Fa fu abi wan moro bun trowlibi

PRAKSERI wan oso di kon brokobroko fu di sma no sorgu en bun. A ferfi e lusu gowe, a daki broko, èn a grasi e gro so hei na tapu a dyari. A de krin fu si taki sibibusi pori na oso disi na ini den yari di pasa, èn sma libi en meki a pori. Den musu broko na oso disi puru? We, dati no abi fu de so. Efu na fondamenti fu na oso bun èn efu a strukturu steifi ete, dan kande den kan meki na oso kon bun baka.

Na oso disi e meki yu prakseri a trowlibi fu yu? Na ini den yari di pasa, a ben kan gersi leki sibibusi wai na ini a trowlibi fu yu. Kande wan fu unu, noso un ala tu no teki nofo ten gi a trawan. Yu ben kan firi neleki fa Sandy ben e firi. A ben trow 15 yari kaba, èn a taki: „A wan-enkri sani di ben meki taki wi ben tan nanga makandra, na fu di wi ben trow nanga makandra. Èn dati no ben sari.”

Srefi te disi na a situwâsi na ini a trowlibi fu yu, toku yu no musu de gaw fu denki taki yu musu broko a trow. Kande a trowlibi fu yu kan kon bun baka. Wan prenspari sani di sa meki taki dati e pasa, na te yu nanga yu patna abi a fasti bosroiti fu du ala san un man fu meki a trowlibi tan waka bun. Te yu abi a fasti bosroiti dati èn te yu wani trutru taki a trowlibi fu yu e tan waka bun, dan a trowlibi fu yu no sa pori, awansi problema e kon. Ma fa Bijbel kan yepi yu fu abi a fasti bosroiti nanga a tranga winsi disi?

Abi a fasti bosroiti fu teki den plekti fu a trowlibi na yu tapu

Wan sma musu teki den plekti fu a trowlibi na en tapu te a wani taki a trowlibi fu en e waka bun. Fu gi wan eksempre, wan sma di e bow oso kan feni taki a de fruplekti fu hori ensrefi na san skrifi na ini a kontrakti di a teken fu bow wan oso. Kande a no sabi srefi gi suma a e bow na oso. Toku a e firi fruplekti fu hori ensrefi na a kontrakti.

Aladi a trowlibi no de wan bisnis afersi pe den firi fu trawan no e teri, toku yu musu teki den plekti fu a libi disi na yu tapu efu yu wani taki a e waka bun. Yu nanga yu trowpatna meki wan seryusu pramisi na Gado èn na tra sma taki unu o tan makandra, awansi san e pasa. Yesus ben taki: „A sma di meki den na a bigin, meki den leki man nanga uma. Unu no leisi tu taki a ben taki: ’Dati meki wan man sa gowe libi en papa nanga  en mama èn a sa tan nanga en wefi.’” Yesus ben taki moro fara: „Nowan sma musu prati a sani di Gado tyari kon na wan” (Mateyus 19:4-6). Te problema e opo kon, dan yu nanga yu trowpatna musu abi a fasti bosroiti fu tan hori unsrefi na den pramisi di un ben meki na makandra. * Wan wefi e taki: „Na di wi tapu fu si brokotrow leki wan fasi fu lusu den problema fu wi, dan fosi wi ben man kenki a situwâsi na ini a trowlibi fu wi.”

Ma a no sari taki trowpatna e du ala san den man fu meki a trowlibi waka bun, soso fu di den feni taki den de fruplekti fu du dati. Sortu tra sani trowpatna musu hori na prakseri tu?

Wroko makandra fu a bun fu a trowlibi

Awansi trowpatna e du ala san den man fu meki a trowlibi waka bun, toku dati no wani taki dati noiti den no sa abi kesekese nanga makandra. Te den kisi trobi, dan den musu du ala san den man fu koti a trobi dati, èn den no musu du dati soso fu di den e si en leki wan plekti, ma fu di den lobi makandra. Yesus ben taki disi fu wan masra nanga en wefi: „Den no de tu skin moro, ma wán skin.”

San a wani taki fu de „wan skin” nanga yu trowpatna? Na apostel Paulus ben skrifi taki „masra musu lobi den wefi leki den eigi skin” (Efeisesma 5:28, 29). Fu dati ede, te yu de „wán skin” nanga a trowpatna fu yu, dan dati wani taki sosrefi taki yu wani taki sani e go bun nanga yu trowpatna, neleki fa yu wani dati gi yusrefi. Sma di trow no musu taki moro fu „mi sani” ma fu „den sani fu wi” èn den no musu taki moro fu „mi” ma fu „wi”. Wan raiman ben skrifi: „Ala tu trowpatna musu kaba si densrefi leki sma di no trow, ma den musu si densrefi leki sma di trow.”

