Suku bun sani na ini ala sma

„Ke mi Gado, memre mi, fu den bun sani di mi du.”​—NEHEMIA 13:31.

1. Fa Yehovah e sori bun-ati gi ala sma?

A DE wan prisiri sani fu si a son, baka te alen fadon fu wan langa pisi ten. Sma e firi densrefi moro bun èn den e prisiri moro te a son e skèin. Na a srefi fasi, te son e skèin fu wan langa pisi ten noso te dreiten hori langa, dan alen, noso wan sibibusi srefi, na sani di e gi frulekti. Wi lobi-ati Mekiman, Yehovah, meki grontapu na so wan fasi taki wi kan abi alenten nanga dreiten. Yesus ben poti prakseri na a bun-ati fu Yehovah di a ben e gi a leri disi: „Tan lobi un feanti èn tan begi gi den sma di e frufolgu unu; dan sma kan si taki unu na manpikin fu un Tata di de na hemel, bika a e meki a son fu en opo gi takru sma èn gi bun sma; a e meki alen fadon gi regtfardiki sma nanga sma di no regtfardiki” (Mateyus 5:43-45). Iya, Yehovah e sori bun-ati gi ala sma. Den futuboi fu en musu meki muiti fu de leki en fu di den e suku bun sani na ini trawan.

2. (a) San e meki taki Yehovah e sori bun-ati gi wi? (b) San Yehovah e luku te a sori bun-ati gi wi?

² San meki taki Yehovah e sori bun-ati gi wi? Sensi di Adam sondu, Yehovah tan suku bun sani na ini sma (Psalm 130:3, 4). A abi na prakseri fu meki den sma di e gi yesi na en kon de volmaakti baka, èn fu meki den libi na ini wan Paradijs (Efeisesma 1:9, 10). A sori bun-ati gi wi aladi wi no abi reti tapu dati èn disi meki taki wi kan abi a  howpu fu kisi frulusu fu sondu nanga onvolmaaktifasi, nanga yepi fu a pramisi Siri (Genesis 3:15; Romesma 5:12, 15). Te wi e bribi na ini a frulusu paiman, dan disi kan meki taki te fu kaba wi e tron volmaakti sma baka. Wan fu den sani di Yehovah e luku na ibriwan fu wi, na san wi e du now di a sori bun-ati gi wi (1 Yohanes 3:16). Yehovah e si iniwan sani di wi e du fu sori taki wi e warderi a bun-ati fu en. „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en”, na so na apostel Paulus ben skrifi.​—Hebrewsma 6:10.

3. Na sortu aksi wi musu poti prakseri?

³ Sobun, na sortu fasi wi kan de leki Yehovah fu di wi e suku bun sani na ini trawan? Fu gi piki tapu na aksi disi, meki wi go luku fo difrenti okasi pe wi kan du disi: (1) na ini a Kresten diniwroko, (2) na ini na osofamiri, (3) na ini a gemeente, èn (4) na ini ala sma.

Na ini a preikiwroko èn na ini a meki di wi e meki disipel

4. Fa a teki di wi e teki prati na a Kresten diniwroko e sori taki wi e suku bun sani na ini ala sma?

⁴ Di den disipel fu Yesus no ben sabi san na agersitori fu bun siri nanga a takru wiwiri ben wani taki, dan Yesus tyari disi kon na krin gi den. A taigi den taki „a gron na grontapu”. Leki disiten disipel fu Krestes, dan wi e si taki disi de so trutru te wi de na ini a preikiwroko (Mateyus 13:36-38; 28:19, 20). A preikiwroko fu wi abi na ini taki wi musu meki bekènti na publiki san wi e bribi. Sma sabi Yehovah Kotoigi fu a preiki di den e preiki oso fu oso èn na strati. A sani disi wawan e sori kaba taki wi de fayafaya fu suku ala sma di warti fu yere a Kownukondre boskopu. Iya, Yesus ben taki: „Na sortu foto noso na sortu dorpu unu e go tu, suku suma de drape di warti en, èn tan drape teleki unu gowe.”​—Mateyus 10:11; Tori fu den Apostel 17:17; 20:20.

5, 6. Fu san ede wi e tan go baka na sma na a oso fu den?

