Aleksander VI​—Wan Pawsu di den sma fu Rome no man frigiti

„SOLEKI fa den Lomsusma e si en, dan wortu no de nofo fu krutu Aleksander VI.” (Geschichte der Päpste seit dem Ausgang des Mittelalters [A historia fu den Pawsu di ben de na a kaba pisi fu den mindri yarihondro]) „A fasi fa a ben libi no ben bun kwetikweti . . . A tru taki a Pawsu disi no e gi a Kerki wan bun nen. Aladi den sma di ben e libi na ini a srefi pisi ten leki a Borgia famiri ben gwenti fu si den srefi sortu ogridu disi, toku a ben gi den gro-skin fu si den sani di Aleksander VI nanga en famiri ben e du. Srefi te na ini a ten disi, sowan fo hondro yari na baka, sma e taki ete fu den ogri di pasa na a ten dati.”​—L’Église et la Renaissance (1449-1517)(A Kerki nanga a Renaissance).

Fu san ede meki prenspari historia buku fu Lomsu Kerki e taki so takru fu a Pawsu disi nanga a famiri fu en? San den ben du fu sma krutu den na so wan fasi? Na ini Rome, sma ben hori wan sortu eksposisi (dati na te sma e seti fowtow noso tra sani na wan presi fu trawan kan kon luku)(a hori fu oktober 2002 te go miti februari 2003). Na eksposisi disi di ben abi leki nen I Borgia​—l’arte del potere (Den sma fu a famiri Borgia​—A koni fu kisi makti), ben gi sma na okasi fu denki pikinso fu den reti di difrenti Pawsu ben feni taki den abi, èn spesrutu fu a fasi fa Rodrigo Borgia, noso Aleksander VI (a ben de Pawsu fu 1492-1503) ben gebroiki den reti disi.

A fasi fa a kon kisi a makti fu en

Rodrigo Borgia ben gebore na ini 1431 na ini wan prenspari famiri fu Játiva, na ini a kownukondre fu Aragon (now dati de wan pisi fu Spanyorokondre). Na omu fu en, Alfonso de Borgia, beskopu fu a foto Valencia, ben yepi en fu kisi bun leri èn a ben sorgu taki Rodrigo ben kisi wan posisi na ini a kerki pe a ben o kisi moni fu dati, aladi a ben de wan tini ete. Di Rodrigo ben abi 18 yari, dan en omu Alfonso sorgu taki a froisi go na Italiakondre, fu go studeri fu tron afkati. Na a ten dati, Alfonso ben tron wan kardinaal (wan fu den moro prenspari yepiman fu a Pawsu). Di Alfonso ben tron Pawsu Calixtus III, dan a ben poti Rodrigo nanga ete wan tra famiriman leki kardinaal. Pere Lluís Borgia ben tron wan sortu komsarsi fu difrenti foto. Te fu yu denki, dan Rodrigo ben tron a moro prenspari man baka a fosi-minister fu a kerki. A du a wroko dati na ondro a tiri fu difrenti Pawsu. A sani dati ben meki taki a meki furu moni, èn a ben kon gudu srefisrefi. A ben kisi bigi makti tu, èn a ben libi neleki wan kownu pikin.

Rodrigo ben de wan koni man, wan bun takiman, a ben lobi horibaka gi sma di ben e meki moi sani, èn a ben de wan sma di ben sabi fa fu kisi san a wani. Ma a ben e libi nanga difrenti uma. A ben meki fo pikin nanga wan waka-uma fu en nanga suma a hori en heri libi langa, èn a ben meki moro pikin ete nanga tra uma. Pawsu Pius II ben piri-ai gi Rodrigo fu di a ben lobi fu meki prisiri na wan „yayo fasi” èn fu di a ben abi wan „lagi fasi fu prisiri”. Toku Rodrigo no ben kenki a fasi fa a ben e libi.

Di Pawsu Innocentius VIII dede na ini 1492, dan den kardinaal fu a kerki ben kon makandra fu taki  suma ben o teki en presi. A no de fu taki dati Rodrigo Borgia pai den kardinaal, so taki ensrefi ben kan kon tron Pawsu Aleksander VI. A ben du dati fu di a pramisi den ala sortu kefalek sani sondro fu syen fu sori o kruka a de. Fa a ben pai den kardinaal di ben poti en leki Pawsu? We a ben gi den hei posisi na ini Kerki, a gi den bigi oso, nanga paleisi, a ben poti den fu luku heri-heri foto, noso presi pe non nanga priester e tan, aladi a ben e sorgu taki den kisi furu moni. Dati meki yu kan frustan fu dati ede fu san ede wan kerki historia skrifiman ben taki dati a pisi ten di Aleksander VI ben de leki Pawsu, ben de den „dei di tyari syen nanga porinen gi a Kerki fu Rome”.