Yu nanga yu trowpatna „e si unsrefi leki sma di trow nanga makandra”? A kan taki tu sma trow furu yari kaba, ma toku den no de „wán skin” leki trowpaar. Iya, a sani dati kan pasa, ma a buku Giving Time a Chance (Abi pasensi te yu e lusu problema) e taki: „Te tu sma trow nanga makandra, dan dati wani taki dati den e libi nanga makandra, èn o moro den e du sani makandra, o moro a trowlibi fu den sa waka bun.”

Son trowpaar di no de koloku e tan nanga makandra soso fu den pikin fu den ede, noso fu di den wani abi a dyaranti taki sani sa waka bun nanga den na ekonomia sei. Tra trowpaar e horidoro fu di den feni taki a no bun kwetikweti fu broko trow, noso fu di den e frede san trawan sa denki te den e broko trow. Aladi a de fu prèise taki den trowpaar disi e tan horidoro, toku den no musu frigiti taki trowpaar no musu tan nanga makandra fu di no wani broko trow, ma den  musu tan nanga makandra fu di den lobi makandra.

Du sani gi makandra fu meki a trowlibi waka bun

Bijbel ben taki na fesi, taki na ini „den lasti dei” sma ben o „lobi densrefi nomo” (2 Timoteyus 3:1, 2). Soleki fa a profeititori dati e taki, sma na ini a ten disi ben o lobi soso densrefi. Furu trowpaar no wani du sani gi makandra efu den no e kisi noti baka, fu di den feni taki na so fasi den e lagi densrefi. Ma trowpatna di abi wan bun trowlibi, e sori taki den de klariklari fu du sani gi makandra. Fa yu kan sori taki yu na so wan sma?

Na presi taki yu e tan aksi yusrefi: „Sortu winimarki a trowlibi disi abi gi mi?”, aksi yusrefi disi: „San misrefi e du fu meki a trowlibi fu mi waka moro bun?” Bijbel e taki dati Kresten no musu „poti prakseri na [den] eigi afersi wawan, ma [den] musu poti prakseri na den afersi fu trawan tu” (Filipisma 2:4). Denki dipi fu a gronprakseri disi, èn luku fa yu tyari yusrefi na ini a wiki di pasa. Omeni leisi yu du wan bun sani gi yu trowpatna, sondro taki yu fruwakti fu en taki a du wan sani baka gi yu? Yu arki yu trowpatna di a ben wani taki wan tori nanga yu, awansi yu no ben firi fu taki tori na a ten dati? Na omeni sani yu teki prati makandra nanga yu trowpatna, aladi yu no ben lobi den sani dati so furu leki fa en lobi den?

Te yu e poti prakseri na den sortu aksi dati, dan yu no musu broko yu ede taki den bun sani di yu du na fu soso. Wan buku e taki: „Furu tron a de so taki te wan sma e du bun sani gi en patna noso en mati, dan dati e meki taki a trawan wani du bun sani baka gi a sma dati. Fu dati ede yu musu tan du bun sani gi yu trowpatna, so taki a kan du bun sani gi yu tu.” Te yu e du bun sani gi a trowpatna fu yu, dan dati kan meki a trowlibi fu yu kon moro bun, fu di den sani di yu e du e sori taki yu e warderi yu trowlibi èn taki yu wani taki a e tan waka bun.

Si a trowlibi leki wan sani di no musu broko

Yehovah e warderi sma di de loyaal. Iya, Bijbel e taki: „Nanga wan sma di de loyaal, yu [Yehovah] sa handri na wan loyaal fasi” (2 Samuel 22:26). Efu yu wani de loyaal na Yehovah, dan yu musu tan loyaal tu na a trowlibi di a seti.​—Genesis 2:24.

Efu yu nanga yu patna de loyaal na makandra, dan yu sa abi wan bun firi fu a trowlibi fu yu. Te yu e prakseri den mun, den yari, nanga den someni tenti yari di de na yu fesi, dan unu e si unsrefi leki trowpatna ete. Un no man prakseri kwetikweti taki unu no sa de trowpatna moro, èn a sani disi e gi unu a dyaranti taki sani sa waka bun nanga a trowlibi fu unu. Wan wefi e taki: „Awinsi mi e atibron srefisrefi [tapu mi masra] èn awinsi mi e broko mi ede nanga a problema fu wi, toku mi no e frede taki wi sa broko trow. Mi e broko mi ede nanga a fasi fa wi sa lusu a problema di wi abi. Mi no e tweifri kwetikweti taki wi sa man lusu en, ma na a momenti dati nomo mi no sabi fa.”

