Takimakandra fu yeye afersi e gi deki-ati

„No taki takru sani nanga un mofo, ma taki sani di bun, so taki unu kan gi sma deki-ati te a de fanowdu; na so fasi den sma di e arki, kan yere sani di bun gi den.”​—EFEISESMA 4:29.

1, 2. (a) O prenspari a de taki libisma man taki? (b) Fa den futuboi fu Yehovah wani gebroiki a tongo fu den?

„LIBISMA no kaba frustan san e meki taki den man taki; a de wan presenti fu Gado, wan wondru.” Na so Ludwig Koehler, wan skrifiman fu wortubuku taki. Kande wi no e si a warti presenti disi di wi kisi fu Gado leki wan tumusi prenspari sani (Yakobus 1:17). Ma prakseri o warti a presenti disi de te wan lobiwan e kisi wan berurtu di e meki taki a no man taki so bun moro. No so langa pasa, a masra fu Joan ben kisi wan berurtu. A taki: „Mi nanga mi masra ben man taki heri bun nanga makandra. Mi e sari trutru taki wi no man taki nanga makandra moro leki fosi.”

² Te sma e taki nanga makandra, dan den kan tron moro bun mati, den kan lusu wan trobi, den kan trowstu trawan di e firi brokosaka, den kan tranga a bribi fu trawan, èn den kan meki a libi fu trawan kon moro bun. Ma moro de fanowdu fu man abi den bun bakapisi disi. A koni Kownu Salomo ben taki: „Wan sma de di e taki sondro fu denki. A de neleki a e dyuku sma nanga wan feti-owru. Ma a tongo fu den koniwan na wan dresi” (Odo 12:18). Leki futuboi fu Yehovah, wi wani taki den takimakandra fu wi de leki wan dresi di e meki sani kon bun baka èn taki den e gi trawan deki-ati, na presi taki den e hati trawan, noso e broko den saka. Te wi de na ini a preikiwroko noso te wi e taki nanga tra sma, dan wi wani gebroiki wi tongo sosrefi fu prèise Yehovah. A psalm skrifiman ben singi: „Heri dei wi sa gi Gado grani, èn wi sa prèise yu nen te ten di no skotu.”​—Psalm 44:8.

3, 4. (a) Sortu problema wi alamala abi te wi e taki? (b) Fu san ede a de prenspari fu luku bun san wi e taki?

³ A disipel Yakobus e warskow: „Nowan libisma kan basi en tongo.” A e memre wi: „Wi alamala e misi furu tron. Efu wan sma no e sondu nanga en mofo, dan a de wan volmaakti sma di man basi en heri skin” (Yakobus 3:2, 8). Nowan fu wi de volmaakti. Fu dati ede, aladi wi e meki muiti trutru fu taki den moro bun sani, toku a no ala ten wi e taki sani di e gi trawan deki-ati noso di e prèise a Mekiman fu wi. Sobun, wi musu leri fu luku bun san wi e taki. Boiti dati, Yesus ben taki: „Efu sma e taki dondon sani, dan den sa musu gi frantwortu fu dati na tapu a Krutudei; bika na den sani di yu e taki, sa fruklari taki yu de regtfardiki; den sani di yu e taki, sa krutu yu” (Mateyus 12:36, 37). Iya, a tru Gado e aksi wi fu gi frantwortu fu den sani di wi e taki.

⁴ Wan fu den moro bun sani di wi kan du fu no taki sani di e hati trawan, na fu kon kisi a gwenti fu taki fu yeye afersi. Na artikel disi sa sori fa wi kan du dati, fu sortu sani wi kan taki, èn sortu wini wi kan kisi te wi e taki nanga trawan fu sani di e gi deki-ati.

Poti prakseri na a ati

5. Fu san ede na ati de prenspari fu man abi takimakandra di e gi deki-ati?

⁵ Te wi wani kon kisi a gwenti fu taki fu sani di e gi deki-ati, dan wi musu frustan fosi taki den  sani di wi e taki e sori san de na ini wi ati. Yesus ben taki: „San furu na ati, na dati mofo e taki” (Mateyus 12:34). Fu taki en moro krin, wi lobi fu taki fu sani di prenspari gi wi. Dati meki wi musu aksi wisrefi: ’Nanga san mi furu mi ati? San den takimakandra fu mi e sori? Te mi de nanga den famiriman fu mi, noso nanga tra bribiman, dan mi e taki moro furu fu yeye afersi, noso mi e taki soso fu sport, krosi, felem, nyanyan, sani di mi bai no so langa pasa, noso tra sani di no de so prenspari?’ Kande, sondro fu wi sabi srefi, wi bigin furu wi libi èn wi prakseri nanga sani di no de so prenspari. Te wi e poti den moro prenspari sani na a fosi presi na ini wi libi, dan disi sa meki wi abi moro bun takimakandra èn wi sa kisi wan moro bun libi tu.​—Filipisma 1:10.

