„Gado na lobi”
„Gado na lobi”
„A sma di no lobi trawan, no kon sabi Gado, bika Gado na lobi.”—1 YOHANES 4:8.
1-3. (a) San Bijbel e taki fu a lobi fu Yehovah? Fu san ede a sani dati de so aparti? (b) Fu san ede Bijbel e taki dati „Gado na lobi”?
ALA den difrenti fasi fu Yehovah na sani di bun srefisrefi, den de volmaakti, èn den e naki sma ati. Ma a moro moiwan fu ala den fasi fu Yehovah, na lobi. Nowan fu den tra fasi fu Yehovah e hari wi so fu kon krosibei na En leki a lobi fu en. A moi fu sabi tu taki lobi na a moro prenspari fasi fu en. Fa wi du sabi dati?
2 Bijbel e taki wan sani fu a lobi fu Yehovah di a no e taki fu nowan fu den tra prenspari fasi fu en. Bijbel no e taki dati Gado na makti, noso taki Gado na retidu. Bijbel no e taki srefi dati Gado na koni. Wi e leisi taki a abi den fasi disi, èn taki en na a moro prenspari sma fu pe den ala dri komopo. Ma na ini 1 Yohanes 4:8, Bijbel e taki wan prenspari sani fu a lobi fu Gado. Drape skrifi: „Gado na lobi.” Iya, lobi na wan fasi di rutu dipi na ini Yehovah. A e sori a lobi disi na ini ala san a e du. Te yu luku en bun, dan a makti fu Yehovah e meki taki a man du sani, aladi a retidu nanga a koni fu en e tiri en na ini den sani di a e du. Ma a de a lobi fu Yehovah di e pusu en fu du den sani. A lobi fu Gado abi krakti tapu a fasi fa a e gebroiki a makti, a koni, nanga a retidu fu en.
3 Furu tron Bijbel e taki dati Yehovah srefi na lobi. Sobun, efu wi wani kon sabi san na lobi, dan wi musu kon sabi suma na Yehovah. Fu dati ede wi wani go ondrosuku wan tu sani di abi fu du nanga na aparti lobi di Yehovah e sori.
A moro kefalek fasi fa wan sma sori lobi
4, 5. (a) San na a moro bigi sani di wan sma du na ini a historia fu libisma fu sori a lobi fu en? (b) Fu san ede wi kan taki dati Yehovah nanga en Manpikin abi a moro tranga banti fu lobi di de?
4 Yehovah sori lobi na furu difrenti fasi. Ma toku a ben sori a lobi fu en na wan moro kefalek fasi di yu no kan teki gersi nanga nowan trawan. San a ben du dan? We, Yehovah ben seni en Manpikin kon fu pina èn dede gi wi. Nanga ala reti wi kan taki dati na ini a heri historia fu libisma, disi na a moro bigi sani di wan sma du fu sori lobi. Fu san ede wi kan taki dati?
5 Bijbel e kari Yesus „a fosi geborewan fu ala den sani di Gado meki” (Kolosesma 1:15). Hori na prakseri taki a Manpikin fu Yehovah ben e libi kaba, srefi bifo Gado ben meki iniwan fu den sani na hemel èn na grontapu. O langa a Tata nanga en Manpikin ben de makandra dan? Son sabiman e taki dati den planeiti nanga ala den stari sistema, owru sowan 13 milyard yari. Srefi efu dati de so trutru, toku a nomru dati no e sori wi ete o langa a Manpikin fu Yehovah e libi kaba! San a ben e du na ini ala den dusundusun yari dati? Nanga prisiri a Manpikin ben e dini leki a „tumusi bun wrokoman” fu en Tata (Odo 8:30; Yohanes 1:3). Yehovah nanga en Manpikin ben e wroko makandra fu meki ala tra sani. Dati ben de span ten di ben e gi den furu prisiri! We, dan suma fu wi kan frustan trutru o tranga a banti de na mindri den tu sma disi di ben de makandra so wan kefalek langa ten? A de krin taki Yehovah Gado nanga en Manpikin abi a moro tranga banti fu lobi di de.
