Disi na buweisi taki Yesus ben de na grontapu trutru?

„A KERFU na ini ston taki Yesus ben libi trutru.” Dati na san ben skrifi na tapu a kafti fu wan tijdschrift di nen Biblical Archaeology Review (fu november/december 2002). Na tapu a kafti dati yu ben kan si wan kisi fu karki ston, di sma ben feni na ini Israel. Furu Dyu gebroiki den sortu kisi disi na ini a syatu pisi ten na mindri a fosi yarihondro b.G.T. nanga 70 G.T., fu poti bonyo fu dedesma na ini. Ma den Arameisi wortu di skrifi na a seibere fu a kisi disi, e meki taki a de so aparti. Sabiman e agri taki den wortu dati wani taki: „Yakobus, manpikin fu Yosef, brada fu Yesus.”

Soleki fa Bijbel e sori, dan Yesus fu Nasaret ben abi wan brada Yakobus di sma ben sabi tu leki a manpikin fu Yosef, a masra fu Maria. Di Yesus Krestes ben e gi sma leri na ini a foto pe a ben kweki, dan den wan di ben e arki en ben fruwondru srefisrefi. Den ben aksi: „En a no a manpikin fu a temreman? A no en mama den e kari Maria? A no Yakobus nanga Yosef nanga Simon nanga Yudas na den brada fu en? A no ala den sisa fu en de nanga wi?”—Mateyus 13:54-56; Lukas 4:22; Yohanes 6:42.

Iya, a gersi leki a sani di kerfu tapu a kisi di den e gebroiki fu poti dedesma bonyo na ini, abi fu du nanga Yesus, a man fu Nasaret. Efu a Yakobus di nen kari na tapu a kisi ben de na afu brada fu Yesus Krestes, dan disi ben o de „a moro owru buweisi, boiti den sani di skrifi na ini Bijbel, di e sori taki Yesus ben libi trutru”. Dati na san André Lemaire ben taki, wan sabiman fu sani di sma fu owruten kerfu na ini ston noso tra sani. A tori disi ben kon na doro na ini na artikel di ben skrifi na ini Biblical Archaeology Review, a tijdschrift di wi ben taki fu en na fesi. Hershel Shanks, di abi a frantwortu fu a tijdschrift disi, e taki dati a spesrutu kisi disi „na wan buweisi di yu kan fasi nanga yu anu èn di yu man si nanga yu ai èn a abi fu du nanga a moro prenspari sma di oiti libi na grontapu”.

Toku a de so taki ala den dri nen di skrifi na tapu a kisi na nen di tra sma fu a fosi yarihondro ben kan abi tu. Sobun, boiti a famiri fu Yesus Krestes, yu ben kan abi wan tra famiri tu di ben abi sma na ini di ben nen Yakobus, Yosef, nanga Yesus. Lemaire e taki: „Tu geslakti bifo 70 G.T., dan Yerusalem ben abi . . . kande sowan 20 sma di yu ben kan kari ’Yakob/Yakobus manpikin fu Yosef, brada fu Yesus’.” Toku a e taki dati pikinmoro a no e tweifri taki a Yakobus di nen kerfu na tapu a kisi, na a afu brada fu Yesus Krestes.

Wan tra sani de tu di e meki taki son sma e bribi taki a Yakobus di nen kerfu na tapu a kisi, ben de na afu brada fu Yesus Krestes. Aladi a ben de a gwenti fu skrifi na tapu a kisi suma na a papa fu a sma di dede, toku a no ben de a gwenti fu skrifi a nen fu wan brada fu a sma dati. Fu dati ede son sabiman e bribi taki a Yesus disi ben musu de wan prenspari sma. Disi e gi den a firi  taki a ben de Yesus Krestes, a sma di ben seti a Kresten bribi.

A kisi disi na wan trutru buweisi?

Wan kisi fu poti bonyo fu dedesma na ini, na wan kisi di sma ben e meki spesrutu fu kibri den bonyo fu wan dede sma baka te a skin fu a sma ben pori kaba na ini a grebi fu en. Sma fufuru wan lo fu den sortu kisi disi komoto fu grebi na ini a kontren fu Yerusalem. A kisi nanga a nen fu Yakobus na tapu, ben e seri na wan wowoyo pe sma e seri fositen sani. A no diki sma diki en puru fu a doti. Sma e fruteri taki na eiginari fu a kisi disi taki dati a bai en gi wan tu hondro dala nomo na a pisi ten fu 1970. Dati meki nowan sma no kan sabi trutru pe a kisi disi komoto. Professor Bruce Chilton fu Bard College na ini a foto New York, e taki: „Efu yu feni wan owruten sani, ma yu no man taki pe yu feni en, noso pe a ben de na ini ala den 2000 yari di pasa, dan yu no kan taki dati a sani di yu feni abi fu du nomonomo nanga den nen fu den sma di skrifi na tapu a sani dati.”

Fu di furu buweisi no ben de fu sori pe a kisi komoto, meki André Lemaire ben seni en go na wan lanti kantoro di e ondrosuku a gron na ini Israel. Den ondrosukuman di e wroko drape taki dati a tru taki a kisi meki fu karki ston fu a fosi noso a di fu tu yarihondro G.T. Den ben taki dati „nowan sani no ben e sori taki sma ben gebroiki disiten wrokosani fu meki a kisi”. Toku a de so taki wan tu sabiman fu Bijbel ben taigi sma fu a koranti The New York Times, taki „aladi furu sani de di e meki sma prakseri taki a sani disi kan abi fu du trutru nanga Yesus, toku wi no musu frigiti taki den sani kan de so, ma taki den no abi fu de so trutru”.

A tijdschrift Time e taki dati „pikinmoro nowan sma di kisi bun leri na ini a ten disi, sa tweifri taki Yesus ben libi na grontapu trutru”. Toku furu sma feni taki den wani moro buweisi, boiti den sani di Bijbel e taki fu Yesus. A de so taki den sani di sma e diki puru na a doti musu de den moro prenspari sani di e meki taki wi bribi na ini Yesus Krestes? Sortu buweisi wi abi taki „a moro prenspari sma di libi na grontapu oiti wan ten” na wan sma di ben de trutru?

[Sma di abi a reti fu den prenki na tapu bladzijde 3]

Left, James Ossuary: AFP PHOTO/J.P. Moczulski; right, inscription: AFP PHOTO/HO