Yu e suku Yehovah fayafaya?

WAN man di de wan Kresten, ben e angri srefisrefi fu prati a bun nyunsu fu Bijbel nanga den tra sma di ben de nanga en na ini a loko di e tyari den go na wroko (Markus 13:10). Ma a ben frede so te, taki a no ben man opo en mofo fu taki nanga den sma. A sani disi meki taki a no pruberi moro fu taki nanga den sma? Nôno, a begi Gado fayafaya fu yepi en nanga a problema disi di a ben abi, èn a du muiti fu leri fa fu bigin wan takimakandra nanga sma di a ben miti. Yehovah Gado du san a brada disi ben aksi en, èn a gi en krakti so taki a ben kan gi sma kotoigi.

A de tumusi prenspari taki wi e suku Yehovah fayafaya tu, so taki a kan feni wi bun. Na apostel Paulus ben taki: „A sma di e kon na Gado, musu bribi taki a de èn taki a e tron a sma di e pai den wan di e suku en fayafaya” (Hebrewsma 11:6). A no nofo fu suku Yehovah nomo. A Griki wortu di vertaal leki ’suku fayafaya’ wani taki dati wan sma e meki ala muiti èn taki a e poti ala en prakseri na wan sani. Te wan sma e du dati, dan a e du en nanga en heri ati, en heri frustan, en heri sili, nanga ala en krakti. Te wi e suku Yehovah fayafaya, dan wi no e tyari wisrefi na wan mi-no-ke fasi, na wan fasi di e sori taki wi e kibri wi skin, noso na wan fasi di e sori taki wi no e broko wi ede nanga en. Na presi fu dati, wi e suku en fayafaya trutru.​—Tori fu den Apostel 15:17.

Sma di ben suku Yehovah fayafaya

Bijbel lai nanga eksempre fu sma di ben suku Yehovah fayafaya. Yakob ben de wan fu den sma disi, èn a ben gebroiki ala en krakti fu feti te musudei mamanten nanga wan engel fu Gado di ben teki wan libisma skin. Leki bakapisi fu dati Yakob kisi a nen Israel (A wan di feti nanga Gado) fu di a ’ben strei nanga Gado’. Na engel blesi en fu di a ben meki so furu muiti.​—Genesis 32:24-30.

Wan uma fu Galilea ben lasi brudu twarfu yari langa kaba. Bijbel no e kari a nen fu na uma disi, ma a siki dati ben „pina [en]” trutru. Fu di a ben abi a siki disi, meki a no ben mag fasi tra sma. Toku a teki deki-ati fu go miti Yesus. A ben tan taigi ensrefi: „Efu mi fasi en krosi nomo, dan mi o kon betre.” Prakseri fa na uma disi ben meki muiti fu ’pasa den sma di ben waka baka Yesus èn ben pusu kon na en tapu’. Di a fasi Yesus en krosi, dan a firi taki „a no ben lasi brudu moro”. A ben kon betre! Na uma kon frede di Yesus aksi: „Suma fasi mi krosi?” Ma Yesus taigi en na wan switi fasi: „Umapikin, na a bribi fu yu meki yu kon betre. Meki sani waka bun gi yu; tan abi wan bun gosontu, bika yu no abi a takru siki moro.” A muiti di na uma ben du ben abi bun bakapisi.​—Markus 5:24-34; Lefitikus 15:25-27.

 Ma na wan tra okasi wan uma fu Funisia begi Yesus fayafaya fu dresi en umapikin. Yesus piki en taki a no ben fiti fu gi pikin dagu a nyanyan di ben de gi den pikin. A ben wani taki nanga dati taki a no ben kan pina den Dyu fu yepi sma di no ben de fu Israel. Di na uma frustan san Yesus ben wani taigi en nanga na agersitori fu en, dan a tan begi en: „Iya mi Masra, ma toku den pikin dagu e nyan den sakasaka fu a brede di e fadon komoto na a tafra fu a basi fu den.” A tranga bribi nanga na opregtifasi fu na uma disi ben meki Yesus taki: „Ai uma, a bribi fu yu tranga; meki a pasa soleki fa yu wani.”​—Mateyus 15:22-28.

