A Gileadskoro e gi sma leri fu tron zendeling 60 yari langa kaba

„FU DI wi studeri Bijbel fayafaya, meki wi kisi wan moro tranga banti nanga Yehovah èn wi kon sabi en organisâsi moro bun. A sani disi sreka wi gi a libi na ini a kondre pe wi go dini leki zendeling.” Na dati wan sisa di ben klari a fosi klas fu a Waktitoren Bijbelskoro Gilead ben taki fu a leri di a ben kisi drape. Sensi a Gileadskoro opo 60 yari bifo, a e seni zendeling go na tra kondre. Tapu 8 maart 2003, a di fu 114 klas klari a skoro nanga bun bakapisi, èn den ben kon makandra gi na okasi dati na a Waktitoren Skoro Centrum na ini Patterson, New York. Ala nanga ala sowan 6404 sma ben konmakandra na ini a zaal èn na tra presi pe sma ben kan luku a programa tapu telefisi. Den sma disi ben kaka den yesi arki den lezing, den interview, nanga den takimakandra di ben hori na a programa.

Theodore Jaracz, wan memre fu a Tiri Skin, ben de a fesiman. A bigin poti prakseri na den sma fu difrenti kondre di ben de na a konmakandra disi, èn dati ben de sma fu Asia, fu den Karibis èilanti, fu Centraal nanga Zuid Amerika, èn fu Europa. Brada Jaracz ben taki sani di ben abi fu du nanga 2 Timoteyus 4:5, èn a ben poti krakti tapu a moro prenspari wroko fu wan zendeling di kisi leri na a Gileadskoro. A musu „du a wroko fu wan evangelie preikiman”. Den zendeling disi e gi sma leri fu Bijbel, èn na so fasi den e gi kotoigi fu a waarheid.

Den studenti e kisi wan tu lasti rai

John Larson, wan memre fu a Bijkantoro Komte fu Amerkankondre, ben de a fosiwan fu den brada di ben hori wan syatu lezing. A lezing fu en ben tranga a bribi fu den arkiman, èn a ben nen „Efu Gado de nanga wi, dan suma o man feti nanga wi?” (Romesma 8:31) Brada Larson gebroiki a Bijbel fu sori fu san ede den studenti kan frutrow dorodoro na tapu taki Yehovah man yepi den fu pasa iniwan problema di den ben kan miti na ini a toewijzing fu den. Brada Larson ben gebroiki Romesma 8:38, nanga 39, fu frumane den studenti: „Teki ten fu poti prakseri na a makti di Gado e gebroiki fu a bun fu yu, en memre taki noti no kan pori a lobi di Yehovah abi gi yu.”

A brada di ben taki baka dati ben de Guy Pierce, wan memre fu a Tiri Skin. A lezing fu en ben nen „Meki den ai fu yu tan koloku!” (Lukas 10:23). A brada fruklari taki wan sma sa de koloku trutru te a sabi Yehovah, te a e frustan a têgo prakseri fu Yehovah, èn te a man si taki den profeititori fu Bijbel e kon tru. Awansi sortu kondre den studenti e go, den kan tan koloku trutru te den e meki den ai fu den tan koloku. Brada Pierce ben gi den nyun zendeling deki-ati fu denki dipi fu a bun-ati fu Yehovah èn fu tan abi a fasti bosroiti fu du a wani fu En (Psalm 77:12). Te den e tan denki bun fu sani, dan den kan kakafutu gi iniwan problema di ben kan miti den.

