Ondrofenitori

Yehovah e hari den mofinawan kon na ini a waarheid

SOLEKI FA ASANO KOSHINO FRUTERI

Na ini 1949, wan tu yari nomo baka a di fu Tu Grontapufeti, wan trakondre-sma ben kon na a osofamiri gi suma mi ben e wroko na ini a foto Kobe. A trakondre-sma disi ben de wan langa man di ben abi switifasi. En ben de a fosi zendeling fu Yehovah Kotoigi di ben kon na Yapan. Fu di a man disi ben kon drape, meki mi yere a waarheid fu Bijbel. Ma meki mi fruteri wan tu sani fu misrefi fosi.

MI GEBORE na ini 1926 na ini wan pikin dorpu na noordsei fu a distrikt Okayama. Aiti pikin de na ini na osofamiri fu wi èn mi na a di fu feifi pikin. Mi papa ben de wan fayafaya anbegiman fu a gado di den sma fu a presi drape ben e anbegi na ini a Syinto tempel. Sobun a heri yari doro, wi leki pikin ben e prisiri fu hori den kerkifesa pe a heri famiri ben e kon na wan.

Di mi ben yongu ete, mi ben abi furu aksi fu sani di abi fu du nanga a libi, ma mi ben e broko mi ede moro furu nanga san e pasa te wan sma dede. A ben de a gwenti taki sma ben musu dede na oso èn taki den pikin ben musu de nanga a famiri na a pisi ten te a e dede. Mi ben e sari srefisrefi di mi granmama dede èn di mi pikin brada dede di a no ben abi wán yari srefi. A ben hebi gi mi srefisrefi fu prakseri fa a ben o de te mi papa nanga mama dede. ’Disi na ala fu a libi? A libi no abi wan moro bun sani na ini?’ Mi ben e angri fu kisi wan piki tapu den aksi disi.

Na ini 1937, di mi ben de na ini a di fu siksi klas fu lagiskoro, dan na orloku mindri China nanga Yapan ben bigin. Lanti ben seni mansma go feti na ini China. Den pikin di ben de na skoro ete ben musu taki den papa, noso brada adyosi, èn den ben e bari taki „banzai!”, san wani  taki, meki a Kèiser libi langa. Sma ben abi na overtoigi taki Yapan ben o wini a feti, fu di a Kèiser di de leki wan libilibi gado gi den, e tiri a nâsi.

Heri esi den famiri bigin kisi dede boskopu fu a presi pe den srudati ben e feti fayafaya. Den famiri di ben de na row ben e sari srefisrefi. Den ben kon kisi bita-ati èn den ben e prisiri srefisrefi te furu fu den feanti ben dede noso te den ben kisi mankeri. Ma na a srefi ten mi ben e prakseri: ’Den feanti musu e sari neleki wi te den lobiwan fu den dede.’ Na a pisi ten di mi kaba nanga lagiskoro, dan na orloku ben hari go moro fara na ini China.

Mi e miti wan trakondre-sma

A famiri fu wi ben e wroko gron èn fu dati ede wi ben de pôti sma. Ma mi papa ben gi mi pasi fu go doro na skoro soso te a no ben abi fu pai gi dati. Sobun, na ini 1941, mi go na wan skoro gi umapikin na ini a foto Okayama di de sowan 100 kilometer fu wi oso. A skoro disi ben de fu leri umapikin fa den ben kan tron bun wefi nanga bun mama. Ibri pikin di de na a skoro disi ben e go tan nanga wan gudu famiri na ini a foto èn drape a musu leri du osowroko. Na mamanten den studenti ben e kisi leri fu di den ben e wroko na den oso disi, èn na bakadina den ben e go na skoro.

