A fasi fa Gado e si sma di dede

A DE wan sari sani trutru te wan lobiwan fu wi lasi en libi. A hebi srefisrefi te yu e misi a sma, te yu e firi sari fu di yu de yu wawan èn te yu e firi a lasi di yu lasi a sma. Fu di wan sma lasi wan lobiwan fu en, meki a kan firi leki a no man yepi ensrefi, awansi omeni moni, nanga makti a abi, nowan sma na grontapu kan gi wan dedesma libi baka.

Ma a Mekiman fu wi e si sani tra fasi. Fu di a meki a fosi libisma fu a doti fu a gron, dan a kan meki wan dedesma kon nyun baka. Disi na fu san ede Gado kan si den dedesma leki den de na libi. Yesus ben taki fu den getrow futuboi fu owruten di dede kaba a sani disi: „Soleki fa Gado e si en, dan den alamala e libi.”​—Lukas 20:38, futuwortu.

Di Yesus ben de na grontapu, a ben kisi makti fu opo dedesma baka (Yohanes 5:21). Fu dati ede a e si sani soleki fa a Tata fu en e si den getrow sma di lasi den libi. Teki leki eksempre, di Lasarus, a mati fu Yesus, dede, dan a taigi den disipel fu en: „Mi e go drape fu wiki en na a sribi” (Yohanes 11:11). Leki fa libisma e si en, dan Lasarus ben dede, ma gi Yehovah nanga Yesus, Lasarus ben e sribi.

Na ondro a Kownukondre tiri fu Yesus „wan opobaka o de fu den regtfardikiwan nanga den onregtfardikiwan” (Tori fu den Apostel 24:15). Bakaten den sma di kisi wan opobaka sa kisi leri fu Gado èn den sa kisi na okasi fu libi fu têgo na grontapu.​—Yohanes 5:28, 29.

Iya, te wan lobiwan fu wi lasi en libi, dan disi kan meki wi sari omeni yari langa ete. Ma te wi e si dedesma leki fa Gado e si den, dan dati kan gi wi furu trowstu nanga howpu.​—2 Korentesma 1:3, 4.