Tan tanapu èn si a frulusu di Yehovah o gi!

„Teki a posisi fu unu, tan tanapu èn si a frulusu di Yehovah o gi fu a bun fu unu ede.”​—2 KRONIKI 20:17.

1, 2. Fu san ede a feti fu „Gog fu a kondre Magog” moro seryusu leki a problema fu terrorisme di de na heri grontapu?

SON sma e taki dati terrorisme na wan feti teige a heri grontapu libimakandra. A no de fu taki dati a de fanowdu trutru fu teki a sani disi seryusu. Na a tra sei, wan tra feti de di moro seryusu srefi, ma sma na grontapu no e poti so furu prakseri na dati. San na a feti disi?

² A de a feti fu „Gog fu a kondre Magog” fu san Bijbel e taki na ini Esekièl kapitel 38. Na dyaf wi e dyaf te wi e taki dati a feti disi moro  seryusu leki a problema fu terrorisme na heri grontapu? Kwetikweti, bika a feti fu Gog no de wan feti teige libisma tirimakti nomo. A feti fu en de teige a hemel tirimakti fu Gado! Libisma no man kakafutu gi ala den sani di trawan e du fu gens a tirimakti fu den. Ma tra fasi leki dati, a Mekiman abi ala makti fu wini a feti nanga Gog, di moro ogri leki sani di libisma man du.

Sma e opo densrefi teige a tirimakti fu Gado

3. Sortu kari grontapu tiriman kisi sensi 1914, èn san den du?

³ Sensi Gado ben seti a Kownukondre na hemel na ini 1914, dan problema ben de kaba na mindri a nyun Kownu fu Gado di e tiri now èn na ogri seti fu sani fu Satan. Na a ten dati, libisma tiriman ben kisi a kari fu saka densrefi na ondro a Tiriman di Gado poti. Ma den weigri fu du dati, soleki fa Bijbel ben taki na fesi: „Den kownu fu grontapu seti densrefi èn den hei man fu kondre srefi ben kon makandra leki wán man teige Yehovah èn teige a salfuwan fu en, èn den e taki: ’Meki wi go priti den banti fu den èn trowe den titei fu den gowe fu wi!’” (Psalm 2:1-3) Soleki fa a sori, dan na opo di den e opo densrefi teige a Kownukondre tiri sa doro wan heimarki na ini a feti fu Gog fu Magog.

4, 5. Fa libisma kan feti teige a hemel tirimakti fu Gado di den no man si?

⁴ Wi e aksi wisrefi kande fa libisma kan feti nanga wan hemel tirimakti di den no man si. Bijbel e sori taki den tiriman fu a hemel tirimakti disi na „den wán hondro fotenti na fo dusun di bai puru fu grontapu”, makandra nanga „a Pikin Skapu”, Krestes Yesus (Openbaring 14:1, 3; Yohanes 1:29). Fu di a nyun tirimakti disi de na ini hemel, meki Bijbel e kari en den „nyun hemel”, èn a no de fu taki dati a  e kari den borgu fu en na grontapu „wan nyun grontapu” (Yesaya 65:17; 2 Petrus 3:13). Furu fu den 144.000 sma di o tiri makandra nanga Krestes tan getrow teleki a libi fu den na grontapu kon na wan kaba. Na so fasi den sori taki den warti fu du a nyun wroko di den kisi fu du na ini hemel.

⁵ Ma wan pikin fikapisi fu den 144.000 sma de na grontapu ete. Fu den moro leki 15.000.000 sma di ben kon na a Memrefesa na ini a yari 2002, dan soso 8.760 sma ben sori taki den abi a howpu fu go du a wroko disi na hemel. Te yu luku en bun, dan ibri sma di e prefuru fu feti nanga den wan na grontapu di sa tron memre fu a Kownukondre, e feti teige a Kownukondre fu Gado.​—Openbaring 12:17.

A Kownu e klari a feti fu en

6. Fa Yehovah nanga Krestes e si a gens di sma e gens a pipel fu Gado?

⁶ Bijbel ben taki na fesi san Yehovah ben o du efu sma ben gens a Kownukondre di a seti: „Iya, a Sma di e sidon na hemel, sa lafu; Yehovah srefi sa spotu den. Na a ten dati a sa taki nanga den ini en atibron, èn ini a faya ati fu en a sa bruya den, taki: ’Mi, iya mi, poti mi kownu na tapu Sion, mi santa bergi’” (Psalm 2:4-6). A ten doro now gi Krestes „fu klari a feti fu en” na ondro a tiri fu Yehovah (Openbaring 6:2). Fa Yehovah e si a gens di sma e gens a pipel fu en na ini a ten fu a lasti feti? A de neleki den e opo densrefi teige en èn teige a Kownu fu en di e tiri. „A sma di e fasi unu, e fasi a popki fu mi ai”, na so Yehovah e taki (Sakaria 2:8). Yesus srefi ben taki na wan krakti fasi tu taki ala sani di sma e du noso no e du gi den salfu brada fu en, na sani di den e du, noso di den no e du gi en.​—Mateyus 25:40, 45.