San ben o pasa nanga den sma disi efu den no ben tan meki muiti? Den ben o kisi den bun bakapisi di den kisi efu den no ben tan meki muiti di biginbigin sani no ben waka soleki fa den ben wani? Nôno! Den eksempre disi e sori heri bun san Yesus ben leri sma, namku taki a fiti, nôno, a prenspari srefi, taki wi e horidoro aladi wi e tan suku Yehovah .​—Lukas 11:5-13.

Akruderi a wani fu en

Den sma di ben kon betre na wan wondru fasi ben ondrofeni dati soso fu di den ben wani dati nanga den heri ati? Nôno, a sani di den ben wani ben musu de akruderi a wani fu Gado. Yesus ben kisi wondru krakti fu sori sma krin taki a ben de a Manpikin fu Gado, noso a Mesias di Gado ben pramisi (Yohanes 6:14; 9:33; Tori fu den Apostel 2:22). Boiti dati, den wondru di Yesus du e meki sma si na fesi sortu bigi blesi Yehovah sa tyari kon gi libisma na grontapu na a ten fu a Dusun Yari Tiri fu Krestes.​—Openbaring 21:4; 22:2.

Gado no e gi den tru anbegiman wondru krakti moro fu dresi sma noso fu taki na ini tongo (1 Korentesma 13:8, 13). Na ini a ten disi, Gado wani taki wi e fruteri sma na heri grontapu fu a bun nyunsu fu a Kownukondre, so taki ’ala sortu sma e kisi frulusu èn e kon kisi wan soifri sabi fu waarheid’ (1 Timoteyus 2:4; Mateyus 24:14; 28:19, 20). Gado en futuboi kan fruwakti nanga leti taki a sa yere den fayafaya begi fu den efu den e tan begi en na wan opregti fasi akruderi a wani fu en.

Wan tu sma ben kan aksi densrefi: „Fu san ede wi musu meki muiti, te wi sabi kaba taki den prakseri fu Gado sa kisi wan kontru te fu kaba?” Aladi a de so taki Yehovah sa du san a abi na prakseri, awansi san libisma e du, toku a e prisiri te sma e du a wani fu en. Wi kan gersi Yehovah nanga wan man di e bow wan oso. A man disi sabi soifri fa a wani taki a oso musu de, ma a e gebroiki sani di a e feni na ini a foto fu en fu bow na oso dati. Na so a de tu nanga Yehovah. A wani klari wan wroko na ini a ten disi, èn a e prisiri fu gebroiki den futuboi fu en di de klariklari fu du a wroko disi.​—Psalm 110:3; 1 Korentesma 9:16, 17.

 Luku na ondrofenitori fu wan boi di nen Toshio. Di a go na middelbaarskoro, dan a ben wani gi kotoigi na so furu sma leki a kan fu di a ben e si a skoro fu en leki wan spesrutu kontren fu gi kotoigi. A ben abi en Bijbel na en ala ten èn a ben du ala muiti fu de wan Kresten di ben de wan bun eksempre gi trawan. Na a kaba fu a fosi yari fu en na a skoro dati, a kisi okasi fu hori wan taki gi a klas fu en. Toshio begi Yehovah fu yepi en, èn a ben prisiri srefisrefi di a si taki en heri klas ben e poti yesi arki a taki fu en di ben nen ’Mi wani tron wan pionier’. A taigi a klas taki a ben wani tron wan dinari na ini a furuten diniwroko fu Yehovah Kotoigi. Wan fu den studenti ben wani studeri Bijbel nanga en, èn a studenti disi go na fesi teleki a teki dopu te fu kaba. Fu di Toshio ben meki muiti akruderi den begi fu en, meki a kisi bun bakapisi.

