„No frede, èn no skreki”

„No frede, èn no skreki. . . . Yehovah sa de nanga unu.”​—2 KRONIKI 20:17.

1. Sortu krakti terrorisme abi tapu sma, èn fu san ede den abi leti fu frede?

TERRORISME! Soso a wortu disi nomo e meki sma ati dyompo kaba, bika a abi fu du nanga ogri-ati sani di sma e du fu gens tirimakti. Te sma e yere a wortu disi, dan den e bigin frede taki den kan lasi den libi èn den firi leki den no man du noti fu kibri densrefi. A wortu disi e skreki sma, a e meki den firi sari, ma na a srefi ten a e meki den atibron tu. Furu sma e frede taki terrorisme na wan sani di o tan trobi libisma furu yari ete. Wan tu kondre pruberi someni yari langa fu tyari wan kaba kon na ala den sortu fasi fu terrorisme, ma den no ben man wini a feti disi krinkrin. Disi e meki sma frede moro.

2. Fa Yehovah Kotoigi e si a problema fu terrorisme? Sortu aksi e opo kon?

² Toku wi kan abi a howpu trutru taki sani o kenki. Yehovah Kotoigi, di e preiki na ini 234 kondre nanga kontren na grontapu, e bribi trutru taki sani o kenki kon bun baka. Den no de leki den sma di e frede taki noiti wan kaba o kon na terrorisme, ma den abi na overtoigi taki a sa kon na wan kaba heri esi. Wi kan abi a srefi overtoigi leki den? Suma ben o man frulusu  grontapu fu a banawtu disi, èn fa dati ben kan pasa? Kande ibriwan fu wi si noso ondrofeni wan ogri-ati sani di hati wi. Fu dati ede a ben o bun fu luku fu san ede wi kan abi a howpu taki sani sa kon bun baka.

3. Sortu sani e meki taki sma e frede, èn san Paulus ben taki na fesi fu a ten fu wi?

³ Na ini a ten disi, furu sani e meki taki sma e frede. Prakseri den someni sma di no man sorgu densrefi moro fu di den kon owru, noso den sma di kon swaki fu di den abi wan siki fu san den no man kon betre. Prakseri sosrefi den osofamiri di e feti fu wroko nofo moni soso fu kan bai den sani di den abi fanowdu. Fu taki en leti, wi no sabi srefi fa a libi fu wi sa waka! Wi ben sa kan lasi wi libi wantronso na ini wan onkoloku noso wan rampu, èn nanga dati wi e lasi ala den sani di wi lobi. Boiti den sorgu disi, furu problema e opo kon na mindri sma, èn furu sani e meki sma lasi-ati. Ala den sani di e pasa na ini a ten disi de soifri soleki fa Paulus ben taki: „Sabi taki na ini den lasti dei muilek ten o de di tranga fu pasa. Bika sma sa lobi densrefi nomo, . . . den no sa lobi tra sma, den no sa wani meki kruderi, den sa de ogri-ati leiman, den no sa man dwengi densrefi, den sa du sani nanga trawan na wan ogri-ati fasi, den no sa lobi bun sani.”​—2 Timoteyus 3:1-3.

4. Aladi 2 Timoteyus 3:1-3 e taki dati muilek ten ben o kon, toku sortu howpu a bijbeltekst dati e gi wi?

⁴ Aladi a bijbeltekst disi e taki dati muilek ten ben o kon, toku a e sori taki howpu de. Luku taki den muilek situwâsi ben o de „na ini den lasti dei” fu na ogri grontapu fu Satan. Disi wani taki dati heri esi wan kaba sa kon na den problema fu libisma, èn taki dyonsro na ogri grontapu sa meki presi gi a tiri fu a volmaakti Kownukondre fu Gado, fu san Yesus ben leri den bakaman fu en fu begi gi dati (Mateyus 6:9, 10). A Kownukondre dati na a hemel tirimakti fu Gado, di „noiti no sa kisi pori”, na so a profeiti Danièl e taki, ma „a sa broko ala den [libisma] kownukondre disi na pisipisi èn tyari wan kaba kon na den, èn ensrefi sa tan te ten di no skotu”.​—Danièl 2:44.

