Wan video di meki fu naki na ati fu yonguwan

A VIDEO Jonge mensen vragen —Hoe kom ik aan echte vrienden? * gi furu yongusma a deki-ati fu ondrosuku seryusu a fasi fa den e tyari densrefi. A video abi bun rai di teki puru fu Bijbel, a e sori yongu Kresten di e taki fu sani di densrefi ben ondrofeni, èn a abi wan disiten drama di teki puru fu a Bijbel tori fu Dina (Genesis, kapitel 34). Den wortu di e kon now èn di abi fu du nanga a video, komoto fu Meksikow.

Martha taki: „A video naki mi ati trutru. A gersi leki a ben meki spesrutu gi mi. Mi ben prakseri taki a ben de nofo taki den leriman nanga den skoromati fu mi ben sabi taki mi na wan Kotoigi fu Yehovah. Ma mi no sori den taki mi na wan, fu di mi no gi den kotoigi. Mi breiti nanga ala den sani di Yehovah e leri wi, spesrutu te den sani di a e leri wi e naki wi ati so kefalek soleki fa a video disi e du.”

Juan Carlos taki: „A video disi e meki yu go denki trutru. Di mi ben de moro yongu, mi ben meki wan tu fowtu èn mi ben de leki wan tu fu den preiman di e prei na ini a drama. Wan tu yari na fesi, mi ben e libi wan dobru libi, ma mi ben kon si taki so wan libi kan tyari takru bakapisi kon. Baka di mi luku a video, mi teki a fasti bosroiti fu tan getrow na Yehovah.”

Sulem fruteri: „Di mi luku a video, a naki mi ati srefisrefi. Wan pisi ten na fesi mi ben tapu nanga a leisi fu Bijbel, èn mi no ben e begi Yehovah so furu moro. Di mi arki den komentaar fu den yongusma na ini a video, mi ben kisi deki-ati fu studeri a Bijbel baka èn sosrefi fu begi Yehovah.”

Na ini a ten disi, yongu sma abi fu du nanga furu tyalensi, èn nofo tron den mati fu den abi furu krakti tapu a fasi fa den e libi (Psalm 26:4; Odo 13:20). A video Jonge mensen vragen —Hoe kom ik aan echte vrienden? e yepi furu yongu sma fu teki a yoisti bosroiti ini a tori disi.

[Futuwortu]