A e gi Yehovah glori te wi e horidoro na ondro tesi

„Efu unu e horidoro te unu e pina aladi unu e du bun, dan dati na wan bun sani na Gado.”​—1 PETRUS 2:20.

1. Na sortu aksi wi musu poti prakseri, spesrutu fu di tru Kresten wani dini Gado soleki fa den pramisi en?

KRESTEN na sma di gi densrefi abra na Yehovah èn den e suku fu du a wani fu en. Fu di den wani dini Gado soleki fa den pramisi en, meki den e du ala muiti fu waka baka Yesus Krestes, a moro bun Eksempre fu den, èn fu gi kotoigi fu a waarheid (Mateyus 16:24; Yohanes 18:37; 1 Petrus 2:21). Ma Yesus nanga tra getrow sma gi den libi èn dede gi a bribi fu den. Disi wani taki dati ala Kresten sa abi fu dede gi a bribi fu den?

2. Fa Kresten e si tesi nanga pina?

² Wi leki Kresten e kisi a frumane fu tan getrow te na dede, ma dati no wani taki dati wi musu dede gi a bribi fu wi (2 Timoteyus 4:7; Openbaring 2:10). Disi wani taki dati wi de klariklari fu nyan pina gi a bribi fu wi, èn fu dede te dati de fanowdu, ma a no de so taki wi abi a winsi fu pina èn fu dede. Wi no lobi fu pina èn wi no feni en wan switi sani te sma e hati wi, noso te sma e gi wi syen. Ma fu di wi e fruwakti taki wi o kisi tesi nanga frufolgu, meki a de prenspari fu prakseri bun san wi kan du te wi o kisi fu du nanga den sani dati.

Den tan getrow na ondro tesi

3. Yu kan fruteri wan eksempre fu Bijbel di e sori san sma du di den kisi frufolgu? (Luku a faki di nen „San den du di den kisi frufolgu”, na tapu a tra bladzijde.)

³ Na ini Bijbel, wi man feni furu tori di e sori san futuboi fu Gado na ini owruten ben du di den kisi fu du nanga situwâsi pe den ben kan lasi den libi. Den difrenti fasi fa den ben handri e sori Kresten na ini a ten disi, san densrefi kan du te den o kisi fu du nanga tesi èn nanga frufolgu. Poti prakseri na den tori na ini a faki di nen „San den du di den kisi frufolgu”, èn luku san yu kan leri fu den.

4. San wi kan taki fu a fasi fa Yesus nanga tra getrow futuboi handri di den ben kisi tesi?

⁴ Aladi Yesus nanga tra getrow futuboi fu Gado ben du difrenti sani na ini difrenti situwâsi, toku a de krin taki den no ben suku fu tyari den libi na ini kefar. Te kefar ben miti den, dan den ben sori deki-ati, ma toku den ben e luku bun san den ben du (Mateyus 10:16, 23). A marki fu den ben de fu meki a preikiwroko go na fesi èn fu tan getrow na Yehovah. A fasi fa den handri na ini difrenti situwâsi de wan eksempre gi den Kresten di e kisi tesi nanga frufolgu na ini a ten disi.

5. Sortu frufolgu ben opo kon na Malawi na ini den yari baka 1960, èn san den Kotoigi fu drape ben du?

⁵ Na ini a ten disi, a pipel fu Yehovah kisi kefalek hebi tesi, èn furu tron den no ben man kisi sani di den ben abi fanowdu, fu di feti ben de, noso fu di lanti ben tapu a preikiwroko, èn son leisi fu di sma frufolgu den nomonomo. Fu gi wan eksempre, na ini den yari baka 1960, dan Yehovah Kotoigi na ini Malawi ben kisi frufolgu na wan tumusi ogri-ati fasi. Sma pori den Kownukondre zaal fu den, den oso fu den, èn sosrefi den nyanyan-sani nanga den bisnis fu den. Iya, yu kan taki dati den ben lasi pikinmoro ala sani. Boiti dati, sma ben fon den èn den ben du tra ogri-ati sani tu nanga den Kotoigi. San den brada nanga sisa du? Dusundusun fu den ben musu lowe gowe libi den dorpu fu den. Furu fu den ben feni kibri na busi, èn trawan ben musu gowe fu go tan wan pisi ten na ini a kondre Mosambik di ben de krosibei. Furu getrow sma lasi den libi, ma trawan bosroiti fu gowe libi a presi pe a feti ben de, èn soleki fa a sori, dan disi ben  de wan bun bosroiti na ini a situwâsi dati. Na so den brada nanga sisa disi teki na eksempre fu Yesus nanga Paulus.