Baka dati tu leriman di ben gi den zendeling leri ala dei, taki wan tu sani fu gi den studenti deki-ati. Lawrence Bowen ben hori wan lezing di ben nen „Yu e suku fu kisi grani?” Furu sma e denki taki te den e kisi glori, dan dati wani taki dati den e kisi prèise, grani, nanga lespeki. Ma a psalm skrifiman Asaf ben kon frustan san trutru glori ben wani taki. Trutru glori na a grani di wan sma abi fu abi wan banti nanga Yehovah, èn a banti disi na wan gudu di warti  trutru (Psalm 73:24, 25). Den studenti di ben klari a skoro nanga bun bakapisi ben kisi deki-ati fu tan studeri Bijbel dorodoro, so taki den ben kan tan abi wan tranga banti nanga Yehovah. Den engel „e angri fu luku” na ini den finifini tori di e taki fu a fasi fa Yehovah sa gebroiki Yesus fu meki den prakseri fu en kon tru (1 Petrus 1:12). Den wani kon sabi ala san den man kon sabi fu a Tata fu den so taki den kan sori trawan a glori fu en. Baka dati a takiman gi den studenti deki-ati fu yepi trawan fu feni a trutru warti gudu. Na so fasi den sa gi Yehovah glori na ini a zendelingwroko fu den.

Wallace Liverance, a brada di abi a frantwortu fu na administrâsi fu a skoro, ben hori a lastiwan fu den lezing di ben hori na a bigin fu a programa, èn a lezing dati ben nen „Taki fu a koni fu Gado na ini wan santa kibritori” (1 Korentesma 2:7). San na a koni fu Gado di na apostel Paulus ben taki fu en na a ten di a ben du zendelingwroko? Yehovah e gebroiki a prenspari koni disi fu tyari vrede nanga wánfasi kon na heri grontapu. A koni disi abi fu du nanga Yesus. Paulus no ben preiki wan bun nyunsu di ben o lusu den problema na ini a libimakandra, ma a ben yepi libisma fu si fa Gado ben o puru den bakapisi fu a sondu fu Adam (Efeisesma 3:8, 9). A takiman ben gi den arkiman a rai disi: „Gebroiki a spesrutu okasi di yu kisi fu du diniwroko, na a srefi fasi soleki fa Paulus ben du dati. Paulus ben si a zendelingwroko fu  en leki wan okasi fu yepi trawan fu kon si fa Yehovah ben o du san A ben abi na prakseri.

Baka a lezing disi, Mark Noumair, wan tra Gilead leriman, hori wan fayafaya takimakandra nanga wan tu studenti fu a klas. A thema fu a takimakandra ben de „Sma di e studeri Gado Wortu e tron fayafaya preikiman”, èn a thema disi ben poti krakti tapu den wortu fu Paulus na ini Romesma 10:10. A klas ben taki fu den someni ondrofeni di den ben kisi na ini a preikiwroko na a ten di den ben de na a skoro. Den ondrofenitori fu den ben sori taki te wi e studeri Gado Wortu èn te wi e denki dipi fu en, dan den wondru sani di abi fu du nanga Yehovah Gado èn nanga en Kownukondre, sa furu wi ati èn wi sa fruteri trawan fu den. Na ini den feifi mun di den studenti tan na a Waktitoren Skoro Centrum, den bigin studeri Bijbel nanga moro leki 30 sma di ben wani sabi moro. Den sma disi ben tan na ini a kontren fu den gemeente di ben de krosibei, èn den Kotoigi ben e preiki doronomo na ini den kontren disi.

Lepi sma e gi bun rai

Na a ten di den studenti ben kisi leri, den kisi wini fu a demakandra di den ben abi nanga den memre fu a Bethelfamiri fu Amerkankondre. Robert Ciranko nanga Robert P. Johnson, memre fu a bijkantoro komte, hori interview nanga difrenti sma di e dini Yehovah furu yari langa kaba. Den hori interview sosrefi nanga opziener di e reis èn di e kisi spesrutu leri nownowde na a Waktitoren Skoro Centrum. Ala den sma di ben teki prati na a interview ben de sma di kisi leri na a Gileadskoro èn di ben dini leki zendeling fosi. Den koni wortu fu den lepi man disi ben gi den studenti deki-ati. Den famiriman nanga mati fu den studenti disi ben kisi deki-ati tu.