Baka di a driktoro fu a skoro hori wan seremonia fu gi den nyun studenti wan switikon èn fu sori den fa a libi fu den sa de now, dan a skoromisi fu mi, di ben weri wan kimono (wan spesrutu krosi di den Yapansma e weri), tyari mi go na wan bigi oso. Ma mi no sabi fu san ede na uma fu na oso disi no ben wani teki mi. Dan a skoromisi taigi mi: „Meki wi go na Misi Koda en oso.” A tyari mi go na wan oso di no ben bow na a fasi fa den Yapansma e bow èn di wi doro drape a naki na a doro. Baka wan pisi ten wan langa uma nanga weti wiwiri kon na doro. Mi skreki! Na uma disi no ben de wan Yapansma èn noiti ete mi ben si wan sma fu Amerkankondre. A skoromisi meki mi miti Misi Maud Koda èn a gowe esi-esi. Mi ben e senwe di mi ben e srepi mi tas go na ini na oso. Baka ten mi kon yere taki Misi Maud Koda na wan Amerkan uma di ben trow nanga wan man fu Yapan di ben studeri na ini Amerkankondre. A misi disi ben e leri sma Ingrisitongo na wan bisnis skoro.

A tra mamanten kaba mi kisi furu fu du. A masra fu Misi Koda ben e kisi stoipi èn mi ben musu yepi sorgu a masra fu en. Mi ben e broko mi ede fu di mi no ben e frustan nowan wortu Ingrisitongo. Mi no ben e broko mi ede moro di Misi Koda bigin taki Yapantongo nanga mi. Ala dei mi ben e yere fa den ben e taki Ingrisitongo èn safrisafri den yesi fu mi ben kon gwenti fu yere a tongo dati. Mi ben lobi fa ala sani ben de na a oso dati.

A ben naki mi ati fu si fa Maud ben tan sorgu gi a siki masra fu en. A masra fu en ben lobi leisi Bijbel. Bakaten mi kon yere taki a trowpaar disi ben bai a buku Het Goddelijke Plan der Eeuwen na ini Yapantongo na wan buku-wenkri di e seri buku di sma gebroiki kaba. Wan tu yari kaba den ben e kisi A Waktitoren doronomo na ini Ingrisitongo.

Wan dei mi kisi wan Bijbel leki kado. Mi ben breiti bika disi ben de a fosi tron na ini mi libi taki mi ben abi mi eigi Bijbel. Mi ben e leisi en te mi ben e go na skoro èn te mi ben komoto na skoro, ma mi no ben frustan furu fu san mi ben leisi. Fu di mi kisi leri fu a Syinto bribi fu Yapan, meki mi no ben sabi furu fu Yesus Krestes. Mi no  ben frustan taki na so mi ben o bigin teki a waarheid fu Bijbel safrisafri èn taki disi ben o piki den aksi fu mi di abi fu du nanga a libi èn a dede fu wan sma.

Dri sari sani ben pasa

Baka tu yari mi ben kaba teki leri fu du osowroko èn mi ben musu gowe libi a famiri. Di mi kaba nanga skoro, dan mi go na ini wan grupu fu meisje di ben e yepi fu meki krosi gi den srudati. Den bigi Amerkan opolani, B-29, bigin trowe bom èn tapu 6 augustus 1945 wan atoombom fadon tapu Hiroshima. Baka wan tu dei mi kisi wan telegram di ben taki dati mi mama ben e siki seryusu. Mi teki a fosi loko di ben kan tyari mi go na oso. Di mi saka fu a loko, wan famiriman fu mi ben e wakti drape èn a taigi mi taki mi mama lasi libi. A dede tapu 11 augustus. A sani di mi ben e frede ala den yari ben kon tru! Noiti moro a ben o taki nanga mi, noso lafu nanga mi.

Tapu 15 augustus Yapan lasi a feti. Sobun na ini wan pisi ten fu tin dei mi kisi fu du nanga dri sari sani, namku: a fosi atoombom di ben trowe tapu Yapan, mi mama kon dede, èn a prenspari sani na ini historia taki Yapan lasi a feti. Ma now mi ben sabi taki sma no ben o dede moro na ini a feti. Mi ben e sari srefisrefi di mi gowe libi a wroko pe wi ben e meki krosi gi den srudati èn mi drai go baka na oso na ini a dorpu pe mi kweki.

