Fu san ede wi musu begi doronomo?

„Begi doronomo. Gi tangi gi ala sani.”​—1 TESALONIKASMA 5:17, 18.

1, 2. Fa Danièl sori taki a ben warderi a grani fu man begi Gado? Sortu krakti dati ben abi tapu a banti di a ben abi nanga Gado?

A PROFEITI Danièl ben abi a gwenti fu begi Gado dri leisi wan dei. A ben abi a gwenti fu saka kindi begi na fesi a fensre fu a tapu-sodro kamra fu en. Drape a ben man si a foto Yerusalem (1 Kownu 8:46-49; Danièl 6:10). Darius, a kownu fu den Mediasma ben meki wan wet di ben taki dati ala sma ben musu anbegi en. Toku Danièl noiti no ben tweifri efu a ben musu tan begi Yehovah. A ben kan lasi en libi fu di a ben e du disi, ma toku a man disi di ben abi a gwenti fu begi, tan begi Yehovah doronomo.

² Fa Yehovah ben si Danièl? Di na engel Gabrièl ben kon fu gi piki tapu wan fu den begi fu Danièl, dan a kari a profeiti ’wan sma di Gado lobi srefisrefi’, noso wan man di ’Gado lobi toemoesi’ (Danièl 9:20-23; Da Bijbel na ini Sranantongo). Na ini a profeititori fu Esekièl, Yehovah e kari Danièl wan regtfardiki man (Esekièl 14:14, 20). En heri libi langa, Danièl ben abi a gwenti fu begi. Leki bakapisi fu dati, a kon abi wan krosibei banti nanga en Gado, èn Darius srefi ben kon si taki disi ben de so. ​—Danièl 6:16.

3. Fa begi kan yepi wi fu tan hori wi soifri retifasi, soleki fa na ondrofenitori fu wan zendeling e sori?

³ Te wi e begi doronomo, dan disi kan yepi wi fu horidoro te tesi e miti wi. Luku fu eksempre, a tori fu Harold King di ben de wan zendeling na ini China. Feifi yari langa den ben sroto en wawan na ini wan strafu-oso kamra. Brada King e fruteri san a ben ondrofeni: „Den kan puru mi fu den mati fu mi, ma nowan sma kan puru mi fu Gado. . . . Sobun, leti na fesi iniwan sma di ben o pasa a strafu-oso kamra fu mi, mi ben saka  kindi begi nanga wan tranga sten, dri leisi wan dei, aladi mi ben hori a tori fu Danièl na prakseri di skrifi na ini Bijbel. . . . A ben gersi leki na den momenti dati, a yeye fu Gado ben e yepi mi fu prakseri den moro prenspari sani, èn a ben meki mi firi korostu. Fu tru, mi kisi furu krakti nanga trowstu fu di mi ben e begi!”

4. Sortu aksi di abi fu du nanga begi wi sa luku na ini na artikel disi?

⁴ Bijbel e taki: „Begi doronomo. Gi tangi gi ala sani” (1 Tesalonikasma 5:17, 18). Nanga a rai disi na prakseri, meki wi go luku den aksi disi: Fu san ede wi musu poti prakseri na a fasi fa wi e begi? Sortu reide wi abi fu begi Yehovah doronomo? Èn san wi musu du efu wi e firi leki wi no warti fu begi Gado fu di wi meki fowtu?

Tron wan mati fu Gado fu di yu e begi

5. Sortu aparti matifasi wi kan abi te wi e begi?

⁵ Yu wani taki Yehovah e si yu leki wan mati fu en? Yehovah ben kari Abraham en mati (Yesaya 41:8; Yakobus 2:23). Yehovah wani taki wi musu abi a srefi sortu banti nanga en. Te yu e luku en bun, dan Yehovah e gi wi a kari fu kon krosibei na en (Yakobus 4:8). A kari dati musu meki wi prakseri dipi fu a tumusi aparti presenti fu begi, a no so? A muilek srefisrefi fu feni wan okasi fu taki nanga wan prenspari tiriman. We, efu dati de so muilek kaba, dan a o moro muilek srefi fu tron wan mati fu en! Ma toku, a Mekiman fu hemel nanga grontapu e gi wi deki-ati fu taki nanga en na ini begi sondro fu frede èn wi kan du disi na iniwan ten di wi wani noso na iniwan ten di wi e firi fu du so (Psalm 37:5). Te wi e begi doronomo, dan disi sa yepi wi fu abi wan krosibei matifasi nanga Yehovah.

