Leri fu de tevrede nanga den sani di yu abi

Di na apostel Paulus ben skrifi wan brifi gi den Kresten na ini Filipi, dan a ben gi den a deki-ati: „Mi leri fu de tevrede nanga san mi abi, awansi fa mi libi e waka. . . . Awansi fa mi libi ben waka, mi kon sabi san a wani taki fu nyan mi bere furu èn san a wani taki fu de nanga angri, èn mi kon sabi tu san a wani taki fu abi bun furu èn san a wani taki fu de na nowtu.” ​—Filipisma 4:11, 12.

San a wani taki fu de tevrede nanga den sani di wi abi, neleki fa Paulus ben du dati? Na ini a ten disi problema lai na ekonomia sei èn wi musu pai furu moni gi den sani di wi abi fanowdu na ini wi libi. Fu dati ede, a sa tyari trutru wini kon gi tru Kresten efu den e leri fu de tevrede nanga den sani di den abi, so taki den sa man tan poti prakseri na a diniwroko di den e du gi Gado.

NA INI a bigin pisi fu a brifi di Paulus ben skrifi, a ben fruteri fu a bun wroko di a ben abi bifo a tron wan Kresten. A ben taki: „Efu wan tra sma denki taki a kan frutrow tapu libisma sani, dan mi kan du dati moro srefi: mi besnèi tapu a di fu aiti dei, mi na wan sma fu Israel, fu a lo fu Benyamin, èn wan trutru Hebrewsma; te wi e taki fu a wet, dan mi ben de wan Fariseiman; te wi e taki fu sma di de nanga faya, dan mi ben frufolgu a gemeente fayafaya; te wi e taki fu sma di de regtfardiki fu di den du san a wet e taki, dan mi ben de sondro fowtu” (Filipisma 3:4-6). Boiti dati, fu di Paulus ben de wan fayafaya Dyu meki den edeman-priester na ini Yerusalem ben e gi en spesrutu wroko èn den ben horibaka gi en. Disi ben wani taki dati Paulus ben o kisi biginen èn a ben o kisi makti na ini politiek afersi, na ini afersi di abi fu du nanga a Dyu kerki èn a no de fu taki dati a ben o tron wan guduman na ini a Dyu libimakandra.​—Tori fu den Apostel 26:10, 12.

Ma di Paulus tron wan fayafaya Kresten dinari, dan a ben tyari bigi kenki kon na ini en libi. Fu a bun nyunsu ede, a ben de klariklari fu libi a bun wroko nanga den frantwortu di a ben abi na ini a Dyu libimakandra (Filipisma 3:7, 8). Fa a ben o sorgu ensrefi now? A ben o kisi moni fu di a ben de wan dinari? Fa a ben o sorgu gi den sani di a ben abi fanowdu na ini en libi?

Paulus ben du a diniwroko fu en sondro taki a ben e kisi moni gi disi. Sobun, fu di Paulus no ben wani de wan hebi gi den sma gi suma a ben e preiki, meki a ben e wroko fu meki tenti makandra nanga Akwila èn nanga Preskela di a ben de na Korente, èn a ben e du tra sani tu so taki a ben man sorgu ensrefi (Tori fu den Apostel 18:1-3; 1 Tesalonikasma 2:9; 2 Tesalonikasma 3:8-10). Paulus ben teki waka go dri leisi leki zendeling na furu presi, èn a ben e go na den gemeente di ben abi yepi fanowdu sosrefi. Fu di a ben abi furu fu du na ini a diniwroko fu Gado, meki a no ben abi furu gudu. Furu tron den brada ben e gi en den sani di a ben abi fanowdu. Ma son tron a ben pina fu di a ben de na ini muilek situwâsi pe a no ben abi san ben de fanowdu (2 Korentesma 11:27; Filipisma 4:15-18). Ma toku, noiti Paulus ben kragi fu den problema di a ben abi, èn a no ben abi bigi-ai tapu den sani di trawan ben abi. Nanga prisiri a ben e wroko tranga gi a bun fu  den Kresten brada nanga sisa fu en. Fu taki en leti, dan na Paulus ben taki den wortu fu Yesus di ala sma sabi: „Wan sma sa de moro koloku te a e gi sani, leki te a e kisi sani.” Disi na wan tumusi moi eksempre gi wi alamala!​—Tori fu den Apostel 20:33-35.