6. San den sani di wi e denki abi fu du nanga den takimakandra fu wi?

⁶ Wan tra fasi fa wi kan abi moro bun takimakandra, na te wi e poti prakseri na den sani di wi e denki. Efu wi e meki muiti spesrutu fu denki dipi fu yeye afersi, dan a sa de moro makriki gi wi fu taki fu yeye afersi. Kownu David ben si a tori disi krin. A ben singi: „Meki den wortu fu mi mofo nanga den dipi prakseri fu mi ati kon de wan prisiri na yu fesi, o Yehovah” (Psalm 19:14). Èn a psalm skrifiman Asaf ben taki: „Fu tru, mi sa denki dipi fu ala yu [Gado] wroko, mi sa prakseri furu fu den sani di yu e du” (Psalm 77:12). Te wan sma e furu en ati èn en frustan nanga den tru tori fu Gado Wortu, dan a no de fu taki dati a sa taki furu tu fu sani di de fu prèise. Yeremia no ben man tapu fu taki fu den sani di Yehovah ben leri en (Yeremia 20:9). Na so a kan de tu nanga wi efu wi e denki dipi fu yeye afersi doronomo.​—1 Timoteyus 4:15.

7, 8. Fu sortu sani wi kan taki fu gi trawan deki-ati?

⁷ Te wi abi a gwenti fu teki yeye nyanyan doronomo, dan wi sa abi furu sani di wi kan gebroiki fu abi takimakandra di e gi deki-ati (Filipisma 3:16). Na den kring konmakandra, den kongres, nanga den gemeente konmakandra, wi e yere tumusi moi tori di wi kan fruteri trawan. Wi kan du a srefi tu nanga den sani di wi e leisi na ini den nyun buku, èn na ini a deitekst nanga komentaar (Mateyus 13:52). Boiti dati, den sani di wi e ondrofeni na ini wi Kresten diniwroko kan gi trawan deki-ati na yeye fasi trutru!

⁸ Kownu Salomo ben fruwondru fu den furu difrenti sortu bon, meti, fowru, nanga fisi di a ben si na ini Israel (1 Kownu 4:33). A ben lobi fu taki fu den sani di Gado meki. Wi kan du a srefi tu. Den futuboi fu Yehovah lobi fu taki fu difrenti sortu sani, ma sma di tranga na yeye fasi e meki takimakandra kon moro switi fu di den e taki fu yeye afersi.​—1 Korentesma 2:13.

„Tan prakseri den sani disi”

9. Sortu rai Paulus ben gi den Filipisma?

⁹ Awinsi fu sortu sani wi o taki, den takimakandra fu wi sa gi trawan deki-ati te den e kruderi nanga a rai di na apostel Paulus ben gi a gemeente fu Filipi. A ben skrifi: „Ala sani san tru, ala sani san de wan seryusu afersi, ala sani san regtfardiki, ala sani san krin, ala sani san de fu lobi, ala sani san sma e taki bun fu en, sortu bunfasi de tu èn sortu sani san musu kisi prèise, tan prakseri den sani disi” (Filipisma 4:8). Den sani di Paulus e kari dyaso, de so prenspari taki a e taki dati wi musu „tan prakseri den sani disi”. Wi musu furu wi frustan èn wi ati nanga den sani disi. Sobun, meki wi luku fa den aiti sani di Paulus kari kan yepi wi fu abi moro bun takimakandra.

10. Fa wi kan abi takimakandra fu sani di tru?

¹⁰ Sani di tru, no abi fu du nomo nanga tori di soifri. Den abi fu du nanga sani di de fu frutrow, sani soleki a waarheid fu Gado Wortu. Fu dati ede, te wi e taki nanga trawan fu den tru tori fu Bijbel di ben naki wi ati, noso fu lezing di ben gi wi deki-ati, èn sosrefi te wi e taki fu Bijbel rai di yepi wi, dan na so fasi wi e tan prakseri den sani di tru. Na a tra sei, wi no wani sabi noti fu a ’sokari sabi’ di gersi nomo leki na tru tori (1 Timoteyus 6:20). Èn wi e luku bun fu no konkru, èn fu no fruteri ondrofenitori te wi no sabi seiker efu den de tru.