6. San den Kotoigi fu Malawi no frigiti fu du aladi den ben kisi hebi frufolgu?

⁶ Aladi den brada nanga sisa fu Malawi ben musu lowe noso go kibri na wan tra presi, toku den suku fu gi yesi na theokrasia tiri. Den ben du ala muiti tu fu go doro na wan kibri fasi nanga den Kresten wroko fu den. San ben de a bakapisi? Den ben doro wan heimarki fu 18.519 Kownukondre preikiman, syatu bifo lanti ben tapu a preikiwroko na ini 1967. Aladi a wroko ben tapu ete èn furu sma lowe go na Mosambik, toku den ben doro wan nyun heimarki fu 23.398 preikiman na ini 1972. Ibri preikiman ben preiki pikinmoro leki 16 yuru ibri mun. A no de fu taki dati a fasi fa den handri ben gi Yehovah glori, èn Yehovah ben blesi den getrow brada nanga sisa dati na ini a tumusi muilek ten dati. *

7, 8. San e meki taki son sma e bosroiti fu no lowe komoto fu a kondre fu den, aladi sma e gens den?

 ⁷ Na a tra sei, aladi problema e opo kon na ini son kondre fu di sma e gens Kotoigi, toku son brada nanga sisa e bosroiti fu no libi a kondre, awinsi den abi na okasi fu du dati. Te den e gowe fu go libi na wan tra presi, dan dati kan lusu wan tu problema, ma a ben kan tyari tra problema kon. Fu eksempre, den ben o man tan abi demakandra nanga Kresten brada nanga sisa? Den ben o man tan kisi yeye nyanyan doronomo? A kan taki den wani pruberi fu seti den libi baka na ini wan kondre pe sani e waka moro bun, noso na ini wan kondre pe den abi moro okasi fu kon gudu. Ma efu den ben o du dati, dan den ben o man tan abi bun gwenti di abi fu du nanga yeye afersi?​—1 Timoteyus 6:9.

⁸ Trawan e bosroiti fu no gowe libi a kondre fu di den wani gi den brada nanga sisa fu den yepi na yeye fasi. Den e bosroiti fu tan èn fu kakafutu gi a situwâsi, so taki den kan go doro fu preiki na a presi pe den e libi èn so taki den kan gi den Kresten brada nanga sisa fu den deki-ati (Filipisma 1:14). Fu di sonwan fu den teki so wan bosroiti, meki den ben man yepi fu wini krutu-afersi srefi na ini a kondre fu den. *

9. Sortu sani wan sma musu hori na prakseri te a musu bosroiti efu a sa tan na a presi pe a de, noso efu a sa go libi na wan tra presi fu wai pasi gi frufolgu?

⁹ Ibri sma musu teki en eigi bosroiti efu a sa tan na a presi pe a de, noso efu a sa go libi na wan tra presi. A no de fu taki dati wi musu aksi Yehovah na ini begi fosi fu tiri wi, bifo wi e teki den sortu bosroiti disi. Ma awinsi sortu bosroiti wi e teki, toku wi musu hori den wortu fu na apostel Paulus na prakseri: „Ibriwan fu wi sa gi Gado frantwortu fu ensrefi” (Romesma 14:12). Soleki fa wi ben taki kaba, dan Yehovah e aksi fu ibriwan fu den futuboi fu en taki den tan getrow, awinsi sortu situwâsi den de na ini. Sonwan fu den futuboi fu en e kisi tesi nanga frufolgu now; trawan kan kisi fu du nanga den sani disi bakaten. Wi alamala sa kisi tesi na a wan noso tra fasi, èn nowan fu wi musu fruwakti taki  wi no sa kisi fu du nanga dati (Yohanes 15:19, 20). Leki futuboi fu Yehovah, wi no kan wai pasi gi a strei nanga san wi alamala kisi fu du, namku fu santa a nen fu Yehovah èn fu sori taki en abi a reti fu tiri ala sani.​—Esekièl 38:23; Mateyus 6:9, 10.