A no ben betre moro tra grontapu tiriman

Aleksander VI ben gebroiki a makti di a ben abi leki kerki fesiman fu a kerki, fu koti a trobi na mindri Spanyorokondre nanga Potogisikondre. Den tu kondre disi ben e strei fu den nyun kontren di den ben feni èn di den ben e kari Amerika. A makti di a ben abi leki tiriman ben meki taki en leki Pawsu ben de na edeman fu difrenti foto nanga presi na a mindrisei pisi fu Italiakondre, èn a ben e tiri a kownukondre fu en neleki fa tra tiriman ben e tiri tra kondre na ini a ten dati. A tiri fu Aleksander VI èn sosrefi a tiri fu wan lo fu den Pawsu di waka na en fesi noso na en baka, ben lai nanga tyuku. Den ben lobi fu seti sani fu yepi famiriman, aladi furu sma dede na wan fasi di trawan no ben man frustan.

Na ini den bruya ten dati, difrenti tirimakti ben e strei fu kisi kontren di ben de fu Italiakondre, èn a Pawsu no ben tan na baka ini a tori disi. A politiek fu en nanga den kruderi di a ben e meki, noso ben e broko bakaten, ben seti na so wan fasi, taki den ben kan yepi en fu kisi moro makti, fu meki den pikin fu en go na fesi, èn fu meki taki a famiri Borgia ben hei moro ala tra famiri. Juan, a manpikin fu en, ben trow nanga wan famiriman fu a kownu fu Castilia, èn ben tron wan tumusi prenspari man na ini Gandía (Spanyorokondre). Jofré, wan tra manpikin fu Aleksander, ben trow nanga a granpikin fu a kownu fu Napels (Italiakondre).

Di a Pawsu ben abi wan patna fanowdu di ben kan yepi en fu tron moro bun mati nanga Fransikondre, dan a ben broko a mofo di Lucresia, na umapikin fu en fu 13 yari ben abi nanga wan prenspari man fu Aragon, èn na presi fu dati a ben gi Lucresia na wan famiriman fu wan heiheiman na ini Milaan. Di a trow dati no ben abi wini moro gi en na politiek sei, dan a suku wan fasi fu broko a trow dati èn baka dati a meki Lucresia trow nanga wan memre fu wan tra kownu-oso, namku Alfonso fu Aragon. Na a srefi ten a brada fu Lucresia, Cesare Borgia, ben go meki wan kruderi nanga Louis XII fu Fransikondre, san ben meki taki a trow di a sisa fu en ben trow nanga a man di ben de fu Aragon, ben kon tron wan sani di ben tyari problema kon. San den ben du fu dati ede? Sma e fruteri taki Alfonso, a pôti masra fu Lucresia, „ben kisi hebi mankeri di fo man suku fu kiri en na tapu a stupu fu a Sint Pieterskerki. Alfonso no ben kaba betre ete, di wan futuboi fu Cesare yokro en kiri.” Ma now a Pawsu ben e suku fu meki wan tu nyun kruderi di ben kan tyari wini gi ensrefi. Lucresia ben abi 21 yari na a pisi ten dati, èn now a Pawsu ben e seti sani fu meki a trow fu a di fu dri leisi. Disi leisi a ben o trow nanga a manpikin fu wan tumusi prenspari man fu a foto Ferrara. A man disi ben abi furu makti.

Sma e taki dati a libi fu Cesare ben de „wan libi fu wan man di no ben e syen fu du ala sortu kruka, wan pisi ten pe furu sma lasi den libi”. Aladi a papa fu Cesare ben poti en leki kardinaal sensi di a ben abi 17 yari, toku yu kan taki dati a ben moro bun leki wan fetiman, na presi fu de wan sma di ben e du kerki afersi, fu di a ben srapu, a ben lobi makti, èn a ben kruka pasa marki. Baka di a gowe libi a kerkiwroko fu en, dan a go trow nanga na umapikin fu a kownu fu Fransikondre, so taki a ben kon tron wan tumusi prenspari man fu a foto Valentinois.  Dan a Fransi legre yepi en fu feti fu teki difrenti kontren abra èn fu kiri sma, so taki a ben kan kisi a noordsei pisi fu Italiakondre na ini en makti.

Fu sorgu taki Cesare ben kan tan kisi yepi fu a Fransi legre, so taki a ben kan tan du den sani di a ben abi na prakseri, dan a Pawsu ben gi pasi taki Louis XII fu Fransikondre ben broko trow. Na so fasi Louis XII ben kan trow nanga Anne fu a kontren fu Britania, so taki a kontren di na uma dati ben abi na en ondro, ben kon tron wan pisi fu a kownukondre fu en. Wan buku e taki dati, te yu luku en bun, a Pawsu „ben de klariklari fu poti a bun nen nanga den hei markitiki fu a Kerki na wan sei, soso fu kan kisi wini gi den memre fu na osofamiri fu en”.