Mi kon lobi a waarheid

Wan dei, sondro fu fruwakti dati, mi kisi wan brifi fu Maud Koda fu Okayama. A ben aksi mi fu go drape fu yepi en nanga osowroko fu di a ben o opo wan Ingrisi skoro. Mi no ben sabi san fu du, ma toku mi go te fu kaba. Baka wan tu yari mi froisi go na Kobe na a famiri Koda.

Na a bigin fu a waran pisi ten fu a yari 1949, wan langa man di ben abi switifasi kon na a famiri Koda. A ben nen Donald Haslett, èn a ben komoto na Tokio kon na Kobe fu suku wan oso na ini Kobe gi den zendeling. A ben de a fosi zendeling fu Yehovah Kotoigi di kon na Yapan. A ben feni wan oso, èn na ini november 1949 wan tu zendeling kon na Kobe. Wan dei, feifi fu den zendeling kon na famiri Koda. Tu fu den ben de Lloyd Barry nanga Percy Iszlaub. Ibriwan fu den tu man disi ben taki sowan tin miniti nanga den sma di ben kon drape na a oso. Maud ben de wan Kresten sisa fu den zendeling èn soleki fa a sori, dan a ben kisi deki-ati fu de makandra nanga den. Na a ten dati mi kisi a deki-ati fu leri Ingrisitongo.

Den fayafaya zendeling ben yepi mi èn safrisafri mi kon frustan den moro prenspari sani fu a waarheid fu Bijbel. Mi kisi piki tapu den aksi di mi ben abi sensi mi pikin-nengre ten. Iya, Bijbel e gi a howpu fu libi fu têgo na ini wan paradijs na grontapu èn a e gi a pramisi taki „ala sma di de na ini den memregrebi” sa kisi wan opobaka (Yohanes 5:28, 29; Openbaring 21:1, 4). Mi de Yehovah tangi taki wi kisi so wan howpu nanga yepi fu a frulusu-ofrandi fu en Manpikin, Yesus Krestes.

Mi e teki prati na a prisiri wroko fu Yehovah Kotoigi

Fu 30 december 1949 te go miti 1 yanuari 1950, a fosi bigi konmakandra fu Yehovah Kotoigi ben hori na ini Yapan na a zendeling-oso na Kobe. Mi ben go nanga Maud. Fosi, a bigi oso disi ben de fu wan Nazi man fu a tirimakti fu Hitler. Na oso disi ben de na wan pisi fu a kondre pe yu ben man si a se nanga na èilanti Awaji; a sani disi ben de wan heri moi sani fu si. Mi no ben frustan furu fu a konmakandra fu di mi no ben sabi so furu fu Bijbel. Ma toku a ben naki mi ati fu si fa den zendeling ben lobi fu abi demakandra nanga den Yapansma. Ala nanga ala, 101 sma ben de na a publikitaki na a konmakandra disi.

Syatu baka dati, mi bosroiti fu teki prati na a preikiwroko. Mi ben musu abi deki-ati fu go oso fu oso, fu di mi na wan sma di e syensyen. Wan mamanten Brada Lloyd Barry kon na wi oso fu tyari mi go na ini a preikiwroko. A ben bigin na a oso leti sei na oso fu Sisa Koda. Yu kan taki dati mi ben kibri baka a brada aladi mi ben e arki fa a ben hori a takimakandra. Di mi go na a preikiwroko fu a di fu tu tron, dan mi wroko nanga tu tra zendeling. Wan owru Yapan uma ben kari wi kon na inisei èn a ben arki. Bakaten a gi ibriwan fu wi wan grasi merki. A ben wani kisi bijbelstudie na en oso èn te fu kaba a tron wan dopu Kresten  srefi. Mi kisi deki-ati di mi si fa na uma disi go na fesi.

Na ini april 1951 Brada Nathan H. Knorr fu na edekantoro na Brooklyn, kon na Yapan fu a fosi leisi. Sowan 700 sma ben kon na a publikitaki di a ben hori na wan konmakandra presi na Kyoritsu na ini Kanda, Tokio. Ala den sma di ben de na a spesrutu konmakandra disi ben prisiri di A Waktitoren kon na doro na ini Yapantongo. Baka wan mun, Brada Knorr ben kon na Kobe èn na a spesrutu konmakandra di ben hori drape, mi teki dopu fu sori taki mi gi libi abra na Yehovah.