⁵ Te wi e go na den sma sondro taki den fruwakti wi, dan wi e luku fa den e feni a boskopu fu wi. Son tron wi e si taki wan ososma wani arki, ma wan tra sma na ini na oso e bari „wi no wani yere noti”, èn disi e meki taki a fosi sma no wani arki moro èn wi abi fu drai gowe. A de wan sari sani gi wi te wan sma no wani arki fu di wan trawan e gens en, noso fu di a trawan no wani yere  noti! Ma san wi kan du dan, so taki wi e tan suku bun sani na ini ala sma?

⁶ Te wi e go na a oso wan tra leisi te wi de na ini a preikiwroko, dan wi kan kisi wan okasi fu taki nanga a tra sma di ben tapu a takimakandra a fosi leisi. Te wi e hori na prakseri san ben pasa a fosi leisi, dan disi sa yepi wi fu de srekasreka te wi e go drape wan tra leisi. A kan taki a sma di no ben wani yere noti, e prakseri taki a musu du wan sani fu tapu a trawan fu arki a Kownukondre boskopu. Kande a e bribi sani di tra sma e taki fu wi, sani di no tru. Ma disi no e tapu wi fu tan preiki a bun nyunsu fu a Kownukondre gi den sma fu na oso dati, èn nanga switifasi wi e pruberi fu fruteri den sma fu san ede wi e du a preikiwroko disi. A marki fu wi na fu yepi ala sma fu leri sabi Gado bun. A kan taki bakaten Yehovah sa hari so wan sma kon na en.​—Yohanes 6:44; 1 Timoteyus 2:4.

7. San kan yepi wi fu abi wan bun denki fu sma te wi e go na den?

⁷ Yesus ben fruteri den disipel fu en sosrefi taki famiriman fu den ben sa gens den. Yesus ben taki: „Mi ben kon fu tyari pratifasi na mindri wan man nanga en papa, èn na mindri wan umapikin nanga en mama, èn na mindri wan yongu wefi nanga a mama fu en masra” Yesus taki moro fara: „Den feanti fu wan sma sa de sma fu en eigi osofamiri” (Mateyus 10:35, 36). Ma a situwâsi fu sma nanga a fasi fa den e denki, e kenki. Kande den siki wantronso, kande wan famiriman fu den dede, kande rampu miti den, noso kande den e firi broko-saka. Wan lo tra sani kan meki tu taki den e kenki prakseri èn den e bigin arki te wi e preiki. Efu wi tan prakseri taki den sma di no wani arki now, noiti no sa arki, dan a de so taki trutru wi e suku bun sani na ini ala sma? Fu san ede wi no e suku wan tra okasi fu go baka na den nanga prisiri? Kande a sma sa handri tra fasi. Son leisi a no a sani di wi e taki wawan e meki wan sma arki, ma a fasi fa wi e taki kan meki tu taki a sma handri tra fasi. Te wi e begi Yehovah fayafaya fosi wi bigin preiki, dan disi sa yepi wi trutru fu suku bun sani na ini ala sma èn fu pristeri den a Kownukondre boskopu na wan fasi di e hari den prakseri.​—Kolosesma 4:6; 1 Tesalonikasma 5:17.

8. San kan de a bakapisi te Kresten e suku bun sani na ini den famiriman fu den di no de na bribi?

⁸ Na ini son gemeente furu sma fu a srefi famiri e dini Yehovah. Furu tron a sani di e meki den yonguwan lobi èn lespeki den moro owru famiriman fu den, na taki den owruwan tan horidoro na ini a diniwroko. Sosrefi, a bun matifasi di den owruwan disi abi nanga tra famiriman èn nanga a trowpatna fu den ben abi furu krakti tapu den yonguwan so taki densrefi bosroiti fu dini Yehovah tu. Fu di furu Kresten wefi ben teki a rai fu na apostel Petrus, meki den ben man wini a masra fu den „sondro fu taki wan wortu”.​—1 Petrus 3:1, 2.

Na ini na osofamiri

9, 10. Fa Yakob nanga Yosef ben suku bun sani na ini na osofamiri fu den?

⁹ A krosibei banti di sma fu wan osofamiri abi nanga makandra, na wan tra okasi pe wi kan suku bun sani na ini tra sma. Luku san wi kan leri fu a fasi fa Yakob ben e handri nanga den manpikin fu en. Na ini Genesis kapitel 37, vers 3 nanga 4, Bijbel e sori taki Yakob ben lobi Yosef spesrutu. Den brada fu Yosef ben e dyarusu so te, taki den ben suku fu kiri en srefi. Ma luku fa Yakob nanga Yosef ben handri bakaten. Alatu ben suku bun sani na ini sma fu na osofamiri fu den.

