Poti ala yu frutrow tapu Yehovah

„Yu na mi howpu, o Yehovah, a Moro Hei Masra, yu na mi frutrow sensi mi yongu yari.”​—PSALM 71:5.

1. Na ini sortu muilek situwâsi a yongu skapuman David ben kon?

GOLIAT ben de sowan dri meter langa. Yu kan frustan taki ala den srudati fu a legre fu Israel ben frede fu go feti nanga en! Furu wiki baka makandra, ibri mamanten nanga ibri mofoneti, a bun bigi Filistiaman Goliat ben e spotu a legre fu Israel, èn a ben bari gi den taki den ben musu seni a moro bun fetiman fu den fu kon feti nanga en. Te fu kaba, wan Israelsma go feti nanga en, ma a sma disi no ben de wan srudati; a ben de wan yonguman nomo. A yongu skapuman David ben gersi wan san-dopi na sei Goliat. Kande David ben lekti moro den fetisani fu Goliat srefi! Toku, a yonguman disi go feti nanga Goliat èn sensi a ten dati sma ben kon sabi en leki wan deki-ati man.​—1 Samuel 17:1-51.

2, 3. (a) Fu san ede David ben abi a frutrow taki a ben o man feti nanga Goliat? (b) Sortu tu sani wi kan du fu man poti ala wi frutrow tapu Yehovah?

² San meki taki David ben abi so wan deki-ati? Luku wan tu wortu di David ben skrifi bakaten: „Yu na mi howpu, o Yehovah, a Moro Hei Masra, yu na mi frutrow sensi mi yongu yari” (Psalm 71:5). Iya, di David ben yongu, a ben e poti ala en frutrow tapu Yehovah. Di a go feti nanga Goliat, a taki: „Yu e waka kon miti mi nanga wan feti-owru èn nanga wan lansri, ma mi e waka kon miti yu na ini a nen fu Yehovah fu den legre, a Gado fu den fetilin fu Israel, di yu e spotu” (1 Samuel 17:45). Goliat ben poti frutrow tapu en eigi krakti èn tapu den fetisani fu en, ma David ben poti frutrow tapu Yehovah. David no ben abi fu frede nowan man kwetikweti, awinsi o bigi a man ben de èn awinsi o furu fetisani a ben abi, bika a Moro Hei Masra ben de na en sei.

³ Te yu e leisi fu David, dan yu e winsi taki yu ben abi moro frutrow na ini Yehovah? Kande furu fu wi e winsi dati. Fu dati ede, meki wi luku tu sani di wi kan du fu man poti ala wi frutrow  tapu Yehovah. A fosi sani, na taki wi musu wini wan problema di e meki taki furu sma no e poti ala den frutrow tapu Yehovah. A di fu tu sani, na taki wi musu frustan san a wani taki trutru fu frutrow tapu Yehovah.

Fa fu wini wan problema di e meki taki furu sma no e poti ala den frutrow tapu Yehovah

4, 5. Fu san ede furu sma e feni en wan muilek sani fu poti frutrow tapu Gado?

⁴ San e meki taki sma no e poti ala den frutrow tapu Gado? Furu tron, son sma e bruya fu di den no sabi fu san ede ogri sani e pasa. Furu sma e kisi fu yere taki na Gado e meki sma pina. Te wan ogri sani pasa nanga wan sma so taki a kon lasi en libi, dan furu kerki tiriman e taki dati Gado „teki” a sma dati so taki a sma kan de nanga en na hemel. Boiti dati, furu kerki fesiman e leri sma taki langa ten na fesi, Gado ben seti kaba fa ala sani ben o waka na grontapu, sosrefi sortu rampu nanga sortu ogridu ben o pasa. A ben o de wan muilek sani fu poti frutrow tapu so wan ogri-ati Gado. Satan, di e breni a frustan fu sma di no de na bribi, e du ala san a man fu panya ala den sortu leri disi „di e kon fu ogri yeye”.​—1 Timoteyus 4:1; 2 Korentesma 4:4.