6. Fa na eksempre fu Yesus e leri wi taki a de prenspari fu „begi doronomo”?

⁶ Ma a kan pasa makriki taki wi e frigiti fu begi! Den aladei problema wawan kan teki so furu ten fu wi taki wi no e meki muiti fu taki nanga Gado. Yesus ben gi den disipel fu en a deki-ati fu „begi doronomo” èn ensrefi ben du dati tu (Mateyus 26:41). Ala dei nanga neti a ben abi furu fu du, ma toku a ben meki ten fu taki nanga en hemel Tata. Son tron, Yesus ben opo ’frukufruku mamanten te a ben dungru ete’, so taki a ben kan begi (Markus 1:35). Tra leisi, na a kaba fu a dei a ben go en wawan na wan presi fu man taki nanga Yehovah (Mateyus 14:23). Ala ten Yesus ben meki ten fu begi, èn wi musu du dati tu.​—1 Petrus 2:21.

7. Sortu situwâsi musu meki wi taki nanga wi hemel Tata ibri dei?

 ⁷ Ibri dei wi abi furu moi okasi fu taki nanga Gado na ini begi te wi e kisi problema nanga tesi, èn te wi abi fu teki bosroiti (Efeisesma 6:18). Te wi e suku a tiri fu Gado na ini ibri afersi fu wi libi, dan seiker wi o kisi wan moro bun matifasi nanga en. Te tu mati e yepi makandra fu lusu wan problema, dan a matifasi fu den e kon moro tranga, a no so? (Odo 17:17) Na so a matifasi fu wi nanga Yehovah o kon moro tranga tu te wi e frutrow tapu en èn te wi e si fa a e yepi wi.​—2 Kroniki 14:11.

8. Te wi e luku den eksempre fu Nehemia, Yesus, nanga Hana, dan san den e leri wi fu o langa den begi fu wi musu de?

⁸ Wi kan breiti srefisrefi taki Gado no poti o langa, noso omeni leisi wi musu taki nanga en na ini begi! Nehemia ben begi syatu na ini en ati, bifo a ben aksi a kownu fu Persia wan sani (Nehemia 2:4, 5). Yesus ben begi syatu tu di a ben aksi Yehovah fu gi en krakti fu gi Lasarus wan opobaka (Yohanes 11:41, 42). Ma Hana ben „fruteri Yehovah ala sani finifini na ini begi” di a ben taki san ben de tapu en ati (1 Samuel 1:12, 15, 16). Den begi fu wi kan de syatu, noso den kan de langa; disi abi fu du nanga a fasi fa wi e firi èn na ini sortu situwâsi wi de.

9. Fu san ede a prenspari fu prèise Yehovah na ini den begi fu wi èn fu taki en tangi fu ala san a e du gi wi?

⁹ Bijbel abi furu begi fu sma di ben sori trutru warderi nanga lespeki gi Yehovah leki a moro hei tiriman èn gi den tumusi moi sani di a meki (Exodus 15:1-19; 1 Kroniki 16:7-36; Psalm 145). Na ini wan fisyun, na apostel Yohanes e si 24 owruman, noso ala den salfu Kresten na ini hemel, di e prèise Yehovah. Den e taki: „Yu, Yehovah, iya wi Gado, warti fu kisi a glori nanga a grani nanga a makti, bika yu ben meki ala sani, èn fu yu wani ede den ben de èn fu yu wani ede yu ben meki den” (Openbaring 4:10, 11). Wi abi nofo reide tu fu prèise a Mekiman doronomo. Papa nanga mama breiti srefisrefi te a pikin fu den e taki den tangi nanga en heri ati gi wan sani di den du gi en! Wan moi fasi fu meki den begi fu wi kon moro bun, na te wi e prakseri nanga warderi fu den bun sani di Yehovah du, èn te wi e sori taki wi de nanga tangi trutru gi den sani dati.

Fu san ede wi musu „begi doronomo”?

