A libi fu Maarten Luther èn a krakti di a man disi ben abi tapu kerki afersi

„SOLEKI fa sma e taki, dan boiti fu Yesus Krestes, sma skrifi moro buku fu [Maarten Luther] leki fu iniwan tra sma na ini historia.” Na so a tijdschrift Time ben taki. Den sani di Luther ben taki èn ben du, meki taki a Reformatie bigin, wan kenki di kon na ini a fasi fa kerki ben seti. Sma kari a kenki disi „a moro prenspari kenki na ini a historia fu libisma”. Na so fasi Luther yepi fu tyari wan kenki kon na ini a kerki strukturu na ini Europa, èn a meki taki wan nyun ten bigin na ini a pisi dati fu grontapu. Luther ben bigin sosrefi nanga wan Doisri tongo di sma ben o gebroiki fu skrifi buku nanga tra sani. A Bijbel di a vertaal, na a moro pôpi Doisri Bijbel te na a dei fu tide.

Suma ben de Maarten Luther? Fa a du kon taki a ben abi so wan bigi krakti tapu den afersi fu Europa?

Luther e tron wan sabiman

Maarten Luther gebore na ini a foto Eisleben, na Doisrikondre, na ini november 1483. A papa fu en ben e wroko na ini wan kopromijn, ma toku a ben man meki nofo moni so taki Maarten ben kan kisi bun skoro. Na ini 1501, Maarten tron wan studenti na a Universiteit fu Erfurt. Na ini a bibliotheek fu na universiteit disi, Maarten leisi Bijbel fu a fosi leisi. A ben taki: „Mi ben lobi a buku disi srefisrefi, èn mi ben howpu taki mi ben kan abi a koloku fu abi so wan buku wan dei.”

Di Luther ben abi 22 yari, dan a go tan na ini a Augustine klooster na ini a foto Erfurt. Bakaten a go na a Universiteit fu Wittenberg, pe a tron sabiman fu kerkileri. Luther ben feni taki a no ben warti fu kisi a bun-ati fu Gado, èn son leisi a ben e brokosaka trutru fu di a ben abi konsensi-fonfon. Ma a studeri Bijbel, a begi, èn a denki dipi fu sani, èn den sani dati yepi en fu kon frustan moro bun fa Gado e si sondari. Luther kon si taki noti san libisma e du kan meki taki den e frudini a bun-ati fu Gado. Na presi fu dati, Gado srefi wani gi en bun-ati na sma di e sori bribi na ini en.​—Romesma 1:16; 3:23, 24, 28.

Fa Luther kon frustan taki a nyun sani disi di a ben leri ben yoisti? Professor Kurt Aland, wan sabiman fu fositen kerki èn ondrosukuman fu Bijbel, ben skrifi: „A denki dipi fu a heri Bijbel fu man kon sabi efu den nyun sani di a ben leri ben e kruderi nanga tra sani di Bijbel ben taki, èn a si taki dati ben de so trutru.” Wan fu den leri fu Luther ben de a leri di e taki dati a no den wroko fu wan sma, noso a berow di a e sori, sa meki taki Gado sa gi en frulusu, ma wan sma sa kisi frulusu nanga yepi fu a bribi fu en. Te nanga a dei fu tide, a leri disi na a moro prenspari leri fu Luther.

A e atibron taki sma e bai spesrutu brifi fu kisi pardon fu sondu

Luther ben sabi fa Gado e si sondari, èn a sani dati meki taki a kisi problema nanga a Lomsu  Kerki. Na a ten dati bun furu sma ben e bribi taki te sondu sma dede, dan den e kisi strafu wan pisi ten. Ma soleki fa sma ben e taki, dan wan sma ben kan pai moni fu kisi spesrutu brifi fu a pawsu, so taki den no ben abi fu kisi strafu fu wan langa pisi ten. Wan fu den man di ben e seri den brifi disi gi sma, ben de Johann Tetzel. A ben wroko gi Edeman beskopu Albert fu Mainz, èn a ben meki furu moni nanga den brifi disi di a ben e seri gi a pipel. Furu sma ben feni taki te den ben bai den brifi disi, dan dati ben gi den a dyaranti taki den no ben o kisi strafu gi sondu di den ben o du na ini a ten di ben de na den fesi.