⁵ Satan wani taki sma musu lasi frutrow na ini Yehovah. A feanti fu Gado no wani taki wi musu sabi san na den trutru reide fu san ede libisma e pina. Èn te wi leri fu Bijbel san na den reide fu san ede libisma e pina, dan Satan wani taki wi musu frigiti den. Fu dati ede, a de wan bun sani efu ten na ten wi e luku den dri moro prenspari reide fu san ede pina de na grontapu. Te wi e du disi, dan wi kan gi wi ati a dyaranti taki a no Yehovah e meki taki problema e miti wi na ini wi libi.​—Filipisma 1:9, 10.

6. Fa 1 Petrus 5:8 e sori wi wán reide fu san ede libisma e pina?

⁶ Wan reide fu san ede libisma e pina, na taki Satan wani broko a soifri retifasi fu a getrow pipel fu Yehovah. A ben pruberi fu meki Yob drai baka gi Gado. Satan no ben kisi Yob so fara, ma a e tan pruberi fu du disi nanga tra sma. Leki tiriman fu a grontapu disi, a e suku fu „nyan” den getrow futuboi fu Yehovah (1 Petrus 5:8). Dati wani taki dati a e suku fu du disi nanga ibriwan fu wi! Satan wani kisi wi so fara taki wi e tapu fu dini Yehovah. Dati meki furu tron a e meki wi kisi frufolgu. Ma aladi a de wan hati sani fu nyan pina, toku wi abi bun reide fu tan horidoro. Te wi e du disi, dan wi e yepi fu sori taki Satan na wan leiman èn na so fasi wi e prisiri na ati fu Yehovah (Yob 2:4; Odo 27:11). O moro Yehovah e tranga wi fu tan horidoro te wi e kisi frufolgu, o moro wi e kisi frutrow na ini en.​—Psalm 9:9, 10.

7. Fa Galasiasma 6:7 e yepi wi fu frustan wan tra reide fu san ede libisma e pina?

⁷ Wan di fu tu reide fu san ede libisma e pina de fu feni na ini a gronprakseri disi: „San wan sma e sai, na dati a sa koti tu” (Galasiasma 6:7). Son tron sma e sai fu di den e teki bosroiti di no bun, èn leki bakapisi fu dati den e koti pina. Kande den e bosroiti fu rei wagi sondro fu hori densrefi na den wet, èn a bakapisi na wan ongoloku. Furu sma e bosroiti fu smoko tabaka, èn a bakapisi na taki den e kisi ati-siki noso kanker na den fokofoko fu den. Den wan di e bosroiti fu du seks hurudu kan pori a banti di den abi nanga den famiriman fu den. Boiti dati, den kan lasi lespeki gi densrefi, den kan kisi siki di sma kan kisi te den abi seks, èn den kan kisi bere sondro taki den wani dati. Kande son sma e suku a fowtu na Gado te den e pina na so wan fasi, ma a tru tori de taki den e pina fu di densrefi bosroiti fu du sani di no bun.​—Odo 19:3.

8. Fu san ede libisma e pina, soleki fa Preikiman 9:11 e sori?

⁸ Wan di fu dri reide fu san ede libisma e pina, de fu si na ini Preikiman 9:11: „Mi ben drai luku fu si na ondro son taki a no den esi-esiwan e wini a streilon, èn a no den trangawan e wini a feti, sosrefi a no den koniwan abi a nyanyan, èn a no den wan di abi frustan abi a gudu, èn taki srefi den wan di abi sabi, a no den wan di trawan feni bun; bika ten nanga sani di e pasa sondro fu fruwakti dati, e miti den alamala.” Son tron a kan pasa taki wan sma de na wan presi na a momenti te wan ogri e pasa èn taki na ogri e miti a sma dati tu. Awinsi fa wi tranga noso swaki, pina nanga dede kan miti iniwan fu wi na iniwan ten sondro taki wi fruwakti dati. Fu eksempre, na ini a ten fu Yesus, wan toren na ini Yerusalem ben fadon kon  na gron èn a ben kiri 18 sma. Yesus ben sori taki Gado no ben strafu den sma disi fu den sondu di den du fosi (Lukas 13:4). Nôno, a no Yehovah abi a fowtu taki libisma e pina.

