Fa fu de leki a Gado fu waarheid

„Un musu de sma di e waka baka na eksempre fu Gado, leki lobi pikin.”​—EFEISESMA 5:1.

1. Sortu denki son sma abi fu waarheid noso tru tori, èn fu san ede a denki disi fowtu?

„SAN na waarheid?” (Yohanes 18:38) Pontius Pilatus ben taki na wan spotu fasi di a poti na aksi dati sowan 2000 yari pasa. Nanga na aksi dati a ben wani sori taki waarheid na wan tumusi dangra sani fu man sabi dati. Furu sma na ini a ten disi abi a srefi denki disi. Sma e tweifri efu waarheid de trutru. Kande yu yere sma taki dati ibriwan sma abi en eigi denki fu san tru, noso taki nowan sma man sabi san tru, noso taki tru tori e kenki ibri tron baka. A denki disi fowtu. Yoisti a de so taki sma e ondrosuku sani èn den e leri sani fu a libi, so taki den kan frustan fa den de trutru. Wan tori no tru soso fu di wan sma feni taki a tru. Luku den tori disi fu eksempre: a libisma sili e dede, noso a no e dede. Satan de trutru, noso a no de. A libi abi wan marki, noso a no abi wan marki. Na ini ibriwan fu den eksempre disi, yu kan abi wán yoisti piki nomo. Wán tru, èn a trawan no tru; ala tu no kan tru.

2. Na sortu fasi Yehovah na a Gado fu waarheid, èn sortu aksi wi sa go luku?

² Na ini a fosi artikel wi ben si taki Yehovah na a Gado fu waarheid. A sabi fa ala sani de trutru. Satan Didibri, a gensman fu Yehovah di e kori sma, de heri tra fasi leki Yehovah di noiti no e lei. Boiti dati, ala ten Yehovah de klariklari fu sori trawan san na waarheid. Na apostel Paulus ben gi tra Kresten a deki-ati: „Un musu de sma di e waka baka na eksempre fu Gado, leki lobi pikin” (Efeisesma 5:1). Fa wi, leki Kotoigi fu Yehovah, kan teki na eksempre fu Gado? Fa wi kan sori taki wi de sma di no e lei, èn fa wi kan libi akruderi waarheid? Fu san ede a de prenspari fu du disi? Sortu dyaranti wi abi taki Yehovah e feni den sma bun di e meki muiti fu de sma di no e lei? Meki wi go luku.

3, 4. Fa den apostel Paulus nanga Petrus fruteri san ben o pasa na ini „den lasti dei”?

³ Wi e libi na ini wan pisi ten pe falsi bribi lai. Soleki fa na apostel Paulus ben taki nanga yepi fu a santa yeye, dan furu sma na ini den „lasti dei” disi wani dini Gado na wan getrow fasi, ma den no abi a krakti fu libi na a fasi disi. Son sma no wani sabi a waarheid, fu di den abi ’wan kruktu denki fu sani’. Boiti dati, „ogri sma nanga bedrigiman . . . kon moro ogri, aladi den e kori sma èn trawan e kori den”. Aladi den sortu  sma disi e tan leri go doro, toku noiti den no e kisi „wan soifri sabi fu waarheid”.​—2 Timoteyus 3:1, 5, 7, 8, 13.

⁴ Yehovah ben meki na apostel Petrus skrifi tu san ben o pasa na ini den lasti dei. Soleki fa a ben taki na fesi, dan a no de so nomo taki sma no wani sabi a waarheid, ma den e spotu a Wortu fu Gado tu. Boiti dati, den e spotu den sma di e meki a waarheid bekènti. „Fu espresi” den spotuman disi no wani sabi taki a grontapu fu den dei fu Noa ben pori nanga watra èn taki disi na wan eksempre fu sori san o pasa na a dei fu krutu di de fu kon. Fu di den spotuman e denki taki den sani disi no o pasa nanga den trutru, meki rampu o miti den te a ten fu Gado doro fu pori den ogri sma.​—2 Petrus 3:3-7.