10. Fa begi e yepi wi fu tranga a bribi fu wi?

¹⁰ Efu wi wani tranga a bribi fu wi, dan a de  prenspari fu begi doronomo. Baka di Yesus ben fruteri wan agersitori fu sori taki a de prenspari „fu begi ala ten èn fu no kon weri fu dati”, dan a poti na aksi disi: „Te a Manpikin fu libisma doro, a sa feni a bribi na grontapu trutru?” (Lukas 18:1-8) Seryusu begi di e komoto fu na ati e tranga a bribi. Di Abraham ben e kon owru èn a no ben meki pikin ete, dan a ben taki nanga Gado fu a tori disi. Yehovah piki en fu di a aksi en fosi fu luku go na hemel èn fu teri den stari efu a ben o man. Baka dati, Gado gi Abraham a dyaranti taki: „Na so yu siri sa tron.” San ben de a bakapisi? Abraham „ben bribi na ini Yehovah; èn fu dati ede A ben si en leki wan regtfardiki sma” (Genesis 15:5, 6). Efu wi e fruteri Yehovah ala san de tapu wi ati, efu wi e bribi den pramisi fu en na ini Bijbel, èn efu wi e gi yesi na En, dan a sa tranga a bribi fu wi.

11. Fa begi kan yepi wi te wi abi problema?

¹¹ Begi kan yepi wi tu te wi abi problema. A libi hebi gi yu, noso yu feni taki yu no man nanga den problema di yu abi? Bijbel e taigi wi: „Trowe yu hebi na tapu Yehovah, èn ensrefi sa horibaka gi yu. Noiti a sa meki taki a regtfardikiwan e degedege” (Psalm 55:22). Te wi musu teki muilek bosroiti, dan wi kan teki na eksempre fu Yesus. A ben begi wan heri neti langa bifo a teki 12 sma fu tron apostel fu en (Lukas 6:12-16). Èn a neti fosi a dede, Yesus ben begi so tranga taki „a sweti fu en ben kon tron leki dropu brudu di ben fadon na gron” (Lukas 22:44). San ben de a bakapisi? „Gado ben arki en fu di a ben abi frede gi Gado” (Hebrewsma 5:7). Te wi e begi fayafaya èn doronomo, dan disi sa yepi wi fu horidoro te muilek situwâsi nanga hebi tesi e miti wi.

12. Fa a seti fu begi e sori wi taki Yehovah e broko en ede nanga wi trutru?

¹² Wan tra reide fu san ede wi musu begi Yehovah, na taki efu wi e kon krosibei na en, dan ensrefi sa kon krosibei na wi tu (Yakobus 4:8). Te wi fruteri Yehovah san de tapu wi ati, dan wi e firi taki Yehovah e poti prakseri na san wi abi fanowdu èn taki a e broko en ede nanga wi, a no so? Ibriwan fu wi e ondrofeni gi ensrefi taki Gado lobi wi trutru. Yehovah no gi nowan tra sma a frantwortu fu arki ibriwan fu den begi di den futuboi fu en e seni gi en leki a hemel Tata fu den (Psalm 66:19, 20; Lukas 11:2). Èn a e gi wi a kari fu ’trowe ala wi broko-ede na en tapu, bika a e sorgu gi wi’.​—1 Petrus 5:6, 7.

13, 14. Sortu reide wi abi fu begi doronomo?

¹³ Begi kan gi wi moro deki-ati fu du a preikiwroko  èn a kan tranga wi tu te sma di abi mi-no-ke fasi noso sma di e gens wi, e meki wi kisi a firi fu tapu nanga a diniwroko fu wi (Tori fu den Apostel 4:23-31). Begi kan kibri wi tu teige „den triki fu Didibri” (Efeisesma 6:11, 17, 18). Aladi wi e meki muiti fu kakafutu gi den aladei tesi fu wi, dan wi kan aksi Gado doronomo fu gi wi krakti. Di Yesus ben sori sma fa fu begi, dan wan fu den sani di a ben aksi Yehovah ben de fu „frulusu wi fu na ogriwan”, Satan Didibri.​—Mateyus 6:13.