Omeni muiti yu e meki?

Yu kan sori na difrenti fasi taki yu e suku Yehovah fayafaya en taki yu e angri fu kisi den blesi fu en. Ma yu musu du wan tu prenspari sani fosi. Wan fu den sani disi, na taki yu musu sreka yusrefi bun gi den Kresten konmakandra. Te yu e gi bun komentaar, te yu e hori lezing di e naki sma ati, èn te yu e hori bun demo, dan na so fasi yu e sori taki yu e suku Yehovah fayafaya. Yu kan sori dati tu te yu e pruberi fu abi wan moro bun prati na a preikiwroko. Fu san ede yu no e pruberi fu sori moro switifasi gi den sma di yu e miti na ini a preikiwroko? Noso, pruberi fu bigin wan takimakandra nanga moro koni na ini a kontren fu yu (Kolosesma 3:23). Wan Kresten brada di e du muiti nanga en heri ati, sa man teki difrenti toewijzing na ini a gemeente. A sa man dini leki wan dinari ini a diniwroko, noso leki wan owruman (1 Timoteyus 3:1, 2, 12, 13). Te yu de klariklari fu du den sani disi, dan yu kan ondrofeni a prisiri di sma e kisi fu di den e gi densrefi. Kande yu sa man dini leki wan wrokoman di e yepi bow bijkantoro, noso kande yu kan yepi nanga a wroko na wan bijkantoro fu Yehovah Kotoigi. Efu yu na wan brada di no trow, dan kande yu sa wani go na a Dinariskoro te yu doro den markitiki gi dati. A skoro dati e sreka yeye brada fu tron bun skapuman. Efu yu trow, dan kande yu kan du zendelingwroko fu sori taki yu e angri fu du moro gi Yehovah. Kande yu kan froisi go tan na wan kontren pe moro Kownukondre preikiman de fanowdu.​—1 Korentesma 16:9.

A sani di de prenspari trutru, na a fasi fa yu e si a toewijzing fu yu. Awansi sortu frantwortu yu e kisi, du en fayafaya, nanga ala yu krakti, èn na „wan opregti ati” (Tori fu den Apostel; 2:46;  Romesma 12:8). A bun te yu e si ibri toewijzing di yu kisi, leki wan okasi fu sori taki yu wani gi Yehovah glori trutru. Begi Yehovah doronomo fu yepi yu, èn tan meki muiti. Te yu e du dati, dan yu sa kisi bun bakapisi.

Wi e kisi bun bakapisi fu di wi e meki muiti fayafaya

Memre a Kresten brada di ben e frede, ma di begi Gado fu yepi en fu man preiki na den tra sma na ini a loko? Yehovah blesi en fu di a ben meki muiti na wan opregti fasi. A brada disi meki muiti fu bigin wan switi takimakandra nanga sma, èn a sreka difrenti tori di a ben kan gebroiki fu bigin wan takimakandra nanga den sma dati. A ben man gebroiki Bijbel bun fu gi kotoigi na wan man di ben e broko en ede nanga den problema di libisma abi nanga makandra. Baka di a miti a man disi difrenti leisi baka na ini a loko, dan a bigin wan bijbelstudie nanga en. Yehovah blesi a brada disi trutru fu di a ben meki so furu muiti!

Yu kan abi densrefi sortu bakapisi disi te yu e tan suku Yehovah fayafaya. Efu yu e horidoro nanga sakafasi èn efu yu e du a theokrasia diniwroko fu yu nanga yu heri ati, dan Yehovah sa gebroiki yu akruderi den prakseri fu en, èn a sa gi yu bun bakapisi trutru.

[Prenki na tapu bladzijde 26]

San ben o pasa nanga na uma disi efu a no ben horidoro?

[Prenki na tapu bladzijde 27]

Yu e tan begi Yehovah fu blesi yu?

[Prenki na tapu bladzijde 28]

Fa yu kan sori taki yu e suku Yehovah fayafaya?