Sma e krutu a Pawsu gi a yayolibi fu en

Fu di a famiri Borgia ben e libi so wan yayolibi, meki sma bigin hori den na feanti èn sma bigin krutu den sosrefi. Ma moro furu a Pawsu ben e gi dofu sei na den sma di ben e taki den sani dati. Ma wan man ben de, namku Girolamo Savonarola, di ben e gi a Pawsu furu broko-ede. A ben de wan moniki fu wan spesrutu grupu fu priester, wan fayafaya takiman, èn sosrefi wan politiek fesiman fu a foto Florence. A ben e krutu a takrudu fu den sma di ben e wroko makandra nanga a Pawsu èn a ben krutu den takrudu èn a politiek fu a Pawsu srefi. A ben wani taki sma ben musu puru a Pawsu èn taki kenki ben musu kon na ini a fasi fa a kerki ben seti. Savonarola ben e rigeri taki: „Un kerki fesiman, . . . te neti, dan unu e go libi nanga den freiri fu unu, ma dan te mamanten unu e go du santa wroko na kerki.” Bakaten a ben taki: „[Den fesiman dati] abi a fesi fu wan motyo. Fu di ala sma sabi den, meki dati e tyari porinen gi a Kerki. Mi e taigi unu taki den man disi no de na ini a Kresten bribi trutru.”

Fu di a Pawsu ben e suku fu meki Savonarola tapu en mofo, meki a ben pristeri fu poti en leki kardinaal, ma Savonarola no ben wani. Wi no kan taki efu a sani di meki taki a man disi kon na ini problema te fu kaba, ben de den sani di a ben taki teige a Pawsu, noso den sani di a ben e leri sma, ma wan sani wi sabi, èn dati na taki den ben puru Savonarola fu a kerki te fu kaba. Den sroto en, èn den gi en hebi skin-ati fu dwengi en fu taki san den ben wani yere. Te fu kaba den anga en, èn baka dati den bron en.

Seryusu aksi di e opo kon?

Den sani disi di pasa na ini a historia, e meki seryusu aksi opo kon. Fa wan Pawsu kan kon nanga den sortu ogri-ati denki disi èn fa a kan tyari ensrefi na so wan fasi? San historia skrifiman e taki fu den tori disi? We, den e fruklari den tori disi na difrenti fasi.

Furu sma feni taki yu musu hori na prakseri na ini sortu pisi ten Aleksander VI ben e libi. Sma feni taki a politiek fu en nanga den sani di a du na ini a kerki, ben de fu di a ben wani vrede. Den e taki dati a ben wani sorgu taki a wan kondre no kon moro tranga leki a trawan. Den e taki dati a ben wani tranga a banti fu en nanga den kondre di ben kan horibaka gi en, fu meki a seti fu a Pawsu kon moro tranga. A ben du den sani disi fu meki den kownu di ben de Kresten bondru kon na wan fu kakafutu gi den Torku.

Ma fa a de nanga a fasi fa a Pawsu tyari ensrefi dan? Tapu dati wan sabiman ben taki: „Na ini ibri pisi ten fu a historia fu a Kerki, yu ben abi takru Kresten noso priester di no du den wroko bun. Krestes srefi ben taki na fesi fu disi, so taki nowan sma ben sa fruwondru fu dati; a ben taki srefi dati a Kerki fu en de leki wan gron pe bun siri nanga takru wiwiri e gro, noso leki wan srepi di abi bun nanga takru fisi na ini, neleki fa a ben gi pasi srefi taki Yudas ben de wan fu den apostel fu en.” *

A srefi sabiman e taki moro fara: „Neleki fa na  isri sani di sma e poti lontu wan diri ston fu kan anga en, no e meki taki a diri ston dati lasi a waarde fu en, na so a sondu fasi fu wan priester no abi fu pori . . . a leri di a e gi sma. . . . Gowtu e tan gowtu, awinsi na anu fu a sma di e prati a gowtu, doti noso krin.” Wan Lomsu historia skrifiman e taki dati opregti Lomsu ben musu si a tori fu Aleksander VI leki fa Yesus ben taigi den disipel di a ben taki fu den sabiman fu wet nanga den Fariseiman: ’Du leki fa den e taki, ma no du san den e du’ (Mateyus 23:2, 3). Ma meki wi taki sani leki fa den de trutru. Te sma e denki na so wan fasi, dan dati e overtoigi yu?

Na so a tru Kresten bribi musu de?

