Yepi gi wan grupu sma na ini Korea di e taki wan spesrutu tongo

NANGA bigi prisiri èn sondro fu meki furu babari, wan grupu sma ben kon makandra na a distrikt kongres fu Yehovah Kotoigi na ini a waran pisi ten fu a yari 1997. Disi ben de a fosi kongres na Korea di ben hori gi dofu sma èn gi sma di no man yere so bun. A moro hei nomru fu sma di ben kon, ben de 1174. A heri programa, den lezing, den interview, nanga a drama, ben hori na ini a Dofusma-tongo fu Korea. Sma ben man si ala sani tapu den bigi telefisi di ben de na ini a kongreshal. A kongres disi ben de a heimarki fu a tranga wroko di furu sma ben du furu yari langa sondro taki den kisi pai fu dati.

Wan ten sa kon na ini wan paradijs grontapu pe „srefi den yesi fu den dofuwan sa kon opo” (Yesaya 35:5). Ma fu kisi libi na ini a Paradijs dati, dan ibriwan sma, sosrefi den dofuwan sa musu kon na ini wan yeye paradijs fosi. A yeye paradijs na a tumusi moi yeye situwâsi fu a koloku pipel fu Gado. Den sma disi musu gi den libi abra na Yehovah, den musu de dopu Kotoigi fu Yehovah, èn den musu gi yesi na en.​—Mika 4:1-4.

A grupu bigin nanga wan tu sma nomo

Aladi Kotoigi ben e preiki gi dofu sma sensi 1960, toku a ben de baka 1970 fosi, di wan tu dofu sma bigin kon na den konmakandra fu Yehovah Kotoigi na ini Seoul, a mamafoto fu Korea. Wan Kresten brada di ben man skrifi esi-esi, ben e gebroiki wan bord pe a ben e skrifi den moro prenspari penti di ben taki na ini den lezing. A ben e skrifi sosrefi den bijbeltekst di den gebroiki.

Na ini 1971, wan Kotoigi di ben e libi na ini a foto Taejon, ben abi wan dofu manpikin. A bigin leri en pikin nanga den dofu mati fu en pikin, a Kownukondre boskopu. Wan tu sma fu a grupu disi ben tron fayafaya preikiman èn den e horibaka gi furu dofusma-tongo gemeente.​—Sakaria 4:10.

Yonguwan de klariklari fu gi yepi

Fu meki dofu sma kisi sabi fu Yehovah nanga Yesus so taki den kan kon na tapu a pasi fu libi, dan moro sma musu de klariklari fu gi yepi èn  fu meki moro muiti (Yohanes 17:3). Nanga disi leki marki, furu Kotoigi fu Yehovah leri a dofusma-tongo èn den kisi furu moi ondrofeni fu di den du disi.

Park In-sun di abi 15 yari, ben poti leki marki fu leri a dofusma-tongo. Fu leri a tongo disi, a go wroko na wan fabriek pe sowan 20 dofu sma ben e wroko. Aiti mun langa a wroko skin-skin makandra nanga den so taki a ben man leri a tongo èn a fasi fa dofu sma e denki. A yari baka dati, a bigin dini leki wan gewoon pionier, noso furuten Kownukondre preikiman, èn a ben wroko makandra nanga wan grupu dofu sma di ben wani sabi moro fu den tru tori fu Bijbel. Heri esi, a grupu disi kon moro bigi èn na ini wan syatu pisi ten moro leki 35 sma ben e kon na den konmakandra tapu sonde.​—Psalm 110:3.

Baka dati, fu a fosi leisi na ini Seoul, sani ben seti so taki Kresten konmakandra ben kan hori soso na ini a dofusma-tongo. Brada Park In-sun ben e dini leki spesrutu pionier na ini a grupu disi di e tan gro. A ben kon sabi a dofusma-tongo bun now. Na ini son mun, a brada disi ben e hori oso-bijbelstudie nanga 28 dofu sma. Furu fu den sma disi go na fesi èn den tron Kotoigi fu Yehovah.

Fu di furu sma ben de klariklari fu yepi a dofusma-grupu, meki na ini oktober 1976, a fosi dofusma-tongo gemeente ben seti na ini Seoul. A gemeente disi ben abi 40 preikiman nanga tu gewoon pionier. Disi ben meki taki a wroko ben go na fesi tu na ini tra pisi fu Korea. Furu dofu sma ben wani sabi moro fu a bun nyunsu èn den ben e wakti fu Kotoigi kon na den.