¹⁰ Di angriten ben de na ini Egepte, dan Yosef di ben de edeman fu nyanyan afersi, ben gi den brada fu en wan switikon di den kon drape. Aladi  a no ben sori den ete suma a ben de trutru, toku a ben seti sani so taki den brada fu en ben kisi bun sorgu èn a gi den nyanyan fu tyari gi na owru papa fu den. Iya, aladi a ben abi fu nyan pina fu di den brada fu en ben abi bita-ati gi en, toku Yosef sorgu den (Genesis 41:53–42:8; 45:23). Na a srefi fasi, di Yakob ben de fu dede, dan a ben taki profeititori di ben abi fu du nanga blesi di a gi ala den manpikin fu en. Aladi den ogri sani di den ben du ben meki taki den ben lasi grani, toku ibriwan fu den manpikin ben kisi wan pisi fu a kondre (Genesis 49:3-28). Fu tru, Yakob ben sori na wan moi fasi taki a ben abi tranga lobi gi en osofamiri!

11, 12. (a) Sortu eksempre fu wan profeiti e sori taki a de prenspari fu suku bun sani na ini den sma fu wi osofamiri? (b) San wi e leri fu na eksempre fu a papa ini a tori di Yesus fruteri fu a manpikin di ben lasi?

¹¹ Te wi e luku fa Yehovah ben abi furu pasensi nanga a nâsi Israel di no ben de getrow, dan dati e meki wi frustan moro bun fa a ben e suku bun sani na ini en pipel. Yehovah ben gebroiki na osofamiri libi fu a profeiti Hosea fu sori a tranga lobi di a ben abi gi Israel. Ibri tron baka, Gomer, a wefi fu Hosea, ben e du sutadu. Ma toku, Yehovah ben taigi Hosea: „Go ete wan leisi, lobi wan uma di abi wan freiri kaba èn di e du sutadu, neleki fa Yehovah lobi den manpikin fu Israel, aladi den drai go na tra gado èn aladi den e lobi korenti kuku” (Hosea 3:1). Fu san ede Yehovah ben taigi en fu du disi? Yehovah ben sabi taki na ini a nâsi di ben gowe libi a pasi fu en, wan tu sma ben de di ben o warderi a pasensi di a abi nanga den. Hosea taki: „Baka dati den manpikin fu Israel sa kon baka èn fu tru, den sa suku Yehovah, a Gado fu den, nanga David, a kownu fu den; èn den sa beifi trutru te den e kon suku Yehovah nanga a bunfasi fu en na ini den lasti dei” (Hosea 3:5). Trutru, disi na wan moi eksempre fu hori na prakseri te problema e kon na ini wi osofamiri. Te yu tan suku bun sani na ini den sma fu yu osofamiri, dan yusrefi sa de wan moi eksempre fu wan sma di abi pasensi.

¹² A tori di Yesus fruteri fu a manpikin di ben lasi, e sori wi tu fa wi kan suku bun sani na ini den sma fu wi osofamiri. A moro yongu manpikin ben drai kon baka na oso, baka di a ben libi wan soso libi. A papa ben abi sari-ati gi en. San a papa du di a moro owru manpikin di noiti no gowe libi na osofamiri, bigin krutukrutu fu a sani disi? A papa taigi a moro owru manpikin: „Pikin, ala ten yu ben de nanga mi, èn ala den  sani di de fu mi, na fu yu.” A papa no ben taki disi fu di a ben wani piri-ai gi a fosi manpikin, ma a ben taki disi fu di a lobi den pikin fu en. A papa taki moro fara: „Wi musu breiti èn prisiri, bika yu brada ben dede, ma a kon na libi baka èn a ben lasi, ma mi feni en baka.” Na a srefi fasi wi kan tan suku bun sani na ini trawan.​—Lukas 15:11-32.

Na ini a Kresten gemeente

13, 14. San na wan fasi fa wi kan sori na ini a Kresten gemeente taki wi abi lobi, soleki fa a wet fu kownu ben taki?

