A ben lobi switifasi

A LIBI fu Milton Henschel kon na wan kaba na grontapu tapu Satra 22 maart 2003. A brada disi ben dini bun langa leki wan memre fu a Tiri Skin fu Yehovah Kotoigi. A ben abi 82 yari.

Di Milton Henschel ben de wan yonkuman, dan a bigin wroko na a edekantoro fu Yehovah Kotoigi pe a dini getrow moro leki 60 yari. Heri esi sma kon sabi en leki wan man di ben sabi fa fu krutu sani na wan yoisti fasi èn leki wan sma di ben lobi a Kownukondre preikiwroko trutru. Na ini 1939, a ben tron a sekretarsi fu N. H. Knorr, di ben teki fesi fu a wroko na ini a drukkerij fu Yehovah Kotoigi na ini Brooklyn. Na ini 1942, di Brada Knorr bigin teki fesi fu a wroko di Yehovah Kotoigi e du na heri grontapu, dan a tan hori Brada Henschel leki en yepiman. Na ini 1956, Brada Henschel trow nanga Lucille Bennett, èn makandra den alatu ondrofeni den prisiri nanga den tyalensi fu a libi.

Brada Henschel ben wroko skinskin nanga Brada Knorr teleki Brada Knorr dede na ini 1977. Brada Henschel ben gwenti fu de makandra nanga Brada Knorr, èn na so a go na moro leki 150 kondre na heri grontapu fu gi Yehovah Kotoigi deki-ati. A go spesrutu na den zendeling èn na den brada nanga sisa na den difrenti bijkantoro. Son leisi a ben hebi gi den fu go na den sortu presi dati, èn kefar ben miti den tu. Na ini 1963, di Brada Henschel ben de na wan kongres na ini Liberia, dan sma frufolgu en na wan ogri-ati fasi fu di a no ben wani teki prati na wan seremonia di sma ben hori fu sori taki den lobi a kondre fu den. * Brada Henschel no ben frede, ma a go baka na Liberia wan tu mun baka dati nomo fu miti a presidenti fu a kondre èn fu du muiti taki Yehovah Kotoigi kisi primisi fu anbegi Gado moro fri.

Te Brada Henschel ben miti nanga muilek problema nanga tyalensi, dan a ben gwenti fu du sani na a yoisti fasi, èn a no ben du muilek. Den sma di wroko makandra nanga en ben warderi en spesrutu taki a ben lobi fu du sani na wan orga fasi, a no ben denki tumusi furu fu ensrefi, èn a ben lobi taki sani fu meki sma lafu. Fu di a ben man memre sani heri bun, meki den zendeling na heri grontapu ben e prisiri te a ben memre den nen sondro problema, te a ben e taki wan tu sani na ini a tongo fu a kondre di a ben e fisiti, noso te a ben e taki wan sani fu meki den lafu. Furu tron en ai ben e brenki te a ben du dati.

Mika 6:8 e memre wi taki Yehovah Gado wani wi „fu lobi switifasi”. Wi sa memre Milton Henschel leki wan man di ben sori wi fa fu du dati. Aladi a ben abi bun furu frantwortu, toku sma ben kan taki makriki nanga en ala ten, a ben abi safri-ati fasi, nanga switifasi. A ben lobi fu taki: „Te mi no sabi san fu du na ini wan spesrutu situwâsi, dan mi e prakseri taki a moro bun sani fu du na fu sori switifasi.” Aladi wi e sari taki a lobi brada disi dede, toku wi e prisiri taki a horidoro na wan getrow fasi te na a kaba, èn wi abi a dyaranti taki a sa kisi en paiman, namku „a kownu-ati fu libi”.​—Openbaring 2:10.

[Futuwortu]

[Prenki na tapu bladzijde 31]

M. G. Henschel makandra nanga N.H. Knorr

[Prenki na tapu bladzijde 31]

Brada Henschel nanga en wefi, Lucille