9. San furu sma no e frustan fu a pina di libisma e pina?

⁹ A de prenspari fu frustan fu san ede libisma e pina. Ma wan tra sani de di furu sma no e frustan. Dati na: Fu san ede Yehovah Gado e gi pasi taki libisma e pina?

Fu san ede Yehovah e gi pasi taki libisma e pina?

10, 11. (a) San pasa nanga „ala den sani di Gado meki”, soleki fa Romesma 8:19-22 e sori? (b) Fa wi kan kon sabi suma gi pasi taki den sani di Gado meki e du sani fu soso?

¹⁰ Wan pisi fu a brifi di na apostel Paulus ben skrifi gi den Romesma, e tyari a prenspari tori disi kon na krin. Paulus ben skrifi: „Bika den sani di Gado meki, e wakti fayafaya tapu a ten te den manpikin fu Gado o kon na krin. Bika den sani di Gado meki e du sani fu soso, no fu di densrefi ben wani, ma fu di en meki dati pasa, fu di wan howpu de taki srefi den sani di Gado meki, o komoto na ini a katibo di e tyari pori kon èn den sa fri trutru leki pikin fu Gado. Bika wi sabi taki ala den sani di Gado meki, e tan geme makandra èn te now ete den alamala abi pen.”​—Romesma 8:19-22.

¹¹ Fu man frustan san den vers disi wani taki, dan wi musu kisi piki tapu wan tu prenspari aksi fosi. Fu eksempre: Suma gi pasi taki den sani di Gado meki, kon abi wan libi pe den e du sani fu soso? Son sma taki dati na Satan, èn trawan taki dati na Adam. Ma nowan fu den ben man de frantwortu gi disi. Fu san ede? Bika a sma di e gi pasi taki den sani di Gado meki kon abi a libi disi, e du so „fu di wan howpu de”. Iya, a e gi a howpu taki te fu kaba den wan di de getrow sa „komoto na ini a katibo di e tyari pori kon”. Adam noso Satan no man gi so wan howpu kwetikweti. Na Yehovah wawan kan du disi. Sobun, a de krin fu si taki na en ben gi pasi taki den kon abi wan libi pe den e du sani fu soso.

12. Sortu bruya kon fu di sma no sabi san na „ala den sani di Gado meki”? Fa wi kan kisi piki tapu na aksi disi?

¹² Ma san na „ala den sani di Gado meki”, soleki fa a pisi tori disi e taki? Son sma e taki dati „ala den sani di Gado meki” e sori go na ala sani na heri grontapu, sosrefi den meti nanga den prani. Ma a de so taki meti nanga prani abi a howpu fu de „fri trutru leki pikin fu Gado”? Nôno (2 Petrus 2:12). Fu dati ede, „ala den sani di Gado meki” kan sori go na libisma wawan. Libisma na den sani di Gado meki, di kisi fu du nanga sondu èn nanga dede fu di Adam nanga Efa ben opo densrefi teige Gado na ini Eden. Leki bakapisi fu dati,  libisma abi howpu fanowdu trutru.​—Romesma 5:12.

