Furu aksi de, ma a no ala piki bun nofo

NA A mamanten fu 1 november 1755, a Dei fu Ala Santawan, wan bigi gronseki naki a foto Lisabon, na ini a kondre Portugal. Moro furu fu den sma fu a foto ben de na kerki. Dusundusun oso broko kon na gron, èn tin dusundusun sma lasi libi.

Syatu baka di a rampu disi pasa, dan Voltaire, wan skrifiman fu Fransikondre, ben tyari en puwema kon na doro di nen Poème sur le désastre de Lisbonne (Puwema fu a rampu fu Lisabon). Aladi sma ben e taki dati na Gado ben meki a rampu disi pasa fu strafu den sma gi den sondu di den du, toku Voltaire ben sori na ini a puwema fu en taki a sani dati no tru. Voltaire ben taki dati libisma no man frustan noso fruklari fu san ede den sortu rampu disi e pasa. Dati meki a ben skrifi:

A naturu babaw, wi e poti aksi gi en fu soso;

Wi abi wan Gado fanowdu di e taki nanga libisma.

A no de fu taki dati a no Voltaire wawan ben wani kon sabi sani fu Gado. Na ini a heri libisma historia, den furu ogri sani nanga rampu di pasa, meki taki sma bigin aksi densrefi wan lo sani. Dusundusun yari pasa, a famiri edeman Yob ben lasi ala en pikin na ini dede èn wan takru siki ben e moro en, sobun a aksi: „Fu san ede [Gado] gi leti na wan sma di e nyan pina, èn libi na den wan di de nanga bigi sari?” (Yob 3:20) Tide na dei, furu sma e aksi densrefi fa a gersi taki so wan bun èn lobi-ati Gado no e du noti, aladi so furu pina nanga kruktudu de.

Fu di angriten, feti, siki, nanga dede e miti furu sma, meki den e weigri fu bribi taki wan Mekiman de di e broko en ede nanga libisma. Wan filosofiaman di no e bribi na ini Gado ben taki: „Nowan sma kan taki dati Gado no abi fowtu te a e gi pasi taki wan pikin e pina, . . . boiti efu a sma taki dati Gado no de kwetikweti.” Den tumusi ogri-ati sani di pasa, soleki a Holocaust na a ten fu a di fu Tu Grontapufeti, meki taki furu sma kon abi a srefi denki dati tu. Luku san wan Dyu skrifiman ben skrifi na ini wan koranti: „A moro bun fasi fa mi kan fruklari a pina di sma ben e pina na Auschwitz, na taki nowan Gado no de di e du wan sani fu yepi libisma.” Na ini 1997, wan ondrosuku ben du na ini Fransikondre, pe moro furu sma na Lomsu. Na ondrosuku disi ben sori taki sowan 40 procent fu den sma drape e tweifri efu wan Gado de trutru, fu di tumusi ogri-ati sani e pasa, soleki san ben pasa na ini 1994 na Rwanda pe sma ben kiri bun furu sma fu wan tra lo.

San e meki en muilek gi sma fu abi bribi?

Fu san ede Gado no e du wan sani so taki nowan ogri e pasa? Wan Lomsu historia skrifiman e taki  dati na aksi disi ’e meki en muilek gi furu sma fu abi bribi’. A e aksi: „Fa wan sma kan bribi na ini wan Gado di no e du noti fu yepi libisma, aladi a e si taki milyunmilyun sma e dede èn trawan e srakti ipi-ipi sma kiri soso fu di den de fu wan tra lo noso kondre?”

Wan prenspari pisi fu a Lomsu koranti La Croix e taki a srefi sani: „Sma e frede te den e prakseri fu den rampu di pasa na ini a historia, noso fu den takru bakapisi di e kon fu di masyin teki a wroko fu libisma abra. A srefi sani e pasa te gronseki noso bigi frudu e pori wan heri pisi kontren, noso te den e yere fa sma orga densrefi fu du kruka sani nanga tra ogri, èn sosrefi te wan lobiwan dede. Ala leisi den e luku go na hemel e aksi densrefi fu san ede Gado meki den sani disi pasa. Pe Gado de? Den wani wan piki nomonomo. A no de so taki En na a Granwan di no e poti prakseri na libisma, a Granwan di no e broko en ede nanga wi?”

Pawsu Yohanes Paulus II ben taki fu a tori disi na ini en apostolis brifi fu 1984, Salvifici Doloris. A ben skrifi: „Aladi grontapu srefi na wan krin buweisi di e sori libisma taki wan Gado de trutru èn taki a abi bigi koni nanga makti, toku a muilek gi libisma fu bribi taki wan Gado de trutru, fu di so furu ogri nanga pina de. Son sma no e bribi kwetikweti taki wan Gado de, spesrutu fu di ala dei so furu sma e pina fu soso, èn so furu sma e du ogri sondro taki den e kisi strafu fu dati.”

A tru taki wan lobi-ati Gado de di abi bigi makti, soleki fa Bijbel e fruteri, aladi so furu libisma e pina? A e kibri wan sma, noso wan grupu fu sma, so taki ogri no e miti den? A e du wan sani fu yepi wi na ini a ten disi? Soleki fa Voltaire ben skrifi, dan ’wan Gado de trutru di e taki nanga libisma’ fu gi libisma piki tapu den aksi disi? Grantangi, leisi na artikel di e kon now fu kisi piki tapu na aksi disi.

[Prenki na tapu bladzijde 3]

A rampu fu Lisabon na ini 1755 ben meki Voltaire taki dati libisma no man frustan fu san ede den sortu rampu dati e pasa

[Sma di abi a reti fu a prenki]

Voltaire: From the book Great Men and Famous Women; Lisbon: J.P. Le Bas, Praça da Patriarcal depois do terramoto de 1755. Foto: Museu da Cidade/Lisboa

[Prenki na tapu bladzijde 4]

Furu sma e tweifri efu Gado de trutru fu di ogri-ati sani e pasa, soleki na ini Rwanda pe sma ben kiri bun furu sma fu wan tra lo

[Sma di abi a reti fu a prenki]

AFP PHOTO

 [Sma di abi a reti fu a prenki na tapu a kafti]

KAFTI, children: USHMM, courtesy of Main Commission for the Prosecution of the Crimes against the Polish Nation