Aksi fu leisiman

San a wani taki fu teki dopu gi den dedewan?

Di na apostel Paulus ben skrifi fu na opobaka na hemel, dan a skrifi wan moi sani. Na ini Da Bijbel na ini Sranantongo wi e leisi: „Noso san dem sa doe disi dopoe gi dem dede soema, efoe dem dede soema no opo baka? Foe san’ede dem teki dopoe gi dem dede soema?” Èn na ini Nyun Testamenti wi e leisi: „Ma san den sma o du dan, di teki dopu gi den wan di dede kba? Efu a tru tak’ dedesma no e opo baka, fu san ede den e teki dopu gi den?”​—1 Korentesma 15:29.

Paulus ben e taki dati sma di de na libi musu teki dopu gi dedesma di noiti teki dopu? Na so a kan gersi te wi e leisi a vers disi na ini den tu bijbelvertaling disi èn sosrefi na ini tra vertaling. Ma te wi e ondrosuku den Buku fu Bijbel èn a Grikitongo, na ini san Paulus ben skrifi, moro fini, dan wi sa kon na wan tra bosroiti. Paulus ben wani taki dati te salfu Kresten e teki dopu, dan den e bigin libi na wan fasi di abi leki bakapisi taki den sa lasi den libi aladi den e hori den soifri retifasi neleki fa dati ben pasa nanga Krestes. Baka dati den sa kisi wan opobaka fu tron wan yeye neleki fa Yesus ben de.

Bijbel e horibaka gi a fruklari disi. Paulus ben skrifi na ini a brifi di a seni gi den Romesma: „Unu no sabi taki wi alamala di ben dopu na ini Krestes Yesus, ben dopu na ini a dede fu en?” (Romesma 6:3) Na ini a brifi di Paulus seni go gi den Filipisma, a ben taki fu ensrefi: „Fu di mi pina leki fa [Krestes] ben pina èn fu di mi dede leki fa en dede; na so mi kan si efu mi kan de wan fu den fosiwan di sa opo baka” (Filipisma 3:10, 11). Paulus ben e sori taki wan salfu bakaman fu Krestes musu hori en soifri retifasi na ondro tesi; aladei a abi fu du nanga dede, èn te fu kaba a sa lasi en libi aladi a e sori en soifri retifasi. Ma baka dati a o kisi wan opobaka fu go na hemel.

A de prenspari taki den tekst di kari na fesi, nanga tra bijbeltekst di e taki fu dede di abi fu du nanga den wan di dopu, e sori go na sma di de na libi èn di teki dopu kaba èn no na den sma di dede kaba. Paulus ben taigi tra salfu Kresten sosrefi: „Unu beri nanga en na ini a dopu, èn fu di unu abi wan banti nanga en, meki unu kisi wan opobaka tu bika unu bribi den sani di Gado du nanga en krakti; Gado ben opo en baka na dede.”​—Kolosesma 2:12.

A Griki wortu hy·perʹ, di vertaal na ini difrenti Bijbel na ini 1 Korentesma 15:29 nanga „gi”, wani taki tu „nanga a marki fu”. Akruderi tra bijbeltekst dan a Nieuwe-Wereldvertaling van de Heilige Schrift e vertaal a vers disi na wan yoisti fasi leki: „San den wan di e dopu nanga a marki fu de dedewan sa du dan? Efu den dedewan no sa kisi wan opobaka kwetikweti, dan fu san ede dan den e dopu nanga a marki dati fu de so?”