13. San ben de a bakapisi gi libisma di Adam nanga Efa ben opo densrefi teige Gado na ini Eden?

¹³ Te yu e luku en bun, dan san ben de a bakapisi gi libisma di Adam nanga Efa ben opo densrefi teige Gado? Fu sori fa a libi kon de gi libisma, dan Paulus e gebroiki tu wortu nomo: fu soso. * Wan buku e taki dati den wortu disi e sori go na „wan wrokosani di de fu soso fu di a no e du a wroko fu san a ben meki”. Libisma ben meki fu libi fu têgo, èn den ben o wroko makandra na ini wánfasi leki wan volmaakti famiri di e sorgu gi a paradijs grontapu. Na presi fu dati, den e libi wan syatu libi di furu nanga pina èn di lai nanga problema di den no man lusu. A de soleki fa Yob ben taki: „Libisma di wan uma meki, e libi syatu èn a abi furu problema” (Yob 14:1). Fu tru, a libi fu den de fu soso!

14, 15. (a) Fa wi kan si taki Yehovah krutu sani na wan reti fasi di a strafu den fosi libisma? (b) Fu san ede Paulus ben taki dati den sani di Gado meki e du sani fu soso, ma „no fu di densrefi ben wani”?

¹⁴ Now wi kon na a moro prenspari aksi: Fu san ede „a Krutuman fu heri grontapu” meki libisma kon abi a bruya libi disi di furu nanga pina? (Genesis 18:25) A ben abi reti fu du so? We, memre san a fosi mama nanga papa fu wi ben du. Fu di den opo densrefi teige Gado, meki den teki a sei fu Satan di ben taki dati Gado no e tiri libisma na wan reti fasi. Nanga den sani di den du, den sori taki den ben agri taki den no ben abi Yehovah fanowdu èn taki sani ben o waka moro bun gi den efu densrefi ben o tiri ondro a makti fu wan yeye di opo ensrefi teige Yehovah. Te yu luku en bun, di Yehovah strafu den sma di opo densrefi teige en, dan a gi den soifri san den ben wani. A gi libisma pasi fu tiri densrefi na ondro a makti fu Satan. Sobun, te wi e luku a situwâsi, dan Gado krutu sani na wan reti fasi trutru, bika a meki libisma abi wan libi pe den e du sani fu soso, ma na a srefi ten a gi den wan howpu tu.

¹⁵ A no de fu taki dati den sani di Gado meki no kon abi a libi disi fu di „densrefi ben wani”. Wi gebore leki srafu fu sondu nanga dede sondro taki wisrefi wani dati. Ma Yehovah sori sari-ati fu di a gi pasi taki Adam nanga Efa libi fu wan pisi ten ete, so taki den ben kan meki pikin. Ma aladi wi leki bakapikin fu den kon de srafu fu sondu nanga dede, toku wi abi na okasi fu du san Adam nanga Efa no ben du. Wi kan arki Yehovah èn wi kan kon sabi taki Yehovah e tiri na wan reti fasi. Wi kan kon sabi tu taki a tiri fu en na a moro bun tiri di de, bika te libisma e tiri sondro a yepi fu Yehovah, dan dati e tyari soso pina nanga bruya kon èn den e du sani fu soso (Yeremia 10:23; Openbaring 4:11). Boiti taki wi de srafu fu sondu nanga dede, dan Satan e meki a situwâsi fu wi kon moro ogri. Disi de fu si na a fasi fa sani waka na ini a heri pisi ten di libisma de na grontapu.​—Preikiman 8:9.

16. (a) Fu san ede wi kan de seiker taki a no Yehovah de frantwortu gi a pina di wi e si na grontapu now? (b) Sortu howpu Yehovah gi en getrow pipel na wan lobi-ati fasi?

