Yu e sori warderi gi den owru Kresten brada nanga sisa fu yu?

DI A nâsi Israel fu owruten ben de na ini a frubontu nanga Gado, dan den ben kisi a komando: „Yu musu opo tanapu gi weti wiwiri, èn yu musu sori taki yu e hori na owru man na prakseri, èn yu musu abi frede gi yu Gado” (Lefitikus 19:32). Sobun, a ben de wan santa sani fu sori lespeki gi owru sma bika a ben abi fu du nanga a gi di den ben musu gi yesi na Gado. Aladi na ini a ten disi Kresten no de na ondro a Wet fu Moses moro, toku a sani dati e memre wi taki Yehovah e si den owru futuboi fu en leki warti sma (Odo 16:31; Hebrewsma 7:18). Wi e si sani na a srefi fasi leki fa Yehovah e si dati? Wi e sori warderi gi den owru Kresten brada nanga sisa fu wi?

Wan sma di sori warderi gi en mati di ben owru

Wan tori na ini Bijbel di de fu feni na ini a buku Tu Kownu, e poti prakseri na a fasi fa wan sma sori warderi gi wan moro owruwan. A tori disi e sori fa a yongu profeiti Elisa ben o kon na ini a presi fu a profeiti Elia. Luku san ben pasa na a lasti dei di Elia ben de leki profeiti na ini a tin lo kownukondre fu Israel.

Na a dei dati, Yehovah ben sori na owru profeiti taki a ben musu komoto na Gilgal go na Bethel, fu Bethel go na Yerikow, èn fu Yerikow go na a Yordanliba (2 Kownu 2:1, 2, 4, 6). Di a profeiti Elia ben waka a langa pasi disi fu sowan 50 kilometer, dan a ben begi Elisa tangitangi fu no waka na en baka. Ma soleki fa a ben de wan tu hondro yari na fesi nanga a yongu uma Rut di no ben wani gowe libi Naomi kwetikweti, na so Elisa no ben wani gowe libi na owru profeiti kwetikweti (Rut 1:16, 17). Elisa ben taki dri tron: „Soleki fa Yehovah e libi èn soleki fa yu sili de na libi, noiti mi sa gowe libi yu” (2 Kownu 2:2, 4, 6). Na a pisi ten dati, Elisa ben yepi Elia sowan siksi yari kaba. Ma a ben wani fu tan dini makandra nanga Elia so langa leki a man. Fu taki en leki, a tori e taki moro fara: „Èn a ben pasa taki di den ben e waka go moro fara, aladi den ben e taki, we, luku! . . . Elia ben opo go na loktu” (Vers 11). Elia nanga Elisa ben e taki nanga makandra te na a lasti momenti fu a diniwroko di Elia ben e du na ini Israel. A e sori taki a yongu profeiti ben wani teki so furu rai leki a ben man fu na owru profeiti di ben abi furu ondrofeni. Disi e sori krin taki a ben e warderi en mati di ben owru.

’Leki papa nanga mama’

A de krin fu si fu san ede Elisa ben lobi na owru profeiti leki wan mati, èn srefi leki wan  papa di ben e gi en tiri na yeye fasi (2 Kownu 2:12). Leti bifo a diniwroko fu Elia ben kon na wan kaba na ini Israel, a ben taigi Elisa: „Aksi san mi musu du gi yu bifo den teki mi puru fu yu” (Vers 9). Sobun, te na a kaba Elia ben sori taki a ben broko en ede nanga a yeyefasi fu a sma di ben o kon na ini en presi èn nanga a wroko fu Gado di ben musu go doro.

Na ini a ten disi, a e gi prisiri fu si fa den owru Kresten brada nanga sisa e broko den ede leki fa wan papa noso mama e du dati. Den de klariklari fu leri den yonguwan den sani di den sabi. Fu eksempre, friwani-wrokoman di e dini yari langa kaba na den bijkantoro fu Yehovah Kotoigi, de klariklari fu yepi den nyun memre fu a Bethelfamiri fu kon kisi a koni di de fanowdu fu du a diniwroko fu den. Na a srefi fasi tu, den opziener di e fisiti den gemeente furu yari langa makandra nanga den wefi fu den, e prisiri fu prati na ondrofeni di den abi nanga den wan di e teki leri fu go dini leki kringopziener. Boiti dati, na ini den gemeente fu Yehovah Kotoigi na heri grontapu, owru brada nanga sisa de, di e dini Yehovah getrow someni tenti yari langa. Nanga prisiri den brada nanga sisa disi e prati a koni èn na ondrofeni di den abi nanga den wan di de nyun na ini a gemeente.​—Odo 2:7; Filipisma 3:17; Titus 2:3-5.

Fu di den lobi Kresten disi di owru kaba, e broko den ede trutru nanga trawan, meki a e gi prisiri trutru fu sori taki wi e warderi den wan disi. Fu dati ede, wi wani teki na eksempre fu Elisa fu sori warderi trutru gi den owru brada nanga sisa fu wi. Soleki fa na apostel Paulus e memre wi, meki wi tan handri nanga ’wan owru man . . . neleki fa wi o du nanga wi eigi papa’ èn nanga wan ’owru uma leki wi eigi mama’ (1 Timoteyus 5:1, 2). Te wi e du disi, dan dati sa meki taki den Kresten gemeente na heri grontapu sa go na fesi èn ala sani sa waka bun.

[Prenki na tapu bladzijde 30]

Elisa ben wani fu dini makandra nanga Elia solanga leki a ben man

[Prenki na tapu bladzijde 31]

Yonguwan e kisi furu wini fu den owru Kresten brada nanga sisa fu den