Baka wan yari, mi kisi deki-ati fu go na ini a furuten diniwroko, noso a pionierwroko. Na a pisi ten dati, wan tu pionier nomo ben de na ini Yapan èn mi ben aksi misrefi fa mi ben o sorgu gi den sani di mi abi fanowdu. Mi ben prakseri tu efu mi ben o feni wan sma fu trow. Ma dan mi kon frustan taki a diniwroko gi Yehovah musu de a moro prenspari sani na ini mi libi. Sobun, na ini 1952 mi go na ini a pionierwroko. Koloku mi ben man du a pionierwroko èn na a srefi ten mi ben man wroko gi Sisa Koda.

Na a pisi ten dati, mi ben denki taki mi bigi brada dede na ini a feti, ma dati no ben de so fu di a ben drai kon baka na oso, makandra nanga en osofamiri fu Taiwan. Noiti a famiri fu mi ben wani sabi moro fu a Kresten bribi, ma fu di mi ben de so fayafaya leki pionier meki mi bigin seni tijdschrift nanga pikin buku gi den. Bakaten mi brada froisi kon na Kobe nanga en osofamiri fu di a ben kon wroko drape. Mi aksi a wefi fu mi brada: „Yu ben leisi den tijdschrift?” Mi fruwondru di a piki mi taki: „Den tijdschrift abi moi tori na ini.” A bigin studeri Bijbel nanga wan fu den zendeling èn a pikin sisa fu mi di ben e tan nanga den, ben de makandra nanga en te a studie ben e hori. Baka wan pisi ten den ala tu tron dopu Kresten.

A wánfasi fu ala wi brada nanga sisa naki mi ati

Heri esi, mi ben fruwondru di mi kisi wan kari fu go na a di fu 22 klas fu a Waktitoren Bijbelskoro Gilead. Mi nanga Brada Tsutomu Fukase ben de den fosiwan fu Yapan di kisi a kari fu go na a skoro. Bifo a klas bigin na ini 1953, wi ben man go na a New World Society Assembly di ben hori na a Yankee Stadion na ini New York. A naki mi ati trutru fu si fa a pipel fu Yehovah de na ini wánfasi.

Moro furu fu den Yapansma di ben kisi wan kari fu kon na a kongres, ben de zendeling. Na tapu a di fu feifi dei fu a kongres den ben o weri wan kimono. Mi ben seni a kimono fu mi na fesi nanga boto, ma a no ben doro drape ete, sobun mi leni wan kimono na Sisa Knorr. Di a programa ben hori, dan alen bigin kon èn mi ben broko mi ede taki a kimono ben kan nati. Na a momenti dati, wan sma di ben tanapu na mi baka, poti wan alendyakti safri tapu mi baka. Wan sisa di ben tanapu na mi sei ben aksi: „Yu sabi a sma dati?” Bakaten mi kon yere taki a ben de Brada Frederick W. Franz, wan memre fu a Tiri Skin. Mi firi a lobi fu Yehovah en organisâsi trutru!

Brada nanga sisa fu ala sei fu grontapu ben de na a di fu 22 klas fu Gilead. Na a klas dati 120 studenti fu 37 kondre ben de. Aladi a ben muilek son leisi fu taki nanga makandra fu di den studenti ben e taki difrenti tongo, toku wi ben prisiri trutru fu a wánfasi di ala den brada nanga sisa ben abi. Snew ben fadon tapu a dei di mi klari a skoro na ini februari 1954, èn mi kisi a wroko fu go baka na Yapan. Inger Brandt, wan sisa fu  Sweden di ben de na ini a srefi klas fu mi, ben o wroko makandra nanga mi na ini a foto Nagoya. Drape wi ben wroko makandra nanga wan grupu zendeling di ben gowe fu Korea fu di orloku ben de drape. Den yari di mi ben de na ini a zendelingwroko na tumusi moi yari gi mi.