¹⁶ A de krin fu si taki Yehovah ben abi nofo reide fu gi pasi taki libisma kon abi wan libi pe den e du sani fu soso. Ma disi wani taki dati na Yehovah e meki wi du sani fu soso èn taki na en e pina ibriwan fu wi na ini a ten disi? We, prakseri fu wan krutuman di e leisi krutustrafu gi wan ogriman. Kande na ogriman disi e pina srefisrefi aladi a e koti strafu. Ma na ogriman kan taki dati na a krutuman e meki taki a e pina? Kwetikweti! Boiti dati, ogridu noiti no e kon fu Yehovah. Yakobus 1:13 e taki: „Nowan sma kan tesi Gado nanga ogri sani, èn Gado srefi no e tesi sma nanga ogri sani tu.” Meki wi memre tu taki Yehovah strafu libisma „fu di wan howpu de”. Na wan lobi-ati fasi a seti sani, so taki den getrow bakapikin fu Adam nanga Efa no ben o abi wan libi moro pe den e du soso sani, ma wan libi pe den o de „fri trutru leki pikin fu Gado”. Noiti moro den getrow libisma sa abi fu broko den ede taki den sani di Gado meki o fadon go baka na ini wan libi pe den e du sani fu soso. A reti fasi fa Yehovah handri na ini a situwâsi disi, sa de wan krin buweisi taki trutru Yehovah abi a reti fu tiri fu têgo.​—Yesaya 25:8.

17. Te wi e luku baka san na den reide fu san ede pina de na grontapu now, dan sortu krakti disi musu abi na wi tapu?

 ¹⁷ Te wi e luku baka san na den reide fu san ede libisma e pina, dan wi kan taki dati na Yehovah e du sma ogri? Noso a de so taki na ensrefi meki taki libisma lasi frutrow na ini en? Kwetikweti. Now di wi kon sabi den sani disi, dan wi musu agri nanga Moses di taki: „A Klepston, volmaakti en wroko de, bika ala den pasi fu en na retidu. Wan Gado fu getrowfasi, èn na en nowan kruktudu de; regtfardiki èn opregti a de” (Deuteronomium 32:4). Ten na ten wi musu denki dipi fu den tori disi, so taki wi kan luku gi wisrefi o bun wi sabi den piki tapu den aksi dati. Na a fasi disi, wi sa man kakafutu gi den tesi fu Satan di e suku fu meki wi tweifri na den sani di wi e bribi. Ma san na a di fu tu sani di wi musu du, soleki fa wi ben taki na a bigin? San a wani taki trutru fu frutrow tapu Yehovah?

San a wani taki fu frutrow tapu Yehovah

18, 19. Nanga sortu wortu Bijbel e gi wi deki-ati fu frutrow tapu Yehovah? Sortu fowtu denki sma abi fu a tori disi?

¹⁸ A Wortu fu Gado e gi wi a deki-ati: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti” (Odo 3:5, 6). Fu tru, den wortu disi na moi wortu di e gi wi deki-ati. A no de fu taki dati a wan-enkri sma na hemel nanga grontapu di wi kan frutrow trutru, na wi lobi hemel Tata. Ma toku, a moro makriki fu leisi den wortu dati na ini Odo leki fu du san skrifi drape.

¹⁹ Furu sma abi wan fowtu denki fu san a wani taki fu frutrow tapu Yehovah. Son sma e denki taki a de wan firi nomo, wan sortu prisiri firi di e kon fu ensrefi na ini wan sma ati. Trawan e bribi taki fu frutrow tapu Gado wani taki dati wi kan fruwakti fu Gado taki a sa kibri wi fu ala ogri, taki a sa lusu ala problema di wi abi, èn taki a sa lusu wi aladei problema wantewante soleki fa wi wani! Ma den sortu denki disi fowtu. Fu abi frutrow no de wan firi nomo, èn wan sma di abi frutrow no e fruwakti sani di no man kwetikweti. Te wan lepi sma abi frutrow, dan dati wani taki dati a e gebroiki en frustan fu teki bun bosroiti.

20, 21. San a wani taki fu frutrow tapu Yehovah? Gi wan eksempre.