Luther no ben feni en bun srefisrefi taki a kerki ben e seri den sortu brifi disi gi sma. A ben sabi taki sma no kan pai Gado fu kisi pardon. Na a kabapisi fu a yari 1517, a skrifi den 95 pôpi artikel fu en. Na ini den artikel disi a krutu a kerki taki den ben e kwinsi a pipel fu di den ben e meki moni tapu den sma, den ben e leri sma falsi sani, èn den ben e tapu sma fu kon sabi a tru anbegi. Luther no ben wani opo ensrefi teige a kerki, ma a ben wani tyari wan kenki kon na ini a fasi fa a kerki ben seti. Fu dati ede a seni kopi fu den artikel fu en go na Edeman beskopu Albert fu Mainz èn gi difrenti tra sabiman. Furu historia skrifiman e taki dati na ini a yari 1517 noso krosibei fu a ten dati, a Reformatie bigin.

Luther no ben de a wan-enkri sma di ben sori taki a no ben agri nanga den ogri di a kerki ben du. Wán hondro yari na fesi, Johannes Hus, wan man fu Tyekia, ben opo ensrefi tu teige a kerki. A ben krutu a kerki fu di den ben e seri brifi gi sma so taki den sma disi ben kan kisi pardon fu sondu. Srefi bifo Hus, John Wycliffe fu Ingrisikondre ben sori taki wan tu fu den gwenti di a kerki ben abi, no ben e kruderi nanga Bijbel. Tra man fu a ten fu Luther ben de Erasmus fu Rotterdam, nanga Tyndale fu Ingrisikondre, èn den man disi ben de fayafaya fu kenki a fasi fa kerki ben seti. Ma na ini Doisrikondre, Johannes Gutenberg ben meki wan drukpers di ben abi letter di lusu, èn tangi fu a drukpers disi meki moro sma na moro presi ben kan leisi a boskopu fu Luther. Disi ben de wan sani di den tra man di ben opo densrefi teige a kerki, no ben man du.

A drukpers fu Gutenberg ben de na ini Mainz, èn a bigin drai na ini 1455. Na a bigin fu a di fu 15 yarihondro, 60 foto na ini Doisrikondre nanga 12 tra kondre na ini Europa ben abi wan drukpers. Disi ben de a fosi leisi na ini historia taki heri esi a pipel ben kan kon sabi moro fu den sani di ben e hari den prakseri. Kande a ben de so taki Luther no ben gi sma primisi di den druk èn prati den 95 artikel di a ben skrifi. Now moro sma na tra kondre ben feni taki wan kenki ben musu kon na ini a fasi fa a kerki ben seti. Bun furu sma na ala sei ben abi den eigi denki fu a tori disi, èn wantronso Maarten Luther tron a moro pôpi man na ini Doisrikondre.

„A son nanga a mun” e du wan sani

Hondrohondro yari kaba, tu prenspari seti ben e tiri Europa, èn dati ben de a Santa Gran Kownukondre fu Rome nanga a Lomsu Kerki. Hanns Lilje, a fositen presidenti fu a Luther Kerki ben taki: „Kèiser nanga Pawsu ben e wroko makandra leki a son nanga a mun.” Ma sma no ben sabi soifri srefisrefi sortu wan fu den tu seti disi ben de a son èn sortu wan ben de a mun. Na a bigin fu a di fu 16 yarihondro, ibriwan fu den tu seti disi ben lasi a makti di den ben abi na ini Europa. A ben de krin fu si taki wan kenki ben o kon.