Futuboi fu Yehovah sabi san na a waarheid

5. San ben o pasa na ini „a ten fu a kaba”, soleki fa a profeiti Danièl ben taki? Fa a profeititori disi kon tru?

⁵ Di a profeiti Danièl ben taki san ben o pasa na ini „a ten fu a kaba”, dan a ben taki na fesi dati wan heri tra sani ben o pasa na mindri a pipel fu Gado, namku a tru bribi ben o opo kon baka. A ben skrifi: „Furu sma sa waka lontu, èn a tru sabi sa kon de pasa marki” (Danièl 12:4). A bigi Bedrigiman no man bruya noso breni a pipel fu Yehovah. Fu di den ondrosuku Bijbel, meki den kon kisi tru sabi. Na ini a fosi yarihondro, Yesus ben yepi den disipel fu en fu frustan sani moro krin. A „opo den ai, so taki den ben kon frustan ala san den Santa Buku ben wani taki” (Lukas 24:45). Na ini a ten disi, Yehovah du a srefi sani tu. Nanga yepi fu en Wortu, en yeye, nanga en organisâsi, a meki milyunmilyun sma na heri grontapu frustan san a sabi kaba, namku a waarheid.

6. Sortu tru tori fu Bijbel a disiten pipel fu Gado sabi?

⁶ Leki a pipel fu Gado, wi e frustan furu sani di wi no ben o man sabi na nowan tra fasi. Wi sabi a piki tapu aksi di sabiman fu grontapu suku fu kon sabi dusundusun yari kaba. Fu eksempre, wi sabi fu san ede sma e pina, fu san ede sma e dede, èn fu san ede libisma no man tyari vrede nanga wánfasi kon na heri grontapu. Wi kon sabi tu san wi kan fruwakti na ini a ten di e kon, namku a Kownukondre fu Gado, wan paradijs grontapu, èn têgo libi leki volmaakti libisma. Wi kon leri sabi Yehovah, a Moro Heiwan. Wi kon leri sabi den tumusi moi fasi fu en èn san wi musu du fu kisi blesi fu en. Fu di wi sabi den tru tori disi, meki wi man si krin san no tru. A libi di wi e libi akruderi den tru tori dati, e kibri wi fu no feti baka soso sani. Boiti dati, a e yepi wi fu libi na wan fasi di e tyari trutru wini kon, èn a e gi wi wan tumusi moi howpu tu gi a ten di e kon.

7. Suma man frustan den tru tori fu Bijbel, èn suma no man frustan den?

⁷ Yu e frustan den tru tori fu Bijbel? Efu disi de so, dan yu kisi wan bigi blesi. Te wan sma skrifi wan buku, dan a e meki en na so wan fasi taki a e hari a prakseri fu wan spesrutu grupu fu sma. Son buku skrifi gi sma di kisi hei skoroleri, trawan skrifi gi pikin-nengre, èn tra buku skrifi gi sma di e du wan spesrutu sortu wroko. Aladi ala sma kan kisi wan Bijbel makriki, toku na soso wán spesrutu grupu fu sma man frustan èn warderi san skrifi na ini. Yehovah meki en gi sma di abi sakafasi, sobun gi den safri-ati sma fu grontapu. Na den sortu sma disi e frustan den sani di skrifi na ini Bijbel, awinsi sortu leri den kisi, awinsi fu sortu kulturu den de, awinsi sortu posisi den abi na ini a libimakandra, noso awinsi fu sortu kondre den de (1 Timoteyus 2:3, 4). Na a tra sei, sma di no abi sakafasi no man frustan a waarheid fu Bijbel, awinsi fa den koni noso awinsi omeni skoroleri den kisi. Sma di abi heimemre noso bigifasi no man frustan den tumusi warti tru tori di de na ini a Wortu fu Gado (Mateyus 13:11-15; Lukas 10:21; Tori fu den Apostel 13:48). Na Gado wawan kan meki so wan buku.

Futuboi fu Yehovah no e lei

8. Fu san ede Yesus srefi ben de a waarheid?

⁸ Neleki Yehovah, den getrow futuboi fu en no e lei. Den sani di Yesus Krestes, a moro prenspari Kotoigi fu Yehovah, ben e leri sma èn a fasi fa a ben libi èn dede, ben poti moro krakti  tapu a waarheid di a ben meki bekènti. Ala ten a ben e horibaka gi den tru tori nanga den pramisi fu Yehovah. Fu dati ede, Yesus srefi ben de a waarheid, soleki fa ensrefi ben taki.​—Yohanes 14:6; Openbaring 3:14; 19:10.

