Wán tru Kresten bribi​—A de trutru

YESUS KRESTES ben seti wán kerki nomo, noso wán gemeente. A gemeente dati ben de wan yeye skin, noso wan yeye famiri. Disi wani taki dati a ben de wan grupu fu sma di Gado ben tyari kon makandra nanga yepi fu en santa yeye, èn Gado ben si ala den sma disi leki en „pikin”.​—Romesma 8:16, 17; Galasiasma 3:26.

Yesus ben leri sma taki wán fasi nomo de fa Gado e meki a pipel fu en kon sabi a waarheid so taki den kan kisi libi. Fu meki wi frustan a prenspari tru tori disi, dan Yesus agersi a fasi fu libi di sa meki wi kisi têgo libi, nanga wan pasi. A ben taki: „Pasa go na ini a smara doro; bika a pasi bradi di e tyari sma go dede, èn a bigi èn furu sma e waka a pasi dati; ma a doro pikin di e tyari sma go na libi, èn a pasi smara, èn pikinso sma nomo e feni en.”​—Mateyus 7:13, 14; Yohanes 14:6; Tori fu den Apostel 4:11, 12.

Wan gemeente di de na ini wánfasi

A buku The New Dictionary of Theology e taki: „Wi no musu denki taki a gemeente na ini a fosi yarihondro ben de wan organisâsi fu sma na heri grontapu, soleki fa a de nanga a Lomsu Kerki na ini a ten disi.” Fu san ede dati no ben de so? A buku e taki: „A piki no muilek bika, so wan bigi organisâsi fu sma na heri grontapu no ben de.”

A no de fu taki dati wi musu agri taki a fosi Kresten gemeente no ben gersi den bigi kerki sistema di wi e si na ini a ten disi. Ma a fosi Kresten gemeente ben seti na wan orga fasi. Den gemeente no ben e wroko aparti fu makandra. Den alamala ben de na ondro a tiri fu a Tiriskin na ini Yerusalem. A Tiriskin dati di ben abi apostel nanga owruman fu a gemeente na ini Yerusalem, ben yepi fu hori den gemeente na ini wánfasi leki a „wán skin” fu Krestes.​—Efeisesma  4:4, 11-16; Tori fu den Apostel 15:22-31; 16:4, 5.

San pasa nanga a wan-enkri tru gemeente dati? A tru taki a gemeente dati na a makti Lomsu Kerki now? A kenki kon tron a Protestant kerki sistema di prati na ini someni difrenti grupu, soleki fa wi e si dati na ini a ten disi? Noso, a de so taki wan tra sani pasa nanga en?

„Aleisi” nanga „takru wiwiri”

Fu man kon sabi san ben pasa nanga a tru gemeente, meki wi luku finifini san Yesus Krestes srefi ben taki. A ben kan fruwondru yu fu kon sabi taki Yesus ben fruwakti taki wan dei, a gemeente disi no ben o de moro, èn a ben o gi pasi taki a sari situwâsi disi ben tan so hondrohondro yari langa.

A ben agersi a gemeente fu en nanga a „kownukondre fu hemel”, èn a ben taki: „A kownukondre fu hemel de leki wan man di ben sai bun siri na tapu a gron fu en. Di den sma ben sribi, dan a feanti fu en kon èn a sai takru wiwiri na mindri na aleisi, baka dati a gowe. Di na aleisi bigin gro èn a gi nyanyan, dan a takru wiwiri ben kon de fu si tu. Dati meki den srafu fu a masra fu na oso kon taigi en: ’Masra, a no bun siri yu ben sai na tapu yu gron? Dan fa a du kon taki a gron abi takru wiwiri?’ A masra taigi den: ’Wan feanti, wan man, du disi.’ Den taigi a masra: ’Yu wani taki wi e go piki a takru wiwiri puru?’ A taki: ’Nôno, so taki te unu e piki a takru wiwiri puru, dan unu no sa hari na aleisi puru tu. Meki den ala tu gro makandra, teleki a ten doro fu koti nyanyan; dan te a kotiten doro, mi sa taigi den sma di musu koti a nyanyan: Un piki a takru wiwiri puru fosi, dan un musu tai den na ini bondru fu bron den; baka dati un musu tyari na aleisi kon na wan èn poti en na ini mi maksin.’”​—Mateyus 13:24-30.

Yesus fruklari taki en ben de „a man di ben sai”. „A bun siri” ben de en trutru disipel. En „feanti” ben de Satan Didibri. „Den takru wiwiri” ben de falsi Kresten di ben kon na ini a fosi Kresten gemeente. A ben taki dati a ben o meki „na aleisi” nanga „den takru wiwiri” gro makandra, teleki „a ten fu koti nyanyan” ben doro, èn dati ben de „na a kaba fu grontapu” (Mateyus 13:37-43). San ala den sani disi ben wani taki?

A Kresten gemeente kon kruka

Syatu baka di den apostel dede, dan leriman di ben fadon komoto fu a bribi bigin basi trawan na ini a gemeente. Den ben taki „kruktu sani fu hari den disipel kon na den baka”  (Tori fu den Apostel 20:29, 30). A sani disi ben meki taki furu Kresten ’fadon komoto fu a bribi’. Den bigin „bribi leitori”.​—1 Timoteyus 4:1-3; 2 Timoteyus 4:3, 4.

