Prèise Yehovah „na mindri fu a gemeente”

KRESTEN konmakandra na sani di Yehovah seti, so taki a pipel fu en kan tan tranga na yeye fasi. Te wi e go na den konmakandra doronomo, dan wi e sori taki wi e warderi den seti fu Yehovah. Boiti dati, wi man „gi [wi brada] deki-ati fu lobi trawan èn fu du bun wroko”, èn disi na wan prenspari fasi fa wi kan sori taki wi lobi makandra (Hebrewsma 10:24; Yohanes 13:35). Ma fa wi kan gi wi brada deki-ati na den konmakandra?

Sori trawan taki yu abi bribi

Kownu David ben skrifi san a ben o du: „Mi sa meki yu nen bekènti na mi brada; na mindri fu a gemeente mi sa prèise yu. Na yu mi wani prèise na ini a bigi gemeente.” „Mi sa prèise yu na ini a bigi gemeente; na mindri wan bigi grupu fu sma mi sa prèise yu.” „Mi fruteri a bun nyunsu fu regtfardikifasi na ini a bigi gemeente. Luku! Mi no e tapu mi mofo fu taki.”​—Psalm 22:22, 25; 35:18; 40:9.

Na a ten fu na apostel Paulus, Kresten di ben kon makandra fu anbegi, ben taki sani tu fu sori taki den ben bribi na ini Yehovah, èn den ben taki sosrefi fu a glori fu en. Na so fasi den ben gi makandra deki-ati èn den ben tranga makandra fu sori lobi gi trawan èn fu du bun wroko. Na ini a ten disi, furu hondrohondro yari baka di Paulus nanga David dede, a de so trutru taki wi „e si a dei [fu Yehovah] e kon krosibei” (Hebrewsma 10:24, 25). Satan en seti fu sani de fu kisi pori, èn moro nanga moro problema e kon. Moro leki iniwan ten na fesi „a de fanowdu taki [wi] e horidoro” (Hebrewsma 10:36). Suma na  den moro bun sma di kan gi wi deki-ati fu horidoro? A no den brada fu wi?

Soleki fa a ben de na ini owruten, na so wan tu seti de tu na ini a ten disi di e gi bribiman okasi fu sori „na mindri fu a gemeente” taki den abi bribi. Wan fu den seti disi, na taki ibri sma di de na den gemeente konmakandra kan gi komentaar tapu den aksi di e poti. Noiti no denki taki a sani disi no abi winimarki. Fu gi wan eksempre, den komentaar di sma e gi fu sori fa fu lusu problema, noso fa fu wai pasi gi den, e gi wi brada nanga sisa deki-ati fu hori densrefi na Bijbel gronprakseri. Komentaar di e fruklari bijbeltekst di kari, ma di no skrifi na ini na artikel, kan gi trawan deki-ati fu studeri moro bun. Na so a de tu nanga komentaar di abi fu du nanga sani di wan sma kon sabi fu di a ondrosuku sani finifini.

Fu di wi sabi taki wi nanga trawan sa kisi wini te wi e gi komentaar na den konmakandra, meki nowan enkri Kotoigi fu Yehovah musu syen fu gi komentaar. A de prenspari spesrutu taki owruman nanga dinari ini a diniwroko de na den konmakandra èn e gi komentaar sosrefi, fu di den na den wan di musu de wan bun eksempre gi trawan. Ma san kan yepi wan sma di feni en muilek fu gi komentaar?

Wan tu rai di kan yepi wi

Memre taki wi e gi komentaar fu di a abi fu du nanga na anbegi di wi e anbegi Yehovah. Wan Kresten sisa di e libi na ini Doisrikondre e taki fa a e si den komentaar fu en. „Nanga yepi fu den komentaar fu mi, misrefi e sori Satan taki a no man tapu a pipel fu Gado fu sori taki den abi bribi.” Wan brada di no dopu so langa ete èn di de fu a srefi gemeente leki a sisa disi, e taki: „Mi e begi furu fu man gi bun komentaar.”

Sreka yusrefi bun. Efu yu no e sreka na artikel na fesi, dan a no sa makriki gi yu fu gi komentaar èn den komentaar fu yu no sa bun nofo. A buku Kisi wini fu a Theokrasia Diniwroko-skoro e gi rai na tapu bladzijde 70, di e sori fa fu gi komentaar na gemeente konmakandra. *

Pruberi fu gi awansi na wán komentaar nomo na ibri konmakandra. Disi wani taki dati wi musu sreka moro leki wán piki, bika te yu e opo yu anu go na loktu furu tron, dan moro okasi o de gi a brada di e hori a takimakandra fu kari yu nen. Kande yu ben sa wani taigi en na fesi srefi tapu sortu aksi yu wani gi piki. A sani disi sa yepi yu spesrutu te yu o gi piki fosi tron. Kande yu e tweifri fu opo yu anu te yu de „na ini a bigi gemeente”. Ma fu di yu sabi taki a brada di e hori a takimakandra sa luku yu efu yu e opo yu anu te a doro a paragraaf pe yu ben wani gi piki, dan dati sa gi yu deki-ati fu gi komentaar.

