A de tumusi prenspari fu sori lobi

AWANSI omeni yari wan sma abi, sortu kulturu a abi, sortu tongo a e taki, noso fu sortu ras a de, ala libisma wani taki trawan musu lobi den. Wan sma no de koloku efu a e firi taki trawan no lobi en. Wan datra di e ondrosuku sani ben skrifi: „A firi di wi abi taki sma lobi wi èn a krosibei banti di wi abi nanga trawan, na prenspari sani di kan meki taki wi e siki èn taki wi e kon betre baka, den kan meki wi sari èn den kan gi wi prisiri, den kan meki wi pina èn den kan meki taki sani e kon bun baka. Efu wan nyun sortu dresi man wroko na a srefi fasi disi, dan pikinmoro ibri datra na ini a kondre ben o gi dati na den sikisma di e kon na den. Wan datra di no ben o gi sma a dresi dati, no ben sa du en wroko bun.”

Ma toku, a libimakandra fu disiten no e si en leki wan prenspari sani taki libisma musu abi wan banti nanga trawan èn taki den musu lobi makandra. Na presi fu dati, dan radio, telefisi, koranti nanga pôpi sma, e poti krakti furu tron tapu sani soleki gudu, makti, biginen, nanga seks. Furu leriman e sori taki a de prenspari dati wan sma abi marki na ini a grontapu èn taki a abi wan bun wroko. Den leriman disi e taki dati wan sma abi wan bun libi soso te a doro wan spesrutu marki èn te a abi wan hei posisi na ini a libimakandra. A tru taki a de prenspari fu teki skoroleri èn fu abi a koni fu man du wan tu sani. Ma wan sma musu suku fu doro den sani dati nomonomo, awansi a wani taki dati a no sa abi ten moro gi en famiri noso gi en mati? Wan skrifiman fu owruten di ben kisi furu leri èn di ben luku finifini fa libisma e tyari densrefi, ben agersi wan koni sma di no abi lobi nanga „ wan pisi kopro di e meki babari, noso wan gengen di e loi” (1 Korentesma 13:1). Kande den sortu sma disi e kon gudu, kande den e kisi barinen srefi, ma noiti den de trutru koloku.

Yesus Krestes ben sabi heri bun fa libisma de, èn a ben lobi den trutru. A moro prenspari sani di a ben e leri sma, na taki den ben musu lobi Gado nanga tra sma tu. A ben taki: „Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan. . . . Yu musu lobi tra sma leki fa yu lobi yusrefi” (Mateyus 22:37-39). Soso den sma di waka baka den wortu disi ben o de trutru bakaman fu Yesus. Fu dati ede a ben taki: „Na a fasi disi ala sma o sabi taki unu na mi disipel, te unu lobi makandra.”—Yohanes 13:35.

Ma fa wan sma kan leri fu lobi trawan na ini a grontapu fu disiten? Fa papa nanga mama kan leri den pikin fu lobi trawan? Na artikel di e kon now sa piki den aksi disi.

[Prenki na tapu bladzijde 3]

A de wan tyalensi fu sori lobi gi trawan na ini wan grontapu pe sma abi gridifasi