Wi abi tra sma fanowdu trutru?

„TE WI e luku wi libi èn den muiti di wi e meki, dan wi sa si taki pikinmoro ala sani di wi e du èn ala sani di wi wani, abi fu du nanga tra libisma”, na so Albert Einstein, wan barinen sabidensiman ben taki. A ben taki moro fara: „Wi e nyan sani di tra sma prani, wi e weri krosi di tra sma meki, wi e libi na ini oso di tra sma bow. . . . A fasi fa wan sma de no e kon fu ensrefi, ma a e kon fu di a de wan memre fu wan bigi libisma libimakandra. A libimakandra abi krakti tapu den sani di wan sma abi èn a fasi fa a e libi, èn sosrefi tapu a fasi fa a e denki noso den sani di a e bribi. Disi de so fu sensi a ten te wan sma gebore te go miti a ten te a dede.”

A de so taki meti srefi e suku fu de makandra nanga tra meti. Asaw e waka makandra na ini wan ipi, pe den e kibri den yongu asaw so taki ogri no miti den. Den uma-lew e go onti makandra èn den e prati a nyanyan fu den nanga den man-lew. Profosu e prei nanga makandra èn den kibri tra meti srefi, noso den yepi sma di ben de fu dede na ini watra.

Ma sabidensiman di e ondrosuku sani di abi fu du nanga a libimakandra e broko den ede moro nanga moro nanga a fasi fa libisma e tyari densrefi now. Soleki fa wan koranti na ini Meksikow ben taki, dan son sabidensiman e denki taki „fu di sma tan den wawan someni tenti yari langa èn fu di den lasi gwenti fu du sani makandra nanga trawan, meki disi abi takru bakapisi gi a libimakandra na ini Amerkankondre”. A koranti ben taki dati „efu den wani taki sani go bun nanga a pipel, dan den ben o abi fu tyari wan bigi kenki kon na ini a fasi fa den e libi nanga makandra. Disi wani taki dati den musu abi moro demakandra nanga trawan soleki fa a ben de fosi.”

A problema disi de spesrutu na ini gudu kondre. Moro nanga moro sma e teki a gwenti fu de den wawan. Sma wani libi ’den eigi libi’ sondro taki trawan yepi den. Den no wani taki tra sma e ’bumui na ini a libi fu den, noso den no wani taki tra sma musu abi wan tumusi krosibei banti nanga den’. Sma e taki dati a fasi disi fa libisma e tyari densrefi e meki taki moro sma na ini a libimakandra e sari èn e lasi-ati moro esi, den no de koloku, èn den e pruberi fu kiri densrefi.

Ini a tori disi, Datra Daniel Goleman e taki: „Te wan sma no abi demakandra nanga trawan, dan a no abi nowan sma nanga suma a e taki fu den dipi firi fu en, noso a no abi wan krosibei banti nanga nowan sma. Te wan sma e du disi, dan a kan siki moro esi noso dede moro esi srefi.” Wan tijdschrift di nen Science ben sori taki te wan sma no abi demakandra nanga trawan, dan dati ’abi a srefi bakapisi leki te wan sma ben sa dede fu di a gwenti smoko, fu di a abi hei-brudu, fu di a abi tumusi furu cholesterol, fu di a fatu tumusi, èn fu di a no e buweigi en skin nofo’.

Fu dati ede, difrenti sani de di e meki taki wi abi tra sma fanowdu trutru. Wi no man du sani sondro a yepi fu trawan. Sobun, san sma kan du fu no de den wawan? San gi furu sma wan marki na ini a libi? Na artikel di e kon now sa taki fu den aksi disi.

[Prenspari pisi na tapu bladzijde 3]

„Pikinmoro ala sani di wi e du èn ala sani di wi wani, abi fu du nanga tra libisma.”​—Albert Einstein