6. Di Yesus teki dopu, dan san Yehovah taki fu sori fa a e denki fu en Manpikin?
6 Toku Yehovah ben seni en Manpikin kon na grontapu fu gebore leki wan libisma pikin. Dati ben wani taki dati wan tu tenti yari langa Gado no ben o abi krosibei demakandra nanga en Manpikin na ini hemel. Nanga ala en prakseri, A luku komoto fu hemel fu si fa Yesus ben e gro kon tron wan volmaakti man. Di Yesus ben abi 30 yari, dan a teki dopu. Na a okasi dati, a Tata srefi taki komoto fu hemel: „Disi na mi Manpikin, a lobiwan di mi feni bun” (Mateyus 3:17). A musu de taki a Tata fu Yesus ben prisiri srefisrefi di a si fa en Manpikin meki ala den profeititori kon tru, èn fa a du ala den sani di a ben musu du!—Yohanes 5:36; 17:4.
7, 8. (a) San Yesus ondrofeni tapu 14 Nisan 33 G.T.? Sortu krakti dati ben abi tapu en hemel Tata? (b) San meki Yehovah gi pasi taki en Manpikin nyan pina èn dede?
7 Ma fa Yehovah ben e firi tapu 14 Nisan 33 G.T., di sma tori Yesus èn di wan grupu fu ogri-ati sma ben grabu en tyari gowe? Fa a ben e firi di sma ben e spotu nanga Yesus, di den spiti na en tapu, èn di den naki en nanga kofu? Fa a ben e firi di a si taki den wipi Yesus teleki a meti fu en baka priti? Fa a ben e firi di den spikri en na en anu nanga en futu na wan udu postu, èn di den libi en drape fu anga na a postu, aladi sma ben e wisiwasi en? Fa a Tata ben e firi di en lobi Manpikin ben bari kari en di skin-ati ben e moro en? Iya, fa Yehovah ben e firi di a si fa Yesus hari en lasti bro, èn di fu a fosi leisi sensi a ten di a bigin meki sani, En lobi Manpikin no ben de moro?—Mateyus 26:14-16, 46, 47, 56, 59, 67; 27:26, 38-44, 46; Yohanes 19:1.
8 Fu di Yehovah abi firi tu, meki wortu no de nofo fu fruteri fa a dede fu en Manpikin ben hati en. Wi kan taki nomo fu san ede Yehovah ben gi pasi taki so wan sani pasa. Fu san ede a Tata ben de klariklari fu teki a hebi pen dati? Na ini Yohanes 3:16, Yehovah e fruteri wi wan kefalek moi sani. A bijbeltekst disi de so prenspari, dati sma taki dati a wan-enkri tekst disi e fruteri syatu san skrifi na ini a heri Evangelie. Drape skrifi: „Gado ben lobi grontapu so te, taki a ben gi en wán-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi.” Sobun, a sani di pusu Gado fu teki a pina disi, na lobi. Noiti ete wan sma sori moro bigi lobi leki dati.
A fasi fa Yehovah e gi wi a dyaranti taki a lobi wi
9. Fa Satan wani taki wi musu prakseri fu a fasi fa Yehovah e denki fu wi, ma sortu dyaranti Yehovah e gi wi?
9 Ma wan prenspari aksi e opo kon: A de so taki Gado lobi ibriwan fu wi? Son sma sa agri taki Gado lobi a libisma famiri, soleki fa Yohanes 3:16 e taki. Ma toku den e denki: ’Leki fa mi de dya, Gado no kan lobi mi noiti.’ Te yu luku en bun, dan Satan de nomonomo fu meki wi bribi taki Yehovah no lobi wi èn taki wi no prenspari gi en. Na a tra sei, awinsi wi denki taki Yehovah no lobi wi, noso taki wi no warti gi en, toku a e gi wi a dyaranti taki ala den getrow futuboi fu en de prenspari gi en.
10, 11. Fa a tori di Yesus fruteri fu den pikin fowru e yepi wi fu kon frustan taki wi de warti gi Yehovah?
