Aksi fu leisiman

Yehovah ben gi pasi taki den owruten futuboi fu en, den Israelsma, ben trow nanga moro leki wán patna, ma now a no wani dati moro. A de so taki den markitiki fu en kenki?

Yehovah no kenki a fasi fa a e denki fu a trow di wan sma e trow nanga moro leki wán patna (Psalm 19:7; Maleaki 3:6). Disi no ben de wan sani di a ben seti gi libisma na ini a bigin, èn na ini a ten disi dati no de so tu. Di Yehovah meki Efa leki wan wefi gi Adam, dan a taki dati a ben wani wan man fu abi wán wefi nomo. A ben taki: „Dati meki wan man sa gowe libi en papa nanga en mama èn a musu tai hori na en wefi èn den musu tron wán skin.”​—Genesis 2:24.

Di Yesus Krestes ben de na grontapu, a taki fu a markitiki disi ete wan tron, fu piki den sma di ben aksi en sani di ben abi fu du nanga brokotrow èn nanga a trow di sma e trow baka. A ben taki: „Unu no leisi taki a sma di meki den na a bigin, meki den leki man nanga uma, èn a ben taki: ’Dati meki wan man sa gowe libi en papa nanga mama èn a sa tan nanga en wefi èn den tu disi sa de wán skin’? Fu dati ede den no de tu skin moro, ma wán skin.” Yesus ben taki moro fara: „Efu wan man broko trow nanga en wefi, ma a wefi no ben du hurudu, èn a man e trow nanga wan tra uma, dan a du sutadu” (Mateyus 19:4-6, 9). Disi e sori krin taki te wan sma e teki moro leki wán wefi, dan a sma dati e du sutadu tu.

Ma fu san ede Yehovah ben gi pasi taki den futuboi fu en na ini owruten ben abi moro leki wán trowpatna? Hori na prakseri taki a gwenti disi no e komoto fu Yehovah. A fosi sma di Bijbel e taki fu en leki wan man di ben abi moro leki wán wefi, na Lamèk, wan bakapikin fu Kain (Genesis 4:19-24). Di Yehovah tyari a Frudu na ini den dei fu Noa, dan Noa nanga den dri manpikin fu en ben abi wán wefi nomo. Ala sma di ben abi moro leki wán trowpatna, kisi pori na ini a frudu.

Hondrohondro yari na baka, di Yehovah teki den Israelsma leki a pipel fu en, sonwan fu den ben abi moro leki wán trowpatna. Ma soleki fa a ben sori, dan a ben de wan aladei sani tu taki furu mansma ben abi wán wefi nomo. Te mansma ben abi moro leki wán wefi, dan Gado no ben feni en fanowdu taki den osofamiri disi ben musu prati. Na presi fu dati a ben poti wet di ben sori finifini fa den mansma disi ben musu libi nanga den memre fu en osofamiri.​—Exodus 21:10, 11; Deuteronomium 21:15-17.

A de krin fu si taki Yehovah no e gi pasi fu ala ten taki sma ben kan abi moro leki wán trowpatna. Wi e si dati te wi e luku san Yesus ben taki fu a markitiki di Yehovah ben poti na ini a bigin gi sma di o trow, èn te wi e luku san na apostel Paulus ben skrifi nanga yepi fu a santa yeye fu Gado. Paulus ben taki: ’Meki ibri man abi en eigi wefi èn meki ibri uma abi en eigi masra’ (1 Korentesma 7:2). A santa yeye ben meki Paulus skrifi sosrefi taki iniwan man di poti leki owruman, noso leki wan dinari ini a diniwroko na ini a gemeente, musu de „wan masra fu wán wefi nomo”.​—1 Timoteyus 3:2, 12; Titus 1:6.

Sobun, di a Kresten gemeente seti sowan 2000 yari pasa, dan Yehovah no e gi pasi moro taki den futuboi fu en ben abi moro leki wán trowpatna. Na a ten dati, sma di ben trow ben musu hori densrefi na a markitiki di Gado ben poti gi a fosi man nanga uma di a ben meki: wan man musu abi wán wefi nomo. Na ini a ten disi, a pipel fu Gado na heri grontapu musu hori densrefi na a markitiki disi.​—Markus 10:11, 12; 1 Korentesma 6:9, 10.