„A gi mi soifri san mi ben e misi”

„KOMOTO fu a dipi fu mi ati, mi e taki unu tangi gi a moi presenti disi, namku a buku Nader dicht tot Jehovah (Kon krosibei na Yehovah). A gi mi soifri san mi ben e misi, fu di a yepi mi fu kon firi taki Yehovah lobi mi èn taki a e si mi leki wan warti sma. Now mi e firi taki mi abi wan bun banti nanga Yehovah èn nanga en lobi Manpikin. Mi wani fruteri ala sma fu a buku disi èn mi wani gi en sosrefi na ala den lobiwan fu mi.” Na so wan Kotoigi fu Yehovah ben e firi di a leisi a nyun buku fu 320 bladzijde, di kon na doro na a „Fayafaya Kownukondre preikiman” Distrikt Kongres fu 2002. Meki wi go luku wan tu fu den sani di de fu feni na ini a buku disi, èn meki wi luku fu san ede a buku disi meki.

Moi sani di de fu feni na ini a nyun buku

San yu kan feni na ini a buku disi? We, ala den sani di skrifi na ini den tu studie-artikel fu a tijdschrift disi, èn furu tra sani sosrefi, de na ini a buku tu! Ibriwan fu den 31 kapitel na ini a buku disi de leki wan Waktitoren studie-artikel. Baka den wortu na a bigin fu a buku nanga den fosi dri kapitel, dan a buku prati na ini fo pisi. Ibriwan fu den pisi e taki fu wán fu den tumusi prenspari fasi fu Yehovah. Den fo pisi disi e bigin nanga wan syatu fruklari fu a spesrutu fasi dati fu Yehovah. Den kapitel di e kon baka ibriwan fu den syatu pisi dati, e tyari kon na krin fa Yehovah e sori a spesrutu fasi fu en. Ala den fo pisi fu a buku abi wan kapitel di e taki fu Yesus. Fu san ede? We, Yesus ben taki: „A sma di si mi, si a Tata tu” (Yohanes 14:9). Fu di Yesus e du sani soifri leki fa Yehovah e du sani, meki a e gi wi tumusi moi eksempre di e sori wi krin fa Gado e sori den difrenti fasi fu en. Ala den fo pisi fu a buku e tapu nanga wan kapitel di e leri wi fa wi kan sori a spesrutu fasi dati neleki fa Yehovah e du dati. A nyun buku disi e gebroiki ala den buku fu Bijbel fu poti prakseri na den fasi fu Yehovah.

A buku Nader dicht tot Jehovah abi wan tu moi yepisani tu. Fu bigin nanga kapitel 2, dan ibriwan fu den kapitel na ini a buku abi wan faki di nen „Denki dipi fu den aksi disi”. A marki fu den bijbeltekst di kari drape no de fu yepi yu fu luku baka san yu leri na ini a kapitel. Na presi fu dati, den seti na wan fasi di kan yepi yu fu gebroiki Bijbel fu denki dipi fu a pisi tori. Wi wani gi yu a deki-ati fu teki yu ten fu leisi ala den bijbeltekst finifini. Teki ten baka dati fu prakseri bun fu na aksi, aladi yu e pruberi fu si fa a tori e fiti yu. Te yu e teki ten fu denki dipi fu sani na so wan fasi, dan den sani di yu leisi kan naki yu ati, èn dati kan yepi yu fu kon moro krosibei na Yehovah.​—Psalm 19:14.

Den teki furu ten nanga muiti fu kon sabi soifri fa den prenki na ini a nyun buku disi ben musu meki, so taki sma kan leri wan sani fu den prenki èn so taki den kan gi sma deki-ati fu du wan sani. Tinaseibi fu den kapitel abi moi prenki di e tapu wan heri bladzijde. Den prenki disi abi fu du nanga tori di de fu feni na ini Bijbel.

Fu san ede a buku disi meki?

Fu san ede a buku Nader dicht tot Jehovah meki? A moro prenspari marki fu a nyun buku disi na fu yepi wi fu kon sabi Yehovah moro bun, so taki wi kan kisi wan moro tranga banti nanga a Gado fu wi.

Yu sabi wan sma kande di ben sa kisi wini fu a nyun buku disi, kande wan sma di e studeri Bijbel noso srefi wan Kresten brada noso sisa di kon lasi a faya di a ben abi gi a diniwroko? Fa a de nanga yusrefi? Yu bigin leisi a nyun buku disi kaba? Efu yu no du dati ete, dan fu san ede yu no e poti ten na wan sei fu bigin leisi en so esi leki a kan? Teki ten sosrefi fu prakseri bun fu den sani di yu e leisi. Wi howpu taki a nyun buku disi sa yepi yu fu kon moro krosibei na Yehovah Gado, so taki yu kan meki a bun nyunsu fu a Kownukondre bekènti nanga moro prisiri èn nanga moro faya!