10 Fu eksempre, luku san Yesus taki na ini Mateyus 10:29-31. Yesus ben sori o warti den disipel fu en de, di a taki: „A no tu pikin fowru den e seri gi wan pisi moni di no warti furu? Ma toku nowan fu den sa fadon na gron sondro taki un Tata sabi. Ma srefi ibri wiwiri na un ede teri. Fu dati ede unu no musu frede: un warti moro leki furu pikin fowru.” Luku san den wortu dati ben wani taki gi den arkiman fu Yesus na ini a fosi yarihondro.
11 Na ini a ten fu Yesus, a sortu pikin fowru disi ben de a moro bunkopu fowru di sma ben kan bai fu nyan. Nanga wan pisi moni di no ben warti furu, wan sma ben kan bai tu pikin fowru. Ma soleki fa Lukas 12:6, 7 e sori, dan Yesus ben taki bakaten taki efu wan sma ben e pai tu pisi moni, dan a no ben e kisi fo, ma feifi fowru. Sma ben e kisi ete wan fowru, neleki a fowru dati no ben warti noti. Kande libisma ben e si den sortu fowru disi leki soso sani. Ma fa a Mekiman ben si den? Yesus ben taki: „Gado no e frigiti nowan fu den.” Srefi a fowru di sma e kisi baksis, Gado no e frigiti. Kande wi e bigin frustan now san Yesus wani sori wi. Efu Yehovah e si wan pikin fowru leki so wan warti sani, dan a no de fu taki dati wan libisma moro warti srefi! Soleki fa Yesus ben taki, dan Yehovah sabi ala sani fu wi. Iya, srefi den wiwiri fu wi ede a teri!
12. Fu san ede wi kan taki dati Yesus ben sabi fu san a ben e taki, di a taki dati ala den wiwiri fu wi ede teri kaba?
12 A kan taki son sma e prakseri taki Yesus ben e suku fu poti pikinso sowtu gi a tori disi. Ma prakseri na opobaka pikinso. A no de fu taki dati Yehovah musu fu sabi wi dorodoro, fu man meki wi baka soleki fa wi de nownow! Wi de so warti gi en, taki a e memre ala sani fu wi, a fasi fa wi meki, a fasi fa wi de, èn sosrefi ala den sani di wi e ondrofeni na ini wi libi. Sobun, efu Gado man du ala den sani dati, dan a no sa tranga gi en kwetikweti fu teri den pikinmoro 100.000 wiwiri di de na tapu wi ede. Fu tru, den wortu fu Yesus e sori wi na wan tumusi moi fasi taki Yehovah e broko en ede nanga ibriwan fu wi!
13. Fa a tori fu Kownu Yosafat e sori taki Yehovah e suku bun sani na ini wi, aladi wi no de volmaakti?
13 Bijbel e gi wi ete wan dyaranti taki Yehovah lobi wi, èn dati na taki a e suku fu si den bun sani di wi e du, èn taki a e warderi den. Prakseri a bun Kownu Yosafat leki eksempre. Di a kownu du wan don sani, dan a profeiti fu Yehovah taigi en: „Fu a sani disi ede meki Yehovah e atibron nanga yu.” Disi na wan seryusu tori! Ma dati no ben de a heri boskopu fu Yehovah. A ben taki moro fara: „Toku yu abi bun sani tu” (2 Kroniki 19:1-3). Sobun, a retidu fu Yehovah no meki taki a kon breni gi den „bun sani” fu Yosafat. Yu no feni taki a de wan trowstu gi wi taki Gado e suku bun sani na ini wi leki onvolmaakti libisma?
Wan Gado di de „klariklari fu gi pardon”
14. Te wi du sondu, dan sortu firi wi kan kisi di kan de leki wan hebi gi wi, ma fa wi kan kisi wini fu a fasi fa Yehovah e gi pardon?