¹⁴ Efu wi e begi doronomo fu aksi Yehovah meki a yepi wi fu basi den sondu firi fu wi, dan wi sa si taki a e yepi wi trutru. Wi abi a dyaranti disi: „Gado de getrow, èn a no sa gi pasi dati unu kisi tesi pasa a sani di unu man tyari, ma nanga a tesi a sa opo a pasi tu fu komoto so taki unu man frudrage en” (1 Korentesma 10:13). Na apostel Paulus srefi ben ondrofeni na ini furu difrenti situwâsi taki Yehovah ben e broko en ede nanga en èn taki Yehovah ben e gi en krakti. „Gi ala sani mi abi a tranga fu en di e gi mi krakti”, na so a ben taki.​—Filipisma 4:13; 2 Korentesma 11:23-29.

Horidoro na ini begi awinsi yu abi swakifasi

15. San kan pasa te wi no e tyari wisrefi akruderi den markitiki fu Gado?

¹⁵ Efu wi wani taki Gado arki den begi fu wi, dan wi musu teki a rai di de fu feni na ini en Wortu. Na apostel Yohanes ben skrifi: „Awansi san wi e aksi, na dati wi e kisi fu en, bika wi e du san den komando fu en e taki, èn wi e du den sani di e prisiri en” (1 Yohanes 3:22). Ma san kan pasa te wi no e tyari wisrefi akruderi den markitiki fu Gado? Adam nanga Efa ben go kibri baka di den sondu na ini a dyari fu Eden. Wisrefi kan kisi a firi tu fu go kibri „gi a fesi fu Yehovah” èn fu no begi moro (Genesis 3:8). „Mi kon si taki furu tron a fosi fowtu di sma e meki te den e drifi gowe fu Yehovah nanga en organisâsi, na taki den e tapu fu begi”, na so Klaus, wan lepi opziener di e reis e taki (Hebrewsma 2:1). Na so pasa nanga José Ángel. A e taki: „Sowan aiti yari langa a ben de so taki mi ben e begi Yehovah wanwan leisi nomo. Mi ben firi leki mi no ben warti fu taki nanga en, aladi mi ben si en leki mi hemel Tata ete.”

16, 17. Gi wan tu eksempre di e sori taki te wi e begi doronomo, dan disi kan yepi wi te wi swaki na yeye fasi.

¹⁶ Sonwan fu wi kan firi leki wi no warti fu begi Gado fu di wi swaki na yeye fasi, noso fu di wi du sondu. Ma spesrutu na den momenti disi wi musu meki bun gebroiki fu a seti fu begi. Yona ben lowe gowe libi a wroko di a ben kisi. Ma ’na ini en banawtu a bari kari Yehovah, èn A piki en. Komoto fu a bere fu Syeol, Yona bari fu kisi yepi, èn Yehovah ben yere en sten’ (Yona 2:2). Yona begi, Yehovah piki a begi fu en, èn a yeyefasi fu Yona kon bun baka.

¹⁷ Yosé Ángel ben begi fayafaya tu fu kisi yepi. A e memre: „Mi opo mi ati èn mi begi Gado fu gi mi pardon. Èn a yepi mi trutru. Mi no denki taki mi ben o drai kon baka na a waarheid efu mi no ben abi na okasi fu begi. Ibri dei now mi e begi Yehovah doronomo èn mi e du dati nanga prisiri.” Noiti wi musu frede fu taigi Gado krin sortu fowtu wi meki èn nanga sakafasi wi musu aksi en fu gi wi pardon. Di Kownu David fruteri Yehovah fu den sondu di a du, dan Yehovah gi en pardon fu den sondu dati (Psalm 32:3-5). Yehovah wani yepi wi, a no wani krutu wi (1 Yohanes 3:19, 20). Èn den begi fu owruman na ini a  gemeente e yepi wi na yeye fasi, bika den sortu begi dati „abi furu krakti”.​—Yakobus 5:13-16.