¹³ A marki fu wi leki Kresten na fu abi lobi soleki fa a wet fu kownu ben e taki (Yakobus 2:1-9). A kan taki den sma na ini a gemeente pe wi e go, abi moro gudu leki wi noso den no abi so furu gudu leki wi. Ma a de so taki te now ete wi e si ’wan grupu fu sma moro hei leki wan tra grupu’ fu di den de fu wan spesrutu ras, noso kulturu, noso fu di den ben de fu wan spesrutu bribi? Efu disi de so, dan fa wi kan taki dati trutru wi e teki a rai fu Yakobus?

¹⁴ Te wi e gi sma wan switikon na den Kresten konmakandra fu wi, dan wi e sori taki wi lobi sma trutru. Te wi e go taki nanga den sma di kon na a Kownukondre zaal fu a fosi leisi, dan disi kan meki taki den sma disi e firi bun èn taki den no e senwe noso syen moro. Iya, son sma di ben go na wan Kresten konmakandra fu a fosi leisi taki: „Ala sma ben sori so wan switi fasi gi makandra. A ben gersi leki den ben sabi mi kaba. Mi ben e firi so switi.”

15. Fa den yonguwan na ini a gemeente kan kisi yepi fu poti prakseri na den owruwan?

¹⁵ Na ini son gemeente, wan tu yonguwan e hori densrefi aparti leki grupu inisei noso dorosei fu a Kownukondre zaal baka te konmakandra hori èn den no abi demakandra nanga den owru sma fu a gemeente. Fa wi kan meki taki disi no e pasa na ini wi gemeente? A no de fu taki dati a fosi sani fu du, na taki papa nanga mama musu leri den pikin fu den na oso fa fu sreka densrefi gi den konmakandra (Odo 22:6). Den kan gi den pikin a wroko fu suku den difrenti publikâsi di den abi fanowdu, so taki ala sma fu na osofamiri sa abi den publikâsi fu tyari go na den konmakandra. Papa nanga mama na den moro bun sma tu fu gi den pikin fu den deki-ati fu go taki nanga den owruwan èn nanga den sikiwan di de na a Kownukondre zaal. Te den pikin sabi san fu taki te den e taki nanga den owruwan noso den sikiwan, dan den pikin srefi e firi prisiri tu.

16, 17. Fa bigisma kan suku bun sani na ini den yonguwan na ini a gemeente?

¹⁶ Owru brada nanga sisa musu poti prakseri na den yonguwan tu (Filipisma 2:4). Den kan suku fu go taki nanga den yonguwan fosi, so taki den yonguwan e kisi deki-ati. Nofo tron te a konmakandra e hori, den yonguwan e yere bun sani di kan de wan yepi gi den. Owruwan kan aksi den yonguwan efu den nyan bun fu a konmakandra èn efu den leri wan tu sani di den e warderi noso wan tu sani di den ben sa man gebroiki na ini den libi. Fu di den yonguwan de wan prenspari pisi fu a gemeente, meki wi musu sori taki wi e warderi den. Wi musu sori warderi te wi e si taki den e poti prakseri na den konmakandra èn te den e gi wan piki na a konmakandra noso te den abi wan prati na wan fu den pisi fu a programa. A fasi fa den yonguwan abi demakandra nanga den owruwan na ini a gemeente èn a fasi fa den e  sorgu bun gi a wroko fu den na oso, awinsi a de wan pikin wroko nomo, kan sori taki den de srekasreka fu teki moro bigi frantwortu bakaten.​—Lukas 16:10.

¹⁷ Fu di son yonguwan teki frantwortu, meki den e go na fesi na yeye fasi èn disi kan meki taki den e kisi moro prenspari wroko fu du. Te den yonguwan abi wroko fu du, dan disi kan de wan yepi gi den so taki den no e go du dondon sani (2 Timoteyus 2:22). Den sortu wroko di den kisi fu du, kan sori efu son brada di wani dini leki dinari ini a diniwroko ’bun nofo’ fu kisi a frantwortu dati (1 Timoteyus 3:10). Te den owruman e luku suma bun nofo fu kisi so wan wroko, dan den e luku efu den brada disi de fayafaya te den e teki prati na den konmakandra èn na a preikiwroko. Den owruman e luku sosrefi efu den e poti prakseri na ala den sma na ini a gemeente.