14 Te wi du sondu, dan dati kan meki wi lasi-ati, a kan meki wi firi syen, èn a kan gi wi konsensi fonfon. Den sani disi kan meki wi kisi a firi taki wi no warti nofo fu dini Yehovah. Ma memre taki Yehovah de „klariklari fu gi pardon” (Psalm 86:5). Iya, efu wi abi berow fu den sondu fu wi èn efu wi e du tranga muiti fu no meki den srefi fowtu dati baka, dan Yehovah kan gi wi pardon. Luku san Bijbel e taki fu a tumusi moi fasi disi fa Yehovah e sori lobi gi wi.
15. O fara fu wi Yehovah e poti den sondu fu wi?
15 A psalm skrifiman David ben sori na wan kefalek moi fasi fa Yehovah e gi pardon: „So fara leki da oost de foe da west, so farawe A ben poeroe wi sondoe komopo foe wi” (Wi poti den wortu skoinsi; Psalm 103:12, Da Bijbel na ini Sranantongo). O fara owstusei de fu westsei? Te yu luku en bun, dan ala ten a de so taki owstusei de te na a wan sei fu grontapu èn taki westsei de te na a tra sei fu grontapu; den tu sei disi no sa man miti noiti. Wan sabiman ben taki dati den wortu disi wani taki, „so fara leki a man; so fara leki wi kan prakseri”. Den wortu di David skrifi nanga yepi fu santa yeye, e fruteri wi taki te Yehovah e gi pardon, dan a e puru den sondu fu wi poti so fara leki wi kan prakseri.
16. Fu san ede wi kan abi a dyaranti taki Yehovah e si wi leki krin sma baka te a gi wi pardon fu den sondu fu wi?
16 Oiti yu pruberi fu puru wan flaka fu wan weti-weti krosi? Kande a flaka no komoto, aladi yu du ala sortu sani fu puru en. Luku san Yehovah e taki fu a fasi fa en e gi sma pardon: „Awansi den sondu fu unu ben sa de leki redi kloru, toku den sa meki kon weti neleki snew; awansi den ben sa redi leki redi krosi, den sa tron srefi leki wol” (Yesaya 1:18). * Noiti wisrefi sa man fu puru a flaka fu sondu. Toku Yehovah kan meki taki den sondu fu wi di de leki redi kloru noso redi krosi, kon weti leki snew noso leki weti wol. Sobun, te Yehovah e gi wi pardon fu den sondu fu wi, dan wi no abi fu firi leki a flaka fu den sondu dati sa tan wi heri libi langa.
17. San a wani taki dati Yehovah e trowe den sondu fu wi na en baka?
17 Baka di Heskia ben kon betre fu wan siki di ben kan kiri en, dan a skrifi wan kefalek moi singi fu gi Gado tangi. A ben taigi Yehovah: „Yu trowe ala den sondu fu mi na yu baka” (Yesaya 38:17). A pisi disi e taki dati Yehovah e teki den sondu fu wan sma di abi berow, èn taki a e trowe den na en baka pe a no man si den, noso pe a no e poti prakseri na den moro. Soleki fa wan buku e taki, dan a prakseri di a pisi tori disi e tyari kon na fesi na: „Yu meki [den sondu fu mi] kon de leki sani di no pasa srefi.” Dati na wan moi trowstu gi wi, a no so?
18. Fa a profeiti Mika e sori taki Yehovah e puru wi sondu krinkrin te a e gi wi pardon?
18 Di a profeiti Mika ben e skrifi fu a pramisi di Yehovah ben meki fu teki den baka leki a pipel fu en, dan Mika ben sori taki a ben e bribi trutru taki Yehovah ben o gi pardon na a pipel fu en di ben abi berow: „Suma na wan Gado leki yu, . . . wan [Gado] di no e tan prakseri den sondu fu a fikapisi fu a famiri-gudu fu en? . . . Yu sa trowe ala den sondu fu den na ini a dipi fu a se” (Mika 7:18, 19). Prakseri san den wortu disi ben wani taki gi sma di ben e libi na ini Bijbel ten. Oiti den sma dati ben o man feni wan sani baka di sma ben trowe go „na ini a dipi fu a se”? Sobun, Mika e sori taki te Yehovah e gi sma pardon, dan a e puru den sondu fu wi krinkrin.