9. San den Buku fu Bijbel e taki fu a taki di wan sma musu taki sani di de tru?

⁹ Yesus ben abi „furu bun-ati nanga waarheid” èn „nowan bedrigifasi ben de na ini en mofo” (Yohanes 1:14; Yesaya 53:9). Tru Kresten e teki na eksempre di Yesus gi fu no lei gi trawan. Paulus ben gi tra bribiman a rai disi: „Taki waarheid, ibriwan fu unu nanga a sma na en sei, bika wi na memre di de fu makandra” (Efeisesma 4:25). A profeiti Sakaria ben skrifi kaba: „Taki waarheid nanga makandra” (Sakaria 8:16). Kresten e taki sani di tru fu di den wani plisi Gado. Yehovah e taki sani di tru èn a sabi sortu takru bakapisi leitori kan abi. Dati meki, nanga leti a e fruwakti fu den futuboi fu en taki den e taki sani di de tru.

10. Fu san ede libisma e lei, èn sortu takru bakapisi disi abi?

¹⁰ Furu sma feni taki wan makriki fasi fu kisi wan sani na fu lei. Libisma e lei te den no wani kisi strafu, te den wani kisi wini, noso te den wani taki trawan musu prèise den. Ma toku, lei na wan takru gwenti. Boiti dati, wan leiman no kan plisi Gado (Openbaring 21:8, 27; 22:15). Te trawan sabi wi leki sma di no e lei, dan den e bribi san wi e taki; den e frutrow wi. Ma te sma kon si taki wi lei, awinsi na wán leisi nomo, dan den o tweifri na iniwan sani di wi o taki bakaten. Wan odo fu Afrika e taki so: „Wan lei e pori dusundusun tru tori.” Wan tra odo e taki: „Nowan sma e bribi wan leiman, awinsi a e taki tru tori.”

11. San moro wi musu du boiti fu taki sani di tru?

¹¹ Aladi a de prenspari fu taki sani di tru, toku wi musu du moro ete. A heri fasi fa wi e tyari wisrefi musu sori taki wi no e bedrigi sma. Sma musu si suma wi de trutru. A no nanga den sani di wi e taki nomo wi e meki sma kon sabi a waarheid, ma sosrefi nanga den sani di wi e du. Na apostel Paulus ben aksi: „Yu di e leri trawan, yusrefi e leri fosi? Yu di e preiki ’Un no musu fufuru’, yusrefi e fufuru? Yu di e taigi sma ’No du sutadu’, yusrefi e du sutadu?” (Romesma 2:21, 22) Efu wi wani meki trawan sabi waarheid, dan ala san wi e du musu sori taki wisrefi e libi akruderi waarheid. Te sma sabi taki wi no e lei èn taki wi no e bedrigi trawan, dan disi sa abi furu krakti tapu a fasi fa sma o arki san wi e leri den.

12, 13. San wan yonguwan skrifi fu a de di wi musu de sma di no e lei? San meki a hori ensrefi na bun gwenti?

¹² Den yongu futuboi fu Yehovah e frustan tu o prenspari a de fu no lei. Di Jenny ben abi 13 yari, dan a ben abi fu skrifi wan pisi tori na skoro. A ben skrifi: „A de tumusi prenspari gi mi fu de wan sma di no e lei. A de wan sari sani taki furu sma na ini a ten disi e lei. Mi pramisi misrefi taki mi heri libi langa mi sa de wan sma di no e lei. Mi no sa lei noiti, awinsi a no e tyari wini gi mi, noso gi den mati fu mi. Mi e luku bun taki mi mati no de sma di e lei, ma sma di e taki soso tru tori.”

¹³ A skoromisi fu Jenny ben taki disi fu a pisi tori fu en: „Aladi yu yongu srefisrefi, toku yu abi a fasti bosroiti fu hori yusrefi na san bun. Mi sabi taki yu o hori yusrefi na den bun gwenti disi fu di yu abi a krakti fu du so.” San ben gi a skoropikin disi so wan krakti? Na a bigin fu a tori di Jenny skrifi, a fruteri taki a bribi fu en „e poti den markitiki di de fanowdu fu libi na wan yoisti fasi”. Seibi yari pasa sensi Jenny skrifi a tori dati. Soleki fa a skoromisi ben fruwakti kaba, dan Jenny tan hori ensrefi na bun gwenti leki wan Kotoigi fu Yehovah.