11. Fu sortu seryusu afersi wi kan taki te wi e taki nanga trawan?

¹¹ Seryusu afersi na tori di fiti èn di de prenspari; den no de lawlaw tori, noso afersi di no de prenspari. Den abi fu du nanga wi Kresten diniwroko, den muilek ten na ini san wi e libi, èn a tan di wi musu tan tyari wisrefi na wan fasi di fiti.  Te wi e taki fu den seryusu sani disi, dan na so fasi wi e kisi wan moro fasti bosroiti fu tan na ai, fu tan hori wi soifri retifasi, èn fu tan preiki a bun nyunsu. Iya, den moi sani di wi e ondrofeni na ini wi diniwroko èn den sani di e pasa na ini a ten disi di e memre wi taki wi e libi na ini den lasti dei, na difrenti sani di wi kan gebroiki fu abi takimakandra di e gi deki-ati.​—Tori fu den Apostel 14:27; 2 Timoteyus 3:1-5.

12. Fu sortu tori wi no sa taki te wi prakseri a rai fu Paulus fu tan prakseri sani di regtfardiki èn di krin?

¹² A wortu regtfardiki wani taki fu de reti na ini Gado ai, noso fu doro den markitiki fu en. Sani di krin e sori taki a denki fu wi èn a fasi fa wi e tyari wisrefi musu de krin. Te wi e taki nanga trawan, dan wi no musu fruteri ogri-ati lei fu pori sma nen èn wi no musu taki doti lafutori tu (Efeisesma 5:3; Kolosesma 3:8). Te trawan na wrokope noso na skoro e bigin taki fu den sortu sani disi, dan a de wan koni sani gi Kresten fu gowe fu drape.

13. Gi wan tu eksempre fu takimakandra di abi fu du nanga sani di de fu lobi èn sani di sma e taki bun fu en.

¹³ Di Paulus ben taki dati wi musu tan prakseri  sani di de fu lobi, dan a ben e taki fu sani di e gi prisiri, sani di e meki sma firi bun, noso sani di e gi trawan deki-ati fu sori lobi. A no ben taki fu sani di e meki taki sma no wani si trawan na ai, sani di e meki sma kisi bita-ati, noso sani di e meki sma strei nanga trawan. Sani di sma e taki bun fu en e sori go na tori fu sani noso sma di abi wan bun nen èn di bun fu sabi. Den bun sani disi kan de den ondrofenitori fu getrow brada nanga sisa, di e kon doronomo na ini den tijdschrift A Waktitoren nanga Ontwaakt! Baka te yu leisi den artikel disi di e tranga a bribi, dan yu kan fruteri trawan fa yu feni den tori dati. A e gi wi furu deki-ati tu te wi e yere sortu marki trawan doro na yeye fasi! Den sortu takimakandra disi sa tranga a lobi nanga a wánfasi na ini a gemeente.

14. (a) San wi musu du efu wi wani sori bunfasi? (b) Fa wi kan taki fu sani di musu kisi prèise?

¹⁴ Paulus e taki fu awinsi „sortu bunfasi de”. Wan sma di abi bunfasi e prakseri bun sani èn a e tyari ensrefi na wan fasi di fiti srefisrefi. Wi musu sorgu dati wi e taki sani di de akruderi Bijbel gronprakseri. Boiti dati, wi no musu taki fu sani di no regtfardiki, di no krin, èn di no fiti. Paulus taki tu fu sani san musu kisi prèise. Efu yu yere fa wan sma hori wan moi lezing, noso efu yu si wan sma na ini a gemeente di de wan bun eksempre fu getrowfasi, dan yu kan taki fu dati nanga a sma srefi èn nanga tra sma sosrefi. Furu tron na apostel Paulus ben prèise den bun fasi fu tra bribiman (Romesma 16:12; Filipisma 2:19-22; Fileimon 4-7). Èn a no de fu taki dati den sani di wi Mekiman meki, de fu prèise trutru. Te wi e luku den sani dati, dan so furu tori de di wi kan gebroiki fu abi takimakandra di e gi deki-ati.​—Odo 6:6-8; 20:12; 26:2.

