Aksi fu leisiman

Na furu presi na grontapu a de wan gwenti fu gi wan kado na wan trow-oso. Na sortu Bijbel gronprakseri wi musu poti prakseri te wi e gi, noso te wi kisi den sortu kado disi?

Bijbel e sori taki a de wan bun sani te wan sma e gi wan presenti nanga a yoisti prakseri èn na a yoisti okasi. Ini a tori fu a gi di wan sma e gi wan sani, dan Bijbel e gi tru Kresten deki-ati fu teki na eksempre fu Yehovah di lobi fu gi sani (Yakobus 1:17). Na apostel Paulus ben gi den Kresten brada nanga sisa fu en a deki-ati: „No frigiti fu du bun èn fu prati sani nanga trawan, bika den sortu ofrandi dati e plisi Gado srefisrefi.” Sobun, Kresten e kisi deki-ati fu de sma di lobi gi sani.​—Hebrewsma 13:16; Lukas 6:38.

A de wan gwenti na ini son kondre taki tu sma di o trow e poti tapu papira sortu kado den wani. Den e go na wan wenkri èn den e luku san den abi fanowdu. Baka dati, den e skrifi tapu papira sortu sani na ini a wenkri den ben sa wani kisi leki kado. Famiriman nanga mati fu den sma di o trow e kisi wan kari fu go na a wenkri dati fu bai wan fu den kado di skrifi tapu a papira. Te yu e luku en bun, dan a sma di o gi wan kado no abi fu go suku someni yuru langa san a o gi leki kado, fu di a kan luku tapu a papira san den sma di o trow wani. Na a tra sei, dan den tu sma di o trow no sa kisi kado di den abi fu tyari go baka na a wenkri fu di den no wani a kado dati.

A de na den tu sma di o trow, fu teki a bosroiti efu den wani skrifi tapu papira sortu kado den wani. Ma wan Kresten musu luku bun fu no du iniwan sani di no de akruderi Bijbel gronprakseri. Fu eksempre, fa a sa de te tu sma di o trow e skrifi soso diri sani tapu a papira di e sori san den wani? Te dati ben o pasa, dan den sma di no man bai den diri sani no sa man gi wan kado, noso den kan feni taki den no sa go na a trow-oso fu di den no o teki a syen taki den no tyari wan diri kado. Wan Kresten uma ben skrifi: „A e kon de leki wan hebi fu gi kado na den trow-oso. Mi e pruberi fu gi sani nanga prisiri, ma now mi no abi a prisiri di mi ben abi fosi te mi e gi sani.” A ben sa de wan sari sani efu sma ben sa firi broko saka fu go na wan trow-oso!

A no de fu taki dati den wan di e gi wan kado, e kisi a firi taki a kado fu den bun soso te den bai en na wan spesrutu wenkri noso te a abi wan spesrutu prijs. Fu taki en leti, dan Yesus ben sori taki a de moro warti na ini Gado ai taki wan sma di e gi sani e du dati nanga a yoisti prakseri, èn taki a no de prenspari o diri a presenti de (Lukas 21:1-4). Na a srefi fasi na apostel Paulus ben skrifi fu du bun gi sma di de na nowtu fu di wi abi sari-ati nanga den. A ben skrifi: „Meki ibriwan sma du soleki fa a bosroiti na ini en ati, no nanga a firi fu no wani du en noso na ondro dwengi, bika Gado lobi wan sma di e gi nanga prisiri.”​—2 Korentesma 9:7.

Bijbel no e taki dati a de wan fowtu sani efu wan sma e sori taki a gi wan kado, kande efu a e skrifi en nen na tapu a kado. Ma na son presi a de a gwenti taki den e kari den nen fu ala sma na a fesa di tyari wan kado kon. A gwenti disi di sma abi kan tyari problema kon. Kande a sma di e gi wan kado no wani taki trawan musu sabi dati, bika a feni taki a no de fanowdu dati sma musu poti tumusi furu prakseri na en fu di a gi wan kado. Den sortu sma dati e handri akruderi a gronprakseri na ini Mateyus 6:3, pe Yesus e taki: „Ma te yu e du pôtisma wan bun fu di yu abi sari-ati nanga den, dan no meki yu kruktu-anu sabi san yu reti-anu e du.” Tra sma e feni taki te den gi wan kado dan a tori dati na wan sani fu en nanga a sma di kisi a kado. Boiti dati, te sma sabi suma na den sma di gi wan kado, dan dati kan meki taki sma o teki a kado fu den gersi nanga san tra sma e gi èn dati ’e wiki streilibi’ (Galasiasma 5:26). A no de fu taki dati Kresten no sa wani meki sma kisi syen fu di den sa meki bekènti suma na den sma di gi wan kado.​—1 Petrus 3:8.

Iya, te wi e du sani di de akruderi den gronprakseri di de fu feni na ini Gado Wortu, dan wi sa tan abi prisiri fu gi wan presenti na trawan.​—Tori fu den Apostel 20:35.