Kresten de tra fasi leki sma di e horibaka gi terrorisme, fu di den no abi noti fu du nanga politiek

5. San wan tu kondre du di den si taki den ogri-ati sani di sma e du fu gens tirimakti kan pasa nanga den sosrefi?

⁵ Na ini den someni tenti yari di pasa, den ogri-ati sani di sma du fu gens tirimakti meki taki dusundusun sma lasi den libi. Baka a rampu fu 11 september 2001 na ini New York City nanga Washington D.C., sma na heri grontapu kon frustan taki den ogri-ati sani disi kan pasa nanga den sosrefi. Fu di a sani disi e pasa furu èn fu di a kan pasa na ala sei fu grontapu, meki esi-esi wan tu kondre bondru kon na wán fu feti terrorisme. Fu eksempre, nyunsu ben taki dati tapu 4 december 2001, „den minister fu dorosei afersi fu 55 kondre na ini Europa, Noord-Amerika, nanga Centraal-Asia ben kon na wán èn den alamala ben agri taki den ben o span anu makandra” fu lusu a problema fu terrorisme. Wan hei tiriman fu Amerkankondre ben prèise den taki a sani di den du ben de leki „nyun krakti” fu feti terrorisme. Wantronso, hondrohondro milyun sma ben poti ala den prakseri na san The New York Times Magazine ben kari „a bigin fu wan tumusi prenspari feti na ini historia”. Ten sa sori efu den muiti disi o abi bun bakapisi. Toku furu sma e frede den sani di kan pasa te  trawan o pruberi fu feti terrorisme, ma dati no de so nanga den wan di e frutrow tapu Yehovah.

6. (a) Fu san ede son sma no man frustan son leisi taki Yehovah Kotoigi no e teki prati na politiek afersi? (b) Te a abi fu du nanga politiek afersi, dan sortu eksempre Yesus gi den bakaman fu en?

⁶ Na ala presi, sma sabi taki Yehovah Kotoigi no abi noti fu du nanga politiek. Na ini ten fu vrede, furu sma no abi trobi nanga a bosroiti di den Kotoigi e teki fu no teki prati na politiek afersi, ma den no man frudrage a sani disi te aparti situwâsi e opo kon. Furu tron te feti e broko, dan frede e meki taki sma de klariklari fu feti gi a kondre fu den. Fu dati ede a kan taki son sma no man frustan fu san ede trawan no ben sa wani horibaka gi barinen organisâsi fu a kondre. Toku tru Kresten sabi taki den musu gi yesi na Yesus di komanderi den fu „no de wan pisi fu grontapu” (Yohanes 15:19; 17:14-16; 18:36; Yakobus 4:4). Disi wani taki dati den no e bumui nanga politiek afersi noso nanga a fasi fa sani e waka na ini a libimakandra. Yesus srefi ben gi a yoisti eksempre. Leki volmaakti sma, Yesus ben koni srefisrefi èn a ben man du furu sani heri bun. Sobun, a ben kan gebroiki a koni disi fu meki sani waka moro bun na ini a libimakandra fu en ten. Toku a no ben wani abi noti fu du nanga politiek. Na a bigin fu en diniwroko, a ben weigri fu tron tiriman fu ala den grontapu kownukondre di Satan ben wani gi en. Bakaten, di sma ben wani gi en politiek makti, dan a no draidrai, ma a gowe wantewante.​—Mateyus 4:8-10; Yohanes 6:14, 15.

7, 8. (a) San Yehovah Kotoigi no sa du fu di den e hori densrefi aparti fu politiek afersi, èn fu san ede? (b) Fa Romesma 13:1, 2 e sori taki wi no musu teki prati na ogri-ati sani di sma e du teige tirimakti?

⁷ A hori di Yehovah Kotoigi e hori densrefi aparti fu politiek afersi no wani taki dati den e agri noso e horibaka gi den ogri-ati sani di sma e du fu hati trawan. Efu den ben o du dati, dan den no ben o de futuboi trutru fu „a Gado fu lobi èn fu vrede” soleki fa den e taki (2 Korentesma 13:11). Den kon sabi fa Yehovah e denki fu den ogri-ati sani di sma e du. A psalm skrifiman ben skrifi: „Yehovah srefi e ondrosuku a regtfardikisma, sosrefi a sma di e du ogri, èn En sili kwetikweti no lobi wan sma di lobi ogri di e du nanga tranga” (Psalm 11:5). Den sabi tu san Yesus ben taigi na apostel Petrus: „Poti yu feti-owru na en presi baka, bika a sma di e teki a feti-owru, na a feti-owru o kiri en.”​—Mateyus 26:52.

