A tru taki wán ’tru kerki’ nomo de?

„NELEKI fa wán Krestes nomo de, na so wán skin fu Krestes de nomo, wán Trowmisi fu Krestes: ’wán Lomsu Kerki fu den apostel.’”​—Dominus Iesus

Na so Joseph Ratzinger, wan hei kerki fesiman fu a Lomsu Kerki, ben leri sma na kerki taki wán tru kerki nomo kan de. A ben taki dati a kerki dati „na a wan-enkri Kerki fu Krestes nomo, èn dati na a Lomsu Kerki”.

„Den no de trutru kerki”

Aladi Pawsu Yohanes Paulus II ben feni nomonomo taki a dokumenti Dominus Iesus „no ben de fu desko, noso fu afrontu tra bribi”, toku den kerki fesiman fu a Protestant bribi no ben agri kwetikweti nanga san ben skrifi na ini a dokumenti disi. Fu gi wan eksempre, na ini yuni 2001, den Presbyter Kerki ben hori wan konmakandra na ini a foto Belfast, na a Noordsei fu Ierland. Na a konmakandra disi, wan domri ben taki dati „wan makti grupu na ini a Lomsu Kerki ben skrifi a dokumenti disi, fu di den ben e frede srefisrefi gi den nyun kenki di ben kon baka Vaticaan II, a nen fu a prenspari kerki konmakandra di ben hori”.

Robin Eames, na edeman beskopu fu a Kerki fu Ierland, ben taki dati a ben o „sari srefisrefi” efu sma ben skrifi a dokumenti nanga a marki fu „drai sani go baka soleki fa den ben de bifo a Vaticaan II”. A Vaticaan ben taki dati den kerki di no e hori densrefi na spesrutu leri fu a Lomsu Kerki „a no tru Kerki”, ma Eames no ben agri nanga a sani dati. A ben taki: „A sani dati kan afrontu tra kerki.”

Fu san ede sma ben skrifi a dokumenti disi di den e kari Dominus Iesus? Soleki fa a sori, dan a Lomsu Curia (a tiri skin fu a Lomsu Kerki) no ben feni en bun taki sma abi a denki taki den kan anbegi Gado fa den wani. Soleki fa a koranti The Irish Times e taki, dan „Kardinaal Ratzinger no ben feni en bun srefisrefi taki a Lomsu Kerki ben e moksi den leri fu en nanga den di fu tra kerki, fu di na so fasi a kerki ben e sori taki a wan bribi bun neleki a trawan”. Soleki fa a sori, dan na a sani disi meki taki a bigin leri kerkiman taki wán tru kerki nomo de.

A tru taki yu kan de fu iniwan kerki di yu wani?

A no de fu taki, dati son sma feni en moro bun taki den difrenti kerki e moksi den leri fu den kon na wan, na presi taki den e leri sma taki wán tru kerki nomo kan de. Den sma disi feni taki den musu man anbegi Gado soleki fa densrefi wani. Den e taki dati ’te fu kaba, a no abi trobi fu sortu kerki yu de’.

A tru taki a denki dati e gi sma okasi fu anbegi  Gado soleki fa densrefi wani, ma a sani disi meki taki a mama-kerki prati na ini bun furu difrenti bribi. Furu sma feni taki ’den someni difrenti bribi di de, na wan bun fasi fa ibri sma kan sori taki den fri fu anbegi Gado soleki fa den wani’. Ma soleki fa skrifiman Steve Bruce e taki na ini a buku A House Divided: Protestantism, Schism, and Secularization, dan a fri fasi disi fa sma e anbegi Gado e sori trutru taki sma no e broko den ede moro nanga san na a yoisti fasi fu anbegi Gado.

Ma san na a yoisti fasi fu si a tori disi? A tru taki wán tru kerki nomo de? A de so taki a tru kerki disi na a Lomsu Kerki? Gado feni tra kerki bun tu? Fu di den aksi disi abi fu du nanga a banti di wi abi nanga wi Mekiman, meki a de prenspari srefisrefi fu kon sabi fa A e denki fu a tori disi. Fa wi kan du dati? Wi musu luku na ini Gado Wortu, Bijbel, di a meki sma skrifi nanga yepi fu santa yeye (Tori fu den Apostel 17:11; 2 Timoteyus 3:16, 17). Meki wi luku san Bijbel e taki fu a wan-enkri tru kerki.

 [Sma di abi a reti fu a prenki na tapu a kafti]

KAFTI: Mark Gibson/Index Stock Photography