18. Sortu dyaranti den futuboi fu Gado kan abi awinsi o fara den drifi gowe?

¹⁸ Sortu papa ben o drai baka gi en manpikin di e kon na en nanga sakafasi fu aksi yepi nanga rai, baka di a meki wan fowtu? Na agersitori fu a manpikin di ben lasi e sori taki awinsi o fara wi drifi gowe, toku wi hemel Tata e prisiri te wi e drai kon baka na en (Lukas 15:21, 22, 32). Yehovah e gi ala den sma di meki fowtu, a deki-ati fu kari en, „bika a sa gi furu pardon” (Yesaya 55:6, 7). Aladi David ben du wan tu seryusu sondu, toku a begi Yehovah èn a taki: „O Gado, grantangi poti yesi arki a begi fu mi; èn no kibri te mi e aksi yu fu sori bun-ati gi mi.” A ben taki tu: „Na neti nanga mamanten nanga bakadina, na soso broko-ede mi abi èn mi e geme, èn [Yehovah] e yere mi sten” (Psalm 55:1, 17). Dati na wan moi dyaranti fu tru!

19. Te wi no kisi piki tapu den begi fu wi, dan fu san ede wi no musu kisi a denki taki dati e sori taki Gado no feni wi bun?

¹⁹ San wi musu du efu wi no e kisi piki tapu a begi fu wi wantewante? Wi musu ondrosuku efu a sani di wi aksi de akruderi a wani fu Yehovah èn efu wi begi na ini a nen fu Yesus (Yohanes 16:23; 1 Yohanes 5:14). A disipel Yakobus ben sori taki son Kresten no ben kisi piki tapu den begi fu den fu di den ben „aksi nanga takru prakseri” (Yakobus 4:3). Ma na a tra sei, te wi no kisi piki tapu den begi fu wi, dan wi no musu kisi a denki wantewante taki ala ten dati e sori taki Gado no feni wi bun. Son tron Gado kan gi pasi taki getrow Kresten tan begi fu wan sani wan pisi ten langa bifo den kisi wan piki. „Tan aksi, dan unu sa kisi”, na so Yesus taki (Mateyus 7:7). Fu dati ede, wi musu „horidoro na ini begi”.​—Romesma 12:12.

Begi doronomo

20, 21. (a) Fu san ede a de prenspari fu begi doronomo na ini den „lasti dei” disi? (b) San wi sa kisi efu wi e go ala dei na fesi a kownusturu fu bun-ati fu Yehovah?

²⁰ Tesi nanga problema e kon moro furu na ini den „lasti dei” disi pe ’muilek ten ben o kon di tranga fu pasa’ (2 Timoteyus 3:1). Èn a makriki fu poti ala wi prakseri na den tesi disi. Ma te wi e begi doronomo, dan disi sa yepi wi fu tan poti prakseri na yeye afersi awinsi wi e kisi problema doronomo, awinsi wi e kisi tesi, èn awinsi wi lasi-ati. Te wi e begi Yehovah ala dei, dan na so fasi wi kan kisi a tumusi prenspari yepi di wi abi fanowdu.

²¹ Yehovah, a „Yereman fu begi”, noiti no abi so furu fu du taki a no sa arki wi (Psalm 65:2). Noiti a musu de so taki wi abi so furu fu du, taki wi no man taki nanga en. A moro prenspari gudu di wi abi na a banti di wi abi nanga Yehovah. Noiti wi musu si a sani disi leki wan soso sani. „Fu dati ede, meki wi go na fesi a kownusturu fu bun-ati sondro fu frede, so taki Gado kan sori wi sari-ati nanga bun-ati èn yepi wi na a yoisti ten.”​—Hebrewsma 4:16.

San yu ben sa piki?

• Fa na eksempre fu a profeiti Danièl e sori wi o prenspari a de fu begi?

• Fa wi kan meki a matifasi di wi abi nanga Yehovah kon moro tranga?

• Fu san ede wi musu begi doronomo?

• Fu san ede wi no musu tapu fu begi Yehovah te wi e firi leki wi no warti fu begi en?

[Aksi fu a tori disi]

[Prenki na tapu bladzijde 16]

Nehemia ben begi syatu na ini en ati bifo a taki nanga a kownu

[Prenki na tapu bladzijde 17]

Hana ben „fruteri Yehovah ala sani finifini na ini begi”

[Prenki na tapu bladzijde 18]

Yesus ben begi wan heri neti langa bifo a teki 12 sma fu tron apostel fu en

[Prenki na tapu bladzijde 20]

Ibri dei wi e kisi furu okasi fu begi