7. Fu san ede den sma fu a „bigi ipi” fu san Openbaring 7:9 e taki, e firi na atibron fu Gog?

⁷ A no de fu taki dati den wan di e horibaka gi a salfu fikapisi sa firi na atibron fu Gog tu. Den sma disi di sa tron memre fu a „nyun grontapu” fu Gado de „wan bigi ipi” di „komoto fu ala kondre nanga lo nanga pipel nanga tongo” (Openbaring 7:9). Bijbel e taki dati den ’e tanapu na fesi a kownusturu èn na fesi a Pikin Skapu, èn den e weri langa weti krosi’. Disi e sori taki Gado nanga Krestes Yesus feni den bun. Nanga „palmtaki na ini den anu”, den e prèise Yehovah leki a Sma di abi a reti fu tiri ala sani na hemel nanga grontapu, èn a tirimakti fu en de fu si na a tiri fu a Kownu di a poti, namku Yesus Krestes, „a Pikin Skapu fu Gado”.​—Yohanes 1:29, 36.

8. San Krestes o du te Gog sa bigin a feti fu en, èn san o de a bakapisi?

⁸ A feti fu Gog o meki taki a Kownu di Gado poti fu tiri, sa opo fu du wan sani èn a sa bigin a feti fu Armagedon (Openbaring 16:14, 16). Den sma di weigri fu teki Yehovah leki a moro hei tiriman fu hemel nanga grontapu, sa kisi pori. Ma den wan di ondrofeni tesi nanga banawtu fu di den ben de getrow na a Kownukondre fu Gado, sa kisi frulusu fu ala ten. Na apostel Paulus ben taki fu a sani disi: „Disi na  wan buweisi fu a regtfardiki fasi fa Gado e krutu sma, san e meki taki unu warti gi a kownukondre fu Gado, èn na fu dati ede unu e pina tu. Disi wani taki dati fu Gado sei a de wan regtfardiki sani fu tyari pina kon baka na tapu den sma di e pina unu, ma fu meki unu di e pina, kisi frulekti makandra nanga wi te Masra Yesus o tyari kon na krin na ini hemel makandra nanga den tranga engel fu en na ini wan bigi faya, te a e puru en atibron na tapu den sma di no sabi Gado èn na tapu den sma di no gi yesi na a bun nyunsu fu wi Masra Yesus.”​—2 Tesalonikasma 1:5-8.

9, 10. (a) Fa Yehovah ben meki Yuda wini wan kefalek makti feanti? (b) San Kresten musu tan du na ini a ten disi?

⁹ Na ini a bigi banawtu, di sa kon na wan kaba na ini Armagedon, Krestes sa feti teige ala ogri. Ma den bakaman fu en no sa abi fu feti, soleki fa dati no ben de fanowdu gi den sma fu a tu-lo kownukondre Yuda dusundusun yari pasa. A feti ben de fu Yehovah, èn a ben meki den wini a feti. A tori e taki: „Yehovah ben poti man fu luru den manpikin fu Amon, Moab, èn a bergi kontren Se-ir di ben hari kon na ini Yuda, èn den ben bigin feti nanga makandra. Èn den manpikin fu Amon nanga Moab ben bigin opo go feti nanga den sma di ben libi na ini a bergi kontren fu Se-ir fu gi den abra na pori èn fu kiri den; èn so esi leki den ben kaba nanga den sma di ben libi na Se-ir, den ben yepi fu gi makandra pori. Ma Yuda ben kon na a waktitoren fu a gran sabana. Di den drai den fesi fu luku na ipi, dan luku, den dedeskin fu den ben fadon na gron sondro taki wan sma ben man lowe.”​—2 Kroniki 20:22-24.

¹⁰ A ben de soifri soleki fa Yehovah ben taki na fesi: „Unu no sa abi fu feti” (2 Kroniki 20:17). Na eksempre disi e sori san Kresten musu du te Yesus Krestes sa go fu „klari a feti fu en”. Ma now den e tan go doro fu feti teige ala ogri. Den no e du dati nanga trutru fetisani, ma nanga yeye fetisani. Na so wan fasi den e „tan wini ogri nanga bun”.​—Romesma 6:13; 12:17-21; 13:12; 2 Korentesma 10:3-5.