Futuboi fu Yehovah e tyari a waarheid kon na krin

14. Fu san ede spesrutu wi leki futuboi fu Gado abi wan bigi frantwortu fu horibaka gi san tru?

¹⁴ A no de fu taki dati tra sma, boiti Yehovah Kotoigi, e taki sani tu di de tru èn den e pruberi sosrefi fu no bedrigi sma. Ma spesrutu leki futuboi fu Gado, wi abi wan bigi frantwortu fu horibaka gi san tru. Gado meki wi kon frustan den tru tori fu Bijbel di kan gi têgo libi. Dati  meki wi abi a frantwortu fu prati a sabi dati nanga trawan. Yesus taki: „Ibri sma di ben kisi furu sani, sma sa aksi furu fu en baka” (Lukas 12:48). Iya, Gado e fruwakti furu fu den wan di a blesi nanga a warti sabi fu En.

15. Sortu prisiri yu e kisi te yu e prati Bijbel waarheid nanga tra sma?

¹⁵ A e gi prisiri fu prati Bijbel waarheid nanga tra sma. Neleki den fosi yarihondro disipel fu Yesus, wi e fruteri sma a bun nyunsu, wan tumusi moi boskopu di e gi howpu. Wi e fruteri en na sma di e ’kisi kwinsi èn di e waka bruyabruya leki skapu sondro skapuman’, èn sosrefi na den wan di kon breni èn kon bruya fu ’den leri fu den ogri yeye’ (Mateyus 9:36; 1 Timoteyus 4:1). Na apostel Yohanes ben skrifi: „Nowan tra sani e gi mi moro prisiri leki te mi e yere taki den pikin fu mi e tan waka na ini a waarheid” (3 Yohanes 4). Den „pikin” fu Yohanes ben kan de den sma di Yohanes ben tyari kon na ini a waarheid, èn a ben breiti srefisrefi fu si fa den sma disi ben tan getrow. Wisrefi e breiti tu te wi e si taki sma e warderi a Wortu fu Gado.

16, 17. (a) Fu san ede a no ala sma e teki a waarheid? (b) Sortu prisiri yu kan kisi te yu e meki den tru tori fu Bijbel bekènti?

¹⁶ A tru, taki a no ala sma sa teki a waarheid. Yesus ben fruteri a waarheid fu Gado, awinsi sma no ben wani arki en. A taigi den Dyu di ben e gens en: „Fu san ede unu no e bribi mi? A sma di de fu Gado, e arki den sani di Gado e taki. Fu dati ede unu no e arki, bika unu no de fu Gado.”​—Yohanes 8:46, 47.

¹⁷ Neleki Yesus, wi no e draidrai fu fruteri sma a tumusi warti waarheid fu Yehovah. Wi no e fruwakti taki ala sma sa arki san wi e taigi den, bika a no ala sma ben wani arki san Yesus ben taki. Ma toku wi e prisiri fu di wi sabi taki wi e du wan bun sani. Fu di Yehovah abi lobi bun-ati, meki a wani taki ala sma kon sabi a waarheid. Fu di Kresten abi a waarheid, meki den tron tyariman fu leti na ini a grontapu disi di de na dungru. Te wi e meki a leti fu waarheid skèin nanga yepi fu den sani di wi e taki èn den sani di wi e du, dan na so wan fasi wi kan yepi tra sma fu gi glori na wi hemel Tata  (Mateyus 5:14, 16). Wi e meki ala sma sabi taki wi drai baka gi den sokari tru tori fu Satan èn wi e tan hori wisrefi na a krin èn soifri Wortu fu Gado. Te sma e teki a waarheid di wi sabi èn di wi e prati, dan dati kan meki den kon fri trutru.​—Yohanes 8:32.

Tyari yusrefi leki wan sma di e taki san de tru

18. Fu san ede Yesus ben lobi Natanaèl èn fa a ben sori disi?

¹⁸ Yesus ben lobi waarheid èn a no ben e taki lei. Di a ben e du en diniwroko na grontapu, dan a ben sori taki a lobi sma di no e lei. Yesus ben taki fu Natanaèl: „Luku! A man disi na trutru wan Israelsma di no e bedrigi sma” (Yohanes 1:47). Bakaten, Yesus ben teki Natanaèl, di den ben e kari Bartolomeyus tu, leki wan fu den 12 apostel (Mateyus 10:2-4). Dati ben de wan bigi grani trutru!

