San pasa nanga den foto Nof nanga No?

NOF nanga No na nen di Bijbel e gi den tu mamafoto fu Egepte, namku Memfes nanga Teibe. Wan ten ben de taki den foto disi ben de foto di ben abi barinen. A foto Nof (Memfes) ben de sowan 23 kilometer fu a zuidsei fu a foto Kairo, di ben de na a westsei fu a Nijl-liba. Ma baka wan pisi ten, Memfes no ben de a mamafoto fu Egepte moro. Na a bigin fu a yari 1500 b.G.T., Egepte ben abi wan nyun mamafoto, namku a foto No (Teibe) di ben de sowan 500 kilometer na a zuidsei fu Memfes. Na ini a foto Teibe furu broko tempel de. Wan fu den na a Karnak tempel, di sma e si leki a moro bigi bow-wroko di sma bow nanga yepi fu bigi stonpostu. Den ben wei a foto Teibe nanga a Karnak tempel na a anbegi fu Amon, a moro hei gado fu den Egeptesma.

San Bijbel profeititori taki na fesi fu den foto Memfes nanga Teibe? Gado ben krutu Farao nanga den gado fu Egepte, spesrutu a moro prenspari gado fu den, ’Amon fu a foto No’ (Yeremia 46:25, 26). Den ipi anbegiman di ben kon makandra drape ben o „koti puru” (Esekièl 30:14, 15). Èn na so a pasa tu. San tan abra fu na anbegi fu Amon na soso brokopresi fu a tempel. A disiten foto Luksor e tanapu na tapu wan pisi gron pe a foto Teibe fu owruten ben de, èn tra pikin dorpu de tu na mindri den brokopresi fu en.

Den wán-enkri sani di tan abra fu a foto Memfes na den beripe. Bijbel sabiman Louis Golding e taki: „ Hondrohondro yari den Arab winiman fu Egepte ben gebroiki a bun bigi brokopresi fu Memfes leki wan presi pe den ben kan diki ston nanga santi puru, soso fu bow a mamafoto [Kairo] fu den di ben de na abrasei fu a liba. We, a Nijl-liba nanga den Arab bowman du den wroko so kefalek, taki te yu e waka na tapu a gron pe na owru foto ben de, yu no e si nowan-enkri ston fu di a blaka doti tapu alamala.” Fu tru, neleki fa Bijbel ben fruteri, Memfes kon tron „wan soso sani di meki sma fruwondru . . . sondro sma di e libi na ini”.​—Yeremia 46:19.

Disi na tu fu den furu eksempre nomo di e sori a soifrifasi fu den profeititori fu Bijbel. A pori fu Teibe nanga Memfes e sori wi wan tu bun sani di e yepi wi fu poti frutrow na ini Bijbel profeititori, awansi den no kon tru ete.​—Psalm 37:10, 11, 29; Lukas 23:43; Openbaring 21:3-5.

[Sma di abi a reti fu a prenki na tapu bladzijde 32]

Photograph taken by courtesy of the British Museum