Taki nanga trawan fu sani di e gi deki-ati

15. Sortu Bijbel komando e sori taki papa nanga mama musu meki ten fu taki seryusu nanga den pikin?

¹⁵ Deuteronomium 6:6, 7 e taki: „Den wortu disi di mi e komanderi yu tide, musu de na tapu yu ati; èn yu musu poti den go dipi na ini a manpikin fu yu èn taki fu den te yu e sidon na ini yu oso èn te yu e waka na pasi èn te yu e go didon èn te yu e opo.” A de krin fu si taki a komando disi e sori taki papa nanga mama musu meki ten fu taki seryusu nanga den pikin fu den fu yeye afersi.

16, 17. San Kresten papa nanga mama kan leri fu den eksempre fu Yehovah nanga Abraham?

¹⁶ Wi kan frustan taki Yesus nanga en hemel Tata ben musu fu abi langa takimakandra di den ben taki fu a wroko di Yesus ben o du na grontapu. „A Tata srefi di seni mi kon, taigi mi san mi musu fruteri èn san mi musu taki”, na so Yesus ben taigi den disipel fu en (Yohanes 12:49; Deuteronomium 18:18). A ben musu fu de so, taki a famiri-edeman Abraham ben taki furu yuru langa nanga en manpikin Isak fu a fasi fa Yehovah ben blesi den nanga den afo fu den. A no de fu taki dati den sortu takimakandra dati ben yepi Yesus nanga Isak fu saka densrefi na ondro a wani fu Gado.​—Genesis 22:7-9; Mateyus 26:39.

¹⁷ Wi musu abi takimakandra nanga den pikin fu wi tu fu gi den deki-ati. Aladi papa nanga mama abi furu fu du, toku den musu meki ten fu taki nanga den pikin fu den. Efu a kan, dan fu san ede unu no e nyan nanga makandra leki osofamiri, awinsi na wan leisi wan dei? Te unu e nyan, noso baka te unu nyan, dan okasi sa de fu abi takimakandra di e gi deki-ati. Den  takimakandra disi de tumusi prenspari fu meki na osofamiri tan gosontu na yeye fasi.

18. Fruteri wan ondrofenitori di e sori taki a abi bun bakapisi te papa nanga mama e taki nanga den pikin fu den.

¹⁸ Alejandro, wan pionier di abi pikinso moro leki 20 yari, e memre ete na sortu sani a ben e tweifri di a ben abi 14 yari. A e fruteri: „Skoromati, skoromeester nanga skoromisi ben taki sani noso den ben du sani di meki taki mi ben e tweifri efu Gado ben de trutru èn efu Bijbel kon fu Gado trutru. Mi papa nanga mi mama ben teki ten fu taki-go-taki-kon nanga mi furu yuru langa. Na ini a muilek pisi ten disi, den takimakandra dati yepi mi fu no tweifri moro. Boiti dati, den yepi mi sosrefi fu teki bun bosroiti na ini mi libi.” Fa a de now? Alejandro e taki moro fara: „Mi e libi na mi papa oso ete. Ma fu di wi abi furu fu du, meki mi nanga mi papa no e feni ten makriki fu man taki nanga makandra. Fu dati ede, wan leisi wan wiki wi e nyan nanga makandra na a wrokope fu en. Mi e warderi den takimakandra disi srefisrefi.”

19. Fu san ede a de prenspari gi wi alamala fu taki nanga trawan fu yeye afersi?

¹⁹ Wi e warderi en tu te wi abi na okasi fu taki nanga wi Kresten brada nanga sisa fu yeye afersi, a no so? Wi abi okasi fu taki nanga den te wi de na den konmakandra, te wi de na ini a preikiwroko, te wi abi prisiri demakandra, noso te wi e go na wan presi makandra. Paulus ben angri fu taki nanga den Kresten na ini Rome. „Mi e angri fu si unu”, na so a ben skrifi gi den, so „taki unu kan gi makandra deki-ati, fu di ibriwan e kisi deki-ati nanga a bribi fu a trawan, a di fu unu èn a di fu mi” (Romesma 1:11, 12). „A de tumusi prenspari gi wi fu taki nanga Kresten brada nanga sisa fu yeye afersi”, na so Johannes, wan Kresten owruman e taki. „Den sortu takimakandra disi e gi prisiri èn den e meki wi no broko wi ede so furu moro nanga den aladei problema fu wi. Furu tron mi e aksi den owruwan fu fruteri mi fu a libi fu den èn san yepi den fu man tan getrow. Na ini den yari di pasa, mi taki nanga furu fu den, èn ibriwan fu den gi mi pikinso koni, noso den meki mi kon frustan sani moro bun, èn leki bakapisi fu dati mi libi kon moro bun.”