No wakti tumusi langa fu gi komentaar. Te yu e wakti tumusi langa fu du wan muilek sani, dan dati no sa meki a sani dati kon moro makriki. Te yu gi wan komentaar frukufruku na a konmakandra, dan dati kan de wan yepi gi yu. Yu sa fruwondru fu si taki a moro makriki fu gi komentaar ete wan tu leisi te yu teki a deki-ati fu gi komentaar a fosi leisi.

Go sidon na wan bun presi. Son sma feni en moro makriki fu gi komentaar te den e sidon  moro na fesisei na ini a Kownukondre zaal. Drape furu sani no de di man puru a prakseri fu den, èn a o moro makriki gi a brada di e hori a takimakandra fu si te den e opo den anu go na loktu. Efu yu e du disi, no frigiti fu taki nanga wan tranga sten so taki ibri sma kan yere yu, spesrutu te a gemeente no abi mikrofon di den arkiman kan gebroiki.

Arki bun. Disi sa yepi yu fu no taki a srefi sani di wan tra sma ben taki didyonsro. Sosrefi, den komentaar di trawan e gi kan memre yu fu wan tekst noso fu wan sani di yu kan gebroiki fu taki moro fini fu a prakseri di wan sma tyari kon na fesi didyonsro. Wanwan leisi, wan syatu ondrofenitori kan yepi den arkiman fu frustan a tori moro krin. Den sortu komentaar dati de wan yepi trutru.

Leri fu gi piki nanga yu eigi wortu. Te yu e leisi wan komentaar na ini na artikel di wi e studeri, dan dati kan sori taki yu feni a yoisti piki, èn a sani disi kan de wan bun fasi fu bigin gi komentaar. Ma te yu e gi komentaar nanga yu eigi wortu, dan dati e sori taki yu frustan a pisi tori bun. Wi no abi fu leisi ibri wortu soifri soleki fa den skrifi na ini den publikâsi fu wi te wi e gi komentaar. Yehovah Kotoigi e gebroiki den eigi wortu te den e taki fu den sani di skrifi na ini den publikâsi fu den.

No gi komentaar di no abi noti fu du nanga na artikel. A no fiti fu gi komentaar di no abi noti fu du nanga na artikel di wi e studeri, èn den komentaar di yu e gi no musu puru sma prakseri fu den moro prenspari penti fu a tori. Disi wani taki dati den komentaar fu yu musu abi soifri fu du nanga na artikel di wi e studeri. Den sortu komentaar dati sa yepi fu abi wan moi takimakandra fu a prenspari tori di wi e studeri, èn den sa gi sma deki-ati.

Suku fu gi trawan deki-ati. Wan prenspari reide fu san ede wi e gi komentaar, na fu gi trawan deki-ati. Fu dati ede wi no musu taki sani di kan broko sma saka. Boiti dati, no taki fu so furu sani na ini a paragraaf, taki noti no e tan abra moro gi trawan fu taki. Komentaar di langa èn di frekti sa meki taki trawan no sa frustan so bun san yu e taki. Syatu komentaar fu wan tu wortu nomo kan de bun komentaar srefisrefi, èn den sa gi den nyunwan deki-ati fu gi den eigi syatu komentaar.

A frantwortu fu den wan di e hori a konmakandra

A sma di abi a bigi frantwortu fu gi trawan deki-ati, na a brada di e hori a takimakandra. A musu arki ibri komentaar bun èn a musu sori switifasi fu di a e tan luku a sma di e gi komentaar, na presi taki a e du wan tra sani. A no ben o fiti srefisrefi efu a brada no ben arki bun te wan sma e gi wan komentaar, èn leki bakapisi fu dati a e taki a srefi sani di a sma ben taki. A no ben o fiti tu te a ben o poti wan aksi di sma ben piki kaba didyonsro!

A brada di e hori a takimakandra ben o broko sma saka tu te ibri tron baka te wan sma gi wan komentaar, a brada e gi a srefi komentaar dati nanga tra wortu. Na so fasi a ben o gersi neleki a brada ben wani taki dati a komentaar fu a sma no bun nofo. Ma na a tra sei, a e gi deki-ati trutru te sma e gi komentaar di e yepi fu taki moro fara fu wan prenspari prakseri. ’Fa wi kan gebroiki a rai disi na ini wi gemeente?’ noso, ’Sortu bijbeltekst na ini a paragraaf e horibaka gi a prakseri di tyari kon na fesi didyonsro?’ Den sortu aksi disi e meki sma gi komentaar di e tranga trawan,  èn na so fasi wi kan abi wan bun prati na a takimakandra.