Suma sa teki fesi na ini a feti fu Gog?

11. (a) Suma Gog sa gebroiki fu feti a feti fu en? (b) San a wani taki fu de na ai na yeye fasi?

¹¹ A kon na krin taki Gog fu Magog na Satan Didibri di lasi en grani sensi 1914, di Gado ben fringi en komopo fu hemel. Fu di a de wan engel, meki ensrefi no man feti a feti fu en, ma a sa gebroiki libisma organisâsi fu du san a abi na prakseri. Suma o de den libisma organisâsi disi? Bijbel no e fruteri wi disi finifini, ma toku a e sori wi wan tu sani di kan yepi wi fu kon sabi suma dati o de. Safrisafri, den sani di e  pasa na grontapu leki wan kontru fu Bijbel profeititori, sa meki wi kon frustan sani moro krin. A pipel fu Yehovah e luku bun fu no taki sani sondro fu abi krin buweisi gi dati. Na presi fu dati, den e tan na ai na yeye fasi. Disi wani taki dati den e poti prakseri na a fasi fa Bijbel profeititori e kon tru, fu di den e luku den sani di e pasa na politiek sei èn na kerki sei.

12, 13. Fa a profeiti Danièl ben taki na fesi fu wan lasti feti teige a pipel fu Gado?

¹² A profeiti Danièl e fruteri wi moro sani fu wan lasti feti teige a pipel fu Gado. A e skrifi: „A [kownu fu noordsei] sa hari go seiker nanga bigi atibron fu man wai sani puru èn fu tyari pori kon na furu sma. Èn a sa prani den paleisi tenti fu en na mindri a bigi se nanga a santa bergi fu Moimoi sani.”​—Danièl 11:44, 45.

¹³ Na ini Bijbel ten, „a bigi se” ben de a Mindrikondre Se, èn „a santa bergi” ben de Sion, fu san Yehovah ben taki: „Mi, iya mi, poti mi kownu na tapu Sion, mi santa bergi” (Psalm 2:6; Yosua 1:4). Sobun, na wan agersi fasi, a kondre „na mindri a bigi se nanga a santa bergi” wani taki dati den salfu Kresten de na ini wan situwâsi pe sani e waka heri bun na yeye fasi. Den no de wan pisi moro fu a bigi se fu libisma di no sabi Gado, èn den e howpu fu tiri nanga Krestes Yesus na ini a hemel Kownukondre. A de krin, taki den salfu futuboi fu Gado, makandra nanga den getrow kompe fu den fu a bigi ipi, sa kisi problema nanga a kownu fu noordsei te a sa kon feti nanga den soleki fa skrifi na ini a profeititori fu Danièl.​—Yesaya 57:20; Hebrewsma 12:22; Openbaring 14:1.

San den futuboi fu Gado sa du?

14. Sortu dri sani a pipel fu Gado sa du te Satan e kon feti nanga den?

¹⁴ San den futuboi fu Gado sa musu du te Satan e kon feti nanga den? Agen, a nâsi fu Gado na ini a ten fu Yosafat ben gi na eksempre. Luku taki den sma fu a nâsi dati ben kisi a komando fu du dri sani. Den ben musu: (1) teki a posisi fu den, (2) tan tanapu, èn (3) si a frulusu di Yehovah o gi. Fa a pipel fu Gado na ini a ten disi sa du den dri sani di kari dyaso?​—2 Kroniki 20:17.

15. San a wani taki gi a pipel fu Yehovah fu teki a posisi fu den?

¹⁵ Teki a posisi fu den: Sondro fu degedege, a pipel fu Gado sa tan horibaka fayafaya gi a Kownukondre fu Gado. Leki Kresten, den sa tan hori densrefi aparti fu politiek afersi. Den sa „tanapu kánkan”, ’den no sa degedege’, ma den sa tan dini Yehovah na wan getrow fasi èn den sa tan go doro fu prèise Yehovah gi a lobi bun-ati fu en (1 Korentesma 15:58; Psalm 118:28, 29). Nowan tesi di e kon na den tapu now, noso na ini a ten di e kon, kan meki den tapu fu dini Gado getrow.