„No pai wan sma ogri fu ogri”

10. Sortu prenspari eksempre Yesus nanga den apostel seti gi wi te wi e kisi tesi nanga frufolgu?

¹⁰ Wan tra prenspari gronprakseri di wi kan leri fu a fasi fa Yesus nanga den apostel ben handri na ondro tesi, na taki noiti wi musu suku fu du ogri baka nanga den sma di e frufolgu wi. Nowan presi na ini Bijbel wi e si taki Yesus, noso den bakaman fu en ben span anu makandra, noso taki den ben seti wan legre fu feti nanga den sma di ben frufolgu den. Tra fasi leki dati, na apostel Paulus ben gi Kresten a rai fu „no pai wan sma ogri fu ogri”. „No teki refensi gi unsrefi, un lobiwan, ma gi pasi na atibron; bika Buku e taki: ’Refensi na fu mi; mi sa pai baka, Yehovah e taki.’” Boiti dati, „no meki ogri wini yu, ma tan wini ogri nanga bun”.​—Romesma 12:17-21; Psalm 37:1-4; Odo 20:22.

11. San wan historia skrifiman ben taki fu a fasi fa den fosi Kresten ben si a Tirimakti fu a ten dati?

¹¹ Den fosi Kresten ben gi yesi na a rai dati. A historia skrifiman Cecil J. Cadoux, ben fruteri na ini en buku The Early Church and the World, fa Kresten ben si a Tirimakti na ini a pisi ten fu 30-70 G.T. A e skrifi: „Wi no abi krin buweisi di e sori taki den Kresten na ini a pisi ten dati ben seti sani fu feti nanga den sma di ben e frufolgu den. A moro krin fasi fa den ben sori taki den no ben agri nanga a frufolgu, na taki den ben e krutu den tiriman fu den na wan krakti fasi, noso den ben e bruya den tiriman fu di den ben lowe. Toku, te Kresten ben kisi frufolgu, dan ala ten den ben handri nanga lespeki, ma den no ben gi yesi kwetikweti te a tirimakti ben aksi den fu du wan sani di ben de teige a leri fu Krestes.”

12. Fu san ede a moro betre fu nyan pina, na presi fu pai ogri fu ogri?

¹² A abi wini trutru te wi meki sma du wi ogri sondro taki wi e du den wan sani baka? Efu wi e handri na so wan fasi, dan a no ben o de moro makriki gi sma fu puru wi na pasi? A no ben o de wan moro bun sani efu wi ben o feti fu kibri wisrefi? Efu wi e luku a tori na a fasi fa libisma e si dati, dan dati kan sori leki a de wan koni sani fu du. Ma leki futuboi fu Yehovah, wi abi na overtoigi taki a moro koni sani fu du na fu gi yesi na a tiri fu Yehovah na ini ala afersi. Wi e hori den wortu fu Petrus na prakseri: „Efu unu e horidoro te unu e pina aladi unu e du bun, dan dati na wan bun sani na Gado” (1 Petrus 2:20). Wi abi na overtoigi taki Yehovah sabi heri bun san e pasa, èn a no sa gi pasi taki sani e go so doro fu ala ten. Fa wi kan de seiker fu dati? Di a pipel fu en ben de na ini katibo na ini Babilon, dan Yehovah ben taki: „A sma di e fasi unu, e fasi a popki fu mi ai” (Sakaria 2:8). Nowan fu wi ben o meki wan trawan fasi a popki fu wi ai fu wan langa pisi ten, a no so? Yehovah sa tyari frulusu kon na a yoisti ten. Wi no abi fu tweifri na dati kwetikweti.​—2 Tesalonikasma 1:5-8.

13. Fu san ede Yesus meki den feanti fu en kisi en sondro taki a du den wan sani?

 ¹³ Wi kan teki na eksempre fu Yesus na ini a tori disi. Di Yesus gi pasi taki den feanti fu en kisi en na ini a dyari fu Getsemane, dan a no de so taki Yesus no ben man du wan sani fu kibri ensrefi. Fu taki en leti, a taigi den disipel fu en: „Yu denki taki mi no man aksi mi Tata fu gi mi moro leki twarfu bigi legre engel nownowde? Ma efu dati ben o pasa, dan fa den Santa Buku ben sa kon tru, di e taki dati sani musu pasa na a fasi disi?” (Mateyus 26:53, 54) A moro prenspari sani gi Yesus ben de fu du a wani fu Yehovah, awinsi a ben musu pina. A ben abi wan tranga bribi na ini den wortu fu a profeititori na ini a psalm fu David: „Yu no sa libi a sili fu mi na ini Syeol. Yu no sa meki a loyaalwan fu yu si na olo” (Psalm 16:10). Wan tu yari baka dati, na apostel Paulus ben taki fu Yesus: „Fu a prisiri ede di ben e wakti en, meki a ben man frudrage a pina-postu èn a no ben frede syen; dan a go sidon na a reti-anusei fu a kownusturu fu Gado.”​—Hebrewsma 12:2.