²⁰ Luku baka san Odo 3:5 e taki. A e sori taki fu frutrow tapu Yehovah de heri tra fasi leki fu frutrow tapu wi eigi frustan. Dati e sori taki wi no kan du ala tu sani na a srefi ten. Ma disi wani taki dati wi no mag gebroiki wi frustan? Nôno, bika Yehovah, di gi wi frustan, e fruwakti taki wi sa gebroiki dati fu dini en (Romesma 12:1). Ma tapu san wi e frutrow te wi musu teki bosroiti? Efu wi no abi a srefi denki leki Yehovah, dan wi no e si a koni fu Yehovah leki fa a de. Wi e agri taki a koni fu en bigi krinkrin moro di fu wi? (Yesaya 55:8, 9). Fu frutrow tapu Yehovah wani taki dati wi musu meki a fasi fa a e denki tiri a fasi fa wi e denki.

²¹ Fu gi yu wan eksempre: Prakseri fu wan yosiyosi pikin di e sidon na bakasei fu wan wagi, aladi en papa nanga mama e sidon na fesisei. En papa e rei a wagi. Aladi den e rei, dan wan tu problema e opo kon. Kande den musu bosroiti sortu pasi den musu teki, noso kande den musu rei na ini takru weer, noso na ini wan takru pasi. San wan pikin di e gi yesi èn di e frutrow en papa nanga mama, e du na ini so wan situwâsi? A e bari go na fesisei gi en papa sortu pasi a musu teki? Noso a e taigi en papa fa a musu rei a wagi? A e tweifri na a bosroiti di en papa nanga mama e teki? Noso a e trangayesi te en papa nanga mama e taigi en taki a musu sidon pî na bakasei? Nôno, sondro fu tweifri a e frutrow taki en papa nanga  mama sa teki bun bosroiti, awinsi den no de volmaakti. Yehovah na wan volmaakti Papa. A no de so dan, taki wi musu poti ala wi frutrow na en tapu, spesrutu te wi e kon na ini muilek situwâsi?​—Yesaya 30:21.

22, 23. (a) Fu san ede wi musu poti ala wi frutrow tapu Yehovah te problema e miti wi, èn fa wi kan du disi? (b) Fu sortu sani wi sa taki na ini na artikel di e kon?

²² Ma Odo 3:6 e sori taki wi musu ’poti prakseri na en na ini ala wi pasi’, a no soso te wi de na ini muilek situwâsi. Sobun, den aladei bosroiti di wi e teki musu sori taki wi e frutrow tapu Yehovah. Te problema e miti wi, dan wi no musu lasi-ati, bruya, noso kakafutu gi a tiri fu Yehovah di e sori wi san na a moro bun sani di wi kan du na ini den situwâsi dati. Wi musu si tesi leki okasi fu horibaka gi a reti di Yehovah abi fu tiri, èn leki okasi pe wi kan yepi fu sori taki Satan na wan leiman. Sosrefi, wi musu si tesi leki okasi di e leri wi fu gi yesi na Yehovah moro nanga moro èn fu kisi tra fasi tu di e plisi Yehovah.​—Hebrewsma 5:7, 8.

²³ Wi kan sori taki wi e frutrow tapu Yehovah, awinsi sortu problema e miti wi. Wi kan sori a frutrow disi te wi e begi èn te wi e suku a tiri fu Yehovah na ini en Wortu èn na ini en organisâsi. Ma na sortu spesrutu fasi wi kan sori taki wi e frutrow tapu Yehovah te wi e kisi fu du nanga den problema fu a disiten grontapu? Wi sa luku disi na ini na artikel di e kon.

[Futuwortu]

San yu ben sa piki?

• Fa David ben sori taki a ben poti ala en frutrow tapu Yehovah?

• San na den dri reide fu san ede libisma e pina, èn fu san ede a de wan bun sani fu luku den baka, ten na ten?

• Sortu strafu Yehovah ben gi libisma, èn fu san ede wi kan taki dati a ben krutu den na wan reti fasi?

• San a wani taki fu frutrow tapu Yehovah?

[Aksi fu a tori disi]

[Prenki na tapu bladzijde 8]

David ben poti ala en frutrow tapu Yehovah

[Prenki na tapu bladzijde 10]

Yesus ben sori taki a no Yehovah ben de frantwortu di wan toren ben fadon na ini Yerusalem