„A bigi sari-ati fu wi Gado”
19, 20. (a) San a Hebrew wortu di vertaal nanga „sori sari-ati” noso „sori taki yu e firi sari gi wan sma” wani taki? (b) Fa Bijbel e gebroiki den firi di wan mama abi gi en nyunyun pikin, fu meki wi frustan a sari-ati di Yehovah abi gi wi?
19 Ete wan sani di abi fu du nanga a lobi fu Yehovah na a sari-ati fu en. San na sari-ati? Bijbel e sori taki te wan sma abi sari-ati trutru, dan a sma dati e du muiti fu yepi den wan di de na nowtu. Difrenti Hebrew nanga Griki wortu abi fu du nanga a firi disi. Leki eksempre, furu tron sma vertaal a Hebrew wortu ra·chamʹ nanga „sori sari-ati” noso „sori taki yu e firi sari gi wan sma”. A Hebrew wortu disi, di Yehovah e gebroiki gi ensrefi, abi fu du nanga a wortu „muru”, èn yu kan teki en gersi nanga „den dipi firi di wan mama abi gi en pikin”.
20 Bijbel e gebroiki den firi di wan mama abi gi a nyunyun pikin fu en, fu meki wi frustan a sari-ati fu Yehovah. Yesaya 49:15 e taki: „Wan oema kan frigiti hem pikin na bobi, so dati a no sa abi sari-hati [ra·chamʹ] gi da manpikin foe hem bere? Ja, dem kan frigiti, tokoe Mi no sa frigiti joe” (Da Bijbel na ini Sranantongo). Wi no e fruwakti taki wan mama di abi wan pikin na bobi ete, sa frigiti fu sorgu en pikin, noso fu gi en pikin nyanyan. Bika te yu luku en bun, wan yongu pikin no man du noti fu ensrefi; dei nanga neti a abi yepi fu en mama fanowdu. Toku a de wan sari sani taki son mama no e poti prakseri na den pikin fu den. A de wan sani di e pasa furu tron, spesrutu na ini den „muilek ten” disi (2 Timoteyus 3:1, 3). Ma luku san Yehovah e taki: „Mi no sa frigiti joe.” A sari-ati di Yehovah abi gi den futuboi fu en bigi omeni dusun tron moro leki a moro tranga lobi di wan sma kan abi gi wan trawan, namku a lobi fu wan mama gi en nyunyun pikin.
21, 22. San den Israelsma ben ondrofeni na ini Egepte fu owruten? San Yehovah ben du di a yere a babari fu den?
21 Fa Yehovah de leki wan lobi-ati papa noso mama di e sori sari-ati gi en pikin? A sari-ati fu en de krin fu si na ini den sani di a du gi den Israelsma fu owruten. Na a kaba fu a di fu 16 yarihondro b.G.T., dan milyunmilyun Israelsma ben de srafu na ini Egepte, pe den ben kisi hebi kwinsi (Exodus 1:11, 14). Na ini a banawtu dati, den Israelsma begi Yehovah fu yepi den. San a Gado fu sari-ati ben du?
22 Yehovah ben firi a banawtu fu den Israelsma. A ben taki: „Mi si a pina fu mi pipel, di de na Egepte, èn mi yere a tranga babari fu den . . . bika mi sabi heri bun san na den pen di den abi” (Exodus 3:7). Yehovah no ben man si fa a pipel fu en ben e pina, èn a no ben man yere a tranga babari fu den sondro fu sari den. Yehovah na wan Gado di man frustan fa trawan e firi. Fu di a man frustan fa trawan e firi, meki a man sori sari-ati gi den. Ma toku Yehovah no ben e firi nomo gi a pipel fu en; a ben e du wan sani tu fu yepi den. Yesaya 63:9 e taki: „Fu di a lobi den èn fu di a abi sari-ati gi den, meki ensrefi bai den baka.” Nanga „wan tranga anu”, a fri den Israelsma fu Egepte (Deuteronomium 4:34). Baka dati a gi den nyanyan nanga yepi fu wan wondru, aladi a kibri den èn a tiri den go na ini wan moi kondre di a ben o gi den.