A e gi prisiri fu santa a nen fu Yehovah

14. San na a sani di ben gi Yesus furu prisiri, so taki a ben man horidoro na ondro ala den tesi fu en?

¹⁴ San na a sani di ben gi Yesus furu prisiri, so taki a ben man horidoro na ondro a moro hebi tesi di wan sma kan kisi? Fu ala den futuboi fu Yehovah, dan Yesus, a lobi Manpikin fu Gado, ben de a moro prenspari sma di Satan ben suku fu tesi. Sobun, efu Yesus ben tan getrow na ondro tesi, dan a ben o gi Satan di ben spotu Yehovah, a moro bun buweisi taki sma kan tan getrow na Gado (Odo 27:11). Yu man frustan fa Yesus ben prisiri di a kisi wan opobaka? A ben musu fu prisiri di a kon sabi taki a du a plekti fu en. Leki wan volmaakti man a sori taki Yehovah  abi a reti fu tiri ala sani èn a santa a nen fu Yehovah! Boiti dati, a go sidon „na a reti-anusei fu a kownusturu fu Gado”. A no de fu taki dati disi ben de a moro bigi grani di Yesus kisi èn taki a sani disi ben gi en prisiri trutru.​—Psalm 110:1, 2; 1 Timoteyus 6:15, 16.

15, 16. Sortu ogri-ati frufolgu den Kotoigi ben kisi na ini Sachsenhausen, èn san ben gi den a krakti fu horidoro?

¹⁵ Na a srefi fasi, Kresten e prisiri tu fu santa a nen fu Yehovah fu di den e horidoro na ondro tesi nanga frufolgu, soleki fa Yesus ben du dati. Wan eksempre fu disi ben de na ondrofenitori fu den Kotoigi di ben pina na ini a strafuman kampu fu Sachsenhausen. Boiti dati, den Kotoigi disi ben pasa a dedewaka libilibi na a kaba fu a di fu Tu Grontapufeti. Disi ben de wan hebi tesi srefisrefi. Na ini a waka dati, dusundusun strafuman dede fu di den no ben man kibri te a ben kowru srefisrefi; trawan ben siki, den ben de nanga angribere, noso den SS-srudati ben kiri sonwan fu den leti na seipasi na wan tumusi ogri-ati fasi. Ala den 230 Kotoigi ben tan na libi fu di den ben tan krosibei na makandra èn den ben yepi makandra, awinsi disi ben wani taki dati den ben kan lasi den eigi libi.

¹⁶ San ben gi den Kotoigi disi a krakti fu horidoro na ondro na ogri-ati frufolgu disi? Di den doro na wan presi pe ogri no ben kan miti den moro, dan wantewante den skrifi na tapu papira fa den ben e prisiri, èn den taki Yehovah tangi. A pisi papira di den skrifi ben nen: „A bosroiti fu 230 kotoigi fu Yehovah fu siksi difrenti kondre, di kon makandra na ini wan busi krosibei fu Schwerin na Mecklenburg.” Na ini a bosroiti dati, den taki: „Wi pasa wan tumusi tranga ten nanga furu tesi, èn a de leki den sma di tan na libi, komoto fu wan faya onfu sondro wan mankeri. (Luku Danièl 3:27.) Tra fasi leki dati, den tranga èn den abi furu krakti fu Yehovah èn den e wakti fayafaya tapu nyun komando fu a Kownu fu meki Theokrasia afersi go na fesi.” *

17. Na sortu fasi a pipel fu Gado e kisi tesi na ini a ten disi?

¹⁷ Neleki den 230 getrow sma dati, wisrefi tu kan kisi tesi tapu a bribi fu wi, aladi noiti ete wi „ben abi fu feti teleki brudu fadon” (Hebrewsma 12:4). Ma wi kan kisi tesi na difrenti sortu fasi. A kan taki skoromati e spotu wi, noso a kan taki speri e dwengi wi fu du hurudu èn fu du tra sani di no bun. Tra sani kan de hebi tesi tu, soleki te wi musu hori wisrefi na a bosroiti fu no teki brudu, fu trow soso na ini Masra, noso fu kweki pikin na ini a bribi na ini wan osofamiri pe wan fu den patna no de na bribi.​—Tori fu den Apostel 15:29; 1 Korentesma 7:39; Efeisesma 6:4; 1 Petrus 3:1, 2.

