Na wan gwenti nomo noso na tyuku?

NA SON heiskoro na ini Polen, a de wan gwenti taki studenti e piki moni fu bai wan kado gi den skoromisi nanga den skoromeester fu den, fu di den e howpu taki den sa kisi wan moro hei cijfer na a examen. A no de fu fruwondru taki a tori disi ben dangra wan yongu Kresten di nen Katarzyna. A ben aksi en srefi: „Mi musu gi moni noso mi no musu gi.” Den speri fu en ben rideneri: „Ala sma e du en. Noti o pasa, na soso wini yu kan wini, sobun fu san ede yu e broko yu ede dan?”

„Mi musu taki dati na ini 1998, a fosi yari fu mi na a heiskoro, mi ben teki prati na ini a piki fu moni”, na so Katarzyna taki. „Bakaten fosi mi kon frustan taki na a fasi disi mi ben e horibaka gi tyuku, wan sani di Bijbel e krutu.” A ben memre bijbeltekst di e sori taki Yehovah no lobi tyuku kwetikweti (Deuteronomium 10:17; 16:19; 2 Kroniki 19:7). Katarzyna ben taki: „Mi ben kon frustan o makriki a de fu brokokindi gi a krakti di speri abi na sma tapu. Mi prakseri a tori baka èn sensi a ten dati noiti mi teki prati na a gwenti dati.” Den lasti dri yari, aladi tra studenti ben spotu en, a ben kisi na okasi fu fruteri wan tu fu den taki a no e piki moni fu bai den „kado” disi, fu den sani di a leri fu Bijbel.

Son sma ben taki dati Katarzyna ben e denki ensrefi nomo èn taki a no e yepi trawan di de na nowtu. „Te nanga now mi no man feni en ete nanga wan tu fu den”, a e taki. „Ma na a tra sei, furu fu den e lespeki a fasi fa mi e denki èn dati e gi mi prisiri.” Sma ben kon sabi Katarzyna leki wan Kotoigi fu Yehovah, di e libi akruderi Bijbel gronprakseri na ini en aladei libi.