Pawsu Leo X no ben agri nanga den sani di ben skrifi na ini den 95 artikel fu Luther, èn a tapu skreki gi Luther taki a ben o puru en leki wan memre fu a Lomsu Kerki efu a no ben taki dati den sani na ini den artikel ben de lei. Luther no ben wani yere noti, èn a bron a brifi di a pawsu ben seni kon gi en nanga a warskow disi na ini, èn a du dati na publiki. A  tyari tra buku kon na doro di ben gi den tra tiriman na ini Europa deki-ati fu kenki a fasi fa a kerki ben seti, awansi a pawsu no ben feni dati bun. Na ini 1521, Pawsu Leo X puru Luther leki wan memre fu a kerki. Luther no ben feni en bun taki den ben puru en leki memre fu a kerki, sondro taki den ben krutu en na wan leti fasi. Fu dati ede Kèiser Karel V seni kari en fu kon na fesi a konmakandra fu heihei sma na ini a foto Worms. Na ini april 1521, Luther gowe libi Wittenberg, èn 15 dei baka dati a doro na ini Worms. A waka disi ben de leki wan fektori waka. A pipel ben horibaka gi den leri fu en, èn sma na ala sei ben wani si en.

Na ini Worms, Luther ben tanapu na fesi a kèiser, kownu manpikin, èn wan heiman di ben e teki presi gi a pawsu. Na ini 1415, Johannes Hus ben tanapu na fesi wan srefi sortu krutu na ini a foto Konstanz, èn den ben bron en na wan postu. Den heiman fu kerki èn fu a kownukondre ben abi den ai now tapu Luther. A ben wani taki den gensman fu en ben musu buweisi fosi nanga yepi fu Bijbel taki den leri fu en no ben tru, efu den ben wani taki a ben musu drai baka gi den leri disi. Ma nowan fu den sma drape ben sabi Bijbel so bun leki Luther. A dokumenti di nen, na Edict fu Worms ben sori fa a krutu disi waka. A dokumenti ben taki dati Luther no ben o kisi kibri moro fu a wet, èn sma no ben mag leisi den buku di a ben skrifi. Fu di a pawsu ben puru Luther leki wan memre fu a kerki, èn fu di a kèiser no ben wani moro taki a wet ben kibri en, meki a libi fu en ben de na ini kefar now.

Ne wan moi sani pasa di nowan sma ben fruwakti. Di Luther drai go baka na Wittenberg, dan Frederick fu Saksen di ben wani yepi en, seti sani so, taki sma tyari en gowe nanga tranga. A sani disi meki taki den feanti fu Luther no ben man du en ogri. Kibrikibri den tyari Luther go na a farawe Wartburg paleisi, pe a meki en barba gro èn a meki sma kon sabi leki wan heri tra sma. Sma ben sabi en now leki wan hei man di ben nen Jonkheer (Masra) Jorg.

Bun furu sma wani a September Bijbel

Na ini den tin mun baka dati, Luther tan na ini a Wartburg paleisi leki wan sma di ben lowe gi a kèiser nanga a pawsu. A buku Welterbe Wartburg e taki dati „na a ten di a ben de na Wartburg, a skrifi wan lo fu den moro moi buku fu en”. Wan fu den moro prenspari sani di a ben du dyaso, na taki a vertaal na Erasmus Bijbel, go na ini Doisritongo, wan Bijbel di ben abi soso den Griki Buku fu Bijbel. A vertaling disi tyari kon na doro na ini a yari 1522, sondro fu meki sma sabi taki Luther ben de a vertaler, èn sma kon sabi a Bijbel disi leki a September Bijbel. Sma ben musu pai wan nanga wan afu golu gi a Bijbel disi, èn dati na a moni di wan uma-futuboi ben e meki na ini wán yari. Toku moro nanga moro sma ben wani a September Bijbel. Na ini 12 mun, 6000 fu den Bijbel disi ben meki na ini tu uitgave, èn 69 uitgave ben de na ini den twarfu yari di kon baka dati.