20. San wi kan du te wi miti wan sma di e syensyen?

²⁰ San yu kan du efu yu e suku fu taki fu yeye afersi nanga trawan, ma den no wani taki nanga yu fu den sani disi? No lasi-ati. Kande bakaten yu kan feni wan moro bun ten fu taki fu den sani disi. „Leki gowtu apra ini solfru kerfu wroko wan wortu de di taki na a yoisti ten”, na so Salomo ben taki (Odo 25:11). Hori na prakseri taki son sma e syensyen. „Rai na ini na ati fu wan man de leki dipi watra, ma a man di abi koni fu man si sani krin, na a wan di sa hari en kon na tapu” * (Odo 20:5). A moro prenspari sani na taki noiti yu musu meki a fasi fa trawan e tyari densrefi, tapu yu fu taki fu den sani di naki yu ati.

A e gi wini fu abi takimakandra fu yeye afersi

21, 22. Sortu wini wi kan kisi te wi e taki nanga trawan fu yeye afersi?

²¹ Paulus ben gi a rai: „No taki takru sani nanga un mofo, ma taki sani di bun, so taki unu kan gi sma deki-ati te a de fanowdu; na so fasi den sma di e arki, kan yere sani di bun gi den” (Efeisesma 4:29; Romesma 10:10). Kande wi musu meki muiti fu drai wan tori na so wan fasi  taki a kon tron wan takimakandra di e gi deki-ati, ma efu wi e du disi dan wi sa kisi furu bun bakapisi. Te wi e taki nanga trawan fu yeye afersi, dan wi man prati wi bribi nanga trawan èn wi kan meki a bradafasi fu wi kon moro tranga.

²² Fu dati ede, meki wi gebroiki a presenti disi, namku a taki di wi man taki, fu gi trawan deki-ati èn fu prèise Gado. Den sortu takimakandra disi sa gi wi prisiri èn den sa gi trawan deki-ati. A moro prenspari sani na taki den takimakandra disi e prisiri na ati fu Yehovah fu di a e arki san wi e taki èn a e prisiri en ati te wi e gebroiki wi tongo na wan fasi di fiti (Psalm 139:4; Odo 27:11). Te wi e taki fu yeye afersi, dan wi kan de seiker taki Yehovah no sa frigiti wi. Bijbel e taki fu den wan di e dini Yehovah na ini a ten fu wi: „Na a ten dati, den sma di ben frede Yehovah ben taki nanga makandra, ibriwan fu den nanga en kompe, èn Yehovah tan poti prakseri na den èn a tan arki den. Èn den bigin skrifi wan buku na en fesi fu memre den wan di ben frede Yehovah èn gi den wan di ben e prakseri en nen” (Maleaki 3:16; 4:5). Fu tru, a de tumusi prenspari dati wi e taki fu sani di e gi deki-ati na yeye fasi!

[Futuwortu]

San yu ben sa piki?

• Fa den takimakandra fu wi e sori suma wi de?

• Fu sortu sani wi kan taki fu gi trawan deki-ati?

• O prenspari a de fu abi takimakandra na ini na osofamiri èn na ini a Kresten gemeente?

• Sortu wini wi kan kisi te wi e taki fu sani di e gi deki-ati?

[Aksi fu a tori disi]

[Prenki na tapu bladzijde 12]

Takimakandra fu yeye afersi abi fu du nanga . . .

„ala sani san tru”

„ala sani san de wan seryusu afersi”

„ala sani san sma e taki bun fu en”

„ala sani san musu kisi prèise”

[Sma di abi a reti fu den prenki]

Video cover, Stalin: U.S. Army photo; Creator book cover, Eagle Nebula: J. Hester and P. Scowen (AZ State Univ.), NASA

[Prenki na tapu bladzijde 13]

Wan moi okasi fu abi takimakandra fu yeye afersi, na te wi e nyan nanga makandra