19-21. Fa wan man di ben breni fosi, ben kisi blesi fu di a no ben frede fu taki sani di tru?

¹⁹ Wan heri kapitel na ini a Bijbel buku Yohanes e taki fu wan tra man di Yesus ben blesi fu di a ben taki sani di tru. Wi no sabi a nen fu a man disi. Ma san wi sabi fu a man disi na taki a ben e begi sani na strati èn a ben breni sensi a gebore. Den sma ben e fruwondru di Yesus meki a man disi si. Den Fariseiman, di no ben wani sabi kwetikweti san de tru, ben kon yere a nyunsu fu a wondru fasi fa a man disi kon betre. Den Fariseiman disi bosroiti taki iniwan sma di ben e bribi na ini Yesus, ben musu yagi puru na ini a snoga. A papa nanga a mama fu a man di ben breni fosi, ben e frede den Fariseiman èn di den yere sortu bosroiti den Fariseiman ben teki, dan den lei taki den no ben sabi fa a manpikin fu den ben man si now èn den no ben sabi suma ben dresi en.​—Yohanes 9:1-23.

²⁰ Ete wan leisi, den kari a man di kon betre fu kon na fesi den Fariseiman. Sondro fu broko en ede nanga den bakapisi, a man disi taigi den san ben pasa trutru. A fruteri den fa a ben kon betre èn taki na Yesus ben dresi en. A man di kon betre ben fruwondru taki den prenspari man disi di kisi hei skoroleri no ben e bribi taki Yesus ben kon fu Gado. Sobun, sondro fu frede a gi den a deki-ati fu teki a sani leki fa a de. A taigi den: „Efu a man disi no ben de fu Gado, dan a no ben o man du noti srefi.” Fu di den Fariseiman no ben man taki noti, den krutu a man taki a ben afrontu den èn den trowe en go na dorosei.​—Yohanes 9:24-34.

²¹ Di Yesus yere san pasa, dan na wan lobi-ati fasi a teki ten fu go suku a man. Di a feni a man disi di ben breni fosi, dan meki a bribi di a man ben sori, kon moro tranga. Yesus sori a man krinkrin taki en na a Mesias. Fu tru, dati na wan blesi di a man kisi fu di a ben taki fa sani pasa trutru! Iya, Gado e feni den sma bun di e taki sani di tru.​—Yohanes 9:35-37.

22. Fu san ede wi musu tyari wisrefi leki sma di e taki san de tru?

²² Wi musu si en leki wan seryusu sani fu taki san de tru. A de prenspari fu du disi efu wi wani kisi wan bun banti nanga tra sma èn nanga Gado èn efu wi wani tan hori a bun banti disi. Wan sma di no e lei de opregti, tra sma man taki nanga en na wan fri fasi, den e frutrow en, èn Yehovah o feni en bun (Psalm 15:1, 2). Wan sma di e lei e bedrigi trawan, a no de fu frutrow, a e taki falsi sani, èn Yehovah no lobi so wan sma kwetikweti (Odo 6:16-19). Fu dati ede, teki a fasti bosroiti fu tyari yusrefi leki wan sma di e taki san de tru. Iya, efu wi wani de leki a Gado fu waarheid, dan wi musu sabi a waarheid, wi musu taki waarheid, èn wi musu libi akruderi a waarheid.

San yu ben sa piki?

• Fu san ede wi musu breiti taki wi sabi a waarheid?

• Fa wi kan de leki Yehovah di no e lei?

• Sortu wini wan sma e kisi te a e prati Bijbel waarheid nanga trawan?

• Fu san ede a de prenspari fu tan tyari wisrefi leki sma di e taki san de tru?

[Aksi fu a tori disi]

[Prenki na tapu bladzijde 17]

Kresten kisi Bijbel waarheid èn den e prati en fayafaya nanga tra sma

 [Prenki na tapu bladzijde 18]

A breni man di Yesus ben dresi, ben kisi bigi blesi fu di a ben taki fa sani pasa trutru