nanga tra sma sosrefi, ben e gebroiki „den sani di den ben abi” fu dini Yesus nanga den apostel fu en, sondro fu bariwroko gi dati. Aladi den man disi no ben de tumusi pôti sma, toku a ben de so taki den ben libi a wroko fu den fu kan poti ala den prakseri soso na a diniwroko fu Gado (Mateyus 4:18-22; Lukas 5:27, 28). Fu di den uma disi ben yepi den fu du a wroko di Gado ben gi den, meki yu kan taki dati den uma ben e gi Gado glori. Gado sori taki a warderi san den uma disi ben du. A sorgu taki sma skrifi fu a fasi fa den sori sari-ati, so taki ala sma di ben o leisi Bijbel bakaten ben kan leisi fu dati tu.​—Odo 19:17; Hebrewsma 6:10.

Dorkas ben de wan lobi-ati uma di ’ben e du furu bun sani èn di ben e gi den pôtiwan furu presenti’. A ben lobi fu meki krosi gi den mofina weduwe fu a foto Yope, pe a ben e libi. Wi no sabi efu na ensrefi ben e bai sani fu meki den krosi dati, noso efu na yepi a ben e yepi trawan nomo fu meki krosi gi den. Ma awinsi fa a no fa, den bun wroko fu en ben meki taki ala den sma di a ben man yepi ben lobi en srefisrefi, èn taki Gado ben lobi en tu, so taki A ben blesi a bun-ati fu na uma disi.​—Tori fu den Apostel 9:36-41.

A prenspari fu gi nanga a yoisti marki

San meki den sma disi ben de klariklari fu gi sani na trawan? A no ben de nomo taki den ben e sori sari-ati fu di wan sma krei nowtu gi den. Ibri dei den ben e si en leki wan frantwortu fu du san den man fu yepi den pôtiwan, den wan di ben de na ini banawtu, den wan di ben siki, noso den wan di ben abi tra problema (Odo 3:27, 28; Yakobus 2:15, 16). A fasi disi fu gi sma sani e gi Gado prisiri. Sma e gi na a fasi disi te den abi bigi lobi gi Gado èn te den e angri fu de neleki Gado na ini a fasi fa den e sori sari-ati èn na ini a fasi fa den e sori taki den lobi fu gi sma sani.​—Mateyus 5:44, 45; Yakobus 1:17.

Na apostel Yohanes ben poti prakseri na a tumusi prenspari fasi disi fu gi sani na trawan, di a ben aksi: „Efu wan sma abi grontapu gudu èn a e si taki en brada de na nowtu, ma a no abi sari-ati gi en, dan fa a lobi fu Gado e tan na ini en?” (1 Yohanes 3:17) We wi sabi kaba san na a piki. Lobi gi Gado e meki taki sma wani yepi trawan di de na nowtu. Gado e blesi den wan di lobi fu gi sma sani neleki fa ensrefi lobi fu gi sani (Odo 22:9; 2 Korentesma 9:6-11). Noyaso sma de di lobi fu gi sani na trawan? Prakseri san feni pasa no solanga ete na ini wan gemeente fu Yehovah Kotoigi.

Wan owru Kresten uma ben e tan na ini wan brokobroko oso èn a no de fu taki dati a ben de tranga fanowdu fu seti na oso kon bun baka. A ben e libi en wawan èn a no ben abi famiri di ben kan yepi en. Yari langa a sisa disi gi pasi taki Kresten konmakandra ben kan hori na ini en oso, èn furu tron a ben e gi nyanyan na iniwan sma di ben sa wani nyan makandra nanga en (Tori fu den Apostel 16:14, 15, 40). Di den memre fu a gemeente si a problema fu a sisa disi, dan den span anu makandra fu yepi en. Son sma ben gi moni, trawan ben gi den krakti fu yepi du a wroko. Na ini wan tu satra nanga sonde den friwani wrokoman seti wan nyun daki tapu na oso fu a sisa,  nanga wan nyun wasi-oso nanga toilet. Den seti èn ferfi den sei skotu fu na oso, èn den poti nyun kukru-kasi. A fasi fa den gi sani ben puru na uma disi na nowtu, èn yepi den memre fu a gemeente fu kisi wan moro tranga banti nanga makandra, aladi a fasi fa den wrokomakandra ben sori den birtisma fa tru Kresten musu sori taki den lobi fu gi.

Someni fasi de fu yepi trawan. Kande wi kan meki ten fu poti prakseri na wan boi noso wan umapikin di no abi papa noso mama. Kande wi kan go bai sani noso nai wan krosi gi wan owru weduwe di wi sabi. Yu denki taki yu ben sa kan bori wan nyanyan noso pai fu wan sani gi wan mofinawan? Wi no abi fu de gudu sma bifo wi kan yepi trawan. Na apostel Paulus ben skrifi: „Efu a de di wan sma de klariklari fu gi, ben de kaba, dan disi bun spesrutu akruderi den sani di wan sma abi, èn no akruderi den sani di wan sma no abi” (2 Korentesma 8:12). Ma a de so dan taki Gado sa blesi wi soso te wi e gi sma sani na a fasi disi? Nôno.

Fa a de te sani musu orga fu yepi sma di de na nowtu?

Son leisi wi wawan no man puru trawan na nowtu. Fu taki en leti, Yesus nanga den apostel fu en ben seti wan moni poti fu yepi den pôtiwan, èn furu tron den ben e teki den moni di den ben kisi fu lobi-ati sma di ben e warderi a wroko fu den (Yohanes 12:6; 13:29). Na so a ben de tu taki den fosi yarihondro gemeente ben piki moni di den ben musu span anu makandra fu yepi wan heri ipi sma di ben de na nowtu.​—Tori fu den Apostel 2:44, 45; 6:1-3; 1 Timoteyus 5:9, 10.

