Trowstu gi den sma di abi yepi fanowdu

A BIJBEL a no wan buku di e fruteri wi sani di abi fu du nanga gosontu na frustan sei. Ma a e gi wi trowstu èn a e yepi wi fu kan warderi a libi aladi wi abi fu du nanga problema. Trutru, Bijbel e taki: „Libisma, di wan uma meki, e libi syatu èn a abi furu problema” (Yob 14:1). Wi eigi onvolmaaktifasi e sorgu taki wi e kisi son tesi. Ma suma na a sma di de frantwortu trutru gi a pina di libisma e pina?

Bijbel e sori taki a sma dati na wan takru yeye di nen Didibri nanga Satan. A e „kori ala sma na heri grontapu” èn na en e tyari furu fu den problema kon di e trobi a libisma famiri. Ma Bijbel e fruteri wi taki a no abi furu ten moro (Openbaring 12:9, 12). Heri esi, Gado sa puru ala banawtu di Satan tyari kon tapu den sma di e libi na grontapu. Leki fa Bijbel e sori, dan a regtfardiki nyun grontapu di Gado pramisi sa tyari wan kaba kon na ala lasi-ati.​—2 Petrus 3:13.

A de wan trowstu trutru fu sabi taki a pina di libisma e pina de wan pisi ten nomo! Kruktudu nanga pina sa kon na wan kaba na ondro a tiri fu a hemel Kownukondre fu Gado di de na ondro a tirimakti fu Yesus Krestes. Bijbel e taki fu a Kownu di Gado poti na wroko: „A sa frulusu a pôtiwan di e bari fu kisi yepi, sosrefi a sma di e kisi kwinsi èn ibri sma di no abi yepiman. A sa firi sari gi a mofinawan èn gi a pôtiwan, èn a sa frulusu den sili fu den pôtiwan. Fu kwinsi èn fu ogri di e du nanga tranga a sa frulusu a sili fu den, èn a brudu fu den sa de warti na ini en ai.”​—Psalm 72:12-14.

A ten fu a kontru fu den profeiti wortu disi de krosibei trutru. Wi kan kisi na okasi fu kisi têgo libi na tapu wan paradijs grontapu pe sani sa waka heri bun (Lukas 23:43; Yohanes 17:3). Te den sma di abi yepi fanowdu e kon leri sabi den moi pramisi di skrifi na ini Bijbel, dan den e kisi howpu nanga trowstu.

[Sma di abi a reti fu a prenki na tapu bladzijde 32]

Wan umapikin di e firi brokosaka: Photo ILO/J. Maillard