Yesus ben yepi wi nanga wan tu bun rai di kan sori wi suma na den sokari Kresten: „Na den froktu fu den, unu sa si suma na den. Sma no e piki droifi noso figa fu makabon, a no so? Sosrefi, ibri bun bon e meki bun froktu, ma ibri bon di no bun no e meki bun froktu; wan bun bon no kan meki pori froktu, èn wan bon di no bun, no kan meki bun froktu. Sobun, na den froktu fu den, unu sa man si suma na den man dati trutru.”​—Mateyus 7:16-18, 20.

Ma fa a ben de nanga furu kerki fesiman na ini a historia? Den doro den markitiki disi? Fa a de nanga kerki fesiman na ini a ten disi? Den e libi akruderi na eksempre di Yesus gi di a seti a tru Kresten bribi, èn den e libi akruderi a fasi fa den tru bakaman fu en ben teki na eksempre dati? Meki wi poti prakseri na soso tu kontren, namku politiek afersi nanga a fasi fa wan sma musu tyari ensrefi.

Yesus no ben de wan tiriman fu grontapu. A libi fu en no ben lai pranpran, èn neleki fa ensrefi e taki, a no ben abi wan presi srefi „fu poti en ede”. A Kownukondre fu en no ben de „wan pisi fu grontapu”, èn den disipel fu en no ben musu „de wan pisi fu grontapu, neleki fa [en] no [ben] de wan pisi fu grontapu”. Na a fasi dati Yesus ben weigri fu teki prati na den politiek afersi fu a ten dati.​—Mateyus 8:20; Yohanes 6:15; 17:16; 18:36.

We, a no tru dan taki hondrohondro yari langa kerki organisâsi teki en leki wan gwenti fu abi matifasi nanga politiek tiriman fu kan kisi makti, noso wini na moni sei, aladi disi ben tyari wan lo pina gi a pipel fu a kondre? A tru sosrefi taki furu fu den kerki fesiman na guduman, aladi bun furu sma di den musu dini, na sma di pôti srefisrefi, a no so?

Yakobus, na afu brada fu Yesus ben taki: „Suta-uma, unu no sabi taki matifasi nanga grontapu na feantifasi nanga Gado? Fu dati ede, a sma di wani fu de wan mati fu grontapu, e meki ensrefi tron wan feanti fu Gado” (Yakobus 4:4). Fu san ede a sma e tron „wan feanti fu Gado”? Wán Yohanes 5:19 e taki: „Heri grontapu de na ini a makti fu na ogriwan.”

Wan historia skrifiman di ben e libi na ini a ten fu a Borgia famiri, ben skrifi fu Aleksander VI taki: „A fasi fa a ben e libi ben pori srefisrefi. A no ben sabi san na syen noso opregtifasi, a no ben sabi san na bribi, noso san a wani taki fu anbegi Gado. A ben de wan man di ben gridi kefalek, wan man di ben lobi makti, wan tumusi ogri-ati sma, èn wan man di ben lobi fu du sani fu meki den someni pikin fu en go na fesi.” A no de fu taki dati Borgia no ben de a wán-enkri kerki tiriman di tyari ensrefi na . . .

. . . den Buku fu Bijbel e taki fu sma di e tyari densrefi na so wan fasi? „Unu no sabi taki onregtfardiki sma no sa kisi a kownukondre fu Gado?” na apostel Paulus ben aksi. „No meki sma kori unu. Nowan huruman, . . . nowan sutaman, nowan . . . sma di abi bigi-ai . . . sa kisi a kownukondre fu Gado.”​—1 Korentesma 6:9, 10.

Sma taki dati wan fu den marki fu na eksposisi fu a Borgia famiri di ben hori na ini Rome, ben de „fu yepi trawan fu kon frustan na ini sortu ten den kefalek sma disi ben e libi . . . , so taki sma kan kon frustan den, ma a no de so kwetikweti taki wi e du en fu meki sma gi den pardon noso fu meki sma krutu den”. Fu taki en leti, den ben gi fisitiman na okasi fu luku a tori soleki fa densrefi wani. We dan, san yu e prakseri fu a pisi tori disi?

[Futuwortu]

[Prenki na tapu bladzijde 26]

Rodrigo Borgia, Pawsu Aleksander VI

[Prenki na tapu bladzijde 27]

A papa fu Lucresia Borgia ben gebroiki en fu kisi moro makti

[Prenki na tapu bladzijde 28]

Cesare Borgia ben de wan man di ben lobi makti, èn wan man di ben kruka kefalek

[Prenki na tapu bladzijde 29]

Den ben anga Girolamo Savonarola èn baka dati den bron en, fu di den no ben man kisi en fu tapu en mofo