Sortu yepi wi kan fruwakti fu Gado?

NA INI a di fu aiti yarihondro b.G.T., Kownu Heskia fu Yuda, ben abi 39 yari di a yere taki a ben abi wan siki di ben o meki a dede te fu kaba. A nyunsu disi ben seki en trutru èn Heskia begi Gado fu kon betre baka. Gado seni en profeiti fu piki Heskia: „Mi yere a begi fu yu. Mi si den watra-ai fu yu. Luku, mi e gi yu ete tinafeifi yari fu libi.”​—Yesaya 38:1-5.

Fu san ede Gado ben gi yepi na a spesrutu okasi dati? Wan tu hondro yari bifo, Gado ben pramisi a regtfardiki Kownu David: „Yu oso nanga yu kownukondre sa tan na yu fesi te ten di no skotu; iya, yu kownusturu sa tan tanapu kánkan te ten di no skotu.” Gado ben tyari kon na krin sosrefi taki a Mesias ben o gebore na ini a famirilin fu David (2 Samuel 7:16; Psalm 89:20, 26-29; Yesaya 11:1). Di Heskia ben kon siki,  dan a no ben abi nowan manpikin ete. Sobun, efu Heskia ben dede sondro fu meki pikin, dan nowan fu den tra bakapikin fu David ben o abi a reti fu tron kownu. Gado ben abi wan spesrutu reide fu san ede a ben yepi Heskia, namku fu meki a Mesias kon gebore na ini a famirilin dati.

Bifo a ten fu den Kresten, dan na furu okasi Yehovah ben du sani fu yepi en pipel, so taki den pramisi fu en ben sa kon tru. Di den Israelsma ben kon fri fu katibo na ini Egepte, dan Moses ben taki: „Na fu di Yehovah ben lobi unu, èn fu di a ben hori ensrefi na a sweri di a ben meki nanga den afo fu unu, meki Yehovah tyari unu gowe nanga wan tranga anu.”​—Deuteronomium 7:8.

Sosrefi na ini a fosi yarihondro, Gado ben du sani fu meki taki den prakseri fu en kon tru. Fu eksempre, di wan Dyu di ben nen Saulus, ben de na pasi fu go na Damaskus, dan na wan wondru fasi a kisi wan fisyun so taki a ben o tapu fu frufolgu den disipel fu Krestes. Fu di a man disi di tron na apostel Paulus ben teki a Kresten bribi, meki na so wan fasi a bun nyunsu ben man panya go na tra kondre.​—Tori fu den Apostel 9:1-16; Romesma 11:13.

Gado ben yepi sma ala ten?

A de so taki Gado ben yepi sma ala ten, noso na ini spesrutu situwâsi nomo? Bijbel e sori krin taki disi no ben de wan aladei sani kwetikweti. Aladi Gado ben frulusu den dri yongu Hebrewsma fu den no dede na ini wan faya onfu, èn aladi a ben frulusu a profeiti Danièl fu a lew-olo, toku a no ben kibri a libi fu tra profeiti (2 Kroniki 24:20, 21; Danièl 3:21-27; 6:16-22; Hebrewsma 11:37). Na wan wondru fasi, Petrus ben kisi frulusu di Herodes  Agrepa I ben poti en na dungru-oso. Ma a srefi kownu disi ben kiri na apostel Yakobus, èn Gado no ben du noti fu no meki na ogri sani disi pasa (Tori fu den Apostel 12:1-11). Aladi Gado ben gi den apostel a makti fu dresi sikiwan èn fu gi dedesma wan opobaka srefi, toku a no ben agri fu puru „a maka na ini a skin” di ben e moro Paulus; a kan taki „a maka” disi ben de wan siki di Paulus ben abi.​—2 Korentesma 12:7-9; Tori fu den Apostel 9:32-41; 1 Korentesma 12:28.

Gado no ben du wan sani fu tapu a hebi frufolgu di den disipel fu Krestes ben e kisi di Nero ben de tiriman fu Rome. Na a ten dati, Kresten ben e kisi hebi skin-ati, sma ben e bron den libilibi, èn sma ben e trowe den gi werdri meti di ben e nyan den. Ma a frufolgu disi no ben fruwondru den fosi Kresten, èn a no ben meki den tweifri efu wan Gado de trutru. Te yu e luku en bun, dan Yesus ben warskow den disipel fu en taki sma ben o tyari den na fesi krutu èn taki den ben musu de klariklari fu nyan pina èn fu dede srefi gi a bribi fu den.​—Mateyus 10:17-22.

Neleki fa Gado ben du na ini owruten, na so a man frulusu den futuboi fu en na ini a ten disi tu te den de na ini kefar. Èn te wan sma e firi taki Gado kibri en fu wan ogri, dan noiti wi musu taki dati a no tru. Ma na ini den sortu situwâsi disi a muilek fu taki krin efu na Gado ben yepi a sma trutru. Furu getrow futuboi fu Yehovah ben kisi mankeri di wan wrokopresi sutu panya na ini a foto Toulouse, èn dusundusun getrow Kresten lasi libi na ini Nazi strafuman kampu nanga Komunist strafuman kampu, noso na ini tra sortu ogri situwâsi. Ma toku Gado no ben du wan sani fu kibri den fu den ogri disi. Fu san ede Gado no e du wan sani ala ten fu yepi den sma di a feni bun?​—Danièl 3:17, 18.

