Aksi fu leisiman

A de wan fowtu sani fu kiri wan osometi di kon siki noso di kon grani?

Furu sma e si difrenti meti leki sani di e gi den prisiri. Son osometi kon tron meti di sma e si leki mati. Teki leki eksempre, sma sabi dagu leki meti di e gi yesi dorodoro èn den lobi den basi fu den trutru. Fu dati ede, wi kan frustan fu san ede sma lobi den osometi disi, spesrutu den osometi di den abi furu yari kaba.

Ma furu osometi no e libi tumusi langa. Son dagu nanga pusipusi kan libi 10 te go miti 15 yari. Te den kon grani, osometi kan kisi siki noso den kan kon malengri. Disi kan de wan hebi tapu den sma di abi den meti disi, fu di den e memre den yari di a meti ben de moro yongu èn di a ben abi moro krakti. A ben o de wan takru sani fu kiri den sortu meti disi?

Wan Kresten ben sa wani handri akruderi a wani fu Gado te a abi fu du nanga meti. Fu handri nanga den na wan ogri-ati fasi de teige a wani fu Gado trutru, fu di a Wortu fu en e taki: „A regtfardikiwan e sorgu gi a sili fu en osometi” (Odo12:10). Ma disi no wani taki dati Gado e si meti neleki a e si libisma. Di Gado ben meki libisma, a sori taki wan bigi difrenti de na mindri libisma nanga meti. Leki eksempre, a ben gi libisma a howpu fu tan libi fu têgo, ma noiti a ben gi meti a howpu disi (Romesma 6:23; 2 Petrus 2:12). Fu di en na a Mekiman, a abi a reti fu gi a yoisti banti na mindri libisma nanga meti.

Genesis 1:28 e sori wi san na a banti dati. Gado ben taigi a fosi libisma: „Poti na yu ondro den fisi fu se nanga den hemel mekisani di e frei, nanga ibri libi mekisani di e buweigi na grontapu.” Na so tu Psalm 8:6-8 e taki: „Ala sani yu poti na en futu ondro: skapu nanga kaw, den alamala, èn den busimeti tu, den fowru na hemel nanga den fisi fu se.”

Gado ben tyari kon na krin taki libisma ben kan gebroiki meti na wan bun fasi èn taki den ben kan kiri den tu. Fu eksempre, libisma ben kan gebroiki a skin fu den meti leki krosi. Boiti taki libisma ben kisi a primisi fu nyan sani soleki gruntu nanga froktu, dan baka a frudu na ini den dei fu Noa, Gado ben gi libisma a primisi fu nyan meti sosrefi.—Genesis 3:21; 4:4; 9:3.

A sani disi no e gi sma a reti fu kiri meti sondro reide leki sport. Na Genesis 10:9 Bijbel e kari a man Nimrod „wan makti ontiman”. Ma a srefi vers e taki moro fara taki a ben de „teige Yehovah”.

Sobun, aladi libisma abi makti abra den meti, a no musu gebroiki a makti dati na wan fasi di no fiti, ma a musu gebroiki en akruderi den gronprakseri fu Gado Wortu. Disi wani taki tu fu no meki wan osometi pina soso fu di a kon grani noso fu di a kisi hebi mankeri, noso fu di a abi wan hebi siki di kan kiri en. Te disi de so, dan a de a frantwortu fu a Kresten fu luku sortu bosroiti a o teki. Efu a e teki a bosroiti taki a de wan bun sani fu no meki na osometi tan pina moro, fu di howpu no de, dan a kan frukisi fu tyari wan kaba kon na a libi fu na osometi.