Fosi nanga now—Fa Bijbel kenki a libi fu a man disi
„Kon krosibei na Gado, èn a sa kon krosibei na unu”
Fosi nanga now—Fa Bijbel kenki a libi fu a man disi
POKU ben de a moro prenspari sani na ini a libi fu Rolf-Michael. Drugs ben de a sani di a ben lobi srefisrefi. Leki wan yonguman na ini Doisrikondre, a ben e dringi furu sopi èn a ben e gebroiki furu LSD, côca, hasj, nanga tra sortu drugs di e pori wan sma frustan.
Di Rolf-Michael ben pruberi fu tyari drugs na wan kibri fasi go na ini wan Afrikan kondre, dan skowtu kisi en èn a ben musu koti strafu 13 mun langa na ini dungru-oso. Di a ben de na dungru-oso, dan a bigin prakseri san na a trutru marki na ini a libi.
Rolf-Michael nanga en wefi Ursula, ben wani sabi trutru san na a marki fu a libi èn den ben suku a waarheid fayafaya. Aladi den no kisi bun bakapisi na den so-kari Kresten kerki, toku den ben wani leri sabi Gado trutru. Ma den ben abi aksi, di difrenti kerki no ben man piki na wan bunfasi. Boiti dati, den kerki disi no ben gi den deki-ati trutru fu tyari wan kenki kon na ini den libi.
Te fu kaba, Rolf-Michael nanga Ursula kon miti Yehovah Kotoigi. Baka di Rolf-Michael bigin studeri Bijbel, dan en ati ben naki en trutru di a leisi a frumane disi: „Kon krosibei na Gado, èn a sa kon krosibei na unu” (Yakobus 4:8). A ben teki a fasti bosroiti fu ’puru na owru fasi fa a ben de, di de akruderi a waka nanga a libi di a ben abi fosi èn fu kon tron wan nyun sma, di ben meki akruderi a wani fu Gado na ini trutru regtfardikifasi nanga loyaalfasi’.—Efeisesma 4:22-24.
Fa Rolf-Michael ben kan tron wan nyun sma? A ben kon si na ini Bijbel taki „nanga yepi fu soifri sabi” wan sma kan tron ’wan nyun sma akruderi a prenki fu a Sma di ben meki en’, namku Yehovah Gado.—Kolosesma 3:9-11.
Aladi Rolf-Michael ben teki a soifri sabi, a ben meki muiti fu tyari en libi akruderi den gronprakseri fu Gado Wortu (Yohanes 17:3). A ben muilek gi Rolf-Michael fu no gebroiki drugs moro, ma a ben kon si o prenspari a de fu kon krosibei na Yehovah na ini begi èn a ben ondrofeni a yepi fu Yehovah (1 Yohanes 5:14, 15). A ben kisi moro yepi di a ben abi krosibei demakandra nanga Yehovah Kotoigi, sma di e meki muiti fu libi akruderi a wani fu Gado.
Wan tra sani di yepi Rolf-Michael, na di a kon sabi taki a grontapu e pasa gowe èn taki den wan di e du a wani fu Gado sa tan fu têgo. Disi ben meki a teki a bosroiti fu no lobi a grontapu di e tan fu wan pisi ten nomo, ma fu kisi a têgo blesi fu di a abi wan krosibei banti nanga a lobi-ati Gado, Yehovah (1 Yohanes 2:15-17). Den wortu na ini Odo 27:11 ben naki na ati fu Rolf-Michael. Drape skrifi: „Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi.” Nanga tangi na ati a e taki: „A tekst disi e sori o dipi a lobi de di Yehovah abi gi wi, fu di a e gi libisma na okasi fu meki en ati prisiri.”
Neleki Rolf-Michael, nanga en wefi, èn den dri pikin fu den, na so dusundusun sma kisi wini di den waka baka den gronprakseri fu Bijbel. Den sortu sma disi de fu feni na ini den gemeente fu Yehovah Kotoigi di de na heri grontapu. A de wan sari sani taki na ini son kondre sma e krutu Kotoigi taki den na wan ogri sekte di e pori osofamiri, aladi dati no de tru. Na eksempre fu Rolf-Michael e sori taki dati no de so kwetikweti.—Hebrewsma 4:12.
Rolf-Michael e taki dati a frumane di skrifi na ini Mateyus 6:33, di e taki dati wi musu poti yeye afersi na a fosi presi, na wan tirilin gi en oso-famiri di e sori fa den musu libi na a yoisti fasi. En nanga en osofamiri, de Yehovah tangi fu di den e prisiri fu abi wan koloku osofamiri-libi leki Kresten. Den e agri nanga den firi fu a psalm skrifiman di ben singi: „San mi sa pai Yehovah baka. Fu ala a bun di a ben du gi mi?”—Psalm 116:12.
[Prenspari pisi na tapu bladzijde 9]
Gado e gi libisma na okasi fu meki en ati prisiri
[Faki na tapu bladzijde 9]
Bijbel gronprakseri di e yepi sma
Wan tu Bijbel gronprakseri di yepi furu sma fu no de wan srafu moro fu sani di kan kiri den, na den wan di e kon now:
„O un sma di lobi Yehovah, tegu gi san ogri” (Psalm 97:10). Baka te wan sma kon sabi taki den takru sani di a e du kan kiri en èn te a no wani si den sani disi na ai kwetikweti, dan a sa de moro makriki gi so wan sma fu du sani di e plisi Gado.
„A sma di e waka nanga koni sma, sa kon koni, ma a sma di abi fu du nanga den wan sondro frustan, a no sa go bun nanga en” (Odo 13:20). Efu wan sma wani tapu fu gebroiki drugs nanga tra sani fu san a kan de wan srafu, dan a musu luku bun nanga sortu sma a abi demakandra. A sa gi a sma dati trutru wini te a abi mati di de Kresten, di sa horibaka gi en fu no gebroiki den sani disi.
„No broko un ede nanga nowan sani, ma na ini ibriwan sani, meki Gado kon sabi san unu wani fu di unu e begi èn e aksi en tangitangi aladi unu e taigi en grantangi tu; èn a vrede fu Gado, di pasa ala suma frustan, sa kibri un ati nanga un frustan nanga yepi fu Krestes Yesus” (Filipisma 4:6, 7). So wan vrede di wan sma sa abi na ini en ati nanga frustan, a no wan firi di sma e kisi te den e gebroiki sani soleki drugs. Èn te wan sma e frutrow tapu Gado nanga yepi fu begi, dan dati e yepi en fu sabi san a musu du te a e kisi problema na ini en libi. A no sa go suku yepi fu di a e gebroiki drugs.