Efu wan sma wani de loyaal na a trowpatna fu en, dan a de prenspari taki a e si a trowlibi leki wan sani di no sa broko. Toku a sari fu si taki  furu trowpaar e denki tra fasi fu a tori disi. Te trowpatna e meki bigi trobi, dan wan fu den ben kan bari: „Mi e gowe libi yu!”, noso „Mi e go suku wan sma di e warderi mi trutru!” A tru taki furu tron den trowpatna disi no sa du san den taki. Toku Bijbel e sori taki a tongo fu wi kan „lai nanga sani di e kiri sma” (Yakobus 3:8). Te wi e taki sani fu tapu skreki gi wi trowpatna, noso te wi e dwengi en fu du spesrutu sani, dan dati na a srefi leki te wi e taki: ’Mi feni taki mi kan brokotrow nanga yu te mi wani. Mi kan gowe libi yu te mi firi fu du dati.’ Te wi e gi wi trowpatna a firi dati, dan dati kan pori a trowlibi fu wi.

Te yu e si a trowlibi fu yu leki wan sani di no sa broko, dan yu sa de klariklari fu tan nanga yu trowpatna awansi sortu problema yu e ondrofeni. A sani disi e tyari wan tra winimarki kon. A sa de moro makriki gi yu nanga yu trowpatna fu luku pasa den swakifasi nanga den fowtu fu makandra; unu sa tan frudrage makandra èn unu sa de klariklari fu gi makandra pardon (Kolosesma 3:13). Wan buku e taki „te wan trowlibi e waka bun, dan awansi yu noso yu trowpatna meki fowtu, toku a trowlibi no sa pori”.

A dei di yu trow, yu pramisi yu trowpatna taki yu ben o de loyaal na en, èn yu no du dati soso fu di yu feni taki trowpatna musu de loyaal na makandra. A sani disi musu sori krin fa yu musu denki èn fa yu musu tyari yusrefi te yu trow. Yu no musu tan nanga yu trowpatna soso fu di yu feni taki a trowlibi no mag broko, ma yu musu tan nanga en fu di yu lobi en, a no so?

[Futuwortu]

[Faki/​Prenki na tapu bladzijde 5]

San yu kan du nownowde

Yu e du ala san yu man fu meki a trowlibi fu yu waka bun? Kande yu feni taki yu kan du moro. A sa de wan yepi gi yu te yu e pruberi fu du den sani di e kon now:

● Ondrosuku yusrefi. Aksi yusrefi: ’Mi e si misrefi trutru leki wan sma di trow, noso mi e denki èn e tyari misrefi ete leki wan sma di no trow?’ Aksi yu trowpatna fa a feni taki yu e tyari yusrefi.

● Leisi na artikel disi makandra nanga yu trowpatna. Baka dati, taki na wan safri-ati fasi nanga en fu den sani di yu ben kan du fu meki a trowlibi fu yu waka moro bun.

● Du sani makandra nanga yu trowpatna, so taki a trowlibi fu yu kan waka moro bun. Fu gi wan eksempre: Luku den trow fowtow fu unu, noso den fowtow fu tra prenspari sani di pasa na ini un libi. Du sani di ben gi unu prisiri na a ten di un ben e hori nanga makandra, noso na ini den bigin yari fu a trowlibi fu unu. Gebroiki den Waktitoren nanga den Ontwaakt! fu studeri Bijbel artikel nanga makandra di abi fu du nanga a trowlibi.

[Faki/​Prenki na tapu bladzijde 6]

Te yu teki a fasti bosroiti fu meki yu trowlibi waka bun, dan yu musu . . .

● Teki den plekti fu a trowlibi na yu tapu „San yu pramisi fu du, du en. A moro bun taki yu no e pramisi noti, na presi taki yu e meki wi pramisi èn yu no e hori yusrefi na a pramisi dati.”​—Preikiman 5:4, 5.

● Wroko makandra „Tu moro bun leki wán . . . Bika efu wan fu den ben sa fadon, dan a trawan kan opo en patna.”​—Preikiman 4:9, 10.

● Du sani gi makandra „Wan sma sa de moro koloku te a e gi sani, leki te a e kisi sani.”​—Tori fu den Apostel 20:35.

● Si a trowlibi leki wan sani di no sa broko „Lobi . . . e horidoro na ondro ala sani.”​—1 Korentesma 13:4, 7.

[Prenki na tapu bladzijde 7]

Yu e arki yu trowpatna te a wani taki nanga yu?