A wroko nanga dofu sma

Kande yu e aksi yusrefi fa Kotoigi e feni den dofu sma. Den feni wan tu dofu sma fu di tra sma taigi den pe den dofu sma e tan. Sosrefi, sma di abi wenkri pe den e seri aleisi, ben gi den nen nanga tanpresi fu dofu sma. Son lanti kantoro ben gi den nen nanga tanpresi fu dofu sma. A finifini kotoigi di du na ini kontren pe dofu sma e libi, ben abi so wan bun bakapisi taki fo dofusma-tongo gemeente ben seti baka wan pisi ten. Furu Kresten yonguwan ben kisi a deki-ati fu leri a dofusma-tongo.

Furu sma di ben e dini leki spesrutu pionier ben leri a dofusma-tongo èn a bijkantoro fu Yehovah Kotoigi seni den fu go wroko na den dofusma-tongo gemeente. A no langa pasa, wan tu fu den brada di ben go na a Dinariskoro, go wroko makandra nanga den dofusma-tongo gemeente èn den de wan deki-ati gi den gemeente disi trutru.

A no makriki fu du disi. Efu wan sma wani wroko nanga dofu sma, dan a abi fu frustan a fasi fa den e denki èn san na den gwenti fu den. Te dofu sma e taki nanga anu, dan den e taki sani krin leki fa a de, den no e draidrai lontu wan tori; den e denki na a srefi fasi disi tu. Son tron disi kan meki taki tra sma e fruwondru noso e firi fruferi èn son tron tra sma e kisi wan heri tra denki fu den. Boiti dati, te Kotoigi e studeri Bijbel nanga wan dofu sma, dan a musu yepi a dofu sma fu leri taki a dofusma-tongo moro bun èn a musu yepi a dofu sma so taki ensrefi kan leisi èn studeri Bijbel moro bun.

Na ini na aladei libi, dofu sma e kisi fu du nanga furu sani di muilek gi den. Furu fu wi no sabi dati. Furu tron a de wan bigi problema gi dofu sma te den abi fu go na lanti kantoro noso na datra, noso te den abi fu seti wan moni tori di no muilek gi tra sma. Ma furu dofu sma na ini a  Kresten gemeente ondrofeni trutru bradafasi fu di Kotoigi fu tra gemeente ini a birti ben de klariklari fu yepi den na wan lobi-ati fasi.​—Yohanes 13:34, 35.

Okasi preiki abi bun bakapisi

Na ini Pusan, a moro prenspari lanpe fu sipi na a zuidsei fu Korea, wan Kotoigi ben miti tu dofu man. Den man disi ben skrifi na tapu wan pisi papira: „Wi lobi Paradijs. Wi wani sabi den bijbeltekst di e taki fu têgo libi.” A brada skrifi pe den ben e tan èn a meki mofo fu go na den. Di a go na den dofu man disi, a si wan heri kamra nanga dofu sma di ben e wakti en fu yere a Kownukondre boskopu. Disi ben gi a Kotoigi deki-ati fu leri a dofusma-tongo. Syatu baka dati, wan dofusma-tongo gemeente ben seti na ini Pusan.

Di wan brada fu a gemeente dati ben si tu dofu man di ben e taki nanga anu nanga makandra, dan a go na den. Fu di a brada ben kon sabi taki syatu na fesi den tu man disi ben kon fu wan kerki konmakandra, meki a gi den wan kari fu kon na a Kownukondre zaal tu yuru bakadina na a srefi dei. Den kon na a Kownukondre zaal, èn den bigin studeri Bijbel. Syatu na baka, den tu dofu man disi kon na a distrikt kongres makandra nanga 20 dofu mati fu den. Wan tu sma fu a grupu dati gi den libi abra na Yehovah. Tu fu den tron gemeente owruman èn wan fu den ben tron wan dinari ini a diniwroko na ini dofusma-tongo gemeente.

 Muiti di no du fu soso

Fu di wan tu dofu sma e tan fara fu iniwan dofusma-tongo gemeente, meki furu muiti du fu yepi den sma disi so taki den kan kisi yeye nyanyan fu Bijbel doronomo. Fu eksempre, wan man fu 31 yari ben e du fisiwroko na a syoro fu wan èilanti. A ben yere a boskopu fu Bijbel fu en yongu brada di ben miti nanga Kotoigi fu Yehovah. Fu di a dofu fisiman disi ben wani sabi moro, meki a waka nanga boto sowan 16 kilometer go na a foto Tongyoung, na a zuidsei syoro fu Korea. A ben du disi fu di a ben wani miti wan brada di ben de spesrutu pionier na ini a dofusma-tongo gemeente na wan presi di den e kari Masan City. Ibri munde a spesrutu pionier disi ben e teki wan waka fu 65 kilometer soso fu studeri Bijbel nanga a dofu fisiman.

