Aksi fu leisiman

Fu san ede Bijbel e kari Satan na Hebrewsma 2:14 „a sma di man tyari dede kon”?

Fu taki en syatu, dan Paulus ben taki dati Satan kan meki taki libisma lasi den libi. A kan du dati ensrefi, noso nanga yepi fu den wrokoman fu en. Akruderi a sani disi Yesus ben kari Satan „wan kiriman di a ben bigin”.​—Yohanes 8:44.

Son leisi sma no e frustan Hebrewsma 2:14 bun, fu di son vertaling e taki dati Satan abi a „krakti fu dede” noso a abi a „makti abra dede” (Da Bijbel; Nyun Testamenti). Den sortu vertaling disi e meki a gersi leki Satan abi ala makti fu kiri iniwan sma di a wani. Ma dati no de so kwetikweti. Efu dati ben de so, dan a ben o kiri ala den anbegiman fu Yehovah na grontapu kaba.​—Genesis 3:15.

A Grikitongo wortu di son Bijbel vertaal nanga „krakti abra dede” èn na ini a Nyun-Grontapuvertaling a vertaal nanga „a sma di man tyari dede kon”, na „kraʹtos tou tha·naʹtou”. Tou tha·naʹtou na wan wortu di wani taki „dede”. Kraʹtos, te yu e luku en bun, wani taki „krakti, makti”. Wan wortubuku fu kerki afersi, a Theological Dictionary of the New Testament, e tyari kon na krin taki „wan sma abi krakti noso makti, ma taki a no e gebroiki a makti dati”. Fu dati ede na ini Hebrewsma 2:14, Paulus no e taki dati Satan abi ala makti abra dede. Na presi fu dati, a e sori taki Satan man kiri sma.

Fa Satan kan „tyari dede kon”? Na ini a buku Yob, wi e leisi wan tori di de tumusi aparti. A tori e sori taki Satan ben gebroiki wan bigi winti fu kiri den pikin fu Yob. Luku taki Satan ben kan du disi soso nanga a primisi fu Gado. A ben kisi primisi fu di a ben abi fu du nanga wan tumusi prenspari strei (Yob 1:12, 18, 19). Iya, Satan no ben man kiri Yob. A no ben kisi a primisi fu du dati (Yob 2:6). A sani disi e sori taki, wanwan leisi Satan ben kisi na okasi fu kiri wan tu getrow libisma, ma wi no abi fu frede taki a kan kiri wi o ten a wani.

Satan kiri sma sosrefi nanga yepi fu tra libisma. Fu dati ede, furu Kresten lasi den libi fu den bribi ede. Sonwan fu den lasi den libi fu di bigi grupu sma di ben abi bigi atibron kiri den. Noso trawan lasi den libi fu di den sma di kiri den ben du san lanti-tiriman, noso kruka krutuman ben taigi den fu du.​—Openbaring 2:13.

Moro fara, son tron Satan ben tyari dede kon fu di a ben gebroiki den swakifasi fu libisma. Na ini den dei fu Israel, a profeiti Bileam ben gi den Moabsma a rai fu kori den Israelsma „fu no de getrow moro na Yehovah” (Numeri 31:16). A bakapisi fu a sani disi ben de taki moro leki 23.000 Israelsma lasi den libi (Numeri 25:9; 1 Korentesma 10:8). Na ini a ten disi son sma e fadon na a srefi fasi gi den „triki” fu Satan èn a e kori den sma fu du seks hurudu noso tra takrudu (Efeise 6:11). A tru taki den sma disi no e lasi den libi wantewante. Ma den kan lasi na okasi fu kisi têgo libi èn na a fasi dati Satan e meki taki den e lasi den libi.

Aladi wi sabi taki Satan abi a makti fu du wi ogri, toku wi no abi fu frede en pasa marki. Di Paulus ben taki dati Satan abi a makti fu tyari dede kon, dan a ben taki sosrefi dati Krestes ben lasi en libi so taki a „ben kan meki [Satan] kon tron leki noti. . . èn taki a kan fri ala sma di ben de na ini katibo den heri libi langa fu di den ben frede fu dede”(Hebrewsma 2:14, 15). Iya, Yesus ben pai a lusu-paiman èn na so wan fasi a ben frulusu a libisma famiri fu a katibo fu sondu nanga dede.​—2 Timoteyus 1:10.

Fu tru, a de wan seryusu sani fu hori na prakseri taki Satan man tyari dede kon, ma wi abi a frutrow taki Yehovah kan tyari wan kenki kon na iniwan fu den ogri sani di Satan, noso wan fu den wrokoman fu en ben tyari kon. Yehovah e gi wi a dyaranti taki Yesus, di kisi wan opobaka, sa „broko den wroko fu Didibri” (1 Yohanes 3:8). Nanga yepi fu a makti fu Yehovah, Yesus sa gi dedesma wan opobaka èn na a fasi dati a sa puru dede srefi (Yohanes 5:28, 29). Te fu kaba, Yesus sa sori krinkrin taki Satan no abi furu makti moro te a sa trowe en go na ini a peti di no abi gron. Satan sa kisi wan lasti krutu èn a sa kisi têgo pori.​—Openbaring 20:1-10.