San a wani taki fu de tevrede nanga den sani di yu abi

A moro prenspari sani di meki taki Paulus ben de koloku, ben de taki a ben frustan san a wani taki fu de tevrede nanga den sani di a ben abi. Ma san a wani taki fu de tevrede nanga den sani di yu abi? Fu taki en leki fa a de, dan a wani taki dati wan sma de tevrede te a abi den moro prenspari sani di a abi fanowdu na ini en libi. Paulus ben taigi Timoteyus, di ben e wroko makandra nanga en na ini a diniwroko: „Seiker a de wan sani di e gi furu wini, a dini di sma e dini Gado fayafaya makandra nanga a tevrede di sma tevrede nanga den sani di den abi. Bika wi no tyari noti kon na grontapu, èn nowan sani wi kan tyari komoto na en tu. Sobun, te wi abi nyanyan, krosi nanga wan presi fu tan, dan wi sa de tevrede nanga den sani disi.”​—1 Timoteyus 6:6-8.

Luku taki Paulus e sori dati a tevrede di wan sma tevrede e go makandra nanga a dini di wan sma e dini Gado fayafaya. A e sori taki te wan sma e dini Gado fayafaya, dan a sa de koloku trutru, fu di a e poti a diniwroko di a e du gi Gado na a fosi presi na ini en libi. A no e sori taki wan sma sa de koloku te a e poti den gudu di a abi na a fosi presi. „Nyanyan, krosi nanga wan presi fu tan”, ben de den wan-enkri sani di Paulus ben abi fanowdu fu man tan dini Gado fayafaya. Sobun, fu de tevrede nanga den sani di Paulus ben abi, ben wani taki gi en fu frutrow tapu Yehovah, awansi na ini sortu situwâsi a de.

Furu sma na ini a ten disi abi furu broko-ede èn den no de koloku, fu di den no sabi fa fu de tevrede noso den no wani de tevrede nanga den sani di den abi. Na presi fu de tevrede nanga san  den abi, den e frutrow tapu a moni fu den, noso tapu den sani di den man bai nanga a moni. A bisnis di e meki reklame èn sosrefi radio, telefisi, nanga koranti, e meki sma denki taki den no man de koloku efu den no abi den moro nyun sani di sma e meki noso den moro diri wrokosani. Den e meki sma denki taki den musu abi den sortu sani disi wantewante. Fu dati ede, furu sma e fadon na ini a trapu fu feti fu kisi moni nanga gudu. Na presi fu kon koloku, den „e kon ini wan tesi èn wan trapu èn furu don èn takru lostu, di e meki sma fadon go na ini pori”.​—1 Timoteyus 6:9, 10.

Sma di leri fu de tevrede nanga san den abi

Wan sma man de koloku na ini a ten disi te a e dini Gado fayafaya èn te a de tevrede nanga san a abi? Iya, dati man. Fu taki en leti, milyunmilyun sma na ini a ten disi e du dati. Den leri fu de tevrede nanga den sani di den abi. Den sma disi na Yehovah Kotoigi di gi densrefi abra na Gado, di e du en wani èn di e leri sma na ala presi san a abi na prakseri.

 Luku fu eksempre den wan di de klariklari fu kisi leri fu man go leki zendeling na kondre di den no sabi, so taki den kan preiki a bun nyunsu fu Gado Kownukondre drape (Mateyus 24:14). Furu tron, den e go na kondre di pôti èn drape den no abi den sani di den ben gwenti fu abi. Fu eksempre, na ini 1947 den zendeling ben doro na ini wan kondre na ini Asia. Den bakapisi fu na orloku ben de fu si ete na ini a kondre èn wan tu oso nomo ben abi stroom. Na ini furu kondre, den zendeling ben e si taki sma ben e wasi den krosi na tapu wan gruma noso na tapu ston na ini liba, na presi fu wasi den na ini wan wasmasyin. Ma den zendeling ben go na den kondre disi fu leri sma den tru tori fu Bijbel, dati meki den ben fiti densrefi na a situwâsi fu a presi pe den de èn den bigin du a diniwroko fayafaya.