Ibri sonde, wan dofu man di ben e studeri Bijbel, ben abi fu go 16 kilometer nanga boto èn baka dati a ben abi fu go ete 65 kilometer nanga bus, soso fu go na wan konmakandra na ini Masan City. A muiti di a ben meki no ben de fu soso. Na ini wan tu mun a ben man taki a dofusma-tongo moro bun, a ben man leisi a Koreatongo moro bun, èn a moro prenspari sani na taki a kon leri sabi a wan-enkri fasi fa fu abi wan banti nanga Yehovah. Fu di a man disi ben frustan o prenspari a de fu go na den konmakandra èn na a preikiwroko doronomo, meki a froisi go na a birti pe a dofusma-tongo gemeente ben de. A sani disi ben makriki gi en? Nôno. A ben abi fu libi wan fisiwroko di ben gi en sowan 3800 Amerkan dala ibri mun, ma a kisi wini fu du dati. Baka di a go na fesi na ini waarheid, a teki dopu èn now a e prisiri fu dini Yehovah makandra nanga en osofamiri.

Vertaling gi den dofuwan

Furu sma kon sabi a bun nyunsu fu a Kownukondre fu di trawan fruteri den dati. Ma efu wan sma wani fruteri trawan a boskopu fu a Wortu fu Gado moro soifri, dan a de prenspari taki a no e yere den Bijbel leri wawan, ma taki a abi den sosrefi fu leisi den bakaten. Dati meki, na ini a fosi yarihondro, owruman nanga ondrofeni ben skrifi buku nanga brifi di e taki fu den tori disi (Tori fu den Apostel 15:22-31; Efeisesma 3:4; Kolosesma 1:2; 4:16). Na ini a ten disi, wi e kisi furu yeye nyanyan nanga yepi fu buku nanga tra Kresten publikâsi. Den buku disi vertaal na ini sowan 380 tongo, sosrefi wan tu dofusma-tongo. Dati meki wan pisi fu a bijkantoro fu Korea de spesrutu fu vertaal den publikâsi na ini a Dofusma-tongo fu Korea. Wan pisi de tu pe den e meki video na ini a dofusma-tongo. Na ini heri Korea, den video disi na wan bigi yepi na ini den gemeente pe dofu preikiman fu a bun nyunsu de èn pe tra dofu sma de di wani sabi moro.

Aladi furu sma man taki a dofusma-tongo bun èn aladi den yepi fu meki furu fu den video, toku furu tron den moro bun sma fu vertaal a dofusma-tongo na den pikin fu dofu sma. Sensi den e gro kon bigi, den pikin disi leri a dofusma-tongo. Den no e taki a tongo heri bun wawan, ma den e taki nanga ala firi èn den man gi krakti na a boskopu fu di den sabi fa fu taki nanga den anu èn fa fu meki sani nanga den fesi so taki den e doro a frustan nanga na ati fu dofu sma.

Soleki fa a skrifi na a bigin fu na artikel, dan kongres nanga tra konmakandra e hori doronomo na ini Korea. Furu wroko, moni, nanga muiti de fanowdu fu man du disi. Ma furu fu den sma di e kon na den konmakandra disi abi furu warderi gi a seti disi. Baka te den konmakandra kon na wan kaba, dan furu fu den e tan wan pisi ten ete fu taki nanga makandra èn fu luku baka sortu bun yeye nyanyan den ben kisi. A no de fu taki dati a de wan tyalensi fu dini na ini a spesrutu grupu disi, ma den yeye blesi e gi furu wini.

[Prenki na tapu bladzijde 10]

Video ini dofusma-tongo di meki na ini Korea: “What Does God Require of Us?”, “Appreciating Our Spiritual Heritage”, “Warning Examples for Our Day”, nanga “Respect Jehovah’s Authority”

[Prenki na tapu bladzijde 10]

Bigin ondrosei, go na a reti-anusei, dan go na ondrosei baka: Den e meki video ini dofusma- tongo na a bijkantoro fu Korea; wan brada e oefen wan tu theokrasia wortu ini dofusma-tongo; a grupu di e vertaal na ini dofusma-tongo; den e yepi wan brada fu vertaal na ini dofusma-tongo aladi wan video e meki