A buku The New Dictionary of Theology e taki dati na a ten fu a di fu fo yarihondro G.T., „a Lomsu Kresten bribi ben tron a moro prenspari bribi na ini a Gran Kownukondre Rome”. Kerki nanga a lanti ben bondru kon na wán, èn a sani disi no ben kruderi srefisrefi nanga a bribi fu den fosi Kresten (Yohanes 17:16; Yakobus 4:4). A srefi buku dati e taki dati baka wan pisi ten, a heri kerki, èn sosrefi wan lo fu den prenspari gronprakseri fu a kerki disi kenki krinkrin. Dati pasa „fu di sma ben moksi den leri fu na Owru Testamenti nanga den filosofia fu Plato, wan sani di ben nyun èn di no ben bun kwetikweti”. Soleki fa Yesus Krestes ben taki, sma no ben sabi moro suma ben de den tru Kresten, èn na a srefi ten, den falsi Kresten ben kon moro furu.

Den sma di ben e arki Yesus ben sabi o muilek a ben de fu kon sabi sortu wiwiri na aleisi èn sortu wiwiri na takru wiwiri. Disi ben de so fu di den tu pransun fu den wiwiri disi gersi makandra te den e gro kon. Na so Yesus ben e sori taki wan pisi ten a ben o muilek fu kon sabi suma na den tru Kresten èn suma na den falsiwan. Disi no wani taki dati a Kresten gemeente no ben o de moro, bika Yesus ben pramisi taki a ben o tiri den yeye brada fu en „ala dei te na a kaba fu a grontapu disi” (Mateyus 28:20). Yesus ben taki dati a takru wiwiri ben o tan gro. A no de fu taki tu, dati na ini den yarihondro di pasa, wanwan tru Kresten noso grupu fu Kresten, du ala san den man fu hori densrefi na den leri fu Krestes. Ma den no ben seti moro leki wan organisâsi di sma ben kan si krin. Den no ben de kwetikweti leki a kerki sistema di ben fadon komoto na bribi èn di pori a nen fu Yesus Krestes.​—2 Petrus 2:1, 2.

„A de krin fu si suma na a sma di e du kruktudu”

Na apostel Paulus ben taki dati wan tra sani ben o pasa di ben o tyari a kruka kerki sistema disi kon na krin. A ben skrifi: „No meki nowan sma kori unu na nowan fasi, bika [a dei fu Yehovah] no sa kon bifo sma o gowe libi a bribi èn bifo a de krin fu si suma na a sma di e du kruktudu” (2 Tesalonikasma 2:2-4). Fu taki en leti, a „sma [disi] di e du kruktudu” na a grupu fu kerki tiriman di opo densrefi kon tron tiriman fu a „Kresten” gemeente. *

Sma bigin fadon komoto fu a tru bribi na ini den dei fu Paulus. A sani disi kon moro ogri di den apostel dede. Baka a dede fu den apostel noti ben man tapu den sma di fadon komopo fu a tru bribi fu pori a gemeente. Paulus ben taki dati na a ten dati ’Satan ben o du ala sortu krakti wroko, marki nanga wondru di e kori sma’ (2 Tesalonikasma 2:6-12). A sani dati e sori krin sortu sani bun furu fu den kerki tiriman du na ini den yari di pasa!

Fu di den Lomsu fesiman wani meki sma bribi taki a Lomsu Kerki na a wan-enkri tru kerki, meki den e taki dati den beskopu fu den „na den apostel di kon baka den tru apostel, èn taki a sani disi de so sensi a bigin fu Krestendom”. Fu taki en leti, historia noso Bijbel no e sori taki a sani disi tru. Nowan enkri krin buweisi de taki a kerki sistema di ben opo kon baka di den apostel fu Yesus dede, oiti ben kisi tiri fu Gado en santa yeye.​—Romesma 8:9; Galasiasma 5:19-21.

Ma fa a de nanga den tra kerki di ben seti baka a pisi ten fu a sokari Reformatie (a pisi ten di sma ben opo densrefi teige a Lomsu Kerki)? Den kerki disi ben seti na a srefi fasi leki fa den fosi Kresten gemeente ben seti? Den gemeente ben krin neleki den fosi Kresten gemeente? A tru taki baka a pisi ten fu a Reformatie, alasma ben kan kisi a Bijbel na ini den eigi tongo. Toku historia e sori taki den kerki disi tan leri sma sani di no e kruderi nanga Bijbel. *​—Mateyus 15:7-9.

 Ma wan sani de di yu musu sabi. Yesus Krestes ben taki krin taki a tru gemeente disi ben o seti baka na a ten di a ben kari ’a kaba fu grontapu’ (Mateyus 13:30, 39). A kontru fu Bijbel profeititori e sori taki wi e libi na ini a ten dati now (Mateyus 24:3-35). Fu di dati tru, meki ibriwan fu wi musu aksi ensrefi: ’Sortu kerki na a wan enkri tru kerki dati?’ Wi ben musu man si krin moro nanga moro sortu kerki na a kerki disi.

Kande yu feni taki yu feni a kerki, noso a gemeente dati kaba. A de prenspari taki yu e kon sabi seiker efu dati de so. Fu san ede? Fu di wán tru kerki nomo kan de, soleki fa dati ben de tu na ini a fosi yarihondro. Yu teki a ten fu kon sabi efu a kerki fu yu seti na a srefi fasi leki fa a gemeente fu den fosi Kresten ben seti, èn efu a e hori ensrefi soifri na den leri fu Yesus Krestes? Fu san ede yu no e pruberi fu kon sabi dati now? Yehovah Kotoigi sa prisiri fu yepi yu nanga dati.​—Tori fu den Apostel 17:11.

[Futuwortu]

[Prenki na tapu bladzijde 5]

San na agersitori di Yesus ben fruteri fu na aleisi nanga den takru wiwiri e leri wi fu a tru gemeente?

[Prenki na tapu bladzijde 7]

A kerki fu yu e preiki èn e studeri na a srefi fasi leki fa den fosi Kresten ben e du dati?