A tru anbegi e tyari wan famiri kon na wán

DI MARIA ben de 13 yari, wan famiriman fu en ben fruteri en, nanga en pikin sisa Lucy, fu Yehovah. A ben fruteri den sosrefi fu a howpu fu wan Paradijs na grontapu. Nanga angri fu sabi moro, den go nanga a famiriman fu den na a Kownukondre zaal fu Yehovah Kotoigi. Den moi leri di ben gi drape ben naki Maria en ati srefisrefi. A ben de tra fasi leki a kerki pe den ben e go, pe den no ben e du noti moro leki singi nomo! No langa na baka, Maria nanga Lucy ben e studeri Bijbel nanga wan fu den Kotoigi fu Yehovah.

Hugo, a moro bigi brada fu den, ben lobi a tori fu filosofia nanga evolutie. A ben e si ensrefi leki wan sma di no e bribi na ini Gado kwetikweti. Ma na ini a pisi ten di a ben e du srudatiwroko, dan a leisi a buku Leven — Hoe is het ontstaan? Door evolutie of door schepping? * A feni piki tapu aksi di tra kerki no ben kan gi en. Di a srudatiwroko fu en kon na wan kaba, a go doro fu tranga a nyun bribi di a kisi na ini Gado nanga yepi fu studie fu Bijbel èn sosrefi nanga yepi fu den konmakandra di a ben fisiti makandra nanga den sisa fu en. Maria nanga Lucy ben teki dopu na ini 1992, tu yari baka di den yere a waarheid a fosi leisi, èn a brada fu den ben teki dopu tu yari baka den.

Na a srefi ten a papa nanga a mama fu den, di ben de fayafaya Lomsusma, no ben wani sabi noti fu a waarheid. Den ben e feni taki Yehovah Kotoigi e fruferi sma, aladi den ben lobi a fasi fa den yongu Kotoigi di ben kon na den oso, ben e tyari densrefi. Den ben lobi a fasi tu fa den yonguwan disi ben e weri krosi di fiti. Sosrefi, te den ben e nyan, dan de pikin ben e taki fu sani di den ben leri na den konmakandra. Den sani di a papa nanga a mama ben e yere, meki taki den ben wani sabi moro.

Ma a papa nanga a mama ben lobi fu du bonuwroko. A papa ben de wan drunguman di ben e fon a mama. A papa nanga mama ben de fu prati nanga makandra. Ne a papa go tu wiki na dungru-oso fu di a ben drungu. Di a ben de na dungru-oso, a bigin leisi a Bijbel. A leisi den sani di Yesus ben taki di ben abi fu du nanga a marki fu den lasti dei. Nanga furu aksi na prakseri, a papa nanga a mama go na a Kownukondre zaal èn den teki wan bijbelstudie. Baka di den bigin leri a waarheid, den pori ala den buku fu den di ben abi fu du nanga bonuwroko èn den feni frulekti teige den ogri yeye di ben e trobi den fu di den ben e kari a nen fu Yehovah. Den bigin fu tyari bigi kenki kon na ini a fasi fa den ben de.

Yu kan frustan fa a ben naki na ati fu Maria nanga Lucy fu si fa Hugo ben dopu a papa nanga a mama fu den na wan fu den kongres di ben hori na ini Bolifia na ini 1999! Sowan neigi yari pasa sensi Maria nanga Lucy fosi yere fu Yehovah èn fu den pramisi fu en. Makandra nanga Hugo den de now na ini a furuten diniwroko. Den breiti srefisrefi taki a tru anbegi tyari a famiri fu den kon na wán!

[Futuwortu]