⁸ Aladi historia e sori krin taki falsi Kresten gebroiki „a feti-owru” furu tron, toku disi no de so nanga Yehovah Kotoigi. Den no e teki prati na nowan sani di abi fu du nanga feti. Den Kotoigi e tan gi yesi na a frumane fu Romesma 13:1, 2: „Ibri sma musu saka ensrefi na ondro den tiriman fu lanti, bika nowan sma kan tiri sondro a primisi fu Gado; na Gado poti den tiriman di de now, ma a no poti den na a srefi presi leki di fu en. Fu dati ede, efu wan sma e gens den tiriman, dan a e gens a seti fu Gado tu; den sma di e gens a seti disi, o tyari strafu kon na tapu densrefi.”

9. San na den tu fasi fa Yehovah Kotoigi e feti terrorisme?

⁹ Ma efu terrorisme takru so, dan a no de so taki Yehovah Kotoigi musu du wan sani fu yepi tyari wan kaba kon na dati? Iya, den musu du wan sani, èn na dati den e du trutru. Na a fosi presi, densrefi no e teki prati na nowan sani di abi fu du nanga terrorisme. A tra sani na taki den e leri sma Kresten gronprakseri, èn te den sma e fiti den gronprakseri disi na ini den libi, dan dati e meki den tapu nanga ala sortu ogridu. * A yari di pasa, den Kotoigi ben wroko 1.202.381.302 yuru fu yepi sma fu leri sabi a fasi fu libi di e fiti wan Kresten. Disi no ben de lasi ten, bika a bakapisi fu a wroko dati ben de taki 265.469 sma teki dopu leki Kotoigi fu Yehovah. Na so fasi den sori ala sma taki den e weigri krinkrin fu du sma ogri.

10. A de so taki wan kaba sa kon na ala ogridu na ini a grontapu disi?

¹⁰ Boiti dati, Yehovah Kotoigi sabi taki densrefi no man puru ala ogridu fu grontapu. Na fu  dati ede den e poti ala den frutrow tapu a sma di kan du dati, namku Yehovah Gado (Psalm 83:18). Libisma no sa man tyari wan kaba kon na ogridu, awinsi den e meki muiti trutru. Ondro a krakti fu santa yeye, a Bijbel skrifiman ben warskow wi na fesi san ben o pasa na ini a ten fu wi, noso na ini „den lasti dei”, èn a e taki: „Ogri sma nanga bedrigiman sa kon ogri moro nanga moro; den o kori trawan èn trawan o kori den” (2 Timoteyus 3:1, 13). Soleki fa a tekst e sori, dan den muiti di libisma e meki fu wini a feti teige ala ogri, no sa abi bun bakapisi trutru. Na a tra sei, wi kan frutrow tapu Yehovah taki a sa puru ala ogridu fu ala ten.​—Psalm 37:1, 2, 9-11; Odo 24:19, 20; Yesaya 60:18.

Den no frede aladi Gog de fu kon feti nanga den

11. San Yehovah du kaba fu tyari wan kaba kon na ogridu?

¹¹ Fu di a Gado fu vrede no lobi ogridu kwetikweti, meki wi kan frustan fu san ede a seti sani fu puru a sma di de frantwortu gi dati, namku Satan Didibri. Fu taki en leti, Gado meki Satan kisi bigi syen kaba di Satan ben lasi a feti nanga a gran engel Mikael, a nyun Kownu di Gado poti, namku Krestes Yesus. Bijbel e fruteri wi san ben pasa: „Wan feti bigin na ini hemel: Mikael nanga den engel fu en ben feti nanga a bigi kaiman èn a bigi kaiman nanga den engel fu en ben feti, ma a bigi kaiman no ben wini, èn presi no ben de moro tu gi den na ini hemel. Fu dati ede, a bigi kaiman ben fringi go na ondro, a fosi sneki di den e kari Didibri nanga Satan, èn di e kori a heri grontapu pe sma e libi; a fringi go na grontapu èn den engel fu en ben fringi go na ondro tu makandra nanga en.”​—Openbaring 12:7-9.