Mi nanga mi trowpatna e dini Yehovah nanga prisiri

Na ini september 1957 mi kisi a kari fu go dini na Bethel, na ini Tokio. A bijkantoro fu Yapan ben de wan udu oso di ben de tu sodro hei. Fo sma nomo ben de na a bijkantoro. Brada Barry di ben de a bijkantoro opziener ben de wan fu den fo sma disi. Den tra memre fu a Bethelfamiri ben de zendeling. Mi ben kisi a wroko fu vertaal èn fu luku efu den artikel di ben vertaal, ben de krin fu frustan. Boiti dati, mi ben musu krin a presi, wasi krosi, bori, èn go so moro fara.

A wroko na ini Yapan ben e go na fesi èn moro brada ben kisi kari fu kon na Bethel. Wan fu den brada disi ben tron wan opziener na ini a gemeente pe mi ben de. A brada dati nen Junji Koshino èn na ini 1966, mi trow nanga en. Baka di wi trow, Junji ben musu du a kringwroko. A ben de wan prisiri sani fu kon leri sabi so furu brada nanga sisa di wi ben go na den difrenti gemeente. Mi ben abi a wroko ete fu vertaal wan tu sani èn fu dati ede meki mi ben e du mi wroko na a presi pe mi ben e tan a wiki dati. Te wi ben go fu a wan presi go na a trawan, dan boiti taki wi ben musu syow nanga a kofru nanga den tra tas, wi ben musu syow sosrefi nanga den hebi wortubuku.

Wi prisiri na ini a kringwroko di wi ben du fo yari langa èn wi si fa na organisâsi tan gro. A bijkantoro froisi go na Numazu, èn baka 10 yari a froisi go na Ebina èn a de drape te now ete. Mi nanga Junji e prisiri fu dini so langa na Bethel èn now wi e wroko nanga a Bethelfamiri di e teri sowan 600 sma. Na ini mei 2002, den mati fu wi na Bethel hori wan fesa gi mi fu memre taki mi de 50 yari na ini a furuten diniwroko.

Mi e prisiri fu si fa a wroko e go na fesi

Di mi bigin dini Yehovah na ini a yari 1950, dan wan tu preikiman ben de nomo na ini Yapan. Nownow moro leki 210.000 Kownukondre preikiman de. Fu tru, neleki fa a de nanga mi, na so Yehovah hari dusundusun sma di kan teki gersi nanga skapu, fu kon leri sabi en.

Den fo zendeling brada nanga sisa di ben kon na a oso fu Sisa Koda na ini 1949 èn Sisa Maud Koda sosrefi, tan getrow te na dede. Mi brada, di ben de wan dinari ini a diniwroko tan getrow te na dede tu èn sosrefi en wefi di ben de na ini a pionierwroko sowan 15 yari langa. Na ini mi pikin-nengre ten mi ben e frede taki mi papa nanga mama ben sa dede, ma sortu howpu de gi den? A pramisi fu Bijbel di e taki fu wan opobaka e gi mi howpu nanga trowstu.​—Tori fu den Apostel 24:15.

Te mi e prakseri fositen, dan mi e frustan taki wan bigi kenki kon na ini mi libi di mi miti Maud na ini 1941. Efu mi no ben miti en èn efu mi no ben teki a kari fu go wroko gi en baka a feti, dan kande mi ben o libi na a gron na ini a farawe dorpu èn kande mi no ben o miti den zendeling. Mi de Yehovah tangi trutru fu di a hari mi kon na ini a waarheid nanga yepi fu Maud nanga den fosi zendeling!

[Prenki na tapu bladzijde 25]

Nanga Maud Koda nanga en masra. Mi de na fesisei na a kruktu-anusei

[Prenki na tapu bladzijde 27]

Nanga den zendeling fu Yapan na a Yankee Stadion na ini 1953. Mi na a lastiwan na a kruktu-anusei

[Prenki na tapu bladzijde 28]

Nanga mi masra Junji na Bethel