’Salomo srefi no ben weri so moi leki wan fu den bromki disi’

DEN busi-bromki, leki den wan di yu kan si na tapu a bladzijde disi, de fu si na furu sei pasi na ini kondre fu a zuidsei fu Afrika. Sma e kari den bromki disi kosmos èn den komoto fu a kontren di de wan pisi fu Midden-Amerika nanga Zuid-Amerika. Te yu e si den moi busi-bromki disi, dan yu kan prakseri wan les di Yesus ben leri sma. Furu fu den arkiman ben de pôti sma, èn den ben e broko den ede nanga den sani di den ben abi fanowdu, namku nyanyan nanga krosi.

Ini a tori fu krosi Yesus ben aksi den: „Fu san ede unu e broko un ede nanga san unu sa weri? Leri wan sani fu den bromki na ini a sabana èn luku fa den e gro; den no e wroko tranga èn den no e brei titei; ma mi e taigi unu taki srefi Salomo di ben abi someni glori no ben weri so moi leki wan fu den bromki disi.”—Mateyus 6:28, 29.

Sma e taki difrenti sani fu a spesrutu sortu bromki di Yesus ben abi na prakseri. Ma Yesus ben agersi den busi-bromki nanga prani di a ben taki: „We, Gado e meki den sani di e gro na ini a sabana weri so moi, sani di de tide ma tamara sma e trowe den go na ini onfu; efu dati de so, dan a no sa sorgu unu moro betre fu gi unu sani fu weri, unu di no e bribi nofo?”—Mateyus 6:30.

Aladi kosmos a no wan bromki di komoto fu Israel, toku den e horibaka gi den sani di Yesus ben leri. Awinsi wi e luku den bromki fu farawe noso fu krosibei, den de tumusi moi èn sma lobi meki fowtow fu den, noso fu teken den. Trutru, Yesus no ben e dyaf di a ben taki: „Srefi Salomo di ben abi someni glori no ben weri so moi leki wan fu den bromki disi.”

San wi kan leri fu den sani na ini a ten disi? Den sma di e dini Gado kan de seiker taki a sa yepi den fu kisi den sani di den abi fanowdu, srefi na ini muilek ten. Yesus ben fruklari: „Tan suku a kownukondre [fu Gado], èn unu o kisi ala den sani disi [sani soleki nyanyan nanga krosi] tu.”(Lukas 12:31). Iya, wi e kisi trutru wini te wi e suku Gado en Kownukondre. Ma yu sabi san na a Kownukondre fu Gado èn san na en wani gi a libisma famiri? Yehovah Kotoigi ben o feni en wan prisiri fu yepi yu fu feni piki na ini Bijbel tapu den aksi fu yu.