Na ini 1525, Maarten Luther trow nanga Katharina von Bora, wan uma di ben de wan non fosi. Katharina ben man seti na osolibi heri bun èn a ben sabi fa fu libi nanga wan man di ben lobi fu gi sma sani. Te fu kaba, den memre fu Luther en osofamiri no ben de soso en wefi nanga den siksi pikin fu en, ma sosrefi mati, sabiman, nanga loweman. Na a kabapisi fu Luther en libi, sma ben abi so furu lespeki gi den rai fu en, taki sabiman di ben e kon na en oso ala ten ben de klariklari fu skrifi na tapu papira san a ben taki. Den sani di den ben skrifi ben tyari kon na wan na ini wan buku di ben nen Luthers Tischreden (Den sani di Luther taki na tafra). Wan pisi ten  a ben de so taki boiti Bijbel, a buku disi ben de a moro pôpi buku na ini Doisritongo.

A ben de wan koni vertaler nanga skrifiman

Na a ten fu 1534, Luther ben kaba vertaal den Hebrew Buku fu Bijbel. A ben skrifi a buku na so wan koni fasi taki a ben switi fu leisi. Leki bakapisi fu dati, sma di no ben teki hei skoro ben man frustan a Bijbel disi bun. Disi na san Luther ben skrifi fu a fasi fa a ben vertaal a Bijbel: „Wi musu taki nanga mama di de na oso, nanga den pikin tapu strati, èn nanga den aladei sma na wowoyo, èn baka dati wi musu arki bun san den e taki, so taki wi kan vertaal na a fasi dati.” A Bijbel fu Luther ben yepi fu meki taki sma na ini heri Doisrikondre ben gebroiki wán spesrutu tongo te den ben e skrifi buku nanga tra sani.

Luther ben de wan heri bun vertaler èn a ben sabi skrifi buku tu. Soleki fa sma e taki dan ibri tu wiki, a ben gwenti fu skrifi wan artikel. Neleki fa a ben de nanga Luther, na so wan tu fu den artikel disi ben e tyari wan lo yu-o-hari-yu-o-trusu kon. Na ini den fosi buku fu en a ben krutu trawan èn a ben koti odo sosrefi, èn dati no kenki di a kon owru. Den artikel di a ben skrifi baka ten ben moro ogri. Soleki fa a buku Lexikon für Theologie und Kirche (Wan wortubuku di abi fu du nanga kerkileri nanga kerki) ben taki, dan den sani di Luther skrifi e sori taki „a ben abi bigi atibron”, taki „a no ben abi sakafasi nanga lobi”, èn taki „a ben si a wroko fu en leki wan tumusi prenspari sani di a ben musu du”.

Di a Peasant’s War (wan orloku na mindri pôti gronman nanga gudu heiheiman) broko na ini Doisrikondre, dan furu sma na ini den difrenti foto lasi den libi. Sma aksi Luther fa a ben feni en taki a pipel ben opo densrefi teige den tiriman. Den gronman ben abi leti fu taki sani teige den heiman di ben de den eiginari fu den gron pe den ben prani sani? Fu di Luther no ben e broko en ede nanga san sma ben denki fu en, meki a gi wan piki di no ben plisi a pipel. A ben bribi taki den futuboi fu Gado musu gi yesi na den wan di de na makti (Romesma 13:1). Luther piki sondro fu draidrai, taki sma ben musu dwengi den gronman di ben opo densrefi teige den heiman, fu tapu nanga a strei fu den. A ben taki: „Meki iniwan sma di kan du dati, dyuku, naki, noso kiri den sma disi.” Hanss Lilje ben taki dati a piki disi meki taki Luther lasi „a bun nen di a ben kon abi na a pipel”. Boiti dati, den artikel di Luther skrifi fu den Dyu di ben weigri fu teki a Kresten bribi, spesrutu na artikel On the Jews and Their Lies (Den Dyu nanga den lei fu den), meki taki furu sma kon si a skrifiman disi leki wan sma di no ben lobi Dyu.