A no de fu taki dati spesrutu den nyun sma, noso sma di e syensyen musu kisi prèise te den e gi komentaar. Baka a konmakandra, a brada di e hori a takimakandra kan taki nanga a sma dati sondro taki trawan e yere, so taki a sma disi no e firi syen. Boiti dati, disi sa gi a brada na okasi fu gi rai te dati de fanowdu.

Efu a de so taki wán sma nomo e taki te wi e taki wan tori, dan a e meki taki trawan no wani taki moro. Den sma di e arki en no feni taki a de fanowdu fu taki san den e denki fu a tori. Den sa arki a sma nanga afu-yesi, en kande den no sa arki a sma dati srefi. A srefi sani disi kan pasa te a sma di e hori a takimakandra e taki tumusi furu na presi taki a e gi trawan okasi fu gi komentaar. Ma a sma di e hori a takimakandra kan poti tra aksi gi den sma na ini a zaal fu kon sabi fa den e prakseri fu a tori, noso fu meki den poti prakseri na a tori. Ma a no musu poti tumusi furu fu den sortu aksi dati.

A sma di e hori a takimakandra no abi fu kari a nen fu a fosi sma di e sutu en anu go na loktu. Te a ben o du dati, dan den wan di abi pikinso ten fanowdu fu kon sabi soifri san den o taki ben kan firi brokosaka. A brada di e hori a takimakandra sa wakti pikinso, èn a sa gi wan sma di no ben gi komentaar ete, na okasi fu du so. Boiti dati, a no sa gi pikin-nengre okasi fu gi piki tapu aksi di abi fu du nanga tori di den no e frustan so bun ete. A sani dati no ben o de wan bun sani fu du.

San fu du te wan sma e gi wan piki di no bun? A brada di e hori a takimakandra no musu meki a sma di gi a piki firi syen. Srefi komentaar di no bun abi wan tu sani na ini di tru. Fu man kisi a yoisti piki tapu na aksi di a ben poti, dan a brada di e hori a takimakandra kan taki go moro fara fu wan bun sani na ini a komentaar di a sma gi, a kan poti na aksi tra fasi, noso a kan poti wan tra aksi gi den sma. Na so fasi a brada disi e sori taki a e hori den firi fu a sma na prakseri, èn a sma no sa firi syen.

Te a brada di e hori a takimakandra e suku fu gi sma deki-ati fu gi komentaar, dan a ben o bun efu a no ben taki sani soleki: ’Suma wani taki wan sani ete?’ Kande a abi na prakseri fu yepi sma te a e poti aksi soleki: ’Suma no gi komentaar ete? Disi na a lasti okasi di yu e kisi!’ Toku disi no sa gi wan sma deki-ati fu gi komentaar. A no bun fu meki sma firi fruferi fu di den no gi komentaar na a bigin fu a studie. Na presi fu dati, a brada di e hori a takimakandra musu gi den sma disi deki-ati fu fruteri trawan san den sabi, fu di na so fasi den sma kan sori taki den lobi trawan. Boiti dati, baka di a brada di e hori a takimakandra e kari a nen fu wan sma di wani gi komentaar, dan a ben o bun efu a no taki sani soleki: „Baka en, dan wi sa arki a komentaar fu Brada Fa den kari en, nanga Sisa Fa den kari en.” A brada di e hori a takimakandra musu arki a komentaar fosi, èn baka dati a kan bosroiti efu a de fanowdu taki wan sma e gi ete wan komentaar.

A de wan grani fu gi komentaar

Wi e go na den Kresten konmakandra fu di den e yepi wi fu gro na yeye fasi. A de wan grani fu gi komentaar na den konmakandra disi. Te wi e teki na aparti okasi disi fu prèise Yehovah „na mindri fu a gemeente”, dan na so fasi wi e teki na eksempre fu David, èn wi e gi yesi sosrefi na a rai fu Paulus. Te wi e teki prati na den konmakandra, dan dati e sori taki wi lobi den brada nanga sisa fu wi èn taki wi na wan memre fu a bigi gemeente fu Yehovah. Wan tra presi de pe yu ben sa wani de, now di „yu e si a dei e kon krosibei”?​—Hebrewsma 10:25.

[Futuwortu]

[Prenki na tapu bladzijde 20]

A de prenspari fu arki èn fu gi komentaar na den Kresten konmakandra

[Prenki na tapu bladzijde 21]

A brada di e hori a takimakandra musu arki ibri komentaar bun