„Ten nanga sani di e pasa onfruwakti”

Rampu kan miti iniwan sma, awinsi a e bribi noso a no e bribi na ini Gado. Di a wrokopresi na ini Toulouse ben sutu panya, dan Alain nanga Liliane ben man pasa a rampu libilibi, ma 30 sma ben lasi libi èn hondrohondro sma ben kisi mankeri aladi a no den ben meki wan fowtu. Na heri grontapu, tin dusundusun sma e kisi mankeri noso e dede srefi fu di trawan du ogri nanga den, fu di trawan e rei wagi sondro fu hori densrefi na wet, noso fu di orloku de. Ma wi no kan taki dati na Gado de frantwortu gi na ogri di miti den. Bijbel e memre wi taki „ten nanga sani di e pasa onfruwakti e miti” ala sma.​—Preikiman 9:11.

Boiti dati, libisma e siki, den e owru, èn den e dede tu. Srefi sonwan fu den sma di prakseri taki Gado ben kibri a libi fu den na wan wondru fasi, noso taki Gado ben meki den kon betre baka fu a siki fu den, srefi den sma dati dede te fu kaba. A tru taki Gado sa puru siki nanga dede èn a sa „figi puru ala watra na den ai” fu libisma, ma a sani dati o pasa na ini a ten di e kon.​—Openbaring 21:1-4.

Fu meki a sani dati pasa, dan Gado sa abi fu tyari moro bigi kenki kon leki fu yepi libisma wanwan leisi nomo. Bijbel e taki fu „a bigi dei fu Yehovah” (Sefanya 1:14). Na a ten dati, Gado sa yepi libisma na heri grontapu fu di a sa puru ala ogri. Libisma sa kisi na okasi fu libi fu têgo na ini wan grontapu pe sani sa bun dorodoro. Drape „sma no sa memre den sani fu fositen moro, èn den no sa kon na ini na ati tu” (Yesaya 65:17). Srefi den dedewan sa kisi libi baka, èn na so dede, a moro bigi rampu di e miti libisma, no sa de moro (Yohanes 5:28, 29). Na so Gado, di abi kefalek furu lobi nanga bunfasi, sa lusu ala problema fu libisma fu têgo.

Fa Gado e yepi sma na ini a ten disi?

Ma disi no wani taki dati Gado e sidon luku nomo fa libisma e pina. Tide na dei, Gado e gi ala sma na okasi fu kon sabi en èn fu kisi wan  bun banti nanga en, awinsi fu sortu kondre noso ras den de, noso awinsi sortu posisi den abi na ini a libimakandra (1 Timoteyus 2:3, 4). Yesus ben fruteri fa disi e pasa: „Nowan sma kan kon na mi, boiti efu a Tata, di ben seni mi kon, e hari en kon” (Yohanes 6:44). Gado e hari opregti sma kon na en fu di a e meki den kon sabi a Kownukondre boskopu di den futuboi fu en e meki bekènti na heri grontapu.

Boiti dati, Gado abi furu krakti tapu a libi fu den sma di wani taki a e tiri den. Nanga yepi fu en santa yeye, Gado e ’opo den ati fu den’, so taki den kan frustan a wani fu en èn so taki den sa du san a e aksi fu den (Tori fu den Apostel 16:14). Iya, Gado e gi sma na okasi fu kon leri sabi en, sosrefi en Wortu, nanga den sani di a abi na prakseri, èn na so fasi a e sori taki a lobi ibriwan fu wi èn taki a e broko en ede nanga wi trutru.​—Yohanes 17:3.

Wan lasti sani, na taki Gado no e frulusu den futuboi fu en na wan wondru fasi na ini a ten disi, ma a e yepi den fu di a e gi den a santa yeye fu en nanga „a krakti di bigi pasa marki”, so taki den kan pasa iniwan situwâsi di e miti den (2 Korentesma 4:7). Na apostel Paulus ben skrifi: „Gi ala sani mi abi a tranga fu en [Yehovah Gado] di e gi mi krakti.”​—Filipisma 4:13.

Sobun, wi abi ala reide fu taki Gado tangi ibri dei taki a gi wi libi èn taki a gi wi a howpu fu libi fu têgo na ini wan grontapu pe nowan pina sa de moro. „San mi sa pai Yehovah fu ala den bun di a du gi mi?”, na so a psalm skrifiman ben aksi. „Mi sa teki a kan fu bigi frulusu, èn mi sa kari a nen fu Yehovah” (Psalm 116:12, 13). Te yu e leisi den Waktitoren doronomo, dan dati sa yepi yu fu frustan san Gado ben du, san a e du now, èn san a sa du ete fu meki yu de koloku nownow kaba èn fu meki yu abi wan trutru howpu gi a ten di e kon.​—1 Timoteyus 4:8.

[Prenspari pisi na tapu bladzijde 6]

„Sma no sa memre den sani fu fositen moro, èn den no sa kon na ini na ati tu.”​—Yesaya 65:17

[Prenki na tapu bladzijde 5]

Na ini Bijbel ten, Yehovah no ben du noti di sma ben ston Sakaria kiri . . .

noso di Herodes ben e kiri ipi-ipi sma di no ben du nowan ogri

[Prenki na tapu bladzijde 7]

A ten de krosibei te pina no sa de moro; srefi den dedewan sa libi baka