A krakti di Luther ben abi tapu kerki afersi

A Reformatie di bigin nanga man leki Luther, Calvijn, nanga Zwingli, meki taki sma bigin seti kerki na wan tra fasi, èn den ben kari a kerki seti dati a Protestantisme. A moro bigi krakti di Luther ben abi tapu a Protestantisme, na a prenspari leri fu en di ben taki dati Gado e feni wan sma bun te a sma dati abi bribi. Ibriwan fu den foto na ini Doisrikondre ben horibaka gi a Protestant bribi, noso gi a Lomsu Bribi. A Protestantisme panya na ala sei èn furu sma na ini Scandinavia, Switserland, Ingrisikondre, nanga Bakrakondre ben horibaka gi a bribi disi. Na ini a ten disi hondrohondro milyun sma na bakaman fu a bribi disi.

Aladi furu sma no e bribi ala den leri fu Luther, toku den abi bigi lespeki gi en. Na ini 1983, a Doisri Demokratisch Republiek, noso  a Doisrikondre fu fosi, memre taki Luther gebore 500 yari pasa. Den foto Eisleben, Erfurt, Wittenberg, nanga a Wartburg paleisi ben de na ini a republiek disi. A Komunist kondre disi ben si Luther leki wan tumusi prenspari sma na ini a historia nanga a kulturu fu Doisrikondre. Boiti dati, wan Lomsu kerki leriman fu den yari baka 1980 taki syatu sortu krakti Luther ben abi tapu kerki afersi. A ben taki: „Nowan sma di kon baka Luther ben abi so wan bigi krakti tapu kerki afersi.” Profesor Aland ben skrifi: „Ibri yari sma e tyari pikinmoro 500 nyun publikâsi kon na doro di e taki fu Maarten Luther nanga a Reformatie, èn den publikâsi disi e tyari kon na doro na ini pikinmoro ala den prenspari tongo fu grontapu.”

Maarten Luther ben koni srefisrefi, a ben man memre sani heri bun, a ben sabi fa fu gebroiki wortu na wan koni fasi, èn a ben teki a wroko fu en leki wan seryusu sani. Ma a ben de sosrefi wan sma di no ben abi pasensi, èn a ben taki sani di ben e hati den firi fu trawan. Te a ben feni taki wan sma ben e hoigri, dan a ben atibron nanga a sma dati. Na ini februari 1546, Luther ben de na ini Eisleben di a ben de fu dede, èn den mati fu en aksi efu a ben e tan hori ensrefi na den sani di a ben leri sma. A piki „Iya”. Luther dede, ma furu sma e hori densrefi ete na den sortu bribi dati.

[Prenki na tapu bladzijde 27]

Luther no ben feni en bun taki sma ben musu bai spesrutu brifi fu man kisi pardon fu sondu

[Sma di abi a reti fu a prenki]

Mit freundlicher Genehmigung: Wartburg-Stiftung

[Prenki na tapu bladzijde 28]

Luther ben wani taki den gensman fu en ben musu buweisi fosi nanga yepi fu Bijbel taki den leri fu en no ben bun, efu den ben wani taki a ben musu drai baka gi den leri disi

[Sma di abi a reti fu a prenki]

From the book The Story of Liberty, 1878

[Prenki na tapu bladzijde 29]

A kamra fu Luther na ini Wartburg Paleisi pe a ben vertaal a Bijbel

[Sma di abi a reti fu a prenki]

Both images: Mit freundlicher Genehmigung: Wartburg-Stiftung

[Sma di abi a reti fu a prenki na tapu bladzijde 26]

From the book Martin Luther The Reformer, 3rd Edition, published by Toronto Willard Tract Depository, Toronto, Ontario

[Sma di abi a reti fu a prenki na tapu bladzijde 30]

From the book The History of Protestantism (Vol. I)