Trawan di no de zendeling, ben go na ini a furuten diniwroko, noso den ben froisi go na presi pe sma no ben yere a bun nyunsu ete. Adulfo dini moro leki 50 yari kaba leki furuten dinari na difrenti presi na ini Meksikow. A e taki: „Neleki na apostel Paulus, mi nanga mi wefi ben leri fu fiti wisrefi na den situwâsi fu a presi pe wi ben de. Fu eksempre, wan fu den gemeente di wi ben fisiti, ben de fara fu iniwan foto noso wowoyo. Den brada ben man nyan soso wán tortilla (wan sortu pan-kuku di meki fu karu) nanga pikinso agu fatu nanga sowtu nanga wán kan kofi. Dati ben de a wan-enkri sani di den ben man nyan, dri tortillas ibri dei. Sobun, wi ben leri fu libi neleki fa den brada ben e libi. Mi prisiri fu ondrofeni den sani disi na ini den 54 yari di mi dini Yehovah na ini a furuten diniwroko.”

Florentino e memre fa en nanga a famiri fu en ben musu fiti densrefi na muilek situwâsi di ben kon. Te a e memre fa a ben de fositen, dan a e taki: „Mi papa ben de wan guduman di ben e bai èn seri sani èn a bisnis fu en ben waka bun. A ben abi furu pisi gron. Mi e memre a tafra ete na ini a wenkri di wi ben abi. A tafra ben abi wan la di ben bradi sowan 50 centimeter èn di ben hei sowan 20 centimeter, èn a ben prati na ini fo pisi. Drape wi ben e poti a moni di sma ben pai wi te den ben kon bai sani na ini a wenkri. Na a kaba fu ibri dei, a la disi ben lai nanga moni.

Dan wantronso wi libi ben kenki, wi ben lasi furu moni èn dati meki taki wi kon pôti. Wi ben abi noti moro boiti na oso fu wi. Boiti dati, wan fu den brada fu mi ben kisi mankeri èn a kon malengri. Ala sani ben kon kenki. Fu wan pisi ten mi ben abi leki wroko fu seri froktu nanga meti. Mi ben piki katun, droifi, nanga wan sortu gro-pesi di sma e kari alfalfa, èn mi ben yepi fu nati den gron sosrefi. Sma ben sabi mi leki wan sma di ben man du ala sortu wroko. Furu tron mi mama ben trowstu wi fu di a ben taki dati wi abi a waarheid, di meki taki wi ben gudu na yeye fasi èn dati ben de wan sani di furu sma no ben abi. Sobun, mi leri san a wani taki fu abi furu èn sosrefi san a wani taki fu abi pikinso nomo noso fu abi noti. Now mi de wan furuten dinari fu Yehovah 25 yari kaba, èn mi kan taki dati ibri dei mi e prisiri fu di mi sabi taki mi teki a moro bun fasi fu libi; dati na fu du furuten diniwroko gi Yehovah.”

Bijbel e taigi wi krin taki „A komediprei fu a grontapu disi e kenki”. Fu dati ede wi e kisi a deki-ati tu: „Meki den wan di e prisiri de neleki den wan di no e prisiri, èn meki den wan di e bai sani de neleki den wan di no abi noti, èn den wan di e gebroiki grontapu neleki den no e gebroiki en dorodoro.”​—1 Korentesma 7:29-31.

Fu dati ede, now na a ten fu ondrosuku a fasi fa yu e libi. Efu yu no abi ala den sani di yu abi fanowdu na ini yu libi, dan yu musu luku bun taki yu no e atibron fu di yu no abi den sani disi, noso yu musu luku bun taki yu no e dyarusu tapu tra sma srefi. Na a tra sei, a sa de wan koni sani efu yu e poti den gudu di yu abi, tapu a yoisti presi na ini yu libi. Na so wan fasi, den gudu fu yu no sa teki a moro prenspari presi na ini yu libi. Soleki fa na apostel Paulus ben warskow, dan yu no musu poti yu howpu „tapu gudu di no e gi seikerfasi, ma tapu Gado di e gi wi ala sani bogobogo fu prisiri fu den”. Efu yu e du dati, dan yusrefi kan taki tu dati yu leri fu de tevrede nanga den sani di yu abi.​—1 Timoteyus 6:17-19.

[Prenki na tapu bladzijde 9]

Paulus ben wroko nanga en eigi anu so taki a no ben sa de wan hebi gi trawan

[Prenki na tapu bladzijde 10]

Dusundusun sma e feni koloku na ini den libi fu di den e ’dini Gado fayafaya èn fu di den de tevrede nanga den sani di den abi’