16. Na sortu fasi den futuboi fu Yehovah sa tan tanapu?

¹⁶ Tan tanapu: Den futuboi fu Yehovah no sa suku den eigi fasi fu kibri den libi, ma den sa poti ala den frutrow tapu Yehovah. En wawan abi a makti fu frulusu den futuboi fu en fu a bruya di de na grontapu, èn a pramisi taki a o du dati trutru (Yesaya 43:10, 11; 54:15; Kragisingi 3:26). Fu frutrow tapu Yehovah wani taki tu dati wi e frutrow tapu a disiten grupu fu sma na grontapu di a e gebroiki someni tenti yari kaba fu du san a abi na prakseri. Dan, moro leki iniwan tra ten na fesi, tru Kresten sa musu poti moro frutrow tapu den Kresten brada fu den di Yehovah èn a Kownu fu en di e tiri, ben gi a frantwortu fu teki fesi. Den getrow man  disi sa tiri a pipel fu Gado. Te wi e weigri fu teki a tiri fu den, dan dati kan abi takru bakapisi.​—Mateyus 24:45-47; Hebrewsma 13:7, 17.

17. Fu san ede den getrow futuboi fu Gado sa si a frulusu di Yehovah o gi?

¹⁷ Si a frulusu di Yehovah o gi: Frulusu sa de a paiman gi ala den sma di hori den soifri retifasi leki Kresten èn di frutrow tapu Yehovah fu frulusu den. Teleki a lasti yuru, den sa meki bekènti taki a krutudei fu Yehovah e kon krosibei, èn den sa du disi someni leki den man. Ala den sani di Gado meki musu sabi taki Yehovah na a tru Gado èn taki a abi getrow futuboi na grontapu. Noiti moro a sa de fanowdu fu haritaki fu wan langa pisi ten efu Yehovah abi a reti fu tiri ala sani.​—Esekièl 33:33; 36:23.

18, 19. (a) Fa a singi na ini Exodus kapitel 15 e sori fa den wan di o pasa a feti fu Gog sa firi? (b) San na a yoisti sani di a pipel fu Gado musu du now?

¹⁸ Nanga a nyun krakti di a pipel fu Gado kisi, den sa go na ini a nyun grontapu, klariklari fu singi wan singi fu di den kisi frulusu. Den sa du disi soleki fa den Israelsma fu owruten ben du dati baka di den kisi frulusu èn ben waka pasa na ini a Redi Se. Den sa de nanga tangi na ati fu têgo taki Yehovah kibri ibriwan fu den èn taki a kibri den sosrefi leki wan grupu; fu dati ede den sa singi den srefi wortu di sma ben singi langa ten pasa kaba: „Meki mi singi gi Yehovah, bika a kon hei srefisrefi. . . . Yehovah na wan mansma fu feti. Yehovah na en nen. . . . Yu reti-anu, o Yehovah, kan masi wan feanti. Èn na ini a furu di a makti fu yu furu, yu kan trowe den wan na gron di e opo densrefi teige yu; yu e seni a faya atibron fu yu go, a e nyan den leki drei wiwiri. . . . Na a lobi bun-ati fu yu meki taki yu tyari a pipel di yu frulusu; nanga yu krakti yu sa tyari den go na a santa tanpresi fu yu. . . . Yu sa tyari den èn prani den na ini a bergi di de fu yu, wan tranga presi di yu sreka gi yusrefi fu libi na ini, o Yehovah, wan santa presi, o Yehovah, di den anu fu yu seti. Yehovah sa tiri leki kownu te ten di no skotu, iya, fu têgo.”​—Exodus 15:1-19.

¹⁹ Na ini a ten disi, a howpu di wi abi fu kisi têgo libi, de moro krin leki fosi. Fu dati ede a de a yoisti ten now gi den futuboi fu Gado fu sori taki den lobi Yehovah èn fu kisi wan moro fasti bosroiti fu dini en leki a têgo Kownu fu den!​—1 Kroniki 29:11-13.

Yu kan tyari disi kon na krin?

• Fu san ede Gog sa kon feti teige den salfuwan èn teige den tra skapu?

• Fa a pipel fu Gado sa teki a posisi fu den?

• San a wani taki fu tan tanapu?

• Fa a pipel fu Gado sa si a frulusu di Yehovah o gi?

[Aksi fu a tori disi]

[Prenki na tapu bladzijde 18]

Yehovah ben meki taki Yosafat nanga en pipel wini a feti, sondro taki den ben abi fu feti

[Prenki na tapu bladzijde 20]

Den salfuwan nanga den tra skapu e wroko makandra fu horibaka gi Yehovah leki a moro hei tiriman

[Prenki na tapu bladzijde 22]

Soleki fa den Israelsma fu owruten ben singi fu di den kisi frulusu, na so a pipel fu Gado sa du a srefi sani tu