23. (a) Fa den wortu fu a psalm skrifiman e gi wi a dyaranti taki Yehovah e broko en ede srefisrefi nanga ibriwan fu wi? (b) Na sortu fasi Yehovah e yepi wi?
23 Yehovah no e sori sari-ati nomo gi a pipel fu en leki grupu. A lobi-ati Gado fu wi e broko en ede srefisrefi nanga ibriwan fu wi. A sabi heri bun na sortu fasi wi e pina. A psalm skrifiman ben taki: „Den ai fu Yehovah de na tapu den regtfardiki sma, èn den yesi fu en e yere te den e bari fu kisi yepi. Yehovah de krosibei fu den wan di den ati broko; èn den wan di masi na ini yeye, a e frulusu” (Psalm 34:15, 18). Fa Yehovah e yepi ibriwan fu wi dan? A no abi fu de so taki a e puru a sani di e meki taki wi e pina. Ma a seti furu sani gi den wan di e bari kari en fu a yepi den. A wortu fu en e gi wi spesrutu rai di kan de wan bigi yepi gi wi. A sorgu taki a gemeente abi lepi brada leki opziener, di e du muiti fu sori sari-ati neleki Gado, te den e yepi trawan (Yakobus 5:14, 15). Leki a „Yereman fu begi”, Yehovah e gi „santa yeye na den wan di e aksi en fu dati” (Psalm 65:2; Lukas 11:13). Ala den seti disi na buweisi fu „a bigi sari-ati fu wi Gado”.—Lukas 1:78.
24. Fa yu kan sori taki yu e warderi a lobi fu Yehovah?
24 A no e gi yu prisiri te yu e prakseri fu a lobi fu wi hemel Tata? Na ini a fosi studie-artikel wi ben kon si baka na sortu lobi-ati fasi Yehovah gebroiki a makti, a retidu, nanga a koni fu en, fu tyari wini kon gi wi. Na ini na artikel disi wi kon si someni moi fasi fa Yehovah sori krin taki a lobi a heri libisma famiri, iya ibriwan fu wi. Now a ben o bun efu wi alamala aksi wisrefi: ’Fa mi sa sori taki mi e warderi a lobi fu Yehovah?’ Meki a de so taki yu sori warderi fu di yu lobi en nanga yu heri ati, frustan, sili, nanga krakti (Markus 12:29, 30). Meki a de so taki a fasi fa yu e libi e sori taki yu na wan sma di wani kon moro krosibei na Yehovah trutru. Iya, meki a de so tu taki Yehovah, a Gado di na lobi, sa tan kon moro krosibei na yu, fu têgo!—Yakobus 4:8.
[Futuwortu]
^ paragraaf 16 Wan sabiman e taki dati a redi kloru ben de „wan kloru di yu no ben man wasi puru fu wan krosi. A kloru disi ben e tan soifri leki fa a de. Awinsi dow ben o naki en, noso alen ben o nati en, awinsi o furu yu ben o wasi noso gebroiki a krosi, a kloru no ben o komoto.”
Yu e memre disi ete?
• Fa wi du sabi taki lobi na a moro prenspari fasi fu Yehovah?
• Fu san ede wi kan taki dati noiti ete wan sma sori moro bigi lobi leki di Yehovah seni en Manpikin kon na grontapu fu pina èn dede gi wi?
• Fa Yehovah e sori taki a lobi ibriwan fu wi?
• Na sortu difrenti moi fasi Bijbel e fruteri wi fa Yehovah e gi sma pardon?
[Aksi fu a tori disi]
[Prenki na tapu bladzijde 15]
„Gado . . . gi en wan-enkri gebore Manpikin”
[Prenki na tapu bladzijde 16 17]
„Un warti moro leki furu pikin fowru”
[Sma di abi a reti fu a prenki]
© J. Heidecker/VIREO
[Prenki na tapu bladzijde 18]
Den firi di wan mama abi gi en pikin kan meki wi frustan a sari-ati fu Yehovah