18. Sortu dyaranti wi abi taki wi kan horidoro na ondro den moro hebi tesi?

¹⁸ Ma awinsi sortu tesi e kon na wi tapu, wi sabi taki wi e pina fu di wi e poti Yehovah nanga en Kownukondre tapu a fosi presi, èn wi e si en leki wan bigi grani fu du dati. Boiti dati, a e gi wi furu prisiri. Wi e kisi deki-ati fu den wortu fu Petrus, di e gi wi a dyaranti: „Koloku fu unu efu unu e kisi porinen fu Krestes nen ede, bika a yeye fu glori, iya, a yeye fu Gado, de na un tapu” (1 Petrus 4:14). Nanga a krakti fu a yeye fu Yehovah, wi de tranga fu horidoro na ondro den moro muilek tesi, èn na so fasi wi e prèise en èn e gi en glori.​—2 Korentesma 4:7; Efeisesma 3:16; Filipisma 4:13.

[Futuwortu]

Yu kan tyari disi kon na krin?

• Fa Kresten e si pina nanga frufolgu?

• San wi kan leri fu a fasi fa Yesus nanga tra getrow sma handri di den ben kisi tesi?

• Fu san ede a de wan koni sani fu no pai ogri fu ogri te wi e kisi frufolgu?

• San na a sani di ben gi Yesus furu prisiri so taki a ben man horidoro na ondro den tesi fu en, èn san wi kan leri fu disi?

[Aksi fu a tori disi]

[Faki/​Prenki na tapu bladzijde 15]

San den du di den kisi frufolgu

• Bifo den srudati fu Herodes doro na Betlehem fu kiri ala den pikin boi fu tu yari noso moro yongu, dan wan engel ben taigi Yosef nanga Maria fu teki a yongu Yesus èn fu lowe go na Egepte.​—Mateyus 2:13-16.

• Furu leisi di Yesus ben du en diniwroko, dan den feanti fu en ben suku fu kiri en fu di a ben gi kotoigi na wan krakti fasi. Na ibriwan fu den okasi dati, Yesus wai pasi gi den sma dati.​—Mateyus 21:45, 46; Lukas 4:28-30; Yohanes 8:57-59.

• Di srudati nanga skowtu ben kon na a dyari fu Getsemane fu kisi Yesus, dan a taigi den krinkrin suma na en. Tu leisi a taigi den: „Na mi.” A no ben wani srefi taki den bakaman fu en ben musu feti, ma a meki den ogriman tyari en gowe.​—Yohanes 18:3-12.

• Na ini Yerusalem, Petrus nanga trawan ben poti na ini strafu-oso, den ben kisi fonfon, èn den ben kisi a komando fu no taki fu Yesus moro. Ma di den ben kon fri, dan den „gowe . . . , èn ibri dei na ini a tempel èn oso fu oso den ben tan go doro sondro fu tapu fu gi leri èn fu meki a bun nyunsu fu a Krestes, Yesus, bekènti”.​—Tori fu den Apostel 5:40-42.

• Di Saulus, a man di ben tron na apostel Paulus bakaten, kon sabi taki den Dyu fu Damaskus ben suku fu kiri en, dan den brada poti en na ini wan baskita, èn na neti den saka en go na ini wan olo na ini a skotu fu a foto, èn na so a ben man lowe gowe.​—Tori fu den Apostel 9:22-25.

• Wan tu yari baka dati, Paulus ben aksi fu meki Caesar krutu en, aladi Granman Festus nanga Kownu Agrepa ben feni taki a ’no du noti fu kisi dedestrafu, noso fu koti strafu’.​—Tori fu den Apostel 25:10-12, 24-27; 26:30-32.

[Prenki na tapu bladzijde 16, 17]

Aladi hebi frufolgu meki taki sma ben musu lowe go na tra presi, toku dusundusun getrow Kotoigi fu Malawi tan du a Kownukondre diniwroko nanga prisiri

[Prenki na tapu bladzijde 17]

Den getrow sma disi ben man horidoro na ini a dedewaka èn na ini den strafuman-kampu fu den Nazi, fu di den ben prisiri fu santa a nen fu Yehovah

[Sma di abi a reti fu a prenki]

A dedewaka: KZ-Gedenkstätte Dachau, courtesy of the USHMM Photo Archives

[Prenki na tapu bladzijde 18]

Wi kan kisi tesi na difrenti sortu fasi