Wan fu den okasi dati ben de na a pisi ten fu 55 G.T., di a gemeente Yudea ben ondrofeni wan tu pina ten, kande leki bakapisi fu a bigi angriten di ben de na ini a kondre (Tori fu den Apostel 11:27-30). Na apostel Paulus, di ben e broko en ede ala ten nanga den pôtiwan, ben aksi difrenti gemeente, srefi den di fu Masedonia, fu yepi den tra brada. Ensrefi ben seti sani fu piki moni, èn a gebroiki wan tu man di ben man tyari frantwortu fu tyari a moni dati gi den brada (1 Korentesma 16:1-4; Galasiasma 2:10). Paulus nanga den wan di ben yepi fu seti den tori disi, no ben wani moni kwetikweti gi a wroko di den du.​—2 Korentesma 8:20, 21.

Na so a de tu na ini a ten disi taki Yehovah Kotoigi de klariklari fu yepi te rampu e pasa. Prakseri san ben pasa na ini a yari 2001. Bigi sibibusi ben sungu furu pisi fu a foto Houston, di de na ini a distrikt Texas, na ini Amerkankondre. Ala nanga ala, dan sowan 723 oso fu Kotoigi ben broko, a wan moro ogri moro a trawan. Wantewante den ben seti wan komte fu lepi owruman di ben musu luku sortu yepi den difrenti brada nanga sisa na ini a kontren ben abi fanowdu. Den ben musu tyari moni kon na wan sosrefi fu yepi den Kotoigi na ini Texas fu yepi den nanga a situwâsi fu den èn fu seti den oso fu den kon bun baka. Friwani wrokoman fu difrenti gemeente na ini a kontren du ala den wroko di ben de fanowdu. Wan Kotoigi ben abi so furu warderi gi a yepi dati, taki di a verzekering fu en gi en moni fu seti na oso fu en kon bun baka,  dan a ben gi den brada a heri moni dati wantewante, so taki den ben kan gebroiki dati fu yepi trawan di ben de na nowtu.

Toku a de so taki te sma e orga sani fu piki moni fu yepi trawan, dan wi musu de na ai fu sabi o ten wi kan horibaka gi so wan sani. Sonwan fu den organisâsi disi abi so furu moni fanowdu fu pai wrokoman, noso fu meki propaganda, taki te fu kaba soso pikinso fu a moni di den piki e tan abra gi a sani fu san den ben piki a moni. Odo 14:15 e taki: „Ibriwan sma di no abi ondrofeni, e bribi ibri wortu, ma a koniwan e luku pe a e poti en futu.” Sobun a ben o de wan koni sani fu ondrosuku finifini fa a tori didon.

San na a moro bun fasi fu gi?

Yu abi wan fasi fu gi sani tu di de moro prenspari leki fu gi moni na wan organisâsi di e suku fu yepi sma di de na nowtu. Disi na san Yesus ben abi na prakseri di wan yongu gudu tiriman ben aksi en san a musu du fu kisi têgo libi. Yesus ben taigi en: „Go seri den sani di yu abi èn gi den pôtiwan a moni dati, dan yu sa kisi wan gudu fu hemel, èn kon waka na mi baka” (Mateyus 19:16-22). Luku taki Yesus no ben taki nomo, ’gi den pôtiwan èn dan yu sa kisi libi’. Na presi fu dati a ben taki: „Kon waka na mi baka.” Nanga tra wortu, awinsi fa a bun taki sma e yepi trawan di de na nowtu, toku wan Kresten disipel abi wan frantwortu di moro prenspari leki dati.

A moro prenspari marki fu Yesus ben de fu yepi trawan na yeye fasi. Leti bifo a dede, a ben taigi Pilatus: „Fu dati ede mi gebore èn na fu dati ede mi kon na grontapu, so taki mi kan kotoigi fu a waarheid” (Yohanes 18:37). Aladi Yesus srefi du furu fu yepi pôtisma, sikiwan, nanga sma di ben de nanga angribere, toku a moro prenspari sani di a leri den disipel fu en ben de a preikiwroko (Mateyus 10:7, 8). Fu taki en leti, dan wan fu den lasti rai di a ben gi den ben de a komando: „Fu dati ede, go na ala kondre èn meki sma tron disipel.”​—Mateyus 28:19, 20.

A no de fu taki dati a preikiwroko no sa lusu ala den problema fu grontapu. Toku a de so taki te wi e preiki a bun nyunsu fu a Kownukondre fu Gado gi ala sortu sma, dan dati e gi glori na Gado fu di en na a sma di wani taki wi musu preiki, èn a e opo a pasi gi den wan di e teki en fu kisi têgo blesi (Yohanes 17:3; 1 Timoteyus 2:3, 4). Fu san ede yu no ben sa du muiti fu luku san Yehovah Kotoigi abi fu taki te den naki na yu doro wan tra leisi? Den e tyari wan kado kon gi yu di komoto fu Gado. Den sabi taki disi na a moro bun fasi fa den kan gi yu wan sani.

[Prenki na tapu bladzijde 6]

Furu difrenti fasi de fu sori taki wi e broko wi ede nanga trawan

[Prenki na tapu bladzijde 7]

Te wi e preiki a bun nyunsu, dan dati e plisi Gado èn a e opo a pasi gi wi fu kisi têgo blesi