Pôtisma e kon moro pôti

„Na ini wan libimakandra pe a moro bigi pisi fu den sma na pôtisma di no de koloku, a libi noiti no kan waka bun, èn sma noiti no sa de koloku trutru.”

SABIMAN FU EKONOMIA AFERSI, Adam Smith, ben taki a sani dati na ini a di fu 18 yarihondro. Furu sma feni taki na ini a ten disi yu kan si moro krin taki a tru san a sabiman disi ben taki. A difrenti na mindri pôtisma nanga gudusma kon moro bigi na ini a ten disi srefi. Na ini den Filippijnen, a di fu dri pisi fu a pipel no e meki wán Amerkan dala ete wan dei, èn dati na moni di wan sma e frudini na ini wan tu miniti na ini gudu kondre. Wan tra raportu, namku a United Nations Human Development Report 2002 e taki dati „na ini wan mun, 5 procent fu den moro gudusma na grontapu e meki 114 leisi so furu moni leki san 5 procent fu den moro pôtisma e meki”.

Aladi son sma abi pikinmoro ala sani di den abi fanowdu na ini den libi, toku bun furu sma e libi na tapu tra sma dyari noso na ini tra sma oso, sondro taki den abi primisi fu du dati. Den sortu sma disi e meki pikin broko kampu na iniwan presi pe den man. Trawan no abi a koloku dati; den e libi na strati, èn kande den e didon na tapu soso wan pisi karton noso wan pisi plastik. Furu fu den sma disi e meki ala sortu muiti fu man tan na libi; den e sukusuku sani na tapu doti-ipi, den e syow hebi lai, noso den e piki papira, leigi plastik batra nanga tra sani poti na ini den pikin wagi di den e pusu, soso fu man seri den sani disi gi pikinso moni.

A no de so taki na ini den pôti kondre wawan difrenti de na mindri gudusma nanga pôtisma, ma soleki fa a Wereldbank e taki dan „ grupu fu pôtisma de na ini ala kondre”. A no abi trobi o gudu son sma de, toku a de so taki fu Bangladesy te go miti Amerkankondre, tra sma de di e du ala san den man fu feni wan sani fu nyan, noso fu feni wan presi fu tan. A tijdschrift The New York Times ben skrifi taki wan raportu fu 2001 fu a Census Bureau fu Amerikankondre e sori taki a grupu fu pôtisma na ini Amerkankondre kon moro bigi. A tijdschrift ben taki: „A yari di pasa, afu fu ala moni di sma na ini Amerkankondre e meki wan mun, go na a di fu feifi pisi fu a pipel di de den moro gudu sma na ini a kondre . . . A di fu feifi pisi fu a pipel di de den moro pôtiwan kisi 3,5 procent.” A srefi situwâsi disi de na ini furu tra kondre, èn na ini son kondre a de moro ogri. A Wereldbank raportu e sori taki sowan 57 procent fu a pipel na grontapu no e meki moro leki tu Amerkan dala ete wan dei.

San e meki a situwâsi moro ogri, na taki na ini a yari 2002, milyunmilyun sma kon sabi taki furu heihei bisnis-sma ben kon gudu  na wan fasi di meki furu sma tweifri. A sani disi gi furu sma broko-ede. Srefi efu den bisnis-sma disi no ben du nowan kruktudu krinkrin, toku furu sma e firi taki den „ben kon gudu na wan fasi di no kan, èn di no fiti srefisrefi”, na so a tijdschrift Fortune e skrifi. Te wi e luku san e pasa na grontapu, dan son sma e aksi densrefi fa a kan taki trawan kan meki so furu moni, namku hondrohondro milyun dala, aladi so furu sma e libi na ini pôtifasi.

Pôtisma sa de fu ala ten?

Dati no wani taki dati nowan sma e pruberi fu yepi den pôtiwan. A no de fu taki dati heihei lantiman nanga organisâsi di abi a bun fu den sma disi na prakseri e suku fasi fu tyari wan kenki kon na ini a situwâsi fu den pôtiwan. Toku a situwâsi e tan a srefi. A Human Development Report 2002 e taki: „Furu kondre kon moro pôti leki 10 noso 20 yari pasa, èn sonwan fu den kon moro pôti leki 30 yari pasa”, aladi den kondre disi du furu bun sani fu tyari wan kenki kon.

A sani disi wani taki dati yepi no de gi den pôtiwan? Grantangi leisi na artikel di e kon now, fu luku san sma kan du fu tyari wan kenki kon nownowde. Yu sa kon sabi sosrefi fa yu kan lusu den problema disi na wan fasi di kande yu no ben prakseri fu en ete.