12, 13. (a) Sortu prenspari sani ben pasa na ini 1914? (b) San o pasa nanga den sma di e horibaka gi a Kownukondre fu Gado, soleki fa a profeititori fu Esekièl e fruteri na fesi?

¹² Te wi e luku a Bijbel historia nanga den sani di pasa na grontapu, dan den e sori taki 1914 na a yari di a feti dati ben feni presi na ini hemel. Sensi a ten dati, a libi na grontapu kon moro ogri. Openbaring 12:12 e fruteri wi fu san ede dati de so. Drape skrifi: „Fu dati ede un hemel èn unu di e tan drape, un musu prisiri! Ma helu fu grontapu èn fu a se, bika Didibri saka kon na unu èn a abi bigi atibron fu di a sabi taki a no abi furu ten moro.”

¹³ A no de fu taki dati Didibri e suku fu puru en atibron spesrutu tapu den salfu anbegiman fu Gado èn tapu den kompe fu den, den „tra skapu” (Yohanes 10:16; Openbaring 12:17). A gens di Didibri e gens den sa doro wan heimarki te a sa bigin wan bigi feti teige ala den sma di e horibaka gi a Kownukondre fu Gado èn di e frutrow tapu a Kownukondre dati. Satan sa gebroiki ala san a man fu feti a bigi feti disi, di Esekièl kapitel 38 e kari a feti fu „Gog fu a kondre Magog”.

14. Sortu yepi Yehovah Kotoigi ben kisi na ini a ten di pasa? A de so taki den sa tan kisi a yepi disi?

¹⁴ Sensi a ten di Gado ben fringi Satan komopo fu hemel, dan Satan ben gens a pipel fu Gado. Ma soleki fa Openbaring 12:15, 16 e sori nanga yepi fu wan agersitori, dan son leisi wan tu politiek organisâsi yepi den so taki Satan no ben man du den ogri. Tra fasi leki dati, Bijbel e sori taki na ini a lasti feti fu Satan, nowan  libisma organisâsi sa kon yepi den wan di e frutrow tapu Yehovah. A sani disi musu frede noso skreki Kresten? Kwetikweti!

15, 16. (a) Fa a dyaranti di Yehovah ben gi en pipel na ini a ten fu Yosafat e gi Kresten howpu na ini a ten disi? (b) Sortu eksempre Yosafat nanga a pipel gi den futuboi fu Gado na ini ten disi?

¹⁵ Wi kan de seiker taki Gado sa horibaka gi a pipel fu en, soleki fa a ben horibaka gi a nâsi di a ben gebroiki leki eksempre na ini a ten fu Kownu Yosafat. Wi e leisi: „Un arki, heri Yuda nanga unu di e libi na Yerusalem èn kownu Yosafat! Disi na san Yehovah taigi unu: ’No frede, èn no skreki fu a bigi ipi disi; bika a no un feti, ma fu Gado. . . . Na a okasi disi unu no sa abi fu feti. Teki a posisi fu unu, tan tanapu èn si a frulusu di Yehovah o gi fu a bun fu unu ede. O Yuda nanga Yerusalem, no frede, èn no skreki. Opo go na den tamara, èn Yehovah sa de nanga unu.’”​—2 Kroniki 20:15-17.

¹⁶ A pipel fu Yuda ben kisi a dyaranti taki den no ben o abi fu feti. Sosrefi, te Gog fu Magog e kon feti nanga a pipel fu Gado, dan den no sa gebroiki fetisani fu kibri a libi fu den. Na presi fu dati, den sa ’tan tanapu èn den sa si fa Yehovah sa frulusu den’. A no de fu taki, dati a tan di den musu tan tanapu no wani taki dati den no musu du notinoti. A pipel fu Gado na ini a ten fu Yosafat no ben tan tanapu tu sondro fu du wan sani. Wi e leisi: „Wantewante Yosafat ben boigi ensrefi nanga en fesi go na gron, èn heri Yuda nanga ala den sma di ben libi na Yerusalem srefi, ben boigi nanga den fesi go na gron na fesi fu Yehovah fu gi Yehovah grani. . . . Moro fara, [Yosafat] nanga a pipel ben poti mofo makandra èn a ben meki den singiman go tanapu na den presi na fesi Yehovah èn den wan di e tyari prèise na ini santa fesakrosi, aladi den ben waka na fesi fu den man di ben tyari fetisani, èn den ben taki: „Un gi Yehovah prèise, bika a lobi bun-atifasi fu en, de te ten di no skotu” (2 Kroniki 20:18-21). Iya, aladi den feanti ben kon feti nanga den, toku a pipel tan go doro fu prèise Yehovah. Na eksempre disi e sori san Kotoigi fu Yehovah musu du te Gog sa kon feti nanga den.