Den brada disi ben gi den studenti a rai disi sosrefi: „Tan du so furu leki yu man na ini a diniwroko èn na ini a gemeente.” „No denki tumusi furu fu yusrefi. Tan poti prakseri na a wroko di yu musu du leki zendeling, èn meki a kondre pe yu e go dini tron yu tanpresi.” Tra bun sani di sma ben taki ben sori fa a leri di zendeling e kisi na a Gileadskoro e sreka wan dinari fu du bun wroko, awansi na ini sortu kondre a e dini. Disi na wan tu fu den sani di sma ben taki: „Wi leri fu yepi trawan èn fu wroko makandra nanga den.” „A skoro yepi wi fu lespeki tra kulturu.” „Wi leri fu gebroiki Bijbel na wan heri tra fasi leki fa wi ben gwenti.”

John E. Barr hori a moro prenspari lezing fu a programa. A brada disi na wan memre fu a Tiri Skin furu yari langa kaba. A nen fu a lezing ben teki puru fu Bijbel, èn dati ben de „Na heri grontapu sma yere den” (Romesma 10:18). A brada disi ben poti wan aksi gi den arkiman, èn na aksi ben de: „A pipel fu Gado man du a muilek wroko disi na ini a ten disi?” Iya, den ben man du dati trutru! Na ini 1881 kaba, A Waktitoren na ini Ingrisitongo ben poti na aksi disi gi den leisiman: „Yu e preiki?” Ne a takiman memre ala den sma di ben de drape fu a prenspari kari di sma ben kisi na a kongres di ben hori na ini Amerkankondre na ini 1922, na Cedar Point, Ohio. A kari disi ben de: „Preiki fu a Kownu nanga en Kownukondre!” Di den yari pasa, dan den getrow futuboi fu Yehovah ben de fayafaya fu fruteri sma na ini ala kondre den tumusi moi tru tori fu a Kownukondre. Nanga yepi fu publikâsi èn nanga yepi fu sani di taki, sma na ala sei fu grontapu kon yere fu a bun nyunsu, en a sani disi gi Yehovah grani nanga bigi nen. Na a kaba fu a konmakandra, Brada Barr hori wan lezing di naki na ati fu den arkiman. A gi den nyun zendeling deki-ati fu teri den blesi fu den. A ben taki: „Ibri dei te yu e begi Yehovah na ini a kondre pe yu sa de, taki en tangi nanga yu heri ati fu di yu abi wan prati na a kontru fu den wortu, ’Na heri grontapu sma yere den’.”

Di a lezing disi ben kaba, dan den brada leisi den boskopu di den difrenti bijkantoro ben seni kon fu taki den nyun zendeling odi, èn a fesiman gi ibri studenti wan diploma. Den studenti ben prisiri ma den ben sari sosrefi taki den ben musu gowe libi a skoro di den ben kon lobi so te. Ne wan studenti teki presi gi a heri klas fu leisi wan prenspari bosroiti gi a Tiri Skin nanga a Bethelfamiri, èn a bosroiti dati ben naki na ati fu den sma drape. A ben sori taki den nyun zendeling ben abi a fasti bosroiti fu prèise Yehovah „fu now te go miti ten di no skotu”.​—Psalm 115:18.

Wi e howpu taki den nyun zendeling disi sa fiti densrefi na a nyun tanpresi fu den. Wi e howpu taki den sa yepi fu meki a preikiwroko di e du na heri grontapu go na fesi, neleki fa den wan di go na den fesi du dati sowan 60 yari langa.

[Faki na tapu bladzijde 23]

WAN TU SANI FU A KLAS

A nomru fu kondre di ben de drape: 12

A nomru fu kondre pe den e go: 16

A nomru fu studenti: 48

Gemiddeld yari di den abi: 34,4

Gemiddeld yari di den de na ini a waarheid: 17,6

Gemiddeld yari di den e du furuten diniwroko: 13,5

[Prenki na tapu bladzijde 24]

A di fu 114 klas fu a Waktitoren Bijbelskoro Gilead di klari a skoro nanga bun bakapisi

Den nen di de fu si na ondrosei, poti na ini rei di nomru fu fesisei go na bakasei, en den nen poti fu a kruktu-anusei go na a reti-anusei na ini ibri rei.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martinez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.