Suku bun sani na ini ala sma

18. Gi sortu sani den owruman musu luku bun te den e koti krutu, èn fu san ede?

¹⁸ „A no bun fu teki partèi te unu e koti krutu”, na so Odo 24:23 e taki. A koni fu tapusei e sori taki owruman no musu teki partèi gi nowan sma te den e koti krutu na ini a gemeente. Yakobus taki: „A sma di abi a koni fu tapusei de krin, a lobi vrede, a e fiti ensrefi, a de klariklari fu gi yesi, a furu nanga sari-ati nanga bun froktu, a no e teki partèi, a no e hoigri” (Yakobus 3:17). A de krin taki, owruman musu suku bun sani na ini trawan, ma den musu luku bun taki den no meki a firi fu den noso den mati fu den abi krakti tapu a fasi fa den e krutu sani. A psalm skrifiman Asaf skrifi: „Gado e tanapu na ini a konmakandra fu En; na mindri den gado [noso „den wan di de leki gado” san e sori go na libisma krutuman] a e koti krutu: ’O langa unu sa tan koti krutu na wan kruktu fasi èn o langa unu sa tan teki a sei fu den ogriwan srefi?’” (Psalm 82:1, 2) Dati meki Kresten owruman no e sori na nowan fasi taki den e teki partèi te den abi fu krutu wan tori di abi fu du nanga wan mati noso wan famiriman fu den. Na so wan fasi den e tan hori a gemeente na wán èn den e meki taki a yeye fu Yehovah kan tan du en wroko.​—1 Tesalonikasma 5:23.

19. Na sortu fasi wi kan suku bun sani na ini trawan?

¹⁹ Te wi e suku bun sani na ini wi brada nanga sisa, dan wi e sori a srefi fasi fu denki di Paulus ben abi di a ben e taki nanga den sma fu a gemeente na ini Tesalonika. A taki: „Sosrefi, wi e frutrow tapu Masra taki unu e du den sani di wi e taigi unu fu du èn taki unu sa tan du den” (2 Tesalonikasma 3:4). O moro wi e suku bun sani na ini trawan, o moro wi sa luku pasa den fowtu fu den. Wi sa suku okasi fu prèise wi brada nanga sisa, èn a no de fu taki dati wi no sa suku pikinpikin fowtu na den kwetikweti. Paulus skrifi: „San den e fruwakti fu den basya, na taki den musu de getrow” (1 Korentesma 4:2). A getrowfasi fu den wan di e teki fesi na ini a gemeente, sosrefi a getrowfasi fu ala wi Kresten brada nanga sisa, e meki taki wi lobi den alamala. Dati meki wi e kon moro krosibei na den, so taki den banti fu Kresten matifasi e kon moro tranga. Wi sa si wi brada nanga sisa na a srefi fasi fa Paulus ben e si den na ini a ten dati. Den de „wrokoman gi a kownukondre fu Gado” di de „wan bigi yepi” gi wi (Kolosesma 4:11). Na so wan fasi wi e sori taki wi de leki Yehovah.

20. Sortu blesi den wan sa kisi di e suku bun sani na ini ala sma?

²⁰ Fu tru, neleki Nehemia wi e begi: „Ke mi Gado, memre mi, fu den bun sani di mi du” (Nehemia 13:31). Wi breiti srefisrefi taki Yehovah e suku bun sani na ini sma! (1 Kownu 14:13) Meki wi du a srefi gi tra sma. Te wi e du disi, dan wi abi a howpu taki wi sa kisi frulusu èn taki wi sa kisi têgo libi na ini wan nyun grontapu di de fu kon.​—Psalm 130:3-8.

San yu ben sa piki?

• San meki taki Yehovah e sori bun-ati gi ala sma?

• Fa wi kan suku bun sani na ini trawan

• na ini wi preikiwroko?

• na ini wi osofamiri?

• na ini wi gemeente?

• Fa wi kan suku bun na ini ala sma?

[Aksi fu a tori disi]

[Prenki na tapu bladzijde 18]

Aladi den brada fu Yosef ben abi bita-ati gi en fosi, toku a ben suku bun sani na ini den

[Prenki na tapu bladzijde 19]

Wi e suku fu yepi ala sma awinsi wi e kisi gens

[Prenki na tapu bladzijde 20]

Awinsi sortu sani den manpikin fu Yakob ben du fosi, toku Yakob ben blesi ibriwan fu den

[Prenki na tapu bladzijde 21]

Gi ala sma wan switikon na den Kresten konmakandra