17, 18. (a) Fa Yehovah Kotoigi e si a feti di Gog sa kon feti nanga den? (b) Sortu frumane Kresten yonguwan kisi no so langa pasa?

¹⁷ Teleki a ten te Gog e kon feti nanga den Kotoigi fu Yehovah èn srefi baka dati, den sa tan go doro fu horibaka gi a Kownukondre fu Gado. Den sa tan kisi krakti nanga kibri na ini den moro leki 94.600 gemeente na heri grontapu  (Yesaya 26:20). Fu tru, now na a yoisti ten fu prèise Yehovah nanga deki-ati! Iya, den sabi taki heri esi Gog sa kon feti nanga den, ma dati no e frede den kwetikweti. Na presi fu dati, den e kisi deki-ati fu du ala san den man fu prèise Gado moro.​—Psalm 146:2.

¹⁸ Dusundusun yonguwan na ala sei fu grontapu e sori a deki-ati disi na wan tumusi moi fasi fu di den go na ini a furuten diniwroko. Fu tyari kon na krin taki dati na a moro bun wroko di wan sma kan teki, dan a traktaat Yonguwan​—San unu o du nanga un libi?, ben tyari kon na doro na den distrikt kongres fu 2002. Kresten yonguwan èn sosrefi owruwan e warderi den frumane disi di e kon na a yoisti ten.​—Psalm 119:14, 24, 99, 119, 129, 146.

19, 20. (a) Fu san ede Kresten no abi fu frede noso skreki? (b) San na artikel di e kon sa du gi wi?

¹⁹ Awinsi san e pasa na grontapu, Kresten no abi fu frede noso skreki fu den sani dati. Den sabi taki heri esi a Kownukondre fu Yehovah sa tyari wan kaba kon fu ala ten na ala den ogri-ati sani di sma e du. Den e kisi trowstu tu fu di den sabi taki furu sma di lasi den libi fu den ogri-ati sani disi ede, sa kisi libi baka nanga yepi fu na opobaka. Disi sa meki taki son sma sa kisi na okasi fu a fosi leisi fu kon leri sabi Yehovah, èn a sa meki taki trawan sa man tan go doro fu dini en na wan getrow fasi.​—Tori fu den Apostel 24:15.

²⁰ Leki tru Kresten, wi e frustan taki wi musu hori wisrefi aparti fu politiek afersi èn wi sa du ala san wi man fu hori wisrefi na a bosroiti dati. Wi wani tan abi a moi howpu taki wi sa man „tan tanapu èn si a frulusu di Yehovah o gi”. Na artikel di e kon sa tranga a bribi fu wi. A sa meki wi poti prakseri na sani di e pasa na ini a ten disi èn di e meki wi frustan moro bun fa Bijbel profeititori e kon tru.

[Futuwortu]

Yu kan tyari disi kon na krin?

• Fu san ede furu sma na ini a ten disi no abi a howpu taki sani sa kenki kon bun baka?

• Fu san ede Yehovah Kotoigi e bribi taki sani sa kon bun na ini a ten di e kon?

• San Yehovah du kaba nanga a sma di de frantwortu gi ala den ogri-ati sani di sma e du?

• Fu san ede wi no abi fu frede gi a feti di Gog sa kon feti nanga wi?

[Aksi fu a tori disi]

[Prenki na tapu bladzijde 13]

Yesus ben gi wi a yoisti eksempre fa wi musu hori wisrefi aparti fu politiek afersi

[Prenki na tapu bladzijde 16]

Dusundusun yongu Kotoigi e du a furuten diniwroko nanga prisiri

[Sma di abi a reti fu a prenki